Vālmīki Rāmāyaṇa (critical edition) 3.19

अतः शूर्पणखा घोरा राघवाश्रमम् आगता । रक्षसाम् आचचक्षे तौ भ्रातरौ सह सीतया

ataḥ śūrpaṇakhā ghorā rāghavāśramam āgatā / rakṣasām ācacakṣe tau bhrātarau saha sītayā

Sanskrit only: no published translation is held for this verse.

ते रामं पर्णशालायाम् उपविष्टं महाबलम् । ददृशुः सीतया सार्धं वैदेह्या लक्ष्मणेन च

te rāmaṃ parṇaśālāyām upaviṣṭaṃ mahābalam / dadṛśuḥ sītayā sārdhaṃ vaidehyā lakṣmaṇena ca

Sanskrit only: no published translation is held for this verse.

तान् दृष्ट्वा राघवः श्रीमान् आगतां तां च राक्षसीम् । अब्रवीद् भ्रातरं रामो लक्ष्मणं दीप्ततेजसम्

tān dṛṣṭvā rāghavaḥ śrīmān āgatāṃ tāṃ ca rākṣasīm / abravīd bhrātaraṃ rāmo lakṣmaṇaṃ dīptatejasam

Sanskrit only: no published translation is held for this verse.

मुहूर्तं भव सौमित्रे सीतायाः प्रत्यनन्तरः । इमान् अस्या वधिष्यामि पदवीम् आगतान् इह

muhūrtaṃ bhava saumitre sītāyāḥ pratyanantaraḥ / imān asyā vadhiṣyāmi padavīm āgatān iha

Sanskrit only: no published translation is held for this verse.

वाक्यम् एतत् ततः श्रुत्वा रामस्य विदितात्मनः । तथेति लक्ष्मणो वाक्यं रामस्य प्रत्यपूजयत्

vākyam etat tataḥ śrutvā rāmasya viditātmanaḥ / tatheti lakṣmaṇo vākyaṃ rāmasya pratyapūjayat

Sanskrit only: no published translation is held for this verse.

राघवो ऽपि महच् चापं चामीकरविभूषितम् । चकार सज्यं धर्मात्मा तानि रक्षांसि चाब्रवीत्

rāghavo 'pi mahac cāpaṃ cāmīkaravibhūṣitam / cakāra sajyaṃ dharmātmā tāni rakṣāṃsi cābravīt

Sanskrit only: no published translation is held for this verse.

पुत्रौ दशरथस्यावां भ्रातरौ रामलक्ष्मणौ । प्रविष्टौ सीतया सार्धं दुश्चरं दण्डकावनम्

putrau daśarathasyāvāṃ bhrātarau rāmalakṣmaṇau / praviṣṭau sītayā sārdhaṃ duścaraṃ daṇḍakāvanam

Sanskrit only: no published translation is held for this verse.

फलमूलाशनौ दान्तौ तापसौ धर्मचारिणौ । वसन्तौ दण्डकारण्ये किमर्थम् उपहिंसथ

phalamūlāśanau dāntau tāpasau dharmacāriṇau / vasantau daṇḍakāraṇye kimartham upahiṃsatha

Sanskrit only: no published translation is held for this verse.

युष्मान् पापात्मकान् हन्तुं विप्रकारान् महावने । ऋषीणां तु नियोगेन प्राप्तो ऽहं सशरासनः

yuṣmān pāpātmakān hantuṃ viprakārān mahāvane / ṛṣīṇāṃ tu niyogena prāpto 'haṃ saśarāsanaḥ

Sanskrit only: no published translation is held for this verse.

तिष्ठतैवात्र संतुष्टा नोपसर्पितुम् अर्हथ । यदि प्राणैर् इहार्थो वो निवर्तध्वं निशाचराः

tiṣṭhataivātra saṃtuṣṭā nopasarpitum arhatha / yadi prāṇair ihārtho vo nivartadhvaṃ niśācarāḥ

Sanskrit only: no published translation is held for this verse.

तस्य तद्वचनं श्रुत्वा राक्षसास् ते चतुर्दश । ऊचुर् वाचं सुसंक्रुद्धा ब्रह्मघ्नाः शूलपाणयः

tasya tadvacanaṃ śrutvā rākṣasās te caturdaśa / ūcur vācaṃ susaṃkruddhā brahmaghnāḥ śūlapāṇayaḥ

Sanskrit only: no published translation is held for this verse.

संरक्तनयना घोरा रामं रक्तान्तलोचनम् । परुषामधुराभाषं हृष्टा दृष्टपराक्रमम्

saṃraktanayanā ghorā rāmaṃ raktāntalocanam / paruṣāmadhurābhāṣaṃ hṛṣṭā dṛṣṭaparākramam

Sanskrit only: no published translation is held for this verse.

क्रोधम् उत्पाद्य नो भर्तुः खरस्य सुमहात्मनः । त्वम् एव हास्यसे प्राणान् अद्यास्माभिर् हतो युधि

krodham utpādya no bhartuḥ kharasya sumahātmanaḥ / tvam eva hāsyase prāṇān adyāsmābhir hato yudhi

Sanskrit only: no published translation is held for this verse.

का हि ते शक्तिर् एकस्य बहूनां रणमूर्धनि । अस्माकम् अग्रतः स्थातुं किं पुनर् योद्धुम् आहवे

kā hi te śaktir ekasya bahūnāṃ raṇamūrdhani / asmākam agrataḥ sthātuṃ kiṃ punar yoddhum āhave

Sanskrit only: no published translation is held for this verse.

एभिर् बाहुप्रयुक्तैर् नः परिघैः शूलपट्टिशैः । प्राणांस् त्यक्ष्यसि वीर्यं च धनुश् च करपीडितम्

ebhir bāhuprayuktair naḥ parighaiḥ śūlapaṭṭiśaiḥ / prāṇāṃs tyakṣyasi vīryaṃ ca dhanuś ca karapīḍitam

Sanskrit only: no published translation is held for this verse.

इत्य् एवम् उक्त्वा संरब्धा राक्षसास् ते चतुर्दश । उद्यतायुधनिस्त्रिंशा रामम् एवाभिदुद्रुवुः । चिक्षिपुस् तानि शूलानि राघवं प्रति दुर्जयम्

ity evam uktvā saṃrabdhā rākṣasās te caturdaśa / udyatāyudhanistriṃśā rāmam evābhidudruvuḥ / cikṣipus tāni śūlāni rāghavaṃ prati durjayam

Sanskrit only: no published translation is held for this verse.

तानि शूलानि काकुत्स्थः समस्तानि चतुर्दश । तावद्भिर् एव चिछेद शरैः काञ्चनभूषणैः

tāni śūlāni kākutsthaḥ samastāni caturdaśa / tāvadbhir eva cicheda śaraiḥ kāñcanabhūṣaṇaiḥ

Sanskrit only: no published translation is held for this verse.

ततः पश्चान् महातेजा नाराचान् सूर्यसंनिभान् । जग्राह परमक्रुद्धश् चतुर्दश शिलाशितान्

tataḥ paścān mahātejā nārācān sūryasaṃnibhān / jagrāha paramakruddhaś caturdaśa śilāśitān

Sanskrit only: no published translation is held for this verse.

गृहीत्वा धनुर् आयम्य लक्ष्यान् उद्दिश्य राक्षसान् । मुमोच राघवो बाणान् वज्रान् इव शतक्रतुः

gṛhītvā dhanur āyamya lakṣyān uddiśya rākṣasān / mumoca rāghavo bāṇān vajrān iva śatakratuḥ

Sanskrit only: no published translation is held for this verse.

रुक्मपुङ्खाश् च विशिखाः प्रदीप्ता हेमभूषणाः । अन्तरिक्षे महोल्कानां बभूवुस् तुल्यवर्चसः

rukmapuṅkhāś ca viśikhāḥ pradīptā hemabhūṣaṇāḥ / antarikṣe maholkānāṃ babhūvus tulyavarcasaḥ

Sanskrit only: no published translation is held for this verse.

ते भित्त्वा रक्षसां वेगाद् वक्षांसि रुधिराप्लुताः । विनिष्पेतुस् तदा भूमौ न्यमज्जन्ताशनिस्वनाः

te bhittvā rakṣasāṃ vegād vakṣāṃsi rudhirāplutāḥ / viniṣpetus tadā bhūmau nyamajjantāśanisvanāḥ

Sanskrit only: no published translation is held for this verse.

ते भिन्नहृदया भूमौ छिन्नमूला इव द्रुमाः । निपेतुः शोणितार्द्राङ्गा विकृता विगतासवः

te bhinnahṛdayā bhūmau chinnamūlā iva drumāḥ / nipetuḥ śoṇitārdrāṅgā vikṛtā vigatāsavaḥ

Sanskrit only: no published translation is held for this verse.

तान् भूमौ पतितान् दृष्ट्वा राक्षसी क्रोधमूर्छिता । परित्रस्ता पुनस् तत्र व्यसृजद् भैरवं रवम्

tān bhūmau patitān dṛṣṭvā rākṣasī krodhamūrchitā / paritrastā punas tatra vyasṛjad bhairavaṃ ravam

Sanskrit only: no published translation is held for this verse.

सा नदन्ती महानादं जवाच् छूर्पणखा पुनः । उपगम्य खरं सा तु किंचित् संशुष्कशोणिता । पपात पुनर् एवार्ता सनिर्यासेव वल्लरी

sā nadantī mahānādaṃ javāc chūrpaṇakhā punaḥ / upagamya kharaṃ sā tu kiṃcit saṃśuṣkaśoṇitā / papāta punar evārtā saniryāseva vallarī

Sanskrit only: no published translation is held for this verse.

निपातितान् प्रेक्ष्य रणे तु राक्षसान् प्रधाविता शूर्पणखा पुनस् ततः । वधं च तेषां निखिलेन रक्षसां शशंस सर्वं भगिनी खरस्य सा

nipātitān prekṣya raṇe tu rākṣasān pradhāvitā śūrpaṇakhā punas tataḥ / vadhaṃ ca teṣāṃ nikhilena rakṣasāṃ śaśaṃsa sarvaṃ bhaginī kharasya sā

Sanskrit only: no published translation is held for this verse.