Vālmīki Rāmāyaṇa (critical edition) 3.25

तद् द्रुमाणां शिलानां च वर्षं प्राणहरं महत् । प्रतिजग्राह धर्मात्मा राघवस् तीक्ष्णसायकैः

tad drumāṇāṃ śilānāṃ ca varṣaṃ prāṇaharaṃ mahat / pratijagrāha dharmātmā rāghavas tīkṣṇasāyakaiḥ

Sanskrit only: no published translation is held for this verse.

प्रतिगृह्य च तद् वरं निमीलित इवर्षभः । रामः क्रोधं परं भेजे वधार्थं सर्वरक्षसाम्

pratigṛhya ca tad varaṃ nimīlita ivarṣabhaḥ / rāmaḥ krodhaṃ paraṃ bheje vadhārthaṃ sarvarakṣasām

Sanskrit only: no published translation is held for this verse.

ततः क्रोधसमाविष्टः प्रदीप्त इव तेजसा । शरैर् अभ्यकिरत् सैन्यं सर्वतः सहदूषणम्

tataḥ krodhasamāviṣṭaḥ pradīpta iva tejasā / śarair abhyakirat sainyaṃ sarvataḥ sahadūṣaṇam

Sanskrit only: no published translation is held for this verse.

ततः सेनापतिः क्रुद्धो दूषणः शत्रुदूषणः । जग्राह गिरिशृङ्गाभं परिघं रोमहर्षणम्

tataḥ senāpatiḥ kruddho dūṣaṇaḥ śatrudūṣaṇaḥ / jagrāha giriśṛṅgābhaṃ parighaṃ romaharṣaṇam

Sanskrit only: no published translation is held for this verse.

वेष्टितं काञ्चनैः पट्टैर् देवसैन्याभिमर्दनम् । आयसैः शङ्कुभिस् तीक्ष्णैः कीर्णं परवसोक्षितम्

veṣṭitaṃ kāñcanaiḥ paṭṭair devasainyābhimardanam / āyasaiḥ śaṅkubhis tīkṣṇaiḥ kīrṇaṃ paravasokṣitam

Sanskrit only: no published translation is held for this verse.

वज्राशनिसमस्पर्शं परगोपुरदारणम् । तं महोरगसंकाशं प्रगृह्य परिघं रणे । दूषणो ऽभ्यपतद् रामं क्रूरकर्मा निशाचरः

vajrāśanisamasparśaṃ paragopuradāraṇam / taṃ mahoragasaṃkāśaṃ pragṛhya parighaṃ raṇe / dūṣaṇo 'bhyapatad rāmaṃ krūrakarmā niśācaraḥ

Sanskrit only: no published translation is held for this verse.

तस्याभिपतमानस्य दूषणस्य स राघवः । द्वाभ्यां शराभ्यां चिछेद सहस्ताभरणौ भुजौ

tasyābhipatamānasya dūṣaṇasya sa rāghavaḥ / dvābhyāṃ śarābhyāṃ cicheda sahastābharaṇau bhujau

Sanskrit only: no published translation is held for this verse.

भ्रष्टस् तस्य महाकायः पपात रणमूर्धनि । परिघश् छिन्नहस्तस्य शक्रध्वज इवाग्रतः

bhraṣṭas tasya mahākāyaḥ papāta raṇamūrdhani / parighaś chinnahastasya śakradhvaja ivāgrataḥ

Sanskrit only: no published translation is held for this verse.

स कराभ्यां विकीर्णाभ्यां पपात भुवि दूषणः । विषाणाभ्यां विशीर्णाभ्यां मनस्वीव महागजः

sa karābhyāṃ vikīrṇābhyāṃ papāta bhuvi dūṣaṇaḥ / viṣāṇābhyāṃ viśīrṇābhyāṃ manasvīva mahāgajaḥ

Sanskrit only: no published translation is held for this verse.

दृष्ट्वा तं पतितं भूमौ दूषणं निहतं रणे । साधु साध्व् इति काकुत्स्थं सर्वभूतान्य् अपूजयन्

dṛṣṭvā taṃ patitaṃ bhūmau dūṣaṇaṃ nihataṃ raṇe / sādhu sādhv iti kākutsthaṃ sarvabhūtāny apūjayan

Sanskrit only: no published translation is held for this verse.

एतस्मिन्न् अन्तरे क्रुद्धास् त्रयः सेनाग्रयायिनः । संहत्याभ्यद्रवन् रामं मृत्युपाशावपाशिताः । महाकपालः स्थूलाक्षः प्रमाथी च महाबलः

etasminn antare kruddhās trayaḥ senāgrayāyinaḥ / saṃhatyābhyadravan rāmaṃ mṛtyupāśāvapāśitāḥ / mahākapālaḥ sthūlākṣaḥ pramāthī ca mahābalaḥ

Sanskrit only: no published translation is held for this verse.

महाकपालो विपुलं शूलम् उद्यम्य राक्षसः । स्थूलाक्षः पट्टिशं गृह्य प्रमाथी च परश्वधम्

mahākapālo vipulaṃ śūlam udyamya rākṣasaḥ / sthūlākṣaḥ paṭṭiśaṃ gṛhya pramāthī ca paraśvadham

Sanskrit only: no published translation is held for this verse.

दृष्ट्वैवापततस् तांस् तु राघवः सायकैः शितैः । तीक्ष्णाग्रैः प्रतिजग्राह सम्प्राप्तान् अतिथीन् इव

dṛṣṭvaivāpatatas tāṃs tu rāghavaḥ sāyakaiḥ śitaiḥ / tīkṣṇāgraiḥ pratijagrāha samprāptān atithīn iva

Sanskrit only: no published translation is held for this verse.

महाकपालस्य शिरश् चिछेद रघुनन्दनः । असंख्येयैस् तु बाणौघैः प्रममाथ प्रमाथिनम्

mahākapālasya śiraś cicheda raghunandanaḥ / asaṃkhyeyais tu bāṇaughaiḥ pramamātha pramāthinam

Sanskrit only: no published translation is held for this verse.

स्थूलाक्षस्याक्षिणी तीक्ष्णैः पूरयामास सायकैः । स पपात हतो भूमौ विटपीव महाद्रुमः

sthūlākṣasyākṣiṇī tīkṣṇaiḥ pūrayāmāsa sāyakaiḥ / sa papāta hato bhūmau viṭapīva mahādrumaḥ

Sanskrit only: no published translation is held for this verse.

ततः पावकसंकाशैर् हेमवज्रविभूषितैः । जघनशेषं तेजस्वी तस्य सैन्यस्य सायकैः

tataḥ pāvakasaṃkāśair hemavajravibhūṣitaiḥ / jaghanaśeṣaṃ tejasvī tasya sainyasya sāyakaiḥ

Sanskrit only: no published translation is held for this verse.

ते रुक्मपुङ्खा विशिखाः सधूमा इव पावकाः । निजघ्नुस् तानि रक्षांसि वज्रा इव महाद्रुमान्

te rukmapuṅkhā viśikhāḥ sadhūmā iva pāvakāḥ / nijaghnus tāni rakṣāṃsi vajrā iva mahādrumān

Sanskrit only: no published translation is held for this verse.

रक्षसां तु शतं रामः शतेनैकेन कर्णिना । सहस्रं च सहस्रेण जघान रणमूर्धनि

rakṣasāṃ tu śataṃ rāmaḥ śatenaikena karṇinā / sahasraṃ ca sahasreṇa jaghāna raṇamūrdhani

Sanskrit only: no published translation is held for this verse.

तैर् भिन्नवर्माभरणाश् छिन्नभिन्नशरासनाः । निपेतुः शोणितादिग्धा धरण्यां रजनीचराः

tair bhinnavarmābharaṇāś chinnabhinnaśarāsanāḥ / nipetuḥ śoṇitādigdhā dharaṇyāṃ rajanīcarāḥ

Sanskrit only: no published translation is held for this verse.

तैर् मुक्तकेशैः समरे पतितैः शोणितोक्षितैः । आस्तीर्णा वसुधा कृत्स्ना महावेदिः कुशैर् इव

tair muktakeśaiḥ samare patitaiḥ śoṇitokṣitaiḥ / āstīrṇā vasudhā kṛtsnā mahāvediḥ kuśair iva

Sanskrit only: no published translation is held for this verse.

क्षणेन तु महाघोरं वनं निहतराक्षसम् । बभूव निरयप्रख्यं मांसशोणितकर्दमम्

kṣaṇena tu mahāghoraṃ vanaṃ nihatarākṣasam / babhūva nirayaprakhyaṃ māṃsaśoṇitakardamam

Sanskrit only: no published translation is held for this verse.

चतुर्दश सहस्राणि रक्षसां भीमकर्मणाम् । हतान्य् एकेन रामेण मानुषेण पदातिना

caturdaśa sahasrāṇi rakṣasāṃ bhīmakarmaṇām / hatāny ekena rāmeṇa mānuṣeṇa padātinā

Sanskrit only: no published translation is held for this verse.

तस्य सैन्यस्य सर्वस्य खरः शेषो महारथः । राक्षसस् त्रिशिराश् चैव रामश् च रिपुसूदनः

tasya sainyasya sarvasya kharaḥ śeṣo mahārathaḥ / rākṣasas triśirāś caiva rāmaś ca ripusūdanaḥ

Sanskrit only: no published translation is held for this verse.

ततस् तु तद् भीमबलं महाहवे समीक्ष्य रामेण हतं बलीयसा । रथेन रामं महता खरस् ततः समाससादेन्द्र इवोद्यताशनिः

tatas tu tad bhīmabalaṃ mahāhave samīkṣya rāmeṇa hataṃ balīyasā / rathena rāmaṃ mahatā kharas tataḥ samāsasādendra ivodyatāśaniḥ

Sanskrit only: no published translation is held for this verse.