Vālmīki Rāmāyaṇa (critical edition) 3.26

खरं तु रामाभिमुखं प्रयान्तं वाहिनीपतिः । राक्षसस् त्रिशिरा नाम संनिपत्येदम् अब्रवीत्

kharaṃ tu rāmābhimukhaṃ prayāntaṃ vāhinīpatiḥ / rākṣasas triśirā nāma saṃnipatyedam abravīt

Sanskrit only: no published translation is held for this verse.

मां नियोजय विक्रान्त संनिवर्तस्व साहसात् । पश्य रामं महाबाहुं संयुगे विनिपातितम्

māṃ niyojaya vikrānta saṃnivartasva sāhasāt / paśya rāmaṃ mahābāhuṃ saṃyuge vinipātitam

Sanskrit only: no published translation is held for this verse.

प्रतिजानामि ते सत्यम् आयुधं चाहम् आलभे । यथा रामं वधिष्यामि वधार्हं सर्वरक्षसाम्

pratijānāmi te satyam āyudhaṃ cāham ālabhe / yathā rāmaṃ vadhiṣyāmi vadhārhaṃ sarvarakṣasām

Sanskrit only: no published translation is held for this verse.

अहं वास्य रणे मृत्युर् एष वा समरे मम । विनिवर्त्य रणोत्साहं मुहूर्तं प्राश्निको भव

ahaṃ vāsya raṇe mṛtyur eṣa vā samare mama / vinivartya raṇotsāhaṃ muhūrtaṃ prāśniko bhava

Sanskrit only: no published translation is held for this verse.

प्रहृष्टो वा हते रामे जनस्थानं प्रयास्यसि । मयि वा निहते रामं संयुगायोपयास्यसि

prahṛṣṭo vā hate rāme janasthānaṃ prayāsyasi / mayi vā nihate rāmaṃ saṃyugāyopayāsyasi

Sanskrit only: no published translation is held for this verse.

खरस् त्रिशिरसा तेन मृत्युलोभात् प्रसादितः । गच्छ युध्येत्य् अनुज्ञातो राघवाभिमुखो ययौ

kharas triśirasā tena mṛtyulobhāt prasāditaḥ / gaccha yudhyety anujñāto rāghavābhimukho yayau

Sanskrit only: no published translation is held for this verse.

त्रिशिराश् च रथेनैव वाजियुक्तेन भास्वता । अभ्यद्रवद् रणे रामं त्रिशृङ्ग इव पर्वतः

triśirāś ca rathenaiva vājiyuktena bhāsvatā / abhyadravad raṇe rāmaṃ triśṛṅga iva parvataḥ

Sanskrit only: no published translation is held for this verse.

शरधारासमूहान् स महामेघ इवोत्सृजन् । व्यसृजत् सदृशं नादं जलार्द्रस्येव दुन्दुभेः

śaradhārāsamūhān sa mahāmegha ivotsṛjan / vyasṛjat sadṛśaṃ nādaṃ jalārdrasyeva dundubheḥ

Sanskrit only: no published translation is held for this verse.

आगच्छन्तं त्रिशिरसं राक्षसं प्रेक्ष्य राघवः । धनुषा प्रतिजग्राह विधुन्वन् सायकाञ् शितान्

āgacchantaṃ triśirasaṃ rākṣasaṃ prekṣya rāghavaḥ / dhanuṣā pratijagrāha vidhunvan sāyakāñ śitān

Sanskrit only: no published translation is held for this verse.

स सम्प्रहारस् तुमुलो रामत्रिशिरसोर् महान् । बभूवातीव बलिनोः सिंहकुञ्जरयोर् इव

sa samprahāras tumulo rāmatriśirasor mahān / babhūvātīva balinoḥ siṃhakuñjarayor iva

Sanskrit only: no published translation is held for this verse.

ततस् त्रिशिरसा बाणैर् ललाटे ताडितस् त्रिभिः । अमर्षी कुपितो रामः संरब्धम् इदम् अब्रवीत्

tatas triśirasā bāṇair lalāṭe tāḍitas tribhiḥ / amarṣī kupito rāmaḥ saṃrabdham idam abravīt

Sanskrit only: no published translation is held for this verse.

अहो विक्रमशूरस्य राक्षसस्येदृशं बलम् । पुष्पैर् इव शरैर् यस्य ललाटे ऽस्मि परिक्षतः । ममापि प्रतिगृह्णीष्व शरांश् चापगुणच्युतान्

aho vikramaśūrasya rākṣasasyedṛśaṃ balam / puṣpair iva śarair yasya lalāṭe 'smi parikṣataḥ / mamāpi pratigṛhṇīṣva śarāṃś cāpaguṇacyutān

Sanskrit only: no published translation is held for this verse.

एवम् उक्त्वा तु संरब्धः शरान् आशीविषोपमान् । त्रिशिरोवक्षसि क्रुद्धो निजघान चतुर्दश

evam uktvā tu saṃrabdhaḥ śarān āśīviṣopamān / triśirovakṣasi kruddho nijaghāna caturdaśa

Sanskrit only: no published translation is held for this verse.

चतुर्भिस् तुरगान् अस्य शरैः संनतपर्वभिः । न्यपातयत तेजस्वी चतुरस् तस्य वाजिनः

caturbhis turagān asya śaraiḥ saṃnataparvabhiḥ / nyapātayata tejasvī caturas tasya vājinaḥ

Sanskrit only: no published translation is held for this verse.

अष्टभिः सायकैः सूतं रथोपस्थे न्यपातयत् । रामश् चिछेद बाणेन ध्वजं चास्य समुच्छ्रितम्

aṣṭabhiḥ sāyakaiḥ sūtaṃ rathopasthe nyapātayat / rāmaś cicheda bāṇena dhvajaṃ cāsya samucchritam

Sanskrit only: no published translation is held for this verse.

ततो हतरथात् तस्माद् उत्पतन्तं निशाचरम् । बिभेद रामस् तं बाणैर् हृदये सो ऽभवज् जडः

tato hatarathāt tasmād utpatantaṃ niśācaram / bibheda rāmas taṃ bāṇair hṛdaye so 'bhavaj jaḍaḥ

Sanskrit only: no published translation is held for this verse.

सायकैश् चाप्रमेयात्मा सामर्षस् तस्य रक्षसः । शिरांस्य् अपातयत् त्रीणि वेगवद्भिस् त्रिभिः शतैः

sāyakaiś cāprameyātmā sāmarṣas tasya rakṣasaḥ / śirāṃsy apātayat trīṇi vegavadbhis tribhiḥ śataiḥ

Sanskrit only: no published translation is held for this verse.

स भूमौ शोणितोद्गारी रामबाणाभिपीडितः । न्यपतत् पतितैः पूर्वं स्वशिरोभिर् निशाचरः

sa bhūmau śoṇitodgārī rāmabāṇābhipīḍitaḥ / nyapatat patitaiḥ pūrvaṃ svaśirobhir niśācaraḥ

Sanskrit only: no published translation is held for this verse.

हतशेषास् ततो भग्ना राक्षसाः खरसंश्रयाः । द्रवन्ति स्म न तिष्ठन्ति व्याघ्रत्रस्ता मृगा इव

hataśeṣās tato bhagnā rākṣasāḥ kharasaṃśrayāḥ / dravanti sma na tiṣṭhanti vyāghratrastā mṛgā iva

Sanskrit only: no published translation is held for this verse.

तान् खरो द्रवतो दृष्ट्वा निवर्त्य रुषितः स्वयम् । रामम् एवाभिदुद्राव राहुश् चन्द्रमसं यथा

tān kharo dravato dṛṣṭvā nivartya ruṣitaḥ svayam / rāmam evābhidudrāva rāhuś candramasaṃ yathā

Sanskrit only: no published translation is held for this verse.