Vālmīki Rāmāyaṇa (critical edition) 3.30

ततः शूर्पणखा दृष्ट्वा सहस्राणि चतुर्दश । हतान्य् एकेन रामेण रक्षसां भीमकर्मणाम्

tataḥ śūrpaṇakhā dṛṣṭvā sahasrāṇi caturdaśa / hatāny ekena rāmeṇa rakṣasāṃ bhīmakarmaṇām

Sanskrit only: no published translation is held for this verse.

दूषणं च खरं चैव हतं त्रिशिरसं रणे । दृष्ट्वा पुनर् महानादं ननाद जलदोपमा

dūṣaṇaṃ ca kharaṃ caiva hataṃ triśirasaṃ raṇe / dṛṣṭvā punar mahānādaṃ nanāda jaladopamā

Sanskrit only: no published translation is held for this verse.

सा दृष्ट्वा कर्म रामस्य कृतम् अन्यैः सुदुष्करम् । जगाम परमोद्विग्ना लङ्कां रावणपालिताम्

sā dṛṣṭvā karma rāmasya kṛtam anyaiḥ suduṣkaram / jagāma paramodvignā laṅkāṃ rāvaṇapālitām

Sanskrit only: no published translation is held for this verse.

सा ददर्श विमानाग्रे रावणं दीप्ततेजसम् । उपोपविष्टं सचिवैर् मरुद्भिर् इव वासवम्

sā dadarśa vimānāgre rāvaṇaṃ dīptatejasam / upopaviṣṭaṃ sacivair marudbhir iva vāsavam

Sanskrit only: no published translation is held for this verse.

आसीनं सूर्यसंकाशे काञ्चने परमासने । रुक्मवेदिगतं प्राज्यं ज्वलन्तम् इव पावकम्

āsīnaṃ sūryasaṃkāśe kāñcane paramāsane / rukmavedigataṃ prājyaṃ jvalantam iva pāvakam

Sanskrit only: no published translation is held for this verse.

देवगन्धर्वभूतानाम् ऋषीणां च महात्मनाम् । अजेयं समरे शूरं व्यात्ताननम् इवान्तकम्

devagandharvabhūtānām ṛṣīṇāṃ ca mahātmanām / ajeyaṃ samare śūraṃ vyāttānanam ivāntakam

Sanskrit only: no published translation is held for this verse.

देवासुरविमर्देषु वज्राशनिकृतव्रणम् । ऐरावतविषाणाग्रैर् उत्कृष्टकिणवक्षसम्

devāsuravimardeṣu vajrāśanikṛtavraṇam / airāvataviṣāṇāgrair utkṛṣṭakiṇavakṣasam

Sanskrit only: no published translation is held for this verse.

विंशद्भुजं दशग्रीवं दर्शनीयपरिच्छदम् । विशालवक्षसं वीरं राजलक्ष्मणलक्षितम्

viṃśadbhujaṃ daśagrīvaṃ darśanīyaparicchadam / viśālavakṣasaṃ vīraṃ rājalakṣmaṇalakṣitam

Sanskrit only: no published translation is held for this verse.

स्निग्धवैडूर्यसंकाशं तप्तकाञ्चनकुण्डलम् । सुभुजं शुक्लदशनं महास्यं पर्वतोपमम्

snigdhavaiḍūryasaṃkāśaṃ taptakāñcanakuṇḍalam / subhujaṃ śukladaśanaṃ mahāsyaṃ parvatopamam

Sanskrit only: no published translation is held for this verse.

विष्णुचक्रनिपातैश् च शतशो देवसंयुगे । आहताङ्गं समस्तैश् च देवप्रहरणैस् तथा

viṣṇucakranipātaiś ca śataśo devasaṃyuge / āhatāṅgaṃ samastaiś ca devapraharaṇais tathā

Sanskrit only: no published translation is held for this verse.

अक्षोभ्याणां समुद्राणां क्षोभणं क्षिप्रकारिणम् । क्षेप्तारं पर्वताग्राणां सुराणां च प्रमर्दनम्

akṣobhyāṇāṃ samudrāṇāṃ kṣobhaṇaṃ kṣiprakāriṇam / kṣeptāraṃ parvatāgrāṇāṃ surāṇāṃ ca pramardanam

Sanskrit only: no published translation is held for this verse.

उच्छेत्तारं च धर्माणां परदाराभिमर्शनम् । सर्वदिव्यास्त्रयोक्तारं यज्ञविघ्नकरं सदा

ucchettāraṃ ca dharmāṇāṃ paradārābhimarśanam / sarvadivyāstrayoktāraṃ yajñavighnakaraṃ sadā

Sanskrit only: no published translation is held for this verse.

पुरीं भोगवतीं गत्वा पराजित्य च वासुकिम् । तक्षकस्य प्रियां भार्यां पराजित्य जहार यः

purīṃ bhogavatīṃ gatvā parājitya ca vāsukim / takṣakasya priyāṃ bhāryāṃ parājitya jahāra yaḥ

Sanskrit only: no published translation is held for this verse.

कैलासं पर्वतं गत्वा विजित्य नरवाहनम् । विमानं पुष्पकं तस्य कामगं वै जहार यः

kailāsaṃ parvataṃ gatvā vijitya naravāhanam / vimānaṃ puṣpakaṃ tasya kāmagaṃ vai jahāra yaḥ

Sanskrit only: no published translation is held for this verse.

वनं चैत्ररथं दिव्यं नलिनीं नन्दनं वनम् । विनाशयति यः क्रोधाद् देवोद्यानानि वीर्यवान्

vanaṃ caitrarathaṃ divyaṃ nalinīṃ nandanaṃ vanam / vināśayati yaḥ krodhād devodyānāni vīryavān

Sanskrit only: no published translation is held for this verse.

चन्द्रसूर्यौ महाभागाव् उत्तिष्ठन्तौ परंतपौ । निवारयति बाहुभ्यां यः शैलशिखरोपमः

candrasūryau mahābhāgāv uttiṣṭhantau paraṃtapau / nivārayati bāhubhyāṃ yaḥ śailaśikharopamaḥ

Sanskrit only: no published translation is held for this verse.

दशवर्षसहस्राणि तपस् तप्त्वा महावने । पुरा स्वयम्भुवे धीरः शिरांस्य् उपजहार यः

daśavarṣasahasrāṇi tapas taptvā mahāvane / purā svayambhuve dhīraḥ śirāṃsy upajahāra yaḥ

Sanskrit only: no published translation is held for this verse.

देवदानवगन्धर्व- पिशाचपतगोरगैः । अभयं यस्य संग्रामे मृत्युतो मानुषाद् ऋते

devadānavagandharva- piśācapatagoragaiḥ / abhayaṃ yasya saṃgrāme mṛtyuto mānuṣād ṛte

Sanskrit only: no published translation is held for this verse.

मन्त्रैर् अभिषुतं पुण्यम् अध्वरेषु द्विजातिभिः । हविर्धानेषु यः सोमम् उपहन्ति महाबलः

mantrair abhiṣutaṃ puṇyam adhvareṣu dvijātibhiḥ / havirdhāneṣu yaḥ somam upahanti mahābalaḥ

Sanskrit only: no published translation is held for this verse.

आप्तयज्ञहरं क्रूरं ब्रह्मघ्नं दुष्टचारिणम् । कर्कशं निरनुक्रोशं प्रजानाम् अहिते रतम् । रावणं सर्वभूतानां सर्वलोकभयावहम्

āptayajñaharaṃ krūraṃ brahmaghnaṃ duṣṭacāriṇam / karkaśaṃ niranukrośaṃ prajānām ahite ratam / rāvaṇaṃ sarvabhūtānāṃ sarvalokabhayāvaham

Sanskrit only: no published translation is held for this verse.

राक्षसी भ्रातरं क्रूरं सा ददर्श महाबलम् । तं दिव्यवस्त्राभरणं दिव्यमाल्योपशोभितम् । राक्षसेन्द्रं महाभागं पौलस्त्यकुलनन्दनम्

rākṣasī bhrātaraṃ krūraṃ sā dadarśa mahābalam / taṃ divyavastrābharaṇaṃ divyamālyopaśobhitam / rākṣasendraṃ mahābhāgaṃ paulastyakulanandanam

Sanskrit only: no published translation is held for this verse.

तम् अब्रवीद् दीप्तविशाललोचनं प्रदर्शयित्वा भयमोहमूर्छिता । सुदारुणं वाक्यम् अभीतचारिणी महात्मना शूर्पणखा विरूपिता

tam abravīd dīptaviśālalocanaṃ pradarśayitvā bhayamohamūrchitā / sudāruṇaṃ vākyam abhītacāriṇī mahātmanā śūrpaṇakhā virūpitā

Sanskrit only: no published translation is held for this verse.