Vālmīki Rāmāyaṇa (critical edition) 3.37

एवम् अस्मि तदा मुक्तः कथंचित् तेन संयुगे । इदानीम् अपि यद् वृत्तं तच् छृणुष्व यद् उत्तरम्

evam asmi tadā muktaḥ kathaṃcit tena saṃyuge / idānīm api yad vṛttaṃ tac chṛṇuṣva yad uttaram

Sanskrit only: no published translation is held for this verse.

राक्षसाभ्याम् अहं द्वाभ्याम् अनिर्विण्णस् तथा कृतः । सहितो मृगरूपाभ्यां प्रविष्टो दण्डकावनम्

rākṣasābhyām ahaṃ dvābhyām anirviṇṇas tathā kṛtaḥ / sahito mṛgarūpābhyāṃ praviṣṭo daṇḍakāvanam

Sanskrit only: no published translation is held for this verse.

दीप्तजिह्वो महाकायस् तीक्ष्णशृङ्गो महाबलः । व्यचरं दण्डकारण्यं मांसभक्षो महामृगः

dīptajihvo mahākāyas tīkṣṇaśṛṅgo mahābalaḥ / vyacaraṃ daṇḍakāraṇyaṃ māṃsabhakṣo mahāmṛgaḥ

Sanskrit only: no published translation is held for this verse.

अग्निहोत्रेषु तीर्थेषु चैत्यवृक्षेषु रावण । अत्यन्तघोरो व्यचरं तापसांस् तान् प्रधर्षयन्

agnihotreṣu tīrtheṣu caityavṛkṣeṣu rāvaṇa / atyantaghoro vyacaraṃ tāpasāṃs tān pradharṣayan

Sanskrit only: no published translation is held for this verse.

निहत्य दण्डकारण्ये तापसान् धर्मचारिणः । रुधिराणि पिबंस् तेषां तथा मांसानि भक्षयन्

nihatya daṇḍakāraṇye tāpasān dharmacāriṇaḥ / rudhirāṇi pibaṃs teṣāṃ tathā māṃsāni bhakṣayan

Sanskrit only: no published translation is held for this verse.

ऋषिमांसाशनः क्रूरस् त्रासयन् वनगोचरान् । तदा रुधिरमत्तो ऽहं व्यचरं दण्डकावनम्

ṛṣimāṃsāśanaḥ krūras trāsayan vanagocarān / tadā rudhiramatto 'haṃ vyacaraṃ daṇḍakāvanam

Sanskrit only: no published translation is held for this verse.

तदाहं दण्डकारण्ये विचरन् धर्मदूषकः । आसादयं तदा रामं तापसं धर्मम् आश्रितम्

tadāhaṃ daṇḍakāraṇye vicaran dharmadūṣakaḥ / āsādayaṃ tadā rāmaṃ tāpasaṃ dharmam āśritam

Sanskrit only: no published translation is held for this verse.

वैदेहीं च महाभागां लक्ष्मणं च महारथम् । तापसं नियताहारं सर्वभूतहिते रतम्

vaidehīṃ ca mahābhāgāṃ lakṣmaṇaṃ ca mahāratham / tāpasaṃ niyatāhāraṃ sarvabhūtahite ratam

Sanskrit only: no published translation is held for this verse.

सो ऽहं वनगतं रामं परिभूय महाबलम् । तापसो ऽयम् इति ज्ञात्वा पूर्ववैरम् अनुस्मरन्

so 'haṃ vanagataṃ rāmaṃ paribhūya mahābalam / tāpaso 'yam iti jñātvā pūrvavairam anusmaran

Sanskrit only: no published translation is held for this verse.

अभ्यधावं सुसंक्रुद्धस् तीक्ष्णशृङ्गो मृगाकृतिः । जिघांसुर् अकृतप्रज्ञस् तं प्रहारम् अनुस्मरन्

abhyadhāvaṃ susaṃkruddhas tīkṣṇaśṛṅgo mṛgākṛtiḥ / jighāṃsur akṛtaprajñas taṃ prahāram anusmaran

Sanskrit only: no published translation is held for this verse.

तेन मुक्तास् त्रयो बाणाः शिताः शत्रुनिबर्हणाः । विकृष्य बलवच् चापं सुपर्णानिलतुल्यगाः

tena muktās trayo bāṇāḥ śitāḥ śatrunibarhaṇāḥ / vikṛṣya balavac cāpaṃ suparṇānilatulyagāḥ

Sanskrit only: no published translation is held for this verse.

ते बाणा वज्रसंकाशाः सुघोरा रक्तभोजनाः । आजग्मुः सहिताः सर्वे त्रयः संनतपर्वणः

te bāṇā vajrasaṃkāśāḥ sughorā raktabhojanāḥ / ājagmuḥ sahitāḥ sarve trayaḥ saṃnataparvaṇaḥ

Sanskrit only: no published translation is held for this verse.

पराक्रमज्ञो रामस्य शठो दृष्टभयः पुरा । समुत्क्रान्तस् ततो मुक्तस् ताव् उभौ राक्षसौ हतौ

parākramajño rāmasya śaṭho dṛṣṭabhayaḥ purā / samutkrāntas tato muktas tāv ubhau rākṣasau hatau

Sanskrit only: no published translation is held for this verse.

शरेण मुक्तो रामस्य कथंचित् प्राप्य जीवितम् । इह प्रव्राजितो युक्तस् तापसो ऽहं समाहितः

śareṇa mukto rāmasya kathaṃcit prāpya jīvitam / iha pravrājito yuktas tāpaso 'haṃ samāhitaḥ

Sanskrit only: no published translation is held for this verse.

वृक्षे वृक्षे हि पश्यामि चीरकृष्णाजिनाम्बरम् । गृहीतधनुषं रामं पाशहस्तम् इवान्तकम्

vṛkṣe vṛkṣe hi paśyāmi cīrakṛṣṇājināmbaram / gṛhītadhanuṣaṃ rāmaṃ pāśahastam ivāntakam

Sanskrit only: no published translation is held for this verse.

अपि रामसहस्राणि भीतः पश्यामि रावण । रामभूतम् इदं सर्वम् अरण्यं प्रतिभाति मे

api rāmasahasrāṇi bhītaḥ paśyāmi rāvaṇa / rāmabhūtam idaṃ sarvam araṇyaṃ pratibhāti me

Sanskrit only: no published translation is held for this verse.

रामम् एव हि पश्यामि रहिते राक्षसेश्वर । दृष्ट्वा स्वप्नगतं रामम् उद्भ्रमामि विचेतनः

rāmam eva hi paśyāmi rahite rākṣaseśvara / dṛṣṭvā svapnagataṃ rāmam udbhramāmi vicetanaḥ

Sanskrit only: no published translation is held for this verse.

रकारादीनि नामानि रामत्रस्तस्य रावण । रत्नानि च रथाश् चैव त्रासं संजनयन्ति मे

rakārādīni nāmāni rāmatrastasya rāvaṇa / ratnāni ca rathāś caiva trāsaṃ saṃjanayanti me

Sanskrit only: no published translation is held for this verse.

अहं तस्य प्रभावज्ञो न युद्धं तेन ते क्षमम् । रणे रामेण युध्यस्व क्षमां वा कुरु राक्षस । न ते रामकथा कार्या यदि मां द्रष्टुम् इच्छसि

ahaṃ tasya prabhāvajño na yuddhaṃ tena te kṣamam / raṇe rāmeṇa yudhyasva kṣamāṃ vā kuru rākṣasa / na te rāmakathā kāryā yadi māṃ draṣṭum icchasi

Sanskrit only: no published translation is held for this verse.

इदं वचो बन्धुहितार्थिना मया यथोच्यमानं यदि नाभिपत्स्यसे । सबान्धवस् त्यक्ष्यसि जीवितं रणे हतो ऽद्य रामेण शरैर् अजिह्मगैः

idaṃ vaco bandhuhitārthinā mayā yathocyamānaṃ yadi nābhipatsyase / sabāndhavas tyakṣyasi jīvitaṃ raṇe hato 'dya rāmeṇa śarair ajihmagaiḥ

Sanskrit only: no published translation is held for this verse.