Vālmīki Rāmāyaṇa (critical edition) 3.39

आज्ञप्तो राजवद् वाक्यं प्रतिकूलं निशाचरः । अब्रवीत् परुषं वाक्यं मारीचो राक्षसाधिपम्

ājñapto rājavad vākyaṃ pratikūlaṃ niśācaraḥ / abravīt paruṣaṃ vākyaṃ mārīco rākṣasādhipam

Sanskrit only: no published translation is held for this verse.

केनायम् उपदिष्टस् ते विनाशः पापकर्मणा । सपुत्रस्य सराष्ट्रस्य सामात्यस्य निशाचर

kenāyam upadiṣṭas te vināśaḥ pāpakarmaṇā / saputrasya sarāṣṭrasya sāmātyasya niśācara

Sanskrit only: no published translation is held for this verse.

कस् त्वया सुखिना राजन् नाभिनन्दति पापकृत् । केनेदम् उपदिष्टं ते मृत्युद्वारम् उपायतः

kas tvayā sukhinā rājan nābhinandati pāpakṛt / kenedam upadiṣṭaṃ te mṛtyudvāram upāyataḥ

Sanskrit only: no published translation is held for this verse.

शत्रवस् तव सुव्यक्तं हीनवीर्या निशाचर । इच्छन्ति त्वां विनश्यन्तम् उपरुद्धं बलीयसा

śatravas tava suvyaktaṃ hīnavīryā niśācara / icchanti tvāṃ vinaśyantam uparuddhaṃ balīyasā

Sanskrit only: no published translation is held for this verse.

केनेदम् उपदिष्टं ते क्षुद्रेणाहितवादिना । यस् त्वाम् इच्छति नश्यन्तं स्वकृतेन निशाचर

kenedam upadiṣṭaṃ te kṣudreṇāhitavādinā / yas tvām icchati naśyantaṃ svakṛtena niśācara

Sanskrit only: no published translation is held for this verse.

वध्याः खलु न हन्यन्ते सचिवास् तव रावण । ये त्वाम् उत्पथम् आरूढं न निगृह्णन्ति सर्वशः

vadhyāḥ khalu na hanyante sacivās tava rāvaṇa / ye tvām utpatham ārūḍhaṃ na nigṛhṇanti sarvaśaḥ

Sanskrit only: no published translation is held for this verse.

अमात्यैः कामवृत्तो हि राजा कापथम् आश्रितः । निग्राह्यः सर्वथा सद्भिर् न निग्राह्यो निगृह्यसे

amātyaiḥ kāmavṛtto hi rājā kāpatham āśritaḥ / nigrāhyaḥ sarvathā sadbhir na nigrāhyo nigṛhyase

Sanskrit only: no published translation is held for this verse.

धर्मम् अर्थं च कामं च यशश् च जयतां वर । स्वामिप्रसादात् सचिवाः प्राप्नुवन्ति निशाचर

dharmam arthaṃ ca kāmaṃ ca yaśaś ca jayatāṃ vara / svāmiprasādāt sacivāḥ prāpnuvanti niśācara

Sanskrit only: no published translation is held for this verse.

विपर्यये तु तत् सर्वं व्यर्थं भवति रावण । व्यसनं स्वामिवैगुण्यात् प्राप्नुवन्तीतरे जनाः

viparyaye tu tat sarvaṃ vyarthaṃ bhavati rāvaṇa / vyasanaṃ svāmivaiguṇyāt prāpnuvantītare janāḥ

Sanskrit only: no published translation is held for this verse.

राजमूलो हि धर्मश् च जयश् च जयतां वर । तस्मात् सर्वास्व् अवस्थासु रक्षितव्यो नराधिपः

rājamūlo hi dharmaś ca jayaś ca jayatāṃ vara / tasmāt sarvāsv avasthāsu rakṣitavyo narādhipaḥ

Sanskrit only: no published translation is held for this verse.

राज्यं पालयितुं शक्यं न तीक्ष्णेन निशाचर । न चापि प्रतिकूलेन नाविनीतेन राक्षस

rājyaṃ pālayituṃ śakyaṃ na tīkṣṇena niśācara / na cāpi pratikūlena nāvinītena rākṣasa

Sanskrit only: no published translation is held for this verse.

ये तीक्ष्णमन्त्राः सचिवा भज्यन्ते सह तेन वै । विषमेषु रथाः शीघ्रं मन्दसारथयो यथा

ye tīkṣṇamantrāḥ sacivā bhajyante saha tena vai / viṣameṣu rathāḥ śīghraṃ mandasārathayo yathā

Sanskrit only: no published translation is held for this verse.

बहवः साधवो लोके युक्तधर्मम् अनुष्ठिताः । परेषाम् अपराधेन विनष्टाः सपरिच्छदाः

bahavaḥ sādhavo loke yuktadharmam anuṣṭhitāḥ / pareṣām aparādhena vinaṣṭāḥ saparicchadāḥ

Sanskrit only: no published translation is held for this verse.

स्वामिना प्रतिकूलेन प्रजास् तीक्ष्णेन रावण । रक्ष्यमाणा न वर्धन्ते मेषा गोमायुना यथा

svāminā pratikūlena prajās tīkṣṇena rāvaṇa / rakṣyamāṇā na vardhante meṣā gomāyunā yathā

Sanskrit only: no published translation is held for this verse.

अवश्यं विनशिष्यन्ति सर्वे रावण राक्षसाः । येषां त्वं कर्कशो राजा दुर्बुद्धिर् अजितेन्द्रियः

avaśyaṃ vinaśiṣyanti sarve rāvaṇa rākṣasāḥ / yeṣāṃ tvaṃ karkaśo rājā durbuddhir ajitendriyaḥ

Sanskrit only: no published translation is held for this verse.

तद् इदं काकतालीयं घोरम् आसादितं त्वया । अत्र किं शोभनं यत् त्वं ससैन्यो विनशिष्यसि

tad idaṃ kākatālīyaṃ ghoram āsāditaṃ tvayā / atra kiṃ śobhanaṃ yat tvaṃ sasainyo vinaśiṣyasi

Sanskrit only: no published translation is held for this verse.

मां निहत्य तु रामो ऽसौ नचिरात् त्वां वधिष्यति । अनेन कृतकृत्यो ऽस्मि म्रिये यद् अरिणा हतः

māṃ nihatya tu rāmo 'sau nacirāt tvāṃ vadhiṣyati / anena kṛtakṛtyo 'smi mriye yad ariṇā hataḥ

Sanskrit only: no published translation is held for this verse.

दर्शनाद् एव रामस्य हतं माम् उपधारय । आत्मानं च हतं विद्धि हृत्वा सीतां सबान्धवम्

darśanād eva rāmasya hataṃ mām upadhāraya / ātmānaṃ ca hataṃ viddhi hṛtvā sītāṃ sabāndhavam

Sanskrit only: no published translation is held for this verse.

आनयिष्यामि चेत् सीताम् आश्रमात् सहितो मया । नैव त्वम् असि नैवाहं नैव लङ्का न राक्षसाः

ānayiṣyāmi cet sītām āśramāt sahito mayā / naiva tvam asi naivāhaṃ naiva laṅkā na rākṣasāḥ

Sanskrit only: no published translation is held for this verse.

निवार्यमाणस् तु मया हितैषिणा न मृष्यसे वाक्यम् इदं निशाचर । परेतकल्पा हि गतायुषो नरा हितं न गृह्णन्ति सुहृद्भिर् ईरितम्

nivāryamāṇas tu mayā hitaiṣiṇā na mṛṣyase vākyam idaṃ niśācara / paretakalpā hi gatāyuṣo narā hitaṃ na gṛhṇanti suhṛdbhir īritam

Sanskrit only: no published translation is held for this verse.