Vālmīki Rāmāyaṇa (critical edition) 3.42

तथा तु तं समादिश्य भ्रातरं रघुनन्दनः । बबन्धासिं महातेजा जाम्बूनदमयत्सरुम्

tathā tu taṃ samādiśya bhrātaraṃ raghunandanaḥ / babandhāsiṃ mahātejā jāmbūnadamayatsarum

Sanskrit only: no published translation is held for this verse.

ततस् त्र्यवनतं चापम् आदायात्मविभूषणम् । आबध्य च कलापौ द्वौ जगामोदग्रविक्रमः

tatas tryavanataṃ cāpam ādāyātmavibhūṣaṇam / ābadhya ca kalāpau dvau jagāmodagravikramaḥ

Sanskrit only: no published translation is held for this verse.

तं वञ्चयानो राजेन्द्रम् आपतन्तं निरीक्ष्य वै । बभूवान्तर्हितस् त्रासात् पुनः संदर्शने ऽभवत्

taṃ vañcayāno rājendram āpatantaṃ nirīkṣya vai / babhūvāntarhitas trāsāt punaḥ saṃdarśane 'bhavat

Sanskrit only: no published translation is held for this verse.

बद्धासिर् धनुर् आदाय प्रदुद्राव यतो मृगः । तं स पश्यति रूपेण द्योतमानम् इवाग्रतः

baddhāsir dhanur ādāya pradudrāva yato mṛgaḥ / taṃ sa paśyati rūpeṇa dyotamānam ivāgrataḥ

Sanskrit only: no published translation is held for this verse.

अवेक्ष्यावेक्ष्य धावन्तं धनुष्पाणिर् महावने । अतिवृत्तम् इषोः पाताल् लोभयानं कदाचन

avekṣyāvekṣya dhāvantaṃ dhanuṣpāṇir mahāvane / ativṛttam iṣoḥ pātāl lobhayānaṃ kadācana

Sanskrit only: no published translation is held for this verse.

शङ्कितं तु समुद्भ्रान्तम् उत्पतन्तम् इवाम्बरे । दश्यमानम् अदृश्यं च नवोद्देशेषु केषुचित्

śaṅkitaṃ tu samudbhrāntam utpatantam ivāmbare / daśyamānam adṛśyaṃ ca navoddeśeṣu keṣucit

Sanskrit only: no published translation is held for this verse.

छिन्नाभ्रैर् इव संवीतं शारदं चन्द्रमण्डलम् । मुहूर्ताद् एव ददृशे मुहुर् दूरात् प्रकाशते

chinnābhrair iva saṃvītaṃ śāradaṃ candramaṇḍalam / muhūrtād eva dadṛśe muhur dūrāt prakāśate

Sanskrit only: no published translation is held for this verse.

दर्शनादर्शनेनैव सो ऽपाकर्षत राघवम् । आसीत् क्रुद्धस् तु काकुत्स्थो विवशस् तेन मोहितः

darśanādarśanenaiva so 'pākarṣata rāghavam / āsīt kruddhas tu kākutstho vivaśas tena mohitaḥ

Sanskrit only: no published translation is held for this verse.

अथावतस्थे सुश्रान्तश् छायाम् आश्रित्य शाद्वले । मृगैः परिवृतो वन्यैर् अदूरात् प्रत्यदृश्यत

athāvatasthe suśrāntaś chāyām āśritya śādvale / mṛgaiḥ parivṛto vanyair adūrāt pratyadṛśyata

Sanskrit only: no published translation is held for this verse.

दृष्ट्वा रामो महातेजास् तं हन्तुं कृतनिश्चयः । संधाय सुदृढे चापे विकृष्य बलवद् बली

dṛṣṭvā rāmo mahātejās taṃ hantuṃ kṛtaniścayaḥ / saṃdhāya sudṛḍhe cāpe vikṛṣya balavad balī

Sanskrit only: no published translation is held for this verse.

तम् एव मृगम् उद्दिश्य ज्वलन्तम् इव पन्नगम् । मुमोच ज्वलितं दीप्तम् अस्त्रब्रह्मविनिर्मितम्

tam eva mṛgam uddiśya jvalantam iva pannagam / mumoca jvalitaṃ dīptam astrabrahmavinirmitam

Sanskrit only: no published translation is held for this verse.

स भृशं मृगरूपस्य विनिर्भिद्य शरोत्तमः । मारीचस्यैव हृदयं विभेदाशनिसंनिभः

sa bhṛśaṃ mṛgarūpasya vinirbhidya śarottamaḥ / mārīcasyaiva hṛdayaṃ vibhedāśanisaṃnibhaḥ

Sanskrit only: no published translation is held for this verse.

तालमात्रम् अथोत्पत्य न्यपतत् स शरातुरः । व्यनदद् भैरवं नादं धरण्याम् अल्पजीवितः । म्रियमाणस् तु मारीचो जहौ तां कृत्रिमां तनुम्

tālamātram athotpatya nyapatat sa śarāturaḥ / vyanadad bhairavaṃ nādaṃ dharaṇyām alpajīvitaḥ / mriyamāṇas tu mārīco jahau tāṃ kṛtrimāṃ tanum

Sanskrit only: no published translation is held for this verse.

सम्प्राप्तकालम् आज्ञाय चकार च ततः स्वरम् । सदृशं राघवस्यैव हा सीते लक्ष्मणेति च

samprāptakālam ājñāya cakāra ca tataḥ svaram / sadṛśaṃ rāghavasyaiva hā sīte lakṣmaṇeti ca

Sanskrit only: no published translation is held for this verse.

तेन मर्मणि निर्विद्धः शरेणानुपमेन हि । मृगरूपं तु तत् त्यक्त्वा राक्षसं रूपम् आत्मनः । चक्रे स सुमहाकायो मारीचो जीवितं त्यजन्

tena marmaṇi nirviddhaḥ śareṇānupamena hi / mṛgarūpaṃ tu tat tyaktvā rākṣasaṃ rūpam ātmanaḥ / cakre sa sumahākāyo mārīco jīvitaṃ tyajan

Sanskrit only: no published translation is held for this verse.

ततो विचित्रकेयूरः सर्वाभरणभूषितः । हेममाली महादंष्ट्रो राक्षसो ऽभूच् छराहतः

tato vicitrakeyūraḥ sarvābharaṇabhūṣitaḥ / hemamālī mahādaṃṣṭro rākṣaso 'bhūc charāhataḥ

Sanskrit only: no published translation is held for this verse.

तं दृष्ट्वा पतितं भूमौ राक्षसं घोरदर्शनम् । जगाम मनसा सीतां लक्ष्मणस्य वचः स्मरन्

taṃ dṛṣṭvā patitaṃ bhūmau rākṣasaṃ ghoradarśanam / jagāma manasā sītāṃ lakṣmaṇasya vacaḥ smaran

Sanskrit only: no published translation is held for this verse.

हा सीते लक्ष्मणेत्य् एवम् आक्रुश्य तु महास्वरम् । ममार राक्षसः सो ऽयं श्रुत्वा सीता कथं भवेत्

hā sīte lakṣmaṇety evam ākruśya tu mahāsvaram / mamāra rākṣasaḥ so 'yaṃ śrutvā sītā kathaṃ bhavet

Sanskrit only: no published translation is held for this verse.

लक्ष्मणश् च महाबाहुः काम् अवस्थां गमिष्यति । इति संचिन्त्य धर्मात्मा रामो हृष्टतनूरुहः

lakṣmaṇaś ca mahābāhuḥ kām avasthāṃ gamiṣyati / iti saṃcintya dharmātmā rāmo hṛṣṭatanūruhaḥ

Sanskrit only: no published translation is held for this verse.

तत्र रामं भयं तीव्रम् आविवेश विषादजम् । राक्षसं मृगरूपं तं हत्वा श्रुत्वा च तत्स्वरम्

tatra rāmaṃ bhayaṃ tīvram āviveśa viṣādajam / rākṣasaṃ mṛgarūpaṃ taṃ hatvā śrutvā ca tatsvaram

Sanskrit only: no published translation is held for this verse.

निहत्य पृषतं चान्यं मांसम् आदाय राघवः । त्वरमाणो जनस्थानं ससाराभिमुखस् तदा

nihatya pṛṣataṃ cānyaṃ māṃsam ādāya rāghavaḥ / tvaramāṇo janasthānaṃ sasārābhimukhas tadā

Sanskrit only: no published translation is held for this verse.