Vālmīki Rāmāyaṇa (critical edition) 3.46

एवं ब्रुवत्यां सीतायां संरब्धः परुषाक्षरम् । ललाटे भ्रुकुटीं कृत्वा रावणः प्रत्युवाच ह

evaṃ bruvatyāṃ sītāyāṃ saṃrabdhaḥ paruṣākṣaram / lalāṭe bhrukuṭīṃ kṛtvā rāvaṇaḥ pratyuvāca ha

Sanskrit only: no published translation is held for this verse.

भ्राता वैश्रवणस्याहं सापत्न्यो वरवर्णिनि । रावणो नाम भद्रं ते दशग्रीवः प्रतापवान्

bhrātā vaiśravaṇasyāhaṃ sāpatnyo varavarṇini / rāvaṇo nāma bhadraṃ te daśagrīvaḥ pratāpavān

Sanskrit only: no published translation is held for this verse.

यस्य देवाः सगन्धर्वाः पिशाचपतगोरगाः । विद्रवन्ति भयाद् भीता मृत्योर् इव सदा प्रजाः

yasya devāḥ sagandharvāḥ piśācapatagoragāḥ / vidravanti bhayād bhītā mṛtyor iva sadā prajāḥ

Sanskrit only: no published translation is held for this verse.

येन वैश्रवणो भ्राता वैमात्रः कारणान्तरे । द्वंद्वम् आसादितः क्रोधाद् रणे विक्रम्य निर्जितः

yena vaiśravaṇo bhrātā vaimātraḥ kāraṇāntare / dvaṃdvam āsāditaḥ krodhād raṇe vikramya nirjitaḥ

Sanskrit only: no published translation is held for this verse.

मद्भयार्तः परित्यज्य स्वम् अधिष्ठानम् ऋद्धिमत् । कैलासं पर्वतश्रेष्ठम् अध्यास्ते नरवाहनः

madbhayārtaḥ parityajya svam adhiṣṭhānam ṛddhimat / kailāsaṃ parvataśreṣṭham adhyāste naravāhanaḥ

Sanskrit only: no published translation is held for this verse.

यस्य तत् पुष्पकं नाम विमानं कामगं शुभम् । वीर्याद् आवर्जितं भद्रे येन यामि विहायसम्

yasya tat puṣpakaṃ nāma vimānaṃ kāmagaṃ śubham / vīryād āvarjitaṃ bhadre yena yāmi vihāyasam

Sanskrit only: no published translation is held for this verse.

मम संजातरोषस्य मुखं दृष्ट्वैव मैथिलि । विद्रवन्ति परित्रस्ताः सुराः शक्रपुरोगमाः

mama saṃjātaroṣasya mukhaṃ dṛṣṭvaiva maithili / vidravanti paritrastāḥ surāḥ śakrapurogamāḥ

Sanskrit only: no published translation is held for this verse.

यत्र तिष्ठाम्य् अहं तत्र मारुतो वाति शङ्कितः । तीव्रांशुः शिशिरांशुश् च भयात् सम्पद्यते रविः

yatra tiṣṭhāmy ahaṃ tatra māruto vāti śaṅkitaḥ / tīvrāṃśuḥ śiśirāṃśuś ca bhayāt sampadyate raviḥ

Sanskrit only: no published translation is held for this verse.

निष्कम्पपत्त्रास् तरवो नद्यश् च स्तिमितोदकाः । भवन्ति यत्र यत्राहं तिष्ठामि च चरामि च

niṣkampapattrās taravo nadyaś ca stimitodakāḥ / bhavanti yatra yatrāhaṃ tiṣṭhāmi ca carāmi ca

Sanskrit only: no published translation is held for this verse.

मम पारे समुद्रस्य लङ्का नाम पुरी शुभा । सम्पूर्णा राक्षसैर् घोरैर् यथेन्द्रस्यामरावती

mama pāre samudrasya laṅkā nāma purī śubhā / sampūrṇā rākṣasair ghorair yathendrasyāmarāvatī

Sanskrit only: no published translation is held for this verse.

प्राकारेण परिक्षिप्ता पाण्डुरेण विराजिता । हेमकक्ष्या पुरी रम्या वैडूर्यमयतोरणा

prākāreṇa parikṣiptā pāṇḍureṇa virājitā / hemakakṣyā purī ramyā vaiḍūryamayatoraṇā

Sanskrit only: no published translation is held for this verse.

हस्त्यश्वरथसम्बाधा तूर्यनादविनादिता । सर्वकामफलैर् वृक्षैः संकुलोद्यानशोभिता

hastyaśvarathasambādhā tūryanādavināditā / sarvakāmaphalair vṛkṣaiḥ saṃkulodyānaśobhitā

Sanskrit only: no published translation is held for this verse.

तत्र त्वं वसती सीते राजपुत्रि मया सह । न स्मरिष्यसि नारीणां मानुषीणां मनस्विनि

tatra tvaṃ vasatī sīte rājaputri mayā saha / na smariṣyasi nārīṇāṃ mānuṣīṇāṃ manasvini

Sanskrit only: no published translation is held for this verse.

भुञ्जाना मानुषान् भोगान् दिव्यांश् च वरवर्णिनि । न स्मरिष्यसि रामस्य मानुषस्य गतायुषः

bhuñjānā mānuṣān bhogān divyāṃś ca varavarṇini / na smariṣyasi rāmasya mānuṣasya gatāyuṣaḥ

Sanskrit only: no published translation is held for this verse.

स्थापयित्वा प्रियं पुत्रं राज्ञा दशरथेन यः । मन्दवीर्यः सुतो ज्येष्ठस् ततः प्रस्थापितो वनम्

sthāpayitvā priyaṃ putraṃ rājñā daśarathena yaḥ / mandavīryaḥ suto jyeṣṭhas tataḥ prasthāpito vanam

Sanskrit only: no published translation is held for this verse.

तेन किं भ्रष्टराज्येन रामेण गतचेतसा । करिष्यसि विशालाक्षि तापसेन तपस्विना

tena kiṃ bhraṣṭarājyena rāmeṇa gatacetasā / kariṣyasi viśālākṣi tāpasena tapasvinā

Sanskrit only: no published translation is held for this verse.

सर्वराक्षसभर्तारं कामात् स्वयम् इहागतम् । न मन्मथशराविष्टं प्रत्याख्यातुं त्वम् अर्हसि

sarvarākṣasabhartāraṃ kāmāt svayam ihāgatam / na manmathaśarāviṣṭaṃ pratyākhyātuṃ tvam arhasi

Sanskrit only: no published translation is held for this verse.

प्रत्याख्याय हि मां भीरु- परितापं गमिष्यसि । चरणेनाभिहत्येव पुरूरवसम् उर्वशी

pratyākhyāya hi māṃ bhīru- paritāpaṃ gamiṣyasi / caraṇenābhihatyeva purūravasam urvaśī

Sanskrit only: no published translation is held for this verse.

एवम् उक्ता तु वैदेही क्रुद्धा संरक्तलोचना । अब्रवीत् परुषं वाक्यं रहिते राक्षसाधिपम्

evam uktā tu vaidehī kruddhā saṃraktalocanā / abravīt paruṣaṃ vākyaṃ rahite rākṣasādhipam

Sanskrit only: no published translation is held for this verse.

कथं वैश्रवणं देवं सर्वभूतनमस्कृतम् । भ्रातरं व्यपदिश्य त्वम् अशुभं कर्तुम् इच्छसि

kathaṃ vaiśravaṇaṃ devaṃ sarvabhūtanamaskṛtam / bhrātaraṃ vyapadiśya tvam aśubhaṃ kartum icchasi

Sanskrit only: no published translation is held for this verse.

अवश्यं विनशिष्यन्ति सर्वे रावण राक्षसाः । येषां त्वं कर्कशो राजा दुर्बुद्धिर् अजितेन्द्रियः

avaśyaṃ vinaśiṣyanti sarve rāvaṇa rākṣasāḥ / yeṣāṃ tvaṃ karkaśo rājā durbuddhir ajitendriyaḥ

Sanskrit only: no published translation is held for this verse.

अपहृत्य शचीं भार्यां शक्यम् इन्द्रस्य जीवितुम् । न तु रामस्य भार्यां माम् अपनीयास्ति जीवितम्

apahṛtya śacīṃ bhāryāṃ śakyam indrasya jīvitum / na tu rāmasya bhāryāṃ mām apanīyāsti jīvitam

Sanskrit only: no published translation is held for this verse.

जीवेच् चिरं वज्रधरस्य हस्ताच् छचीं प्रधृष्याप्रतिरूपरूपाम् । न मादृशीं राक्षस धर्षयित्वा पीतामृतस्यापि तवास्ति मोक्षः

jīvec ciraṃ vajradharasya hastāc chacīṃ pradhṛṣyāpratirūparūpām / na mādṛśīṃ rākṣasa dharṣayitvā pītāmṛtasyāpi tavāsti mokṣaḥ

Sanskrit only: no published translation is held for this verse.