Vālmīki Rāmāyaṇa (critical edition) 3.6

रामस् तु सहितो भ्रात्रा सीतया च परंतपः । सुतीक्ष्णस्याश्रमपदं जगाम सह तैर् द्विजैः

rāmas tu sahito bhrātrā sītayā ca paraṃtapaḥ / sutīkṣṇasyāśramapadaṃ jagāma saha tair dvijaiḥ

Sanskrit only: no published translation is held for this verse.

स गत्वा दूरम् अध्वानं नदीस् तीर्त्वा बहूदकाः । ददर्श विपुलं शैलं महामेघम् इवोन्नतम्

sa gatvā dūram adhvānaṃ nadīs tīrtvā bahūdakāḥ / dadarśa vipulaṃ śailaṃ mahāmegham ivonnatam

Sanskrit only: no published translation is held for this verse.

ततस् तद् इक्ष्वाकुवरौ सततं विविधैर् द्रुमैः । काननं तौ विविशतुः सीतया सह राघवौ

tatas tad ikṣvākuvarau satataṃ vividhair drumaiḥ / kānanaṃ tau viviśatuḥ sītayā saha rāghavau

Sanskrit only: no published translation is held for this verse.

प्रविष्टस् तु वनं घोरं बहुपुष्पफलद्रुमम् । ददर्शाश्रमम् एकान्ते चीरमालापरिष्कृतम्

praviṣṭas tu vanaṃ ghoraṃ bahupuṣpaphaladrumam / dadarśāśramam ekānte cīramālāpariṣkṛtam

Sanskrit only: no published translation is held for this verse.

तत्र तापसम् आसीनं मलपङ्कजटाधरम् । रामः सुतीक्ष्णं विधिवत् तपोवृद्धम् अभाषत

tatra tāpasam āsīnaṃ malapaṅkajaṭādharam / rāmaḥ sutīkṣṇaṃ vidhivat tapovṛddham abhāṣata

Sanskrit only: no published translation is held for this verse.

रामो ऽहम् अस्मि भगवन् भवन्तं द्रष्टुम् आगतः । तन् माभिवद धर्मज्ञ महर्षे सत्यविक्रम

rāmo 'ham asmi bhagavan bhavantaṃ draṣṭum āgataḥ / tan mābhivada dharmajña maharṣe satyavikrama

Sanskrit only: no published translation is held for this verse.

स निरीक्ष्य ततो वीरं रामं धर्मभृतां वरम् । समाश्लिष्य च बाहुभ्याम् इदं वचनम् अब्रवीत्

sa nirīkṣya tato vīraṃ rāmaṃ dharmabhṛtāṃ varam / samāśliṣya ca bāhubhyām idaṃ vacanam abravīt

Sanskrit only: no published translation is held for this verse.

स्वागतं खलु ते वीर राम धर्मभृतां वर । आश्रमो ऽयं त्वयाक्रान्तः सनाथ इव साम्प्रतम्

svāgataṃ khalu te vīra rāma dharmabhṛtāṃ vara / āśramo 'yaṃ tvayākrāntaḥ sanātha iva sāmpratam

Sanskrit only: no published translation is held for this verse.

प्रतीक्षमाणस् त्वाम् एव नारोहे ऽहं महायशः । देवलोकम् इतो वीर देहं त्यक्त्वा महीतले

pratīkṣamāṇas tvām eva nārohe 'haṃ mahāyaśaḥ / devalokam ito vīra dehaṃ tyaktvā mahītale

Sanskrit only: no published translation is held for this verse.

चित्रकूटम् उपादाय राज्यभ्रष्टो ऽसि मे श्रुतः । इहोपयातः काकुत्स्थो देवराजः शतक्रतुः । सर्वांल् लोकाञ् जितान् आह मम पुण्येन कर्मणा

citrakūṭam upādāya rājyabhraṣṭo 'si me śrutaḥ / ihopayātaḥ kākutstho devarājaḥ śatakratuḥ / sarvāṃl lokāñ jitān āha mama puṇyena karmaṇā

Sanskrit only: no published translation is held for this verse.

तेषु देवर्षिजुष्टेषु जितेषु तपसा मया । मत्प्रसादात् सभार्यस् त्वं विहरस्व सलक्ष्मणः

teṣu devarṣijuṣṭeṣu jiteṣu tapasā mayā / matprasādāt sabhāryas tvaṃ viharasva salakṣmaṇaḥ

Sanskrit only: no published translation is held for this verse.

तम् उग्रतपसं दीप्तं महर्षिं सत्यवादिनम् । प्रत्युवाचात्मवान् रामो ब्रह्माणम् इव वासवः

tam ugratapasaṃ dīptaṃ maharṣiṃ satyavādinam / pratyuvācātmavān rāmo brahmāṇam iva vāsavaḥ

Sanskrit only: no published translation is held for this verse.

अहम् एवाहरिष्यामि स्वयं लोकान् महामुने । आवासं त्व् अहम् इच्छामि प्रदिष्टम् इह कानने

aham evāhariṣyāmi svayaṃ lokān mahāmune / āvāsaṃ tv aham icchāmi pradiṣṭam iha kānane

Sanskrit only: no published translation is held for this verse.

भवान् सर्वत्र कुशलः सर्वभूतहिते रतः । आख्यातः शरभङ्गेन गौतमेन महात्मना

bhavān sarvatra kuśalaḥ sarvabhūtahite rataḥ / ākhyātaḥ śarabhaṅgena gautamena mahātmanā

Sanskrit only: no published translation is held for this verse.

एवम् उक्तस् तु रामेण महर्षिर् लोकविश्रुतः । अब्रवीन् मधुरं वाक्यं हर्षेण महताप्लुतः

evam uktas tu rāmeṇa maharṣir lokaviśrutaḥ / abravīn madhuraṃ vākyaṃ harṣeṇa mahatāplutaḥ

Sanskrit only: no published translation is held for this verse.

अयम् एवाश्रमो राम गुणवान् रम्यताम् इह । ऋषिसंघानुचरितः सदा मूलफलैर् युतः

ayam evāśramo rāma guṇavān ramyatām iha / ṛṣisaṃghānucaritaḥ sadā mūlaphalair yutaḥ

Sanskrit only: no published translation is held for this verse.

इमम् आश्रमम् आगम्य मृगसंघा महायशः । अटित्वा प्रतिगच्छन्ति लोभयित्वाकुतोभयाः

imam āśramam āgamya mṛgasaṃghā mahāyaśaḥ / aṭitvā pratigacchanti lobhayitvākutobhayāḥ

Sanskrit only: no published translation is held for this verse.

तच् छ्रुत्वा वचनं तस्य महर्षेर् लक्ष्मणाग्रजः । उवाच वचनं धीरो विकृष्य सशरं धनुः

tac chrutvā vacanaṃ tasya maharṣer lakṣmaṇāgrajaḥ / uvāca vacanaṃ dhīro vikṛṣya saśaraṃ dhanuḥ

Sanskrit only: no published translation is held for this verse.

तान् अहं सुमहाभाग मृगसंघान् समागतान् । हन्यां निशितधारेण शरेणाशनिवर्चसा

tān ahaṃ sumahābhāga mṛgasaṃghān samāgatān / hanyāṃ niśitadhāreṇa śareṇāśanivarcasā

Sanskrit only: no published translation is held for this verse.

भवांस् तत्राभिषज्येत किं स्यात् कृच्छ्रतरं ततः । एतस्मिन्न् आश्रमे वासं चिरं तु न समर्थये

bhavāṃs tatrābhiṣajyeta kiṃ syāt kṛcchrataraṃ tataḥ / etasminn āśrame vāsaṃ ciraṃ tu na samarthaye

Sanskrit only: no published translation is held for this verse.

तम् एवम् उक्त्वा वरदं रामः संध्याम् उपागमत् । अन्वास्य पश्चिमां संध्यां तत्र वासम् अकल्पयत्

tam evam uktvā varadaṃ rāmaḥ saṃdhyām upāgamat / anvāsya paścimāṃ saṃdhyāṃ tatra vāsam akalpayat

Sanskrit only: no published translation is held for this verse.

ततः शुभं तापसभोज्यम् अन्नं स्वयं सुतीक्ष्णः पुरुषर्षभाभ्याम् । ताभ्यां सुसत्कृत्य ददौ महात्मा संध्यानिवृत्तौ रजनीं समीक्ष्य

tataḥ śubhaṃ tāpasabhojyam annaṃ svayaṃ sutīkṣṇaḥ puruṣarṣabhābhyām / tābhyāṃ susatkṛtya dadau mahātmā saṃdhyānivṛttau rajanīṃ samīkṣya

Sanskrit only: no published translation is held for this verse.