Vālmīki Rāmāyaṇa (critical edition) 3.61

तप्यमानं तथा रामं सीताहरणकर्शितम् । लोकानाम् अभवे युक्तं संवर्तकम् इवानलम्

tapyamānaṃ tathā rāmaṃ sītāharaṇakarśitam / lokānām abhave yuktaṃ saṃvartakam ivānalam

Sanskrit only: no published translation is held for this verse.

वीक्षमाणं धनुः सज्यं निःश्वसन्तं मुहुर् मुहुः । हन्तुकामं पशुं रुद्रं क्रुद्धं दक्षक्रतौ यथा

vīkṣamāṇaṃ dhanuḥ sajyaṃ niḥśvasantaṃ muhur muhuḥ / hantukāmaṃ paśuṃ rudraṃ kruddhaṃ dakṣakratau yathā

Sanskrit only: no published translation is held for this verse.

अदृष्टपूर्वं संक्रुद्धं दृष्ट्वा रामं स लक्ष्मणः । अब्रवीत् प्राञ्जलिर् वाक्यं मुखेन परिशुष्यता

adṛṣṭapūrvaṃ saṃkruddhaṃ dṛṣṭvā rāmaṃ sa lakṣmaṇaḥ / abravīt prāñjalir vākyaṃ mukhena pariśuṣyatā

Sanskrit only: no published translation is held for this verse.

पुरा भूत्वा मृदुर् दान्तः सर्वभूतहिते रतः । न क्रोधवशम् आपन्नः प्रकृतिं हातुम् अर्हसि

purā bhūtvā mṛdur dāntaḥ sarvabhūtahite rataḥ / na krodhavaśam āpannaḥ prakṛtiṃ hātum arhasi

Sanskrit only: no published translation is held for this verse.

चन्द्रे लक्ष्मीः प्रभा सूर्ये गतिर् वायौ भुवि क्षमा । एतच् च नियतं सर्वं त्वयि चानुत्तमं यशः

candre lakṣmīḥ prabhā sūrye gatir vāyau bhuvi kṣamā / etac ca niyataṃ sarvaṃ tvayi cānuttamaṃ yaśaḥ

Sanskrit only: no published translation is held for this verse.

न तु जानामि कस्यायं भग्नः सांग्रामिको रथः । केन वा कस्य वा हेतोः सायुधः सपरिच्छदः

na tu jānāmi kasyāyaṃ bhagnaḥ sāṃgrāmiko rathaḥ / kena vā kasya vā hetoḥ sāyudhaḥ saparicchadaḥ

Sanskrit only: no published translation is held for this verse.

खुरनेमिक्षतश् चायं सिक्तो रुधिरबिन्दुभिः । देशो निवृत्तसंग्रामः सुघोरः पार्थिवात्मज

khuranemikṣataś cāyaṃ sikto rudhirabindubhiḥ / deśo nivṛttasaṃgrāmaḥ sughoraḥ pārthivātmaja

Sanskrit only: no published translation is held for this verse.

एकस्य तु विमर्दो ऽयं न द्वयोर् वदतां वर । न हि वृत्तं हि पश्यामि बलस्य महतः पदम्

ekasya tu vimardo 'yaṃ na dvayor vadatāṃ vara / na hi vṛttaṃ hi paśyāmi balasya mahataḥ padam

Sanskrit only: no published translation is held for this verse.

नैकस्य तु कृते लोकान् विनाशयितुम् अर्हसि । युक्तदण्डा हि मृदवः प्रशान्ता वसुधाधिपाः

naikasya tu kṛte lokān vināśayitum arhasi / yuktadaṇḍā hi mṛdavaḥ praśāntā vasudhādhipāḥ

Sanskrit only: no published translation is held for this verse.

सदा त्वं सर्वभूतानां शरण्यः परमा गतिः । को नु दारप्रणाशं ते साधु मन्येत राघव

sadā tvaṃ sarvabhūtānāṃ śaraṇyaḥ paramā gatiḥ / ko nu dārapraṇāśaṃ te sādhu manyeta rāghava

Sanskrit only: no published translation is held for this verse.

सरितः सागराः शैला देवगन्धर्वदानवाः । नालं ते विप्रियं कर्तुं दीक्षितस्येव साधवः

saritaḥ sāgarāḥ śailā devagandharvadānavāḥ / nālaṃ te vipriyaṃ kartuṃ dīkṣitasyeva sādhavaḥ

Sanskrit only: no published translation is held for this verse.

येन राजन् हृता सीता तम् अन्वेषितुम् अर्हसि । मद्द्वितीयो धनुष्पाणिः सहायैः परमर्षिभिः

yena rājan hṛtā sītā tam anveṣitum arhasi / maddvitīyo dhanuṣpāṇiḥ sahāyaiḥ paramarṣibhiḥ

Sanskrit only: no published translation is held for this verse.

समुद्रं च विचेष्यामः पर्वतांश् च वनानि च । गुहाश् च विविधा घोरा नलिनीः पार्वतीश् च ह

samudraṃ ca viceṣyāmaḥ parvatāṃś ca vanāni ca / guhāś ca vividhā ghorā nalinīḥ pārvatīś ca ha

Sanskrit only: no published translation is held for this verse.

देवगन्धर्वलोकांश् च विचेष्यामः समाहिताः । यावन् नाधिगमिष्यामस् तव भार्यापहारिणम्

devagandharvalokāṃś ca viceṣyāmaḥ samāhitāḥ / yāvan nādhigamiṣyāmas tava bhāryāpahāriṇam

Sanskrit only: no published translation is held for this verse.

न चेत् साम्ना प्रदास्यन्ति पत्नीं ते त्रिदशेश्वराः । कोसलेन्द्र ततः पश्चात् प्राप्तकालं करिष्यसि

na cet sāmnā pradāsyanti patnīṃ te tridaśeśvarāḥ / kosalendra tataḥ paścāt prāptakālaṃ kariṣyasi

Sanskrit only: no published translation is held for this verse.

शीलेन साम्ना विनयेन सीतां नयेन न प्राप्स्यसि चेन् नरेन्द्र । ततः समुत्सादय हेमपुङ्खैर् महेन्द्रवज्रप्रतिमैः शरौघैः

śīlena sāmnā vinayena sītāṃ nayena na prāpsyasi cen narendra / tataḥ samutsādaya hemapuṅkhair mahendravajrapratimaiḥ śaraughaiḥ

Sanskrit only: no published translation is held for this verse.