Vālmīki Rāmāyaṇa (critical edition) 3.66

तौ तु तत्र स्थितौ दृष्ट्वा भ्रातरौ रामलक्ष्मणौ । बाहुपाशपरिक्षिप्तौ कबन्धो वाक्यम् अब्रवीत्

tau tu tatra sthitau dṛṣṭvā bhrātarau rāmalakṣmaṇau / bāhupāśaparikṣiptau kabandho vākyam abravīt

Sanskrit only: no published translation is held for this verse.

तिष्ठतः किं नु मां दृष्ट्वा क्षुधार्तं क्षत्रियर्षभौ । आहारार्थं तु संदिष्टौ दैवेन गतचेतसौ

tiṣṭhataḥ kiṃ nu māṃ dṛṣṭvā kṣudhārtaṃ kṣatriyarṣabhau / āhārārthaṃ tu saṃdiṣṭau daivena gatacetasau

Sanskrit only: no published translation is held for this verse.

तच् छ्रुत्वा लक्ष्मणो वाक्यं प्राप्तकालं हितं तदा । उवाचार्तिसमापन्नो विक्रमे कृतनिश्चयः

tac chrutvā lakṣmaṇo vākyaṃ prāptakālaṃ hitaṃ tadā / uvācārtisamāpanno vikrame kṛtaniścayaḥ

Sanskrit only: no published translation is held for this verse.

त्वां च मां च पुरा तूर्णम् आदत्ते राक्षसाधमः । तस्माद् असिभ्याम् अस्याशु बाहू छिन्दावहै गुरू

tvāṃ ca māṃ ca purā tūrṇam ādatte rākṣasādhamaḥ / tasmād asibhyām asyāśu bāhū chindāvahai gurū

Sanskrit only: no published translation is held for this verse.

ततस् तौ देशकालज्ञौ खड्गाभ्याम् एव राघवौ । अछिन्दतां सुसंहृष्टौ बाहू तस्यांसदेशयोः

tatas tau deśakālajñau khaḍgābhyām eva rāghavau / achindatāṃ susaṃhṛṣṭau bāhū tasyāṃsadeśayoḥ

Sanskrit only: no published translation is held for this verse.

दक्षिणो दक्षिणं बाहुम् असक्तम् असिना ततः । चिछेद रामो वेगेन सव्यं वीरस् तु लक्ष्मणः

dakṣiṇo dakṣiṇaṃ bāhum asaktam asinā tataḥ / cicheda rāmo vegena savyaṃ vīras tu lakṣmaṇaḥ

Sanskrit only: no published translation is held for this verse.

स पपात महाबाहुश् छिन्नबाहुर् महास्वनः । खं च गां च दिशश् चैव नादयञ् जलदो यथा

sa papāta mahābāhuś chinnabāhur mahāsvanaḥ / khaṃ ca gāṃ ca diśaś caiva nādayañ jalado yathā

Sanskrit only: no published translation is held for this verse.

स निकृत्तौ भुजौ दृष्ट्वा शोणितौघपरिप्लुतः । दीनः पप्रच्छ तौ वीरौ कौ युवाम् इति दानवः

sa nikṛttau bhujau dṛṣṭvā śoṇitaughapariplutaḥ / dīnaḥ papraccha tau vīrau kau yuvām iti dānavaḥ

Sanskrit only: no published translation is held for this verse.

इति तस्य ब्रुवाणस्य लक्ष्मणः शुभलक्षणः । शशंस तस्य काकुत्स्थं कबन्धस्य महाबलः

iti tasya bruvāṇasya lakṣmaṇaḥ śubhalakṣaṇaḥ / śaśaṃsa tasya kākutsthaṃ kabandhasya mahābalaḥ

Sanskrit only: no published translation is held for this verse.

अयम् इक्ष्वाकुदायादो रामो नाम जनैः श्रुतः । अस्यैवावरजं विद्धि भ्रातरं मां च लक्ष्मणम्

ayam ikṣvākudāyādo rāmo nāma janaiḥ śrutaḥ / asyaivāvarajaṃ viddhi bhrātaraṃ māṃ ca lakṣmaṇam

Sanskrit only: no published translation is held for this verse.

अस्य देवप्रभावस्य वसतो विजने वने । रक्षसापहृता भार्या याम् इच्छन्ताव् इहागतौ

asya devaprabhāvasya vasato vijane vane / rakṣasāpahṛtā bhāryā yām icchantāv ihāgatau

Sanskrit only: no published translation is held for this verse.

त्वं तु को वा किमर्थं वा कबन्ध सदृशो वने । आस्येनोरसि दीप्तेन भग्नजङ्घो विचेष्टसे

tvaṃ tu ko vā kimarthaṃ vā kabandha sadṛśo vane / āsyenorasi dīptena bhagnajaṅgho viceṣṭase

Sanskrit only: no published translation is held for this verse.

एवम् उक्तः कबन्धस् तु लक्ष्मणेनोत्तरं वचः । उवाच परमप्रीतस् तद् इन्द्रवचनं स्मरन्

evam uktaḥ kabandhas tu lakṣmaṇenottaraṃ vacaḥ / uvāca paramaprītas tad indravacanaṃ smaran

Sanskrit only: no published translation is held for this verse.

स्वागतं वां नरव्याघ्रौ दिष्ट्या पश्यामि चाप्य् अहम् । दिष्ट्या चेमौ निकृत्तौ मे युवाभ्यां बाहुबन्धनौ

svāgataṃ vāṃ naravyāghrau diṣṭyā paśyāmi cāpy aham / diṣṭyā cemau nikṛttau me yuvābhyāṃ bāhubandhanau

Sanskrit only: no published translation is held for this verse.

विरूपं यच् च मे रूपं प्राप्तं ह्य् अविनयाद् यथा । तन् मे शृणु नरव्याघ्र तत्त्वतः शंसतस् तव

virūpaṃ yac ca me rūpaṃ prāptaṃ hy avinayād yathā / tan me śṛṇu naravyāghra tattvataḥ śaṃsatas tava

Sanskrit only: no published translation is held for this verse.