Vālmīki Rāmāyaṇa (critical edition) 3.68

एवम् उक्तौ तु तौ वीरौ कबन्धेन नरेश्वरौ । गिरिप्रदरम् आसाद्य पावकं विससर्जतुः

evam uktau tu tau vīrau kabandhena nareśvarau / giripradaram āsādya pāvakaṃ visasarjatuḥ

Sanskrit only: no published translation is held for this verse.

लक्ष्मणस् तु महोल्काभिर् ज्वलिताभिः समन्ततः । चिताम् आदीपयामास सा प्रजज्वाल सर्वतः

lakṣmaṇas tu maholkābhir jvalitābhiḥ samantataḥ / citām ādīpayāmāsa sā prajajvāla sarvataḥ

Sanskrit only: no published translation is held for this verse.

तच् छरीरं कबन्धस्य घृतपिण्डोपमं महत् । मेदसा पच्यमानस्य मन्दं दहति पावकः

tac charīraṃ kabandhasya ghṛtapiṇḍopamaṃ mahat / medasā pacyamānasya mandaṃ dahati pāvakaḥ

Sanskrit only: no published translation is held for this verse.

स विधूय चिताम् आशु विधूमो ऽग्निर् इवोत्थितः । अरजे वाससी बिभ्रन् मालां दिव्यां महाबलः

sa vidhūya citām āśu vidhūmo 'gnir ivotthitaḥ / araje vāsasī bibhran mālāṃ divyāṃ mahābalaḥ

Sanskrit only: no published translation is held for this verse.

ततश् चिताया वेगेन भास्वरो विरजाम्बरः । उत्पपाताशु संहृष्टः सर्वप्रत्यङ्गभूषणः

tataś citāyā vegena bhāsvaro virajāmbaraḥ / utpapātāśu saṃhṛṣṭaḥ sarvapratyaṅgabhūṣaṇaḥ

Sanskrit only: no published translation is held for this verse.

विमाने भास्वरे तिष्ठन् हंसयुक्ते यशस्करे । प्रभया च महातेजा दिशो दश विराजयन्

vimāne bhāsvare tiṣṭhan haṃsayukte yaśaskare / prabhayā ca mahātejā diśo daśa virājayan

Sanskrit only: no published translation is held for this verse.

सो ऽन्तरिक्षगतो रामं कबन्धो वाक्यम् अब्रवीत् । शृणु राघव तत्त्वेन यथा सीमाम् अवाप्स्यसि

so 'ntarikṣagato rāmaṃ kabandho vākyam abravīt / śṛṇu rāghava tattvena yathā sīmām avāpsyasi

Sanskrit only: no published translation is held for this verse.

राम षड् युक्तयो लोके याभिः सर्वं विमृश्यते । परिमृष्टो दशान्तेन दशाभागेन सेव्यते

rāma ṣaḍ yuktayo loke yābhiḥ sarvaṃ vimṛśyate / parimṛṣṭo daśāntena daśābhāgena sevyate

Sanskrit only: no published translation is held for this verse.

दशाभागगतो हीनस् त्वं राम सहलक्ष्मणः । यत् कृते व्यसनं प्राप्तं त्वया दारप्रधर्षणम्

daśābhāgagato hīnas tvaṃ rāma sahalakṣmaṇaḥ / yat kṛte vyasanaṃ prāptaṃ tvayā dārapradharṣaṇam

Sanskrit only: no published translation is held for this verse.

तद् अवश्यं त्वया कार्यः स सुहृत् सुहृदां वर । अकृत्वा न हि ते सिद्धिम् अहं पश्यामि चिन्तयन्

tad avaśyaṃ tvayā kāryaḥ sa suhṛt suhṛdāṃ vara / akṛtvā na hi te siddhim ahaṃ paśyāmi cintayan

Sanskrit only: no published translation is held for this verse.

श्रूयतां राम वक्ष्यामि सुग्रीवो नाम वानरः । भ्रात्रा निरस्तः क्रुद्धेन वालिना शक्रसूनुना

śrūyatāṃ rāma vakṣyāmi sugrīvo nāma vānaraḥ / bhrātrā nirastaḥ kruddhena vālinā śakrasūnunā

Sanskrit only: no published translation is held for this verse.

ऋष्यमूके गिरिवरे पम्पापर्यन्तशोभिते । निवसत्य् आत्मवान् वीरश् चतुर्भिः सह वानरैः

ṛṣyamūke girivare pampāparyantaśobhite / nivasaty ātmavān vīraś caturbhiḥ saha vānaraiḥ

Sanskrit only: no published translation is held for this verse.

वयस्यं तं कुरु क्षिप्रम् इतो गत्वाद्य राघव । अद्रोहाय समागम्य दीप्यमाने विभावसौ

vayasyaṃ taṃ kuru kṣipram ito gatvādya rāghava / adrohāya samāgamya dīpyamāne vibhāvasau

Sanskrit only: no published translation is held for this verse.

न च ते सो ऽवमन्तव्यः सुग्रीवो वानराधिपः । कृतज्ञः कामरूपी च सहायार्थी च वीर्यवान्

na ca te so 'vamantavyaḥ sugrīvo vānarādhipaḥ / kṛtajñaḥ kāmarūpī ca sahāyārthī ca vīryavān

Sanskrit only: no published translation is held for this verse.

शक्तौ ह्य् अद्य युवां कर्तुं कार्यं तस्य चिकीर्षितम् । कृतार्थो वाकृतार्थो वा कृत्यं तव करिष्यति

śaktau hy adya yuvāṃ kartuṃ kāryaṃ tasya cikīrṣitam / kṛtārtho vākṛtārtho vā kṛtyaṃ tava kariṣyati

Sanskrit only: no published translation is held for this verse.

स ऋक्षरजसः पुत्रः पम्पाम् अटति शङ्कितः । भास्करस्यौरसः पुत्रो वालिना कृतकिल्बिषः

sa ṛkṣarajasaḥ putraḥ pampām aṭati śaṅkitaḥ / bhāskarasyaurasaḥ putro vālinā kṛtakilbiṣaḥ

Sanskrit only: no published translation is held for this verse.

संनिधायायुधं क्षिप्रम् ऋष्यमूकालयं कपिम् । कुरु राघव सत्येन वयस्यं वनचारिणम्

saṃnidhāyāyudhaṃ kṣipram ṛṣyamūkālayaṃ kapim / kuru rāghava satyena vayasyaṃ vanacāriṇam

Sanskrit only: no published translation is held for this verse.

स हि स्थानानि सर्वाणि कार्त्स्न्येन कपिकुञ्जरः । नरमांसाशिनां लोके नैपुण्याद् अधिगच्छति

sa hi sthānāni sarvāṇi kārtsnyena kapikuñjaraḥ / naramāṃsāśināṃ loke naipuṇyād adhigacchati

Sanskrit only: no published translation is held for this verse.

न तस्याविदितं लोके किंचिद् अस्ति हि राघव । यावत् सूर्यः प्रतपति सहस्रांशुर् अरिंदम

na tasyāviditaṃ loke kiṃcid asti hi rāghava / yāvat sūryaḥ pratapati sahasrāṃśur ariṃdama

Sanskrit only: no published translation is held for this verse.

स नदीर् विपुलाञ् शैलान् गिरिदुर्गाणि कन्दरान् । अन्विष्य वानरैः सार्धं पत्नीं ते ऽधिगमिष्यति

sa nadīr vipulāñ śailān giridurgāṇi kandarān / anviṣya vānaraiḥ sārdhaṃ patnīṃ te 'dhigamiṣyati

Sanskrit only: no published translation is held for this verse.

वानरांश् च महाकायान् प्रेषयिष्यति राघव । दिशो विचेतुं तां सीतां त्वद्वियोगेन शोचतीम्

vānarāṃś ca mahākāyān preṣayiṣyati rāghava / diśo vicetuṃ tāṃ sītāṃ tvadviyogena śocatīm

Sanskrit only: no published translation is held for this verse.

स मेरुशृङ्गाग्रगताम् अनिन्दितां प्रविश्य पातालतले ऽपि वाश्रिताम् । प्लवंगमानां प्रवरस् तव प्रियां निहत्य रक्षांसि पुनः प्रदास्यति

sa meruśṛṅgāgragatām aninditāṃ praviśya pātālatale 'pi vāśritām / plavaṃgamānāṃ pravaras tava priyāṃ nihatya rakṣāṃsi punaḥ pradāsyati

Sanskrit only: no published translation is held for this verse.