Vālmīki Rāmāyaṇa (critical edition) 3.7

रामस् तु सहसौमित्रिः सुतीक्ष्णेनाभिपूजितः । परिणाम्य निशां तत्र प्रभाते प्रत्यबुध्यत

rāmas tu sahasaumitriḥ sutīkṣṇenābhipūjitaḥ / pariṇāmya niśāṃ tatra prabhāte pratyabudhyata

Sanskrit only: no published translation is held for this verse.

उत्थाय तु यथाकालं राघवः सह सीतया । उपास्पृशत् सुशीतेन जलेनोत्पलगन्धिना

utthāya tu yathākālaṃ rāghavaḥ saha sītayā / upāspṛśat suśītena jalenotpalagandhinā

Sanskrit only: no published translation is held for this verse.

अथ ते ऽग्निं सुरांश् चैव वैदेही रामलक्ष्मणौ । काल्यं विधिवद् अभ्यर्च्य तपस्विशरणे वने

atha te 'gniṃ surāṃś caiva vaidehī rāmalakṣmaṇau / kālyaṃ vidhivad abhyarcya tapasviśaraṇe vane

Sanskrit only: no published translation is held for this verse.

उदयन्तं दिनकरं दृष्ट्वा विगतकल्मषाः । सुतीक्ष्णम् अभिगम्येदं श्लक्ष्णं वचनम् अब्रुवन्

udayantaṃ dinakaraṃ dṛṣṭvā vigatakalmaṣāḥ / sutīkṣṇam abhigamyedaṃ ślakṣṇaṃ vacanam abruvan

Sanskrit only: no published translation is held for this verse.

सुखोषिताः स्म भगवंस् त्वया पूज्येन पूजिताः । आपृच्छामः प्रयास्यामो मुनयस् त्वरयन्ति नः

sukhoṣitāḥ sma bhagavaṃs tvayā pūjyena pūjitāḥ / āpṛcchāmaḥ prayāsyāmo munayas tvarayanti naḥ

Sanskrit only: no published translation is held for this verse.

त्वरामहे वयं द्रष्टुं कृत्स्नम् आश्रममण्डलम् । ऋषीणां पुण्यशीलानां दण्डकारण्यवासिनाम्

tvarāmahe vayaṃ draṣṭuṃ kṛtsnam āśramamaṇḍalam / ṛṣīṇāṃ puṇyaśīlānāṃ daṇḍakāraṇyavāsinām

Sanskrit only: no published translation is held for this verse.

अभ्यनुज्ञातुम् इच्छामः सहैभिर् मुनिपुंगवैः । धर्मनित्यैस् तपोदान्तैर् विशिखैर् इव पावकैः

abhyanujñātum icchāmaḥ sahaibhir munipuṃgavaiḥ / dharmanityais tapodāntair viśikhair iva pāvakaiḥ

Sanskrit only: no published translation is held for this verse.

अविषह्यातपो यावत् सूर्यो नातिविराजते । अमार्गेणागतां लक्ष्मीं प्राप्येवान्वयवर्जितः

aviṣahyātapo yāvat sūryo nātivirājate / amārgeṇāgatāṃ lakṣmīṃ prāpyevānvayavarjitaḥ

Sanskrit only: no published translation is held for this verse.

तावद् इच्छामहे गन्तुम् इत्य् उक्त्वा चरणौ मुनेः । ववन्दे सहसौमित्रिः सीतया सह राघवः

tāvad icchāmahe gantum ity uktvā caraṇau muneḥ / vavande sahasaumitriḥ sītayā saha rāghavaḥ

Sanskrit only: no published translation is held for this verse.

तौ संस्पृशन्तौ चरणाव् उत्थाप्य मुनिपुंगवः । गाढम् आलिङ्ग्य सस्नेहम् इदं वचनम् अब्रवीत्

tau saṃspṛśantau caraṇāv utthāpya munipuṃgavaḥ / gāḍham āliṅgya sasneham idaṃ vacanam abravīt

Sanskrit only: no published translation is held for this verse.

अरिष्टं गच्छ पन्थानं राम सौमित्रिणा सह । सीतया चानया सार्धं छाययेवानुवृत्तया

ariṣṭaṃ gaccha panthānaṃ rāma saumitriṇā saha / sītayā cānayā sārdhaṃ chāyayevānuvṛttayā

Sanskrit only: no published translation is held for this verse.

पश्याश्रमपदं रम्यं दण्डकारण्यवासिनाम् । एषां तपस्विनां वीर तपसा भावितात्मनाम्

paśyāśramapadaṃ ramyaṃ daṇḍakāraṇyavāsinām / eṣāṃ tapasvināṃ vīra tapasā bhāvitātmanām

Sanskrit only: no published translation is held for this verse.

सुप्राज्यफलमूलानि पुष्पितानि वनानि च । प्रशान्तमृगयूथानि शान्तपक्षिगणानि च

suprājyaphalamūlāni puṣpitāni vanāni ca / praśāntamṛgayūthāni śāntapakṣigaṇāni ca

Sanskrit only: no published translation is held for this verse.

फुल्लपङ्कजषण्डानि प्रसन्नसलिलानि च । कारण्डवविकीर्णानि तटाकानि सरांसि च

phullapaṅkajaṣaṇḍāni prasannasalilāni ca / kāraṇḍavavikīrṇāni taṭākāni sarāṃsi ca

Sanskrit only: no published translation is held for this verse.

द्रक्ष्यसे दृष्टिरम्याणि गिरिप्रस्रवणानि च । रमणीयान्य् अरण्यानि मयूराभिरुतानि च

drakṣyase dṛṣṭiramyāṇi giriprasravaṇāni ca / ramaṇīyāny araṇyāni mayūrābhirutāni ca

Sanskrit only: no published translation is held for this verse.

गम्यतां वत्स सौमित्रे भवान् अपि च गच्छतु । आगन्तव्यं च ते दृष्ट्वा पुनर् एवाश्रमं मम

gamyatāṃ vatsa saumitre bhavān api ca gacchatu / āgantavyaṃ ca te dṛṣṭvā punar evāśramaṃ mama

Sanskrit only: no published translation is held for this verse.

एवम् उक्तस् तथेत्य् उक्त्वा काकुत्स्थः सहलक्ष्मणः । प्रदक्षिणं मुनिं कृत्वा प्रस्थातुम् उपचक्रमे

evam uktas tathety uktvā kākutsthaḥ sahalakṣmaṇaḥ / pradakṣiṇaṃ muniṃ kṛtvā prasthātum upacakrame

Sanskrit only: no published translation is held for this verse.

ततः शुभतरे तूणी धनुषी चायतेक्षणा । ददौ सीता तयोर् भ्रात्रोः खड्गौ च विमलौ ततः

tataḥ śubhatare tūṇī dhanuṣī cāyatekṣaṇā / dadau sītā tayor bhrātroḥ khaḍgau ca vimalau tataḥ

Sanskrit only: no published translation is held for this verse.

आबध्य च शुभे तूणी चापौ चादाय सस्वनौ । निष्क्रान्ताव् आश्रमाद् गन्तुम् उभौ तौ रामलक्ष्मणौ

ābadhya ca śubhe tūṇī cāpau cādāya sasvanau / niṣkrāntāv āśramād gantum ubhau tau rāmalakṣmaṇau

Sanskrit only: no published translation is held for this verse.