Vālmīki Rāmāyaṇa (critical edition) 3.70

तौ कबन्धेन तं मार्गं पम्पाया दर्शितं वने । आतस्थतुर् दिशं गृह्य प्रतीचीं नृवरात्मजौ

tau kabandhena taṃ mārgaṃ pampāyā darśitaṃ vane / ātasthatur diśaṃ gṛhya pratīcīṃ nṛvarātmajau

Sanskrit only: no published translation is held for this verse.

तौ शैलेष्व् आचितानेकान् क्षौद्रकल्पफलद्रुमान् । वीक्षन्तौ जग्मतुर् द्रष्टुं सुग्रीवं रामलक्ष्मणौ

tau śaileṣv ācitānekān kṣaudrakalpaphaladrumān / vīkṣantau jagmatur draṣṭuṃ sugrīvaṃ rāmalakṣmaṇau

Sanskrit only: no published translation is held for this verse.

कृत्वा च शैलपृष्ठे तु तौ वासं रघुनन्दनौ । पम्पायाः पश्चिमं तीरं राघवाव् उपतस्थतुः

kṛtvā ca śailapṛṣṭhe tu tau vāsaṃ raghunandanau / pampāyāḥ paścimaṃ tīraṃ rāghavāv upatasthatuḥ

Sanskrit only: no published translation is held for this verse.

तौ पुष्करिण्याः पम्पायास् तीरम् आसाद्य पश्चिमम् । अपश्यतां ततस् तत्र शबर्या रम्यम् आश्रमम्

tau puṣkariṇyāḥ pampāyās tīram āsādya paścimam / apaśyatāṃ tatas tatra śabaryā ramyam āśramam

Sanskrit only: no published translation is held for this verse.

तौ तम् आश्रमम् आसाद्य द्रुमैर् बहुभिर् आवृतम् । सुरम्यम् अभिवीक्षन्तौ शबरीम् अभ्युपेयतुः

tau tam āśramam āsādya drumair bahubhir āvṛtam / suramyam abhivīkṣantau śabarīm abhyupeyatuḥ

Sanskrit only: no published translation is held for this verse.

तौ तु दृष्ट्वा तदा सिद्धा समुत्थाय कृताञ्जलिः । पादौ जग्राह रामस्य लक्ष्मणस्य च धीमतः

tau tu dṛṣṭvā tadā siddhā samutthāya kṛtāñjaliḥ / pādau jagrāha rāmasya lakṣmaṇasya ca dhīmataḥ

Sanskrit only: no published translation is held for this verse.

ताम् उवाच ततो रामः श्रमणीं संशितव्रताम् । कच्चित् ते निर्जिता विघ्नाः कच्चित् ते वर्धते तपः

tām uvāca tato rāmaḥ śramaṇīṃ saṃśitavratām / kaccit te nirjitā vighnāḥ kaccit te vardhate tapaḥ

Sanskrit only: no published translation is held for this verse.

कच्चित् ते नियतः कोप आहारश् च तपोधने । कच्चित् ते नियमाः प्राप्ताः कच्चित् ते मनसः सुखम् । कच्चित् ते गुरुशुश्रूषा सफला चारुभाषिणि

kaccit te niyataḥ kopa āhāraś ca tapodhane / kaccit te niyamāḥ prāptāḥ kaccit te manasaḥ sukham / kaccit te guruśuśrūṣā saphalā cārubhāṣiṇi

Sanskrit only: no published translation is held for this verse.

रामेण तापसी पृष्टा सा सिद्धा सिद्धसंमता । शशंस शबरी वृद्धा रामाय प्रत्युपस्थिता

rāmeṇa tāpasī pṛṣṭā sā siddhā siddhasaṃmatā / śaśaṃsa śabarī vṛddhā rāmāya pratyupasthitā

Sanskrit only: no published translation is held for this verse.

चित्रकूटं त्वयि प्राप्ते विमानैर् अतुलप्रभैः । इतस् ते दिवम् आरूढा यान् अहं पर्यचारिषम्

citrakūṭaṃ tvayi prāpte vimānair atulaprabhaiḥ / itas te divam ārūḍhā yān ahaṃ paryacāriṣam

Sanskrit only: no published translation is held for this verse.

तैश् चाहम् उक्ता धर्मज्ञैर् महाभागैर् महर्षिभिः । आगमिष्यति ते रामः सुपुण्यम् इमम् आश्रमम्

taiś cāham uktā dharmajñair mahābhāgair maharṣibhiḥ / āgamiṣyati te rāmaḥ supuṇyam imam āśramam

Sanskrit only: no published translation is held for this verse.

स ते प्रतिग्रहीतव्यः सौमित्रिसहितो ऽतिथिः । तं च दृष्ट्वा वरांल् लोकान् अक्षयांस् त्वं गमिष्यसि

sa te pratigrahītavyaḥ saumitrisahito 'tithiḥ / taṃ ca dṛṣṭvā varāṃl lokān akṣayāṃs tvaṃ gamiṣyasi

Sanskrit only: no published translation is held for this verse.

मया तु विविधं वन्यं संचितं पुरुषर्षभ । तवार्थे पुरुषव्याघ्र पम्पायास् तीरसम्भवम्

mayā tu vividhaṃ vanyaṃ saṃcitaṃ puruṣarṣabha / tavārthe puruṣavyāghra pampāyās tīrasambhavam

Sanskrit only: no published translation is held for this verse.

एवम् उक्तः स धर्मात्मा शबर्या शबरीम् इदम् । राघवः प्राह विजाने तां नित्यम् अबहिष्कृताम्

evam uktaḥ sa dharmātmā śabaryā śabarīm idam / rāghavaḥ prāha vijāne tāṃ nityam abahiṣkṛtām

Sanskrit only: no published translation is held for this verse.

दनोः सकाशात् तत्त्वेन प्रभावं ते महात्मनः । श्रुतं प्रत्यक्षम् इच्छामि संद्रष्टुं यदि मन्यसे

danoḥ sakāśāt tattvena prabhāvaṃ te mahātmanaḥ / śrutaṃ pratyakṣam icchāmi saṃdraṣṭuṃ yadi manyase

Sanskrit only: no published translation is held for this verse.

एतत् तु वचनं श्रुत्वा रामवक्त्राद् विनिःसृतम् । शबरी दर्शयामास ताव् उभौ तद् वनं महत्

etat tu vacanaṃ śrutvā rāmavaktrād viniḥsṛtam / śabarī darśayāmāsa tāv ubhau tad vanaṃ mahat

Sanskrit only: no published translation is held for this verse.

पश्य मेघघनप्रख्यं मृगपक्षिसमाकुलम् । मतंगवनम् इत्य् एव विश्रुतं रघुनन्दन

paśya meghaghanaprakhyaṃ mṛgapakṣisamākulam / mataṃgavanam ity eva viśrutaṃ raghunandana

Sanskrit only: no published translation is held for this verse.

इह ते भावितात्मानो गुरवो मे महाद्युते । जुहवांश्चक्रिरे तीर्थं मन्त्रवन् मन्त्रपूजितम्

iha te bhāvitātmāno guravo me mahādyute / juhavāṃścakrire tīrthaṃ mantravan mantrapūjitam

Sanskrit only: no published translation is held for this verse.

इयं प्रत्यक्स्थली वेदी यत्र ते मे सुसत्कृताः । पुष्पोपहारं कुर्वन्ति श्रमाद् उद्वेपिभिः करैः

iyaṃ pratyaksthalī vedī yatra te me susatkṛtāḥ / puṣpopahāraṃ kurvanti śramād udvepibhiḥ karaiḥ

Sanskrit only: no published translation is held for this verse.

तेषां तपःप्रभावेन पश्याद्यापि रघूत्तम । द्योतयन्ति दिशः सर्वाः श्रिया वेद्यो ऽतुलप्रभाः

teṣāṃ tapaḥprabhāvena paśyādyāpi raghūttama / dyotayanti diśaḥ sarvāḥ śriyā vedyo 'tulaprabhāḥ

Sanskrit only: no published translation is held for this verse.

अशक्नुवद्भिस् तैर् गन्तुम् उपवासश्रमालसैः । चिन्तिते ऽभ्यागतान् पश्य समेतान् सप्त सागरान्

aśaknuvadbhis tair gantum upavāsaśramālasaiḥ / cintite 'bhyāgatān paśya sametān sapta sāgarān

Sanskrit only: no published translation is held for this verse.

कृताभिषेकैस् तैर् न्यस्ता वल्कलाः पादपेष्व् इह । अद्यापि न विशुष्यन्ति प्रदेशे रघुनन्दन

kṛtābhiṣekais tair nyastā valkalāḥ pādapeṣv iha / adyāpi na viśuṣyanti pradeśe raghunandana

Sanskrit only: no published translation is held for this verse.

कृत्स्नं वनम् इदं दृष्टं श्रोतव्यं च श्रुतं त्वया । तद् इच्छाम्य् अभ्यनुज्ञाता त्यक्तुम् एतत् कलेवरम्

kṛtsnaṃ vanam idaṃ dṛṣṭaṃ śrotavyaṃ ca śrutaṃ tvayā / tad icchāmy abhyanujñātā tyaktum etat kalevaram

Sanskrit only: no published translation is held for this verse.

तेषाम् इच्छाम्य् अहं गन्तुं समीपं भावितात्मनाम् । मुनीनाम् आश्रमो येषाम् अहं च परिचारिणी

teṣām icchāmy ahaṃ gantuṃ samīpaṃ bhāvitātmanām / munīnām āśramo yeṣām ahaṃ ca paricāriṇī

Sanskrit only: no published translation is held for this verse.

धर्मिष्ठं तु वचः श्रुत्वा राघवः सहलक्ष्मणः । अनुजानामि गच्छेति प्रहृष्टवदनो ऽब्रवीत्

dharmiṣṭhaṃ tu vacaḥ śrutvā rāghavaḥ sahalakṣmaṇaḥ / anujānāmi gaccheti prahṛṣṭavadano 'bravīt

Sanskrit only: no published translation is held for this verse.

अनुज्ञाता तु रामेण हुत्वात्मानं हुताशने । ज्वलत्पावकसंकाशा स्वर्गम् एव जगाम सा

anujñātā tu rāmeṇa hutvātmānaṃ hutāśane / jvalatpāvakasaṃkāśā svargam eva jagāma sā

Sanskrit only: no published translation is held for this verse.

यत्र ते सुकृतात्मानो विहरन्ति महर्षयः । तत् पुण्यं शबरी स्थानं जगामात्मसमाधिना

yatra te sukṛtātmāno viharanti maharṣayaḥ / tat puṇyaṃ śabarī sthānaṃ jagāmātmasamādhinā

Sanskrit only: no published translation is held for this verse.