Vālmīki Rāmāyaṇa (critical edition) 4.35

इत्य् उक्तस् तारया वाक्यं प्रश्रितं धर्मसंहितम् मृदुस्वभावः सौमित्रिः प्रतिजग्राह तद्वचः

ity uktas tārayā vākyaṃ praśritaṃ dharmasaṃhitam mṛdusvabhāvaḥ saumitriḥ pratijagrāha tadvacaḥ

Sanskrit only: no published translation is held for this verse.

तस्मिन् प्रतिगृहीते तु वाक्ये हरिगणेश्वरः लक्ष्मणात् सुमहत् त्रासं वस्त्रं क्लिन्नम् इवात्यजत्

tasmin pratigṛhīte tu vākye harigaṇeśvaraḥ lakṣmaṇāt sumahat trāsaṃ vastraṃ klinnam ivātyajat

Sanskrit only: no published translation is held for this verse.

ततः कण्ठगतं माल्यं चित्रं बहुगुणं महत् चिच्छेद विमदश् चासीत् सुग्रीवो वानरेश्वरः

tataḥ kaṇṭhagataṃ mālyaṃ citraṃ bahuguṇaṃ mahat ciccheda vimadaś cāsīt sugrīvo vānareśvaraḥ

Sanskrit only: no published translation is held for this verse.

स लक्ष्मणं भीमबलं सर्ववानरसत्तमः अब्रवीत् प्रश्रितं वाक्यं सुग्रीवः संप्रहर्षयन्

sa lakṣmaṇaṃ bhīmabalaṃ sarvavānarasattamaḥ abravīt praśritaṃ vākyaṃ sugrīvaḥ saṃpraharṣayan

Sanskrit only: no published translation is held for this verse.

प्रनष्टा श्रीश् च कीर्तिश् च कपिराज्यं च शाश्वतम् रामप्रसादात् सौमित्रे पुनः प्राप्तम् इदं मया

pranaṣṭā śrīś ca kīrtiś ca kapirājyaṃ ca śāśvatam rāmaprasādāt saumitre punaḥ prāptam idaṃ mayā

Sanskrit only: no published translation is held for this verse.

कः शक्तस् तस्य देवस्य ख्यातस्य स्वेन कर्मणा तादृशं विक्रमं वीर प्रतिकर्तुम् अरिंदम

kaḥ śaktas tasya devasya khyātasya svena karmaṇā tādṛśaṃ vikramaṃ vīra pratikartum ariṃdama

Sanskrit only: no published translation is held for this verse.

सीतां प्राप्स्यति धर्मात्मा वधिष्यति च रावणम् सहायमात्रेण मया राघवः स्वेन तेजसा

sītāṃ prāpsyati dharmātmā vadhiṣyati ca rāvaṇam sahāyamātreṇa mayā rāghavaḥ svena tejasā

Sanskrit only: no published translation is held for this verse.

सहायकृत्यं हि तस्य येन सप्त महाद्रुमाः शैलश् च वसुधा चैव बाणेनैकेन दारिताः

sahāyakṛtyaṃ hi tasya yena sapta mahādrumāḥ śailaś ca vasudhā caiva bāṇenaikena dāritāḥ

Sanskrit only: no published translation is held for this verse.

धनुर् विस्फारमाणस्य यस्य शब्देन लक्ष्मण सशैला कम्पिता भूमिः सहायैस् तस्य किं नु वै

dhanur visphāramāṇasya yasya śabdena lakṣmaṇa saśailā kampitā bhūmiḥ sahāyais tasya kiṃ nu vai

Sanskrit only: no published translation is held for this verse.

अनुयात्रां नरेन्द्रस्य करिष्ये ऽहं नरर्षभ गच्छतो रावणं हन्तुं वैरिणं सपुरःसरम्

anuyātrāṃ narendrasya kariṣye 'haṃ nararṣabha gacchato rāvaṇaṃ hantuṃ vairiṇaṃ sapuraḥsaram

Sanskrit only: no published translation is held for this verse.

यदि किं चिद् अतिक्रान्तं विश्वासात् प्रणयेन वा प्रेष्यस्य क्षमितव्यं मे न कश् चिन् नापराध्यति

yadi kiṃ cid atikrāntaṃ viśvāsāt praṇayena vā preṣyasya kṣamitavyaṃ me na kaś cin nāparādhyati

Sanskrit only: no published translation is held for this verse.

इति तस्य ब्रुवाणस्य सुग्रीवस्य महात्मनः अभवल् लक्ष्मणः प्रीतः प्रेंणा चेदम् उवाच ह

iti tasya bruvāṇasya sugrīvasya mahātmanaḥ abhaval lakṣmaṇaḥ prītaḥ preṃṇā cedam uvāca ha

Sanskrit only: no published translation is held for this verse.

सर्वथा हि मम भ्राता सनाथो वानरेश्वर त्वया नाथेन सुग्रीव प्रश्रितेन विशेषतः

sarvathā hi mama bhrātā sanātho vānareśvara tvayā nāthena sugrīva praśritena viśeṣataḥ

Sanskrit only: no published translation is held for this verse.

यस् ते प्रभावः सुग्रीव यच् च ते शौचम् उत्तमम् अर्हस् तं कपिराज्यस्य श्रियं भोक्तुम् अनुत्तमाम्

yas te prabhāvaḥ sugrīva yac ca te śaucam uttamam arhas taṃ kapirājyasya śriyaṃ bhoktum anuttamām

Sanskrit only: no published translation is held for this verse.

सहायेन च सुग्रीव त्वया रामः प्रतापवान् वधिष्यति रणे शत्रून् अचिरान् नात्र संशयः

sahāyena ca sugrīva tvayā rāmaḥ pratāpavān vadhiṣyati raṇe śatrūn acirān nātra saṃśayaḥ

Sanskrit only: no published translation is held for this verse.

धर्मज्ञस्य कृतज्ञस्य संग्रामेष्व् अनिवर्तिनः उपपन्नं च युक्तं च सुग्रीव तव भाषितम्

dharmajñasya kṛtajñasya saṃgrāmeṣv anivartinaḥ upapannaṃ ca yuktaṃ ca sugrīva tava bhāṣitam

Sanskrit only: no published translation is held for this verse.

दोषज्ञः सति सामर्थ्ये को ऽन्यो भाषितुम् अर्हति वर्जयित्वा मम ज्येष्ठं त्वां च वानरसत्तम

doṣajñaḥ sati sāmarthye ko 'nyo bhāṣitum arhati varjayitvā mama jyeṣṭhaṃ tvāṃ ca vānarasattama

Sanskrit only: no published translation is held for this verse.

सदृशश् चासि रामस्य विक्रमेण बलेन च सहायो दैवतैर् दत्तश् चिराय हरिपुंगव

sadṛśaś cāsi rāmasya vikrameṇa balena ca sahāyo daivatair dattaś cirāya haripuṃgava

Sanskrit only: no published translation is held for this verse.

किं तु शीघ्रम् इतो वीर निष्क्राम त्वं मया सह सान्त्वयस्व वयस्यं च भार्याहरणदुःखितम्

kiṃ tu śīghram ito vīra niṣkrāma tvaṃ mayā saha sāntvayasva vayasyaṃ ca bhāryāharaṇaduḥkhitam

Sanskrit only: no published translation is held for this verse.

यच् च शोकाभिभूतस्य श्रुत्वा रामस्य भाषितम् मया त्वं परुषाण्य् उक्तस् तच् च त्वं क्षन्तुम् अर्हसि

yac ca śokābhibhūtasya śrutvā rāmasya bhāṣitam mayā tvaṃ paruṣāṇy uktas tac ca tvaṃ kṣantum arhasi

Sanskrit only: no published translation is held for this verse.