Vālmīki Rāmāyaṇa (critical edition) 4.44

तद् उग्रशासनं भर्तुर् विज्ञाय हरिपुंगवाः शलभा इव संछाद्य मेदिनीं संप्रतस्थिरे

tad ugraśāsanaṃ bhartur vijñāya haripuṃgavāḥ śalabhā iva saṃchādya medinīṃ saṃpratasthire

Sanskrit only: no published translation is held for this verse.

रामः प्रस्रवणे तस्मिन् न्यवसत् सहलक्ष्मणः प्रतीक्षमाणस् तं मासं यः सीताधिगमे कृतः

rāmaḥ prasravaṇe tasmin nyavasat sahalakṣmaṇaḥ pratīkṣamāṇas taṃ māsaṃ yaḥ sītādhigame kṛtaḥ

Sanskrit only: no published translation is held for this verse.

उत्तरां तु दिशं रम्यां गिरिराजसमावृताम् प्रतस्थे सहसा वीरो हरिः शतबलिस् तदा

uttarāṃ tu diśaṃ ramyāṃ girirājasamāvṛtām pratasthe sahasā vīro hariḥ śatabalis tadā

Sanskrit only: no published translation is held for this verse.

पूर्वां दिशं प्रति ययौ विनतो हरियूथपः

pūrvāṃ diśaṃ prati yayau vinato hariyūthapaḥ

Sanskrit only: no published translation is held for this verse.

ताराङ्गदादि सहितः प्लवगः पवनात्मजः अगस्त्यचरिताम् आशां दक्षिणां हरियूथपः

tārāṅgadādi sahitaḥ plavagaḥ pavanātmajaḥ agastyacaritām āśāṃ dakṣiṇāṃ hariyūthapaḥ

Sanskrit only: no published translation is held for this verse.

पश्चिमां तु दिशं घोरां सुषेणः प्लवगेश्वरः प्रतस्थे हरिशार्दूलो भृशं वरुणपालिताम्

paścimāṃ tu diśaṃ ghorāṃ suṣeṇaḥ plavageśvaraḥ pratasthe hariśārdūlo bhṛśaṃ varuṇapālitām

Sanskrit only: no published translation is held for this verse.

ततः सर्वा दिशो राजा चोदयित्वा यथा तथम् कपिसेना पतीन् मुख्यान् मुमोद सुखितः सुखम्

tataḥ sarvā diśo rājā codayitvā yathā tatham kapisenā patīn mukhyān mumoda sukhitaḥ sukham

Sanskrit only: no published translation is held for this verse.

एवं संचोदिताः सर्वे राज्ञा वानरयूथपाः स्वां स्वां दिशम् अभिप्रेत्य त्वरिताः संप्रतस्थिरे

evaṃ saṃcoditāḥ sarve rājñā vānarayūthapāḥ svāṃ svāṃ diśam abhipretya tvaritāḥ saṃpratasthire

Sanskrit only: no published translation is held for this verse.

नदन्तश् चोन्नदन्तश् च गर्जन्तश् च प्लवंगमाः क्ष्वेलन्तो धावमानाश् च ययुः प्लवगसत्तमाः आनयिष्यामहे सीतां हनिष्यामश् च रावणम्

nadantaś connadantaś ca garjantaś ca plavaṃgamāḥ kṣvelanto dhāvamānāś ca yayuḥ plavagasattamāḥ ānayiṣyāmahe sītāṃ haniṣyāmaś ca rāvaṇam

Sanskrit only: no published translation is held for this verse.

अहम् एको हनिष्यामि प्राप्तं रावणम् आहवे ततश् चोन्मथ्य सहसा हरिष्ये जनकात्मजाम्

aham eko haniṣyāmi prāptaṃ rāvaṇam āhave tataś conmathya sahasā hariṣye janakātmajām

Sanskrit only: no published translation is held for this verse.

वेपमानं श्रमेणाद्य भवद्भिः स्थीयताम् इति एक एवाहरिष्यामि पातालाद् अपि जानकीम्

vepamānaṃ śrameṇādya bhavadbhiḥ sthīyatām iti eka evāhariṣyāmi pātālād api jānakīm

Sanskrit only: no published translation is held for this verse.

विधमिष्याम्य् अहं वृक्षान् दारयिष्याम्य् अहं गिरीन् धरणीं दारयिष्यामि क्षोभयिष्यामि सागरान्

vidhamiṣyāmy ahaṃ vṛkṣān dārayiṣyāmy ahaṃ girīn dharaṇīṃ dārayiṣyāmi kṣobhayiṣyāmi sāgarān

Sanskrit only: no published translation is held for this verse.

अहं योजनसंख्यायाः प्लविता नात्र संशयः शतं योजनसंख्यायाः शतं समधिकं ह्य् अहम्

ahaṃ yojanasaṃkhyāyāḥ plavitā nātra saṃśayaḥ śataṃ yojanasaṃkhyāyāḥ śataṃ samadhikaṃ hy aham

Sanskrit only: no published translation is held for this verse.

भूतले सागरे वापि शैलेषु च वनेषु च पातालस्यापि वा मध्ये न ममाच्छिद्यते गतिः

bhūtale sāgare vāpi śaileṣu ca vaneṣu ca pātālasyāpi vā madhye na mamācchidyate gatiḥ

Sanskrit only: no published translation is held for this verse.

इत्य् एकैकं तदा तत्र वानरा बलदर्पिताः ऊचुश् च वचनं तस्मिन् हरिराजस्य संनिधौ

ity ekaikaṃ tadā tatra vānarā baladarpitāḥ ūcuś ca vacanaṃ tasmin harirājasya saṃnidhau

Sanskrit only: no published translation is held for this verse.