Vālmīki Rāmāyaṇa (critical edition) 5.26

सा राक्षसेन्द्रस्य वचो निशम्य; तद् रावणस्याप्रियम् अप्रियार्ता सीता वितत्रास यथा वनान्ते; सिंहाभिपन्ना गजराजकन्या

sā rākṣasendrasya vaco niśamya; tad rāvaṇasyāpriyam apriyārtā sītā vitatrāsa yathā vanānte; siṃhābhipannā gajarājakanyā

Sanskrit only: no published translation is held for this verse.

सा राक्षसी मध्यगता च भीरुर्; वाग्भिर् भृशं रावणतर्जिता च कान्तारमध्ये विजने विसृष्टा; बालेव कन्या विललाप सीता

sā rākṣasī madhyagatā ca bhīrur; vāgbhir bhṛśaṃ rāvaṇatarjitā ca kāntāramadhye vijane visṛṣṭā; bāleva kanyā vilalāpa sītā

Sanskrit only: no published translation is held for this verse.

सत्यं बतेदं प्रवदन्ति लोके; नाकालमृत्युर् भवतीति सन्तः यत्राहम् एवं परिभर्त्स्यमाना; जीवामि किं चित् क्षणम् अप्य् अपुण्या

satyaṃ batedaṃ pravadanti loke; nākālamṛtyur bhavatīti santaḥ yatrāham evaṃ paribhartsyamānā; jīvāmi kiṃ cit kṣaṇam apy apuṇyā

Sanskrit only: no published translation is held for this verse.

सुखाद् विहीनं बहुदुःखपूर्णम्; इदं तु नूनं हृदयं स्थिरं मे विदीर्यते यन् न सहस्रधाद्य; वज्राहतं शृङ्गम् इवाचलस्य

sukhād vihīnaṃ bahuduḥkhapūrṇam; idaṃ tu nūnaṃ hṛdayaṃ sthiraṃ me vidīryate yan na sahasradhādya; vajrāhataṃ śṛṅgam ivācalasya

Sanskrit only: no published translation is held for this verse.

नैवास्ति नूनं मम दोषम् अत्र; वध्याहम् अस्याप्रियदर्शनस्य भावं न चास्याहम् अनुप्रदातुम्; अलं द्विजो मन्त्रम् इवाद्विजाय

naivāsti nūnaṃ mama doṣam atra; vadhyāham asyāpriyadarśanasya bhāvaṃ na cāsyāham anupradātum; alaṃ dvijo mantram ivādvijāya

Sanskrit only: no published translation is held for this verse.

नूनं ममाङ्गान्य् अचिराद् अनार्यः; शस्त्रैः शितैश् छेत्स्यति राक्षसेन्द्रः तस्मिन्न् अनागच्छति लोकनाथे; गर्भस्थजन्तोर् इव शल्यकृन्तः

nūnaṃ mamāṅgāny acirād anāryaḥ; śastraiḥ śitaiś chetsyati rākṣasendraḥ tasminn anāgacchati lokanāthe; garbhasthajantor iva śalyakṛntaḥ

Sanskrit only: no published translation is held for this verse.

दुःखं बतेदं मम दुःखिताया; मासौ चिरायाभिगमिष्यतो द्वौ बद्धस्य वध्यस्य यथा निशान्ते; राजापराधाद् इव तस्करस्य

duḥkhaṃ batedaṃ mama duḥkhitāyā; māsau cirāyābhigamiṣyato dvau baddhasya vadhyasya yathā niśānte; rājāparādhād iva taskarasya

Sanskrit only: no published translation is held for this verse.

हा राम हा लक्ष्मण हा सुमित्रे; हा राम मातः सह मे जनन्या एषा विपद्याम्य् अहम् अल्पभाग्या; महार्णवे नौर् इव मूढ वाता

hā rāma hā lakṣmaṇa hā sumitre; hā rāma mātaḥ saha me jananyā eṣā vipadyāmy aham alpabhāgyā; mahārṇave naur iva mūḍha vātā

Sanskrit only: no published translation is held for this verse.

तरस्विनौ धारयता मृगस्य; सत्त्वेन रूपं मनुजेन्द्रपुत्रौ नूनं विशस्तौ मम कारणात् तौ; सिंहर्षभौ द्वाव् इव वैद्युतेन

tarasvinau dhārayatā mṛgasya; sattvena rūpaṃ manujendraputrau nūnaṃ viśastau mama kāraṇāt tau; siṃharṣabhau dvāv iva vaidyutena

Sanskrit only: no published translation is held for this verse.

नूनं स कालो मृगरूपधारी; माम् अल्पभाग्यां लुलुभे तदानीम् यत्रार्यपुत्रं विससर्ज मूढा; रामानुजं लक्ष्मणपूर्वकं च

nūnaṃ sa kālo mṛgarūpadhārī; mām alpabhāgyāṃ lulubhe tadānīm yatrāryaputraṃ visasarja mūḍhā; rāmānujaṃ lakṣmaṇapūrvakaṃ ca

Sanskrit only: no published translation is held for this verse.

हा राम सत्यव्रत दीर्घवाहो; हा पूर्णचन्द्रप्रतिमानवक्त्र हा जीवलोकस्य हितः प्रियश् च; वध्यां न मां वेत्सि हि राक्षसानाम्

hā rāma satyavrata dīrghavāho; hā pūrṇacandrapratimānavaktra hā jīvalokasya hitaḥ priyaś ca; vadhyāṃ na māṃ vetsi hi rākṣasānām

Sanskrit only: no published translation is held for this verse.

अनन्यदेवत्वम् इयं क्षमा च; भूमौ च शय्या नियमश् च धर्मे पतिव्रतात्वं विफलं ममेदं; कृतं कृतघ्नेष्व् इव मानुषाणाम्

ananyadevatvam iyaṃ kṣamā ca; bhūmau ca śayyā niyamaś ca dharme pativratātvaṃ viphalaṃ mamedaṃ; kṛtaṃ kṛtaghneṣv iva mānuṣāṇām

Sanskrit only: no published translation is held for this verse.

मोघो हि धर्मश् चरितो ममायं; तथैकपत्नीत्वम् इदं निरर्थम् या त्वां न पश्यामि कृशा विवर्णा; हीना त्वया संगमने निराशा

mogho hi dharmaś carito mamāyaṃ; tathaikapatnītvam idaṃ nirartham yā tvāṃ na paśyāmi kṛśā vivarṇā; hīnā tvayā saṃgamane nirāśā

Sanskrit only: no published translation is held for this verse.

पितुर् निर्देशं नियमेन कृत्वा; वनान् निवृत्तश् चरितव्रतश् च स्त्रीभिस् तु मन्ये विपुलेक्षणाभिः; संरंस्यसे वीतभयः कृतार्थः

pitur nirdeśaṃ niyamena kṛtvā; vanān nivṛttaś caritavrataś ca strībhis tu manye vipulekṣaṇābhiḥ; saṃraṃsyase vītabhayaḥ kṛtārthaḥ

Sanskrit only: no published translation is held for this verse.

अहं तु राम त्वयि जातकामा; चिरं विनाशाय निबद्धभावा मोघं चरित्वाथ तपोव्रतं च; त्यक्ष्यामि धिग् जीवितम् अल्पभाग्या

ahaṃ tu rāma tvayi jātakāmā; ciraṃ vināśāya nibaddhabhāvā moghaṃ caritvātha tapovrataṃ ca; tyakṣyāmi dhig jīvitam alpabhāgyā

Sanskrit only: no published translation is held for this verse.

सा जीवितं क्षिप्रम् अहं त्यजेयं; विषेण शस्त्रेण शितेन वापि विषस्य दाता न तु मे ऽस्ति कश् चिच्; छस्त्रस्य वा वेश्मनि राक्षसस्य

sā jīvitaṃ kṣipram ahaṃ tyajeyaṃ; viṣeṇa śastreṇa śitena vāpi viṣasya dātā na tu me 'sti kaś cic; chastrasya vā veśmani rākṣasasya

Sanskrit only: no published translation is held for this verse.

शोकाभितप्ता बहुधा विचिन्त्य; सीताथ वेण्युद्ग्रथनं गृहीत्वा उद्बध्य वेण्युद्ग्रथनेन शीघ्रम्; अहं गमिष्यामि यमस्य मूलम्

śokābhitaptā bahudhā vicintya; sītātha veṇyudgrathanaṃ gṛhītvā udbadhya veṇyudgrathanena śīghram; ahaṃ gamiṣyāmi yamasya mūlam

Sanskrit only: no published translation is held for this verse.

इतीव सीता बहुधा विलप्य; सर्वात्मना रामम् अनुस्मरन्ती प्रवेपमाना परिशुष्कवक्त्रा; नगोत्तमं पुष्पितम् आससाद

itīva sītā bahudhā vilapya; sarvātmanā rāmam anusmarantī pravepamānā pariśuṣkavaktrā; nagottamaṃ puṣpitam āsasāda

Sanskrit only: no published translation is held for this verse.

उपस्थिता सा मृदुर् सर्वगात्री; शाखां गृहीत्वाथ नगस्य तस्य तस्यास् तु रामं प्रविचिन्तयन्त्या; रामानुजं स्वं च कुलं शुभाङ्ग्याः

upasthitā sā mṛdur sarvagātrī; śākhāṃ gṛhītvātha nagasya tasya tasyās tu rāmaṃ pravicintayantyā; rāmānujaṃ svaṃ ca kulaṃ śubhāṅgyāḥ

Sanskrit only: no published translation is held for this verse.

शोकानिमित्तानि तदा बहूनि; धैर्यार्जितानि प्रवराणि लोके प्रादुर्निमित्तानि तदा बभूवुः; पुरापि सिद्धान्य् उपलक्षितानि

śokānimittāni tadā bahūni; dhairyārjitāni pravarāṇi loke prādurnimittāni tadā babhūvuḥ; purāpi siddhāny upalakṣitāni

Sanskrit only: no published translation is held for this verse.