Vālmīki Rāmāyaṇa (critical edition) 5.27

तथागतां तां व्यथिताम् अनिन्दितां; व्यपेतहर्षां परिदीनमानसाम् शुभां निमित्तानि शुभानि भेजिरे; नरं श्रिया जुष्टम् इवोपजीविनः

tathāgatāṃ tāṃ vyathitām aninditāṃ; vyapetaharṣāṃ paridīnamānasām śubhāṃ nimittāni śubhāni bhejire; naraṃ śriyā juṣṭam ivopajīvinaḥ

Sanskrit only: no published translation is held for this verse.

तस्याः शुभं वामम् अरालपक्ष्म; राजीवृतं कृष्णविशालशुक्लम् प्रास्पन्दतैकं नयनं सुकेश्या; मीनाहतं पद्मम् इवाभिताम्रम्

tasyāḥ śubhaṃ vāmam arālapakṣma; rājīvṛtaṃ kṛṣṇaviśālaśuklam prāspandataikaṃ nayanaṃ sukeśyā; mīnāhataṃ padmam ivābhitāmram

Sanskrit only: no published translation is held for this verse.

भुजश् च चार्वञ्चितपीनवृत्तः; परार्ध्य कालागुरुचन्दनार्हः अनुत्तमेनाध्युषितः प्रियेण; चिरेण वामः समवेपताशु

bhujaś ca cārvañcitapīnavṛttaḥ; parārdhya kālāgurucandanārhaḥ anuttamenādhyuṣitaḥ priyeṇa; cireṇa vāmaḥ samavepatāśu

Sanskrit only: no published translation is held for this verse.

गजेन्द्रहस्तप्रतिमश् च पीनस्; तयोर् द्वयोः संहतयोः सुजातः प्रस्पन्दमानः पुनर् ऊरुर् अस्या; रामं पुरस्तात् स्थितम् आचचक्षे

gajendrahastapratimaś ca pīnas; tayor dvayoḥ saṃhatayoḥ sujātaḥ praspandamānaḥ punar ūrur asyā; rāmaṃ purastāt sthitam ācacakṣe

Sanskrit only: no published translation is held for this verse.

शुभं पुनर् हेमसमानवर्णम्; ईषद्रजोध्वस्तम् इवामलाक्ष्याः वासः स्थितायाः शिखराग्रदन्त्याः; किं चित् परिस्रंसत चारुगात्र्याः

śubhaṃ punar hemasamānavarṇam; īṣadrajodhvastam ivāmalākṣyāḥ vāsaḥ sthitāyāḥ śikharāgradantyāḥ; kiṃ cit parisraṃsata cārugātryāḥ

Sanskrit only: no published translation is held for this verse.

एतैर् निमित्तैर् अपरैश् च सुभ्रूः; संबोधिता प्राग् अपि साधुसिद्धैः वातातपक्लान्तम् इव प्रनष्टं; वर्षेण बीजं प्रतिसंजहर्ष

etair nimittair aparaiś ca subhrūḥ; saṃbodhitā prāg api sādhusiddhaiḥ vātātapaklāntam iva pranaṣṭaṃ; varṣeṇa bījaṃ pratisaṃjaharṣa

Sanskrit only: no published translation is held for this verse.

तस्याः पुनर् बिम्बफलोपमौष्ठं; स्वक्षिभ्रुकेशान्तम् अरालपक्ष्म वक्त्रं बभासे सितशुक्लदंष्ट्रं; राहोर् मुखाच् चन्द्र इव प्रमुक्तः

tasyāḥ punar bimbaphalopamauṣṭhaṃ; svakṣibhrukeśāntam arālapakṣma vaktraṃ babhāse sitaśukladaṃṣṭraṃ; rāhor mukhāc candra iva pramuktaḥ

Sanskrit only: no published translation is held for this verse.

सा वीतशोका व्यपनीततन्द्री; शान्तज्वरा हर्षविबुद्धसत्त्वा अशोभतार्या वदनेन शुक्ले; शीतान्शुना रात्रिर् इवोदितेन

sā vītaśokā vyapanītatandrī; śāntajvarā harṣavibuddhasattvā aśobhatāryā vadanena śukle; śītānśunā rātrir ivoditena

Sanskrit only: no published translation is held for this verse.