Vālmīki Rāmāyaṇa (critical edition) 5.43

ततस् ते राक्षसेन्द्रेण चोदिता मन्त्रिणः सुताः निर्ययुर् भवनात् तस्मात् सप्त सप्तार्चिवर्चसः

tatas te rākṣasendreṇa coditā mantriṇaḥ sutāḥ niryayur bhavanāt tasmāt sapta saptārcivarcasaḥ

Sanskrit only: no published translation is held for this verse.

महाबलपरीवारा धनुष्मन्तो महाबलाः कृतास्त्रास्त्रविदां श्रेष्ठाः परस्परजयैषिणः

mahābalaparīvārā dhanuṣmanto mahābalāḥ kṛtāstrāstravidāṃ śreṣṭhāḥ parasparajayaiṣiṇaḥ

Sanskrit only: no published translation is held for this verse.

हेमजालपरिक्षिप्तैर् ध्वजवद्भिः पताकिभिः तोयदस्वननिर्घोषैर् वाजियुक्तैर् महारथैः

hemajālaparikṣiptair dhvajavadbhiḥ patākibhiḥ toyadasvananirghoṣair vājiyuktair mahārathaiḥ

Sanskrit only: no published translation is held for this verse.

तप्तकाञ्चनचित्राणि चापान्य् अमितविक्रमाः विस्फारयन्तः संहृष्टास् तडिद्वन्त इवाम्बुदाः

taptakāñcanacitrāṇi cāpāny amitavikramāḥ visphārayantaḥ saṃhṛṣṭās taḍidvanta ivāmbudāḥ

Sanskrit only: no published translation is held for this verse.

जनन्यस् तास् ततस् तेषां विदित्वा किंकरान् हतान् बभूवुः शोकसंभ्रान्ताः सबान्धवसुहृज्जनाः

jananyas tās tatas teṣāṃ viditvā kiṃkarān hatān babhūvuḥ śokasaṃbhrāntāḥ sabāndhavasuhṛjjanāḥ

Sanskrit only: no published translation is held for this verse.

ते परस्परसंघर्षास् तप्तकाञ्चनभूषणाः अभिपेतुर् हनूमन्तं तोरणस्थम् अवस्थितम्

te parasparasaṃgharṣās taptakāñcanabhūṣaṇāḥ abhipetur hanūmantaṃ toraṇastham avasthitam

Sanskrit only: no published translation is held for this verse.

सृजन्तो बाणवृष्टिं ते रथगर्जितनिःस्वनाः वृष्टिमन्त इवाम्भोदा विचेरुर् नैरृतर्षभाः

sṛjanto bāṇavṛṣṭiṃ te rathagarjitaniḥsvanāḥ vṛṣṭimanta ivāmbhodā vicerur nairṛtarṣabhāḥ

Sanskrit only: no published translation is held for this verse.

अवकीर्णस् ततस् ताभिर् हनूमाञ् शरवृष्टिभिः अभवत् संवृताकारः शैलराड् इव वृष्टिभिः

avakīrṇas tatas tābhir hanūmāñ śaravṛṣṭibhiḥ abhavat saṃvṛtākāraḥ śailarāḍ iva vṛṣṭibhiḥ

Sanskrit only: no published translation is held for this verse.

स शरान् वञ्चयाम् आस तेषाम् आशुचरः कपिः रथवेगांश् च वीराणां विचरन् विमले ऽम्बरे

sa śarān vañcayām āsa teṣām āśucaraḥ kapiḥ rathavegāṃś ca vīrāṇāṃ vicaran vimale 'mbare

Sanskrit only: no published translation is held for this verse.

स तैः क्रीडन् धनुष्मद्भिर् व्योम्नि वीरः प्रकाशते धनुष्मद्भिर् यथा मेघैर् मारुतः प्रभुर् अम्बरे

sa taiḥ krīḍan dhanuṣmadbhir vyomni vīraḥ prakāśate dhanuṣmadbhir yathā meghair mārutaḥ prabhur ambare

Sanskrit only: no published translation is held for this verse.

स कृत्वा निनदं घोरं त्रासयंस् तां महाचमूम् चकार हनुमान् वेगं तेषु रक्षःसु वीर्यवान्

sa kṛtvā ninadaṃ ghoraṃ trāsayaṃs tāṃ mahācamūm cakāra hanumān vegaṃ teṣu rakṣaḥsu vīryavān

Sanskrit only: no published translation is held for this verse.

तलेनाभिहनत् कांश् चित् पादैः कांश् चित् परंतपः मुष्टिनाभ्यहनत् कांश् चिन् नखैः कांश् चिद् व्यदारयत्

talenābhihanat kāṃś cit pādaiḥ kāṃś cit paraṃtapaḥ muṣṭinābhyahanat kāṃś cin nakhaiḥ kāṃś cid vyadārayat

Sanskrit only: no published translation is held for this verse.

प्रममाथोरसा कांश् चिद् ऊरुभ्याम् अपरान् कपिः के चित् तस्यैव नादेन तत्रैव पतिता भुवि

pramamāthorasā kāṃś cid ūrubhyām aparān kapiḥ ke cit tasyaiva nādena tatraiva patitā bhuvi

Sanskrit only: no published translation is held for this verse.

ततस् तेष्व् अवपन्नेषु भूमौ निपतितेषु च तत् सैन्यम् अगमत् सर्वं दिशो दशभयार्दितम्

tatas teṣv avapanneṣu bhūmau nipatiteṣu ca tat sainyam agamat sarvaṃ diśo daśabhayārditam

Sanskrit only: no published translation is held for this verse.

विनेदुर् विस्वरं नागा निपेतुर् भुवि वाजिनः भग्ननीडध्वजच्छत्रैर् भूश् च कीर्णाभवद् रथैः

vinedur visvaraṃ nāgā nipetur bhuvi vājinaḥ bhagnanīḍadhvajacchatrair bhūś ca kīrṇābhavad rathaiḥ

Sanskrit only: no published translation is held for this verse.

स तान् प्रवृद्धान् विनिहत्य राक्षसान्; महाबलश् चण्डपराक्रमः कपिः युयुत्सुर् अन्यैः पुनर् एव राक्षसैस्; तद् एव वीरो ऽभिजगाम तोरणम्

sa tān pravṛddhān vinihatya rākṣasān; mahābalaś caṇḍaparākramaḥ kapiḥ yuyutsur anyaiḥ punar eva rākṣasais; tad eva vīro 'bhijagāma toraṇam

Sanskrit only: no published translation is held for this verse.