Vālmīki Rāmāyaṇa (critical edition) 5.6

स वेश्मजालं बलवान् ददर्श; व्यासक्तवैदूर्यसुवर्णजालम् यथा महत् प्रावृषि मेघजालं; विद्युत्पिनद्धं सविहंगजालम्

sa veśmajālaṃ balavān dadarśa; vyāsaktavaidūryasuvarṇajālam yathā mahat prāvṛṣi meghajālaṃ; vidyutpinaddhaṃ savihaṃgajālam

Sanskrit only: no published translation is held for this verse.

निवेशनानां विविधाश् च शालाः; प्रधानशङ्खायुधचापशालाः मनोहराश् चापि पुनर् विशाला; ददर्श वेश्माद्रिषु चन्द्रशालाः

niveśanānāṃ vividhāś ca śālāḥ; pradhānaśaṅkhāyudhacāpaśālāḥ manoharāś cāpi punar viśālā; dadarśa veśmādriṣu candraśālāḥ

Sanskrit only: no published translation is held for this verse.

गृहाणि नानावसुराजितानि; देवासुरैश् चापि सुपूजितानि सर्वैश् च दोषैः परिवर्जितानि; कपिर् ददर्श स्वबलार्जितानि

gṛhāṇi nānāvasurājitāni; devāsuraiś cāpi supūjitāni sarvaiś ca doṣaiḥ parivarjitāni; kapir dadarśa svabalārjitāni

Sanskrit only: no published translation is held for this verse.

तानि प्रयत्नाभिसमाहितानि; मयेन साक्षाद् इव निर्मितानि महीतले सर्वगुणोत्तराणि; ददर्श लङ्काधिपतेर् गृहाणि

tāni prayatnābhisamāhitāni; mayena sākṣād iva nirmitāni mahītale sarvaguṇottarāṇi; dadarśa laṅkādhipater gṛhāṇi

Sanskrit only: no published translation is held for this verse.

ततो ददर्शोच्छ्रितमेघरूपं; मनोहरं काञ्चनचारुरूपम् रक्षोऽधिपस्यात्मबलानुरूपं; गृहोत्तमं ह्य् अप्रतिरूपरूपम्

tato dadarśocchritamegharūpaṃ; manoharaṃ kāñcanacārurūpam rakṣo'dhipasyātmabalānurūpaṃ; gṛhottamaṃ hy apratirūparūpam

Sanskrit only: no published translation is held for this verse.

महीतले स्वर्गम् इव प्रकीर्णं; श्रिया ज्वलन्तं बहुरत्नकीर्णम् नानातरूणां कुसुमावकीर्णं; गिरेर् इवाग्रं रजसावकीर्णम्

mahītale svargam iva prakīrṇaṃ; śriyā jvalantaṃ bahuratnakīrṇam nānātarūṇāṃ kusumāvakīrṇaṃ; girer ivāgraṃ rajasāvakīrṇam

Sanskrit only: no published translation is held for this verse.

नारीप्रवेकैर् इव दीप्यमानं; तडिद्भिर् अम्भोदवद् अर्च्यमानम् हंसप्रवेकैर् इव वाह्यमानं; श्रिया युतं खे सुकृतां विमानम्

nārīpravekair iva dīpyamānaṃ; taḍidbhir ambhodavad arcyamānam haṃsapravekair iva vāhyamānaṃ; śriyā yutaṃ khe sukṛtāṃ vimānam

Sanskrit only: no published translation is held for this verse.

यथा नगाग्रं बहुधातुचित्रं; यथा नभश् च ग्रहचन्द्रचित्रम् ददर्श युक्तीकृतमेघचित्रं; विमानरत्नं बहुरत्नचित्रम्

yathā nagāgraṃ bahudhātucitraṃ; yathā nabhaś ca grahacandracitram dadarśa yuktīkṛtameghacitraṃ; vimānaratnaṃ bahuratnacitram

Sanskrit only: no published translation is held for this verse.

मही कृता पर्वतराजिपूर्णा; शैलाः कृता वृक्षवितानपूर्णाः वृक्षाः कृताः पुष्पवितानपूर्णाः; पुष्पं कृतं केसरपत्रपूर्णम्

mahī kṛtā parvatarājipūrṇā; śailāḥ kṛtā vṛkṣavitānapūrṇāḥ vṛkṣāḥ kṛtāḥ puṣpavitānapūrṇāḥ; puṣpaṃ kṛtaṃ kesarapatrapūrṇam

Sanskrit only: no published translation is held for this verse.

कृतानि वेश्मानि च पाण्डुराणि; तथा सुपुष्पा अपि पुष्करिण्यः पुनश् च पद्मानि सकेसराणि; धन्यानि चित्राणि तथा वनानि

kṛtāni veśmāni ca pāṇḍurāṇi; tathā supuṣpā api puṣkariṇyaḥ punaś ca padmāni sakesarāṇi; dhanyāni citrāṇi tathā vanāni

Sanskrit only: no published translation is held for this verse.

पुष्पाह्वयं नाम विराजमानं; रत्नप्रभाभिश् च विवर्धमानम् वेश्मोत्तमानाम् अपि चोच्चमानं; महाकपिस् तत्र महाविमानम्

puṣpāhvayaṃ nāma virājamānaṃ; ratnaprabhābhiś ca vivardhamānam veśmottamānām api coccamānaṃ; mahākapis tatra mahāvimānam

Sanskrit only: no published translation is held for this verse.

कृताश् च वैदूर्यमया विहंगा; रूप्यप्रवालैश् च तथा विहंगाः चित्राश् च नानावसुभिर् भुजंगा; जात्यानुरूपास् तुरगाः शुभाङ्गाः

kṛtāś ca vaidūryamayā vihaṃgā; rūpyapravālaiś ca tathā vihaṃgāḥ citrāś ca nānāvasubhir bhujaṃgā; jātyānurūpās turagāḥ śubhāṅgāḥ

Sanskrit only: no published translation is held for this verse.

प्रवालजाम्बूनदपुष्पपक्षाः; सलीलम् आवर्जितजिह्मपक्षाः कामस्य साक्षाद् इव भान्ति पक्षाः; कृता विहंगाः सुमुखाः सुपक्षाः

pravālajāmbūnadapuṣpapakṣāḥ; salīlam āvarjitajihmapakṣāḥ kāmasya sākṣād iva bhānti pakṣāḥ; kṛtā vihaṃgāḥ sumukhāḥ supakṣāḥ

Sanskrit only: no published translation is held for this verse.

नियुज्यमानाश् च गजाः सुहस्ताः; सकेसराश् चोत्पलपत्रहस्ताः बभूव देवी च कृता सुहस्ता; लक्ष्मीस् तथा पद्मिनि पद्महस्ता

niyujyamānāś ca gajāḥ suhastāḥ; sakesarāś cotpalapatrahastāḥ babhūva devī ca kṛtā suhastā; lakṣmīs tathā padmini padmahastā

Sanskrit only: no published translation is held for this verse.

इतीव तद् गृहम् अभिगम्य शोभनं; सविस्मयो नगम् इव चारुशोभनम् पुनश् च तत् परमसुगन्धि सुन्दरं; हिमात्यये नगम् इव चारुकन्दरम्

itīva tad gṛham abhigamya śobhanaṃ; savismayo nagam iva cāruśobhanam punaś ca tat paramasugandhi sundaraṃ; himātyaye nagam iva cārukandaram

Sanskrit only: no published translation is held for this verse.

ततः स तां कपिर् अभिपत्य पूजितां; चरन् पुरीं दशमुखबाहुपालिताम् अदृश्य तां जनकसुतां सुपूजितां; सुदुःखितां पतिगुणवेगनिर्जिताम्

tataḥ sa tāṃ kapir abhipatya pūjitāṃ; caran purīṃ daśamukhabāhupālitām adṛśya tāṃ janakasutāṃ supūjitāṃ; suduḥkhitāṃ patiguṇaveganirjitām

Sanskrit only: no published translation is held for this verse.

ततस् तदा बहुविधभावितात्मनः; कृतात्मनो जनकसुतां सुवर्त्मनः अपश्यतो ऽभवद् अतिदुःखितं मनः; सुचक्षुषः प्रविचरतो महात्मनः

tatas tadā bahuvidhabhāvitātmanaḥ; kṛtātmano janakasutāṃ suvartmanaḥ apaśyato 'bhavad atiduḥkhitaṃ manaḥ; sucakṣuṣaḥ pravicarato mahātmanaḥ

Sanskrit only: no published translation is held for this verse.