Vālmīki Rāmāyaṇa (critical edition) 6.26

तेन शङ्खविमिश्रेण भेरीशब्देन राघवः उपयतो महाबाहू रामः परपुरंजयः

tena śaṅkhavimiśreṇa bherīśabdena rāghavaḥ upayato mahābāhū rāmaḥ parapuraṃjayaḥ

Sanskrit only: no published translation is held for this verse.

तं निनादं निशम्याथ रावणो राक्षसेश्वरः मुहूर्तं ध्यानम् आस्थाय सचिवान् अभ्युदैक्षत

taṃ ninādaṃ niśamyātha rāvaṇo rākṣaseśvaraḥ muhūrtaṃ dhyānam āsthāya sacivān abhyudaikṣata

Sanskrit only: no published translation is held for this verse.

अथ तान् सचिवांस् तत्र सर्वान् आभाष्य रावणः सभां संनादयन् सर्वाम् इत्य् उवाच महाबलः

atha tān sacivāṃs tatra sarvān ābhāṣya rāvaṇaḥ sabhāṃ saṃnādayan sarvām ity uvāca mahābalaḥ

Sanskrit only: no published translation is held for this verse.

तरणं सागरस्यापि विक्रमं बलसंचयम् यद् उक्तवन्तो रामस्य भवन्तस् तन् मया श्रुतम् भवतश् चाप्य् अहं वेद्मि युद्धे सत्यपराक्रमान्

taraṇaṃ sāgarasyāpi vikramaṃ balasaṃcayam yad uktavanto rāmasya bhavantas tan mayā śrutam bhavataś cāpy ahaṃ vedmi yuddhe satyaparākramān

Sanskrit only: no published translation is held for this verse.

ततस् तु सुमहाप्राज्ञो माल्यवान् नाम राक्षसः रावणस्य वचः श्रुत्वा मातुः पैतामहो ऽब्रवीत्

tatas tu sumahāprājño mālyavān nāma rākṣasaḥ rāvaṇasya vacaḥ śrutvā mātuḥ paitāmaho 'bravīt

Sanskrit only: no published translation is held for this verse.

विद्यास्व् अभिविनीतो यो राजा राजन् नयानुगः स शास्ति चिरम् ऐश्वर्यम् अरींश् च कुरुते वशे

vidyāsv abhivinīto yo rājā rājan nayānugaḥ sa śāsti ciram aiśvaryam arīṃś ca kurute vaśe

Sanskrit only: no published translation is held for this verse.

संदधानो हि कालेन विगृह्णंश् चारिभिः सह स्वपक्षवर्धनं कुर्वन् महद् ऐश्वर्यम् अश्नुते

saṃdadhāno hi kālena vigṛhṇaṃś cāribhiḥ saha svapakṣavardhanaṃ kurvan mahad aiśvaryam aśnute

Sanskrit only: no published translation is held for this verse.

हीयमानेन कर्तव्यो राज्ञा संधिः समेन च न शत्रुम् अवमन्येत ज्यायान् कुर्वीत विग्रहम्

hīyamānena kartavyo rājñā saṃdhiḥ samena ca na śatrum avamanyeta jyāyān kurvīta vigraham

Sanskrit only: no published translation is held for this verse.

तन् मह्यं रोचते संधिः सह रामेण रावण यदर्थम् अभियुक्ताः स्म सीता तस्मै प्रदीयताम्

tan mahyaṃ rocate saṃdhiḥ saha rāmeṇa rāvaṇa yadartham abhiyuktāḥ sma sītā tasmai pradīyatām

Sanskrit only: no published translation is held for this verse.

तस्य देवर्षयः सर्वे गन्धर्वाश् च जयैषिणः विरोधं मा गमस् तेन संधिस् ते तेन रोचताम्

tasya devarṣayaḥ sarve gandharvāś ca jayaiṣiṇaḥ virodhaṃ mā gamas tena saṃdhis te tena rocatām

Sanskrit only: no published translation is held for this verse.

असृजद् भगवान् पक्षौ द्वाव् एव हि पितामहः सुराणाम् असुराणां च धर्माधर्मौ तदाश्रयौ

asṛjad bhagavān pakṣau dvāv eva hi pitāmahaḥ surāṇām asurāṇāṃ ca dharmādharmau tadāśrayau

Sanskrit only: no published translation is held for this verse.

धर्मो हि श्रूयते पक्षः सुराणां च महात्मनाम् अधर्मो रक्षसं पक्षो ह्य् असुराणां च रावण

dharmo hi śrūyate pakṣaḥ surāṇāṃ ca mahātmanām adharmo rakṣasaṃ pakṣo hy asurāṇāṃ ca rāvaṇa

Sanskrit only: no published translation is held for this verse.

धर्मो वै ग्रसते ऽधर्मं ततः कृतम् अभूद् युगम् अधर्मो ग्रसते धर्मं ततस् तिष्यः प्रवर्तते

dharmo vai grasate 'dharmaṃ tataḥ kṛtam abhūd yugam adharmo grasate dharmaṃ tatas tiṣyaḥ pravartate

Sanskrit only: no published translation is held for this verse.

तत् त्वया चरता लोकान् धर्मो विनिहतो महान् अधर्मः प्रगृहीतश् च तेनास्मद्बलिनः परे

tat tvayā caratā lokān dharmo vinihato mahān adharmaḥ pragṛhītaś ca tenāsmadbalinaḥ pare

Sanskrit only: no published translation is held for this verse.

स प्रमादाद् विवृद्धस् ते ऽधर्मो ऽहिर् ग्रसते हि नः विवर्धयति पक्षं च सुराणां सुरभावनः

sa pramādād vivṛddhas te 'dharmo 'hir grasate hi naḥ vivardhayati pakṣaṃ ca surāṇāṃ surabhāvanaḥ

Sanskrit only: no published translation is held for this verse.

विषयेषु प्रसक्तेन यत्किंचित्कारिणा त्वया ऋषीणाम् अग्निकल्पानाम् उद्वेगो जनितो महान् तेषां प्रभावो दुर्धर्षः प्रदीप्त इव पावकः

viṣayeṣu prasaktena yatkiṃcitkāriṇā tvayā ṛṣīṇām agnikalpānām udvego janito mahān teṣāṃ prabhāvo durdharṣaḥ pradīpta iva pāvakaḥ

Sanskrit only: no published translation is held for this verse.

तपसा भावितात्मानो धर्मस्यानुग्रहे रताः मुख्यैर् यज्ञैर् यजन्त्य् एते नित्यं तैस् तैर् द्विजातयः

tapasā bhāvitātmāno dharmasyānugrahe ratāḥ mukhyair yajñair yajanty ete nityaṃ tais tair dvijātayaḥ

Sanskrit only: no published translation is held for this verse.

जुह्वत्य् अग्नींश् च विधिवद् वेदांश् चोच्चैर् अधीयते अभिभूय च रक्षांसि ब्रह्मघोषान् उदैरयन् दिशो विप्रद्रुताः सर्वे स्तनयित्नुर् इवोष्णगे

juhvaty agnīṃś ca vidhivad vedāṃś coccair adhīyate abhibhūya ca rakṣāṃsi brahmaghoṣān udairayan diśo vipradrutāḥ sarve stanayitnur ivoṣṇage

Sanskrit only: no published translation is held for this verse.

ऋषीणाम् अग्निकल्पानाम् अग्निहोत्रसमुत्थितः आदत्ते रक्षसां तेजो धूमो व्याप्य दिशो दश

ṛṣīṇām agnikalpānām agnihotrasamutthitaḥ ādatte rakṣasāṃ tejo dhūmo vyāpya diśo daśa

Sanskrit only: no published translation is held for this verse.

तेषु तेषु च देशेषु पुण्येषु च दृढव्रतैः चर्यमाणं तपस् तीव्रं संतापयति राक्षसान्

teṣu teṣu ca deśeṣu puṇyeṣu ca dṛḍhavrataiḥ caryamāṇaṃ tapas tīvraṃ saṃtāpayati rākṣasān

Sanskrit only: no published translation is held for this verse.

उत्पातान् विविधान् दृष्ट्वा घोरान् बहुविधांस् तथा विनाशम् अनुपश्यामि सर्वेषां रक्षसाम् अहम्

utpātān vividhān dṛṣṭvā ghorān bahuvidhāṃs tathā vināśam anupaśyāmi sarveṣāṃ rakṣasām aham

Sanskrit only: no published translation is held for this verse.

खराभिस् तनिता घोरा मेघाः प्रतिभयंकरः शोणितेनाभिवर्षन्ति लङ्काम् उष्णेन सर्वतः

kharābhis tanitā ghorā meghāḥ pratibhayaṃkaraḥ śoṇitenābhivarṣanti laṅkām uṣṇena sarvataḥ

Sanskrit only: no published translation is held for this verse.

रुदतां वाहनानां च प्रपतन्त्य् अस्रबिन्दवः ध्वजा ध्वस्ता विवर्णाश् च न प्रभान्ति यथापुरम्

rudatāṃ vāhanānāṃ ca prapatanty asrabindavaḥ dhvajā dhvastā vivarṇāś ca na prabhānti yathāpuram

Sanskrit only: no published translation is held for this verse.

व्याला गोमायवो गृध्रा वाशन्ति च सुभैरवम् प्रविश्य लङ्काम् अनिशं समवायांश् च कुर्वते

vyālā gomāyavo gṛdhrā vāśanti ca subhairavam praviśya laṅkām aniśaṃ samavāyāṃś ca kurvate

Sanskrit only: no published translation is held for this verse.

कालिकाः पाण्डुरैर् दन्तैः प्रहसन्त्य् अग्रतः स्थिताः स्त्रियः स्वप्नेषु मुष्णन्त्यो गृहाणि प्रतिभाष्य च

kālikāḥ pāṇḍurair dantaiḥ prahasanty agrataḥ sthitāḥ striyaḥ svapneṣu muṣṇantyo gṛhāṇi pratibhāṣya ca

Sanskrit only: no published translation is held for this verse.

गृहाणां बलिकर्माणि श्वानः पर्युपभुञ्जते खरा गोषु प्रजायन्ते मूषिका नकुलैः सह

gṛhāṇāṃ balikarmāṇi śvānaḥ paryupabhuñjate kharā goṣu prajāyante mūṣikā nakulaiḥ saha

Sanskrit only: no published translation is held for this verse.

मार्जारा द्वीपिभिः सार्धं सूकराः शुनकैः सह किंनरा राक्षसैश् चापि समेयुर् मानुषैः सह

mārjārā dvīpibhiḥ sārdhaṃ sūkarāḥ śunakaiḥ saha kiṃnarā rākṣasaiś cāpi sameyur mānuṣaiḥ saha

Sanskrit only: no published translation is held for this verse.

पाण्डुरा रक्तपादाश् च विहगाः कालचोदिताः राक्षसानां विनाशाय कपोता विचरन्ति च

pāṇḍurā raktapādāś ca vihagāḥ kālacoditāḥ rākṣasānāṃ vināśāya kapotā vicaranti ca

Sanskrit only: no published translation is held for this verse.

चीकी कूचीति वाशन्त्यः शारिका वेश्मसु स्थिताः पतन्ति ग्रथिताश् चापि निर्जिताः कलहैषिणः

cīkī kūcīti vāśantyaḥ śārikā veśmasu sthitāḥ patanti grathitāś cāpi nirjitāḥ kalahaiṣiṇaḥ

Sanskrit only: no published translation is held for this verse.

करालो विकटो मुण्डः पुरुषः कृष्णपिङ्गलः कालो गृहाणि सर्वेषां काले काले ऽन्ववेक्षते एतान्य् अन्यानि दुष्टानि निमित्तान्य् उत्पतन्ति च

karālo vikaṭo muṇḍaḥ puruṣaḥ kṛṣṇapiṅgalaḥ kālo gṛhāṇi sarveṣāṃ kāle kāle 'nvavekṣate etāny anyāni duṣṭāni nimittāny utpatanti ca

Sanskrit only: no published translation is held for this verse.

विष्णुं मन्यामहे रामं मानुषं देहम् आस्थितम् न हि मानुषमात्रो ऽसौ राघवो दृढविक्रमः

viṣṇuṃ manyāmahe rāmaṃ mānuṣaṃ deham āsthitam na hi mānuṣamātro 'sau rāghavo dṛḍhavikramaḥ

Sanskrit only: no published translation is held for this verse.

येन बद्धः समुद्रस्य स सेतुः परमाद्भुतः कुरुष्व नरराजेन संधिं रामेण रावण

yena baddhaḥ samudrasya sa setuḥ paramādbhutaḥ kuruṣva nararājena saṃdhiṃ rāmeṇa rāvaṇa

Sanskrit only: no published translation is held for this verse.

इदं वचस् तत्र निगद्य माल्यवन्; परीक्ष्य रक्षोऽधिपतेर् मनः पुनः अनुत्तमेषूत्तमपौरुषो बली; बभूव तूष्णीं समवेक्ष्य रावणम्

idaṃ vacas tatra nigadya mālyavan; parīkṣya rakṣo'dhipater manaḥ punaḥ anuttameṣūttamapauruṣo balī; babhūva tūṣṇīṃ samavekṣya rāvaṇam

Sanskrit only: no published translation is held for this verse.