Vālmīki Rāmāyaṇa (critical edition) 6.47

तिष्ठ तिष्ठ मम त्वं हि कृत्वा विप्रियम् ईदृशम् क्व नु राक्षसशार्दूल गतो मोक्षम् अवाप्स्यसि

tiṣṭha tiṣṭha mama tvaṃ hi kṛtvā vipriyam īdṛśam kva nu rākṣasaśārdūla gato mokṣam avāpsyasi

Sanskrit only: no published translation is held for this verse.

यदीन्द्रवैवस्वत भास्करान् वा; स्वयम्भुवैश्वानरशंकरान् वा गमिष्यसि त्वं दश वा दिशो वा; तथापि मे नाद्य गतो विमोक्ष्यसे

yadīndravaivasvata bhāskarān vā; svayambhuvaiśvānaraśaṃkarān vā gamiṣyasi tvaṃ daśa vā diśo vā; tathāpi me nādya gato vimokṣyase

Sanskrit only: no published translation is held for this verse.

यश् चैष शक्त्याभिहतस् त्वयाद्य; इच्छन् विषादं सहसाभ्युपेतः स एष रक्षोगणराज मृत्युः; सपुत्रदारस्य तवाद्य युद्धे

yaś caiṣa śaktyābhihatas tvayādya; icchan viṣādaṃ sahasābhyupetaḥ sa eṣa rakṣogaṇarāja mṛtyuḥ; saputradārasya tavādya yuddhe

Sanskrit only: no published translation is held for this verse.

राघवस्य वचः श्रुत्वा राक्षसेन्द्रो महाकपिम् आजघान शरैस् तीक्ष्णैः कालानलशिखोपमैः

rāghavasya vacaḥ śrutvā rākṣasendro mahākapim ājaghāna śarais tīkṣṇaiḥ kālānalaśikhopamaiḥ

Sanskrit only: no published translation is held for this verse.

राक्षसेनाहवे तस्य ताडितस्यापि सायकैः स्वभावतेजोयुक्तस्य भूयस् तेजो व्यवर्धत

rākṣasenāhave tasya tāḍitasyāpi sāyakaiḥ svabhāvatejoyuktasya bhūyas tejo vyavardhata

Sanskrit only: no published translation is held for this verse.

ततो रामो महातेजा रावणेन कृतव्रणम् दृष्ट्वा प्लवगशार्दूलं क्रोधस्य वशम् एयिवान्

tato rāmo mahātejā rāvaṇena kṛtavraṇam dṛṣṭvā plavagaśārdūlaṃ krodhasya vaśam eyivān

Sanskrit only: no published translation is held for this verse.

तस्याभिसंक्रम्य रथं सचक्रं; साश्वध्वजच्छत्रमहापताकम् ससारथिं साशनिशूलखड्गं; रामः प्रचिच्छेद शरैः सुपुङ्खैः

tasyābhisaṃkramya rathaṃ sacakraṃ; sāśvadhvajacchatramahāpatākam sasārathiṃ sāśaniśūlakhaḍgaṃ; rāmaḥ praciccheda śaraiḥ supuṅkhaiḥ

Sanskrit only: no published translation is held for this verse.

अथेन्द्रशत्रुं तरसा जघान; बाणेन वज्राशनिसंनिभेन भुजान्तरे व्यूढसुजातरूपे; वज्रेण मेरुं भगवान् इवेन्द्रः

athendraśatruṃ tarasā jaghāna; bāṇena vajrāśanisaṃnibhena bhujāntare vyūḍhasujātarūpe; vajreṇa meruṃ bhagavān ivendraḥ

Sanskrit only: no published translation is held for this verse.

यो वज्रपाताशनिसंनिपातान्; न चुक्षुभे नापि चचाल राजा स रामबाणाभिहतो भृशार्तश्; चचाल चापं च मुमोच वीरः

yo vajrapātāśanisaṃnipātān; na cukṣubhe nāpi cacāla rājā sa rāmabāṇābhihato bhṛśārtaś; cacāla cāpaṃ ca mumoca vīraḥ

Sanskrit only: no published translation is held for this verse.

तं विह्वलन्तं प्रसमीक्ष्य रामः; समाददे दीप्तम् अथार्धचन्द्रम् तेनार्कवर्णं सहसा किरीटं; चिच्छेद रक्षोऽधिपतेर् महात्माः

taṃ vihvalantaṃ prasamīkṣya rāmaḥ; samādade dīptam athārdhacandram tenārkavarṇaṃ sahasā kirīṭaṃ; ciccheda rakṣo'dhipater mahātmāḥ

Sanskrit only: no published translation is held for this verse.

तं निर्विषाशीविषसंनिकाशं; शान्तार्चिषं सूर्यम् इवाप्रकाशम् गतश्रियं कृत्तकिरीटकूटम्; उवाच रामो युधि राक्षसेन्द्रम्

taṃ nirviṣāśīviṣasaṃnikāśaṃ; śāntārciṣaṃ sūryam ivāprakāśam gataśriyaṃ kṛttakirīṭakūṭam; uvāca rāmo yudhi rākṣasendram

Sanskrit only: no published translation is held for this verse.

कृतं त्वया कर्म महत् सुभीमं; हतप्रवीरश् च कृतस् त्वयाहम् तस्मात् परिश्रान्त इति व्यवस्य; न त्वं शरैर् मृत्युवशं नयामि

kṛtaṃ tvayā karma mahat subhīmaṃ; hatapravīraś ca kṛtas tvayāham tasmāt pariśrānta iti vyavasya; na tvaṃ śarair mṛtyuvaśaṃ nayāmi

Sanskrit only: no published translation is held for this verse.

स एवम् उक्तो हतदर्पहर्षो; निकृत्तचापः स हताश्वसूतः शरार्दितः कृत्तमहाकिरीटो; विवेश लङ्कां सहसा स्म राजा

sa evam ukto hatadarpaharṣo; nikṛttacāpaḥ sa hatāśvasūtaḥ śarārditaḥ kṛttamahākirīṭo; viveśa laṅkāṃ sahasā sma rājā

Sanskrit only: no published translation is held for this verse.

तस्मिन् प्रविष्टे रजनीचरेन्द्रे; महाबले दानवदेवशत्रौ हरीन् विशल्यान् सहलक्ष्मणेन; चकार रामः परमाहवाग्रे

tasmin praviṣṭe rajanīcarendre; mahābale dānavadevaśatrau harīn viśalyān sahalakṣmaṇena; cakāra rāmaḥ paramāhavāgre

Sanskrit only: no published translation is held for this verse.

तस्मिन् प्रभग्ने त्रिदशेन्द्रशत्रौ; सुरासुरा भूतगणा दिशश् च ससागराः सर्षिमहोरगाश् च; तथैव भूम्यम्बुचराश् च हृष्टाः

tasmin prabhagne tridaśendraśatrau; surāsurā bhūtagaṇā diśaś ca sasāgarāḥ sarṣimahoragāś ca; tathaiva bhūmyambucarāś ca hṛṣṭāḥ

Sanskrit only: no published translation is held for this verse.