Vālmīki Rāmāyaṇa (critical edition) 6.55

तं वज्रजाम्बूनदचारुपुङ्खं; प्रदीप्तसूर्यज्वलनप्रकाशम् महेन्द्रवज्राशनितुल्यवेगं; रामः प्रचिक्षेप निशाचराय

taṃ vajrajāmbūnadacārupuṅkhaṃ; pradīptasūryajvalanaprakāśam mahendravajrāśanitulyavegaṃ; rāmaḥ pracikṣepa niśācarāya

Sanskrit only: no published translation is held for this verse.

स सायको राघवबाहुचोदितो; दिशः स्वभासा दश संप्रकाशयन् विधूमवैश्वानरदीप्तदर्शनो; जगाम शक्राशनितुल्यविक्रमः

sa sāyako rāghavabāhucodito; diśaḥ svabhāsā daśa saṃprakāśayan vidhūmavaiśvānaradīptadarśano; jagāma śakrāśanitulyavikramaḥ

Sanskrit only: no published translation is held for this verse.

स तन् महापर्वतकूटसंनिभं; विवृत्तदंष्ट्रं चलचारुकुण्डलम् चकर्त रक्षोऽधिपतेः शिरस् तदा; यथैव वृत्रस्य पुरा पुरंदरः

sa tan mahāparvatakūṭasaṃnibhaṃ; vivṛttadaṃṣṭraṃ calacārukuṇḍalam cakarta rakṣo'dhipateḥ śiras tadā; yathaiva vṛtrasya purā puraṃdaraḥ

Sanskrit only: no published translation is held for this verse.

तद् रामबाणाभिहतं पपात; रक्षःशिरः पर्वतसंनिकाशम् बभञ्ज चर्यागृहगोपुराणि; प्राकारम् उच्चं तम् अपातयच् च

tad rāmabāṇābhihataṃ papāta; rakṣaḥśiraḥ parvatasaṃnikāśam babhañja caryāgṛhagopurāṇi; prākāram uccaṃ tam apātayac ca

Sanskrit only: no published translation is held for this verse.

तच् चातिकायं हिमवत्प्रकाशं; रक्षस् तदा तोयनिधौ पपात ग्राहान् महामीनचयान् भुजंगमान्; ममर्द भूमिं च तथा विवेश

tac cātikāyaṃ himavatprakāśaṃ; rakṣas tadā toyanidhau papāta grāhān mahāmīnacayān bhujaṃgamān; mamarda bhūmiṃ ca tathā viveśa

Sanskrit only: no published translation is held for this verse.

तस्मिर् हते ब्राह्मणदेवशत्रौ; महाबले संयति कुम्भकर्णे चचाल भूर् भूमिधराश् च सर्वे; हर्षाच् च देवास् तुमुलं प्रणेदुः

tasmir hate brāhmaṇadevaśatrau; mahābale saṃyati kumbhakarṇe cacāla bhūr bhūmidharāś ca sarve; harṣāc ca devās tumulaṃ praṇeduḥ

Sanskrit only: no published translation is held for this verse.

ततस् तु देवर्षिमहर्षिपन्नगाः; सुराश् च भूतानि सुपर्णगुह्यकाः सयक्षगन्धर्वगणा नभोगताः; प्रहर्षिता राम पराक्रमेण

tatas tu devarṣimaharṣipannagāḥ; surāś ca bhūtāni suparṇaguhyakāḥ sayakṣagandharvagaṇā nabhogatāḥ; praharṣitā rāma parākrameṇa

Sanskrit only: no published translation is held for this verse.

प्रहर्षम् ईयुर् बहवस् तु वानराः; प्रबुद्धपद्मप्रतिमैर् इवाननैः अपूजयन् राघवम् इष्टभागिनं; हते रिपौ भीमबले दुरासदे

praharṣam īyur bahavas tu vānarāḥ; prabuddhapadmapratimair ivānanaiḥ apūjayan rāghavam iṣṭabhāginaṃ; hate ripau bhīmabale durāsade

Sanskrit only: no published translation is held for this verse.

स कुम्भकर्णं सुरसैन्यमर्दनं; महत्सु युद्धेष्व् अपराजितश्रमम् ननन्द हत्वा भरताग्रजो रणे; महासुरं वृत्रम् इवामराधिपः

sa kumbhakarṇaṃ surasainyamardanaṃ; mahatsu yuddheṣv aparājitaśramam nananda hatvā bharatāgrajo raṇe; mahāsuraṃ vṛtram ivāmarādhipaḥ

Sanskrit only: no published translation is held for this verse.