Vālmīki Rāmāyaṇa (critical edition) 6.59

स्वबलं व्यथितं दृष्ट्वा तुमुलं लोमहर्षणम् भ्रातॄंश् च निहतान् दृष्ट्वा शक्रतुल्यपराक्रमान्

svabalaṃ vyathitaṃ dṛṣṭvā tumulaṃ lomaharṣaṇam bhrātṝṃś ca nihatān dṛṣṭvā śakratulyaparākramān

Sanskrit only: no published translation is held for this verse.

पितृव्यौ चापि संदृश्य समरे संनिषूदितौ महोदरमहापार्श्वौ भ्रातरौ राक्षसर्षभौ

pitṛvyau cāpi saṃdṛśya samare saṃniṣūditau mahodaramahāpārśvau bhrātarau rākṣasarṣabhau

Sanskrit only: no published translation is held for this verse.

चुकोप च महातेजा ब्रह्मदत्तवरो युधि अतिकायो ऽद्रिसंकाशो देवदानवदर्पहा

cukopa ca mahātejā brahmadattavaro yudhi atikāyo 'drisaṃkāśo devadānavadarpahā

Sanskrit only: no published translation is held for this verse.

स भास्करसहस्रस्य संघातम् इव भास्वरम् रथम् आस्थाय शक्रारिर् अभिदुद्राव वानरान्

sa bhāskarasahasrasya saṃghātam iva bhāsvaram ratham āsthāya śakrārir abhidudrāva vānarān

Sanskrit only: no published translation is held for this verse.

स विस्फार्य महच् चापं किरीटी मृष्टकुण्डलः नाम विश्रावयाम् आस ननाद च महास्वनम्

sa visphārya mahac cāpaṃ kirīṭī mṛṣṭakuṇḍalaḥ nāma viśrāvayām āsa nanāda ca mahāsvanam

Sanskrit only: no published translation is held for this verse.

तेन सिंहप्रणादेन नामविश्रावणेन च ज्याशब्देन च भीमेन त्रासयाम् आस वानरान्

tena siṃhapraṇādena nāmaviśrāvaṇena ca jyāśabdena ca bhīmena trāsayām āsa vānarān

Sanskrit only: no published translation is held for this verse.

ते तस्य रूपम् आलोक्य यथा विष्णोस् त्रिविक्रमे भयार्ता वानराः सर्वे विद्रवन्ति दिशो दश

te tasya rūpam ālokya yathā viṣṇos trivikrame bhayārtā vānarāḥ sarve vidravanti diśo daśa

Sanskrit only: no published translation is held for this verse.

ते ऽतिकायं समासाद्य वानरा मूढचेतसः शरण्यं शरणं जग्मुर् लक्ष्मणाग्रजम् आहवे

te 'tikāyaṃ samāsādya vānarā mūḍhacetasaḥ śaraṇyaṃ śaraṇaṃ jagmur lakṣmaṇāgrajam āhave

Sanskrit only: no published translation is held for this verse.

ततो ऽतिकायं काकुत्स्थो रथस्थं पर्वतोपमम् ददर्श धन्विनं दूराद् गर्जन्तं कालमेघवत्

tato 'tikāyaṃ kākutstho rathasthaṃ parvatopamam dadarśa dhanvinaṃ dūrād garjantaṃ kālameghavat

Sanskrit only: no published translation is held for this verse.

स तं दृष्ट्वा महात्मानं राघवस् तु सुविस्मितः वानरान् सान्त्वयित्वा तु विभीषणम् उवाच ह

sa taṃ dṛṣṭvā mahātmānaṃ rāghavas tu suvismitaḥ vānarān sāntvayitvā tu vibhīṣaṇam uvāca ha

Sanskrit only: no published translation is held for this verse.

को ऽसौ पर्वतसंकाशो धनुष्मान् हरिलोचनः युक्ते हयसहस्रेण विशाले स्यन्दने स्थितः

ko 'sau parvatasaṃkāśo dhanuṣmān harilocanaḥ yukte hayasahasreṇa viśāle syandane sthitaḥ

Sanskrit only: no published translation is held for this verse.

य एष निशितैः शूलैः सुतीक्ष्णैः प्रासतोमरैः अर्चिष्मद्भिर् वृतो भाति भूतैर् इव महेश्वरः

ya eṣa niśitaiḥ śūlaiḥ sutīkṣṇaiḥ prāsatomaraiḥ arciṣmadbhir vṛto bhāti bhūtair iva maheśvaraḥ

Sanskrit only: no published translation is held for this verse.

कालजिह्वाप्रकाशाभिर् य एषो ऽभिविराजते आवृतो रथशक्तीभिर् विद्युद्भिर् इव तोयदः

kālajihvāprakāśābhir ya eṣo 'bhivirājate āvṛto rathaśaktībhir vidyudbhir iva toyadaḥ

Sanskrit only: no published translation is held for this verse.

धनूंसि चास्य सज्यानि हेमपृष्ठानि सर्वशः शोभयन्ति रथश्रेष्ठं शक्रपातम् इवाम्बरम्

dhanūṃsi cāsya sajyāni hemapṛṣṭhāni sarvaśaḥ śobhayanti rathaśreṣṭhaṃ śakrapātam ivāmbaram

Sanskrit only: no published translation is held for this verse.

क एष रक्षः शार्दूलो रणभूमिं विराजयन् अभ्येति रथिनां श्रेष्ठो रथेनादित्यतेजसा

ka eṣa rakṣaḥ śārdūlo raṇabhūmiṃ virājayan abhyeti rathināṃ śreṣṭho rathenādityatejasā

Sanskrit only: no published translation is held for this verse.

ध्वजशृङ्गप्रतिष्ठेन राहुणाभिविराजते सूर्यरश्मिप्रभैर् बाणैर् दिशो दश विराजयन्

dhvajaśṛṅgapratiṣṭhena rāhuṇābhivirājate sūryaraśmiprabhair bāṇair diśo daśa virājayan

Sanskrit only: no published translation is held for this verse.

त्रिणतं मेघनिर्ह्रादं हेमपृष्ठम् अलंकृतम् शतक्रतुधनुःप्रख्यं धनुश् चास्य विराजते

triṇataṃ meghanirhrādaṃ hemapṛṣṭham alaṃkṛtam śatakratudhanuḥprakhyaṃ dhanuś cāsya virājate

Sanskrit only: no published translation is held for this verse.

सध्वजः सपताकश् च सानुकर्षो महारथः चतुःसादिसमायुक्तो मेघस्तनितनिस्वनः

sadhvajaḥ sapatākaś ca sānukarṣo mahārathaḥ catuḥsādisamāyukto meghastanitanisvanaḥ

Sanskrit only: no published translation is held for this verse.

विंशतिर् दश चाष्टौ च तूणीररथम् आस्थिताः कार्मुकाणि च भीमानि ज्याश् च काञ्चनपिङ्गलाः

viṃśatir daśa cāṣṭau ca tūṇīraratham āsthitāḥ kārmukāṇi ca bhīmāni jyāś ca kāñcanapiṅgalāḥ

Sanskrit only: no published translation is held for this verse.

द्वौ च खड्गौ रथगतौ पार्श्वस्थौ पार्श्वशोभिनौ चतुर्हस्तत्सरुचितौ व्यक्तहस्तदशायतौ

dvau ca khaḍgau rathagatau pārśvasthau pārśvaśobhinau caturhastatsarucitau vyaktahastadaśāyatau

Sanskrit only: no published translation is held for this verse.

रक्तकण्ठगुणो धीरो महापर्वतसंनिभः कालः कालमहावक्त्रो मेघस्थ इव भास्करः

raktakaṇṭhaguṇo dhīro mahāparvatasaṃnibhaḥ kālaḥ kālamahāvaktro meghastha iva bhāskaraḥ

Sanskrit only: no published translation is held for this verse.

काञ्चनाङ्गदनद्धाभ्यां भुजाभ्याम् एष शोभते शृङ्गाभ्याम् इव तुङ्गाभ्यां हिमवान् पर्वतोत्तमः

kāñcanāṅgadanaddhābhyāṃ bhujābhyām eṣa śobhate śṛṅgābhyām iva tuṅgābhyāṃ himavān parvatottamaḥ

Sanskrit only: no published translation is held for this verse.

कुण्डलाभ्यां तु यस्यैतद् भाति वक्त्रं शुभेक्षणम् पुनर्वस्वन्तरगतं पूर्णबिम्बम् इवैन्दवम्

kuṇḍalābhyāṃ tu yasyaitad bhāti vaktraṃ śubhekṣaṇam punarvasvantaragataṃ pūrṇabimbam ivaindavam

Sanskrit only: no published translation is held for this verse.

आचक्ष्व मे महाबाहो त्वम् एनं राक्षसोत्तमम् यं दृष्ट्वा वानराः सर्वे भयार्ता विद्रुता दिशः

ācakṣva me mahābāho tvam enaṃ rākṣasottamam yaṃ dṛṣṭvā vānarāḥ sarve bhayārtā vidrutā diśaḥ

Sanskrit only: no published translation is held for this verse.

स पृष्ठो राजपुत्रेण रामेणामिततेजसा आचचक्षे महातेजा राघवाय विभीषणः

sa pṛṣṭho rājaputreṇa rāmeṇāmitatejasā ācacakṣe mahātejā rāghavāya vibhīṣaṇaḥ

Sanskrit only: no published translation is held for this verse.

दशग्रीवो महातेजा राजा वैश्रवणानुजः भीमकर्मा महोत्साहो रावणो राक्षसाधिपः

daśagrīvo mahātejā rājā vaiśravaṇānujaḥ bhīmakarmā mahotsāho rāvaṇo rākṣasādhipaḥ

Sanskrit only: no published translation is held for this verse.

तस्यासीद् वीर्यवान् पुत्रो रावणप्रतिमो रणे वृद्धसेवी श्रुतधरः सर्वास्त्रविदुषां वरः

tasyāsīd vīryavān putro rāvaṇapratimo raṇe vṛddhasevī śrutadharaḥ sarvāstraviduṣāṃ varaḥ

Sanskrit only: no published translation is held for this verse.

अश्वपृष्ठे रथे नागे खड्गे धनुषि कर्षणे भेदे सान्त्वे च दाने च नये मन्त्रे च संमतः

aśvapṛṣṭhe rathe nāge khaḍge dhanuṣi karṣaṇe bhede sāntve ca dāne ca naye mantre ca saṃmataḥ

Sanskrit only: no published translation is held for this verse.

यस्य बाहुं समाश्रित्य लङ्का भवति निर्भया तनयं धान्यमालिन्या अतिकायम् इमं विदुः

yasya bāhuṃ samāśritya laṅkā bhavati nirbhayā tanayaṃ dhānyamālinyā atikāyam imaṃ viduḥ

Sanskrit only: no published translation is held for this verse.

एतेनाराधितो ब्रह्मा तपसा भावितात्मना अस्त्राणि चाप्य् अवाप्तानि रिपवश् च पराजिताः

etenārādhito brahmā tapasā bhāvitātmanā astrāṇi cāpy avāptāni ripavaś ca parājitāḥ

Sanskrit only: no published translation is held for this verse.

सुरासुरैर् अवध्यत्वं दत्तम् अस्मै स्वयम्भुवा एतच् च कवचं दिव्यं रथश् चैषो ऽर्कभास्करः

surāsurair avadhyatvaṃ dattam asmai svayambhuvā etac ca kavacaṃ divyaṃ rathaś caiṣo 'rkabhāskaraḥ

Sanskrit only: no published translation is held for this verse.

एतेन शतशो देवा दानवाश् च पराजिताः रक्षितानि च रक्षामि यक्षाश् चापि निषूदिताः

etena śataśo devā dānavāś ca parājitāḥ rakṣitāni ca rakṣāmi yakṣāś cāpi niṣūditāḥ

Sanskrit only: no published translation is held for this verse.

वज्रं विष्टम्भितं येन बाणैर् इन्द्रस्य धीमतः पाशः सलिलराजस्य युद्धे प्रतिहतस् तथा

vajraṃ viṣṭambhitaṃ yena bāṇair indrasya dhīmataḥ pāśaḥ salilarājasya yuddhe pratihatas tathā

Sanskrit only: no published translation is held for this verse.

एषो ऽतिकायो बलवान् राक्षसानाम् अथर्षभः रावणस्य सुतो धीमान् देवदनव दर्पहा

eṣo 'tikāyo balavān rākṣasānām atharṣabhaḥ rāvaṇasya suto dhīmān devadanava darpahā

Sanskrit only: no published translation is held for this verse.

तद् अस्मिन् क्रियतां यत्नः क्षिप्रं पुरुषपुंगव पुरा वानरसैन्यानि क्षयं नयति सायकैः

tad asmin kriyatāṃ yatnaḥ kṣipraṃ puruṣapuṃgava purā vānarasainyāni kṣayaṃ nayati sāyakaiḥ

Sanskrit only: no published translation is held for this verse.

ततो ऽतिकायो बलवान् प्रविश्य हरिवाहिनीम् विस्फारयाम् आस धनुर् ननाद च पुनः पुनः

tato 'tikāyo balavān praviśya harivāhinīm visphārayām āsa dhanur nanāda ca punaḥ punaḥ

Sanskrit only: no published translation is held for this verse.

तं भीमवपुषं दृष्ट्वा रथस्थं रथिनां वरम् अभिपेतुर् महात्मानो ये प्रधानाः प्लवंगमाः

taṃ bhīmavapuṣaṃ dṛṣṭvā rathasthaṃ rathināṃ varam abhipetur mahātmāno ye pradhānāḥ plavaṃgamāḥ

Sanskrit only: no published translation is held for this verse.

कुमुदो द्विविदो मैन्दो नीलः शरभ एव च पादपैर् गिरिशृङ्गैश् च युगपत् समभिद्रवन्

kumudo dvivido maindo nīlaḥ śarabha eva ca pādapair giriśṛṅgaiś ca yugapat samabhidravan

Sanskrit only: no published translation is held for this verse.

तेषां वृक्षांश् च शैलांश् च शरैः काञ्चनभूषणैः अतिकायो महातेजाश् चिच्छेदास्त्रविदां वरः

teṣāṃ vṛkṣāṃś ca śailāṃś ca śaraiḥ kāñcanabhūṣaṇaiḥ atikāyo mahātejāś cicchedāstravidāṃ varaḥ

Sanskrit only: no published translation is held for this verse.

तांश् चैव सरान् स हरीञ् शरैः सर्वायसैर् बली विव्याधाभिमुखः संख्ये भीमकायो निशाचरः

tāṃś caiva sarān sa harīñ śaraiḥ sarvāyasair balī vivyādhābhimukhaḥ saṃkhye bhīmakāyo niśācaraḥ

Sanskrit only: no published translation is held for this verse.

ते ऽर्दिता बाणबर्षेण भिन्नगात्राः प्लवंगमाः न शेकुर् अतिकायस्य प्रतिकर्तुं महारणे

te 'rditā bāṇabarṣeṇa bhinnagātrāḥ plavaṃgamāḥ na śekur atikāyasya pratikartuṃ mahāraṇe

Sanskrit only: no published translation is held for this verse.

तत् सैन्यं हरिवीराणां त्रासयाम् आस राक्षसः मृगयूथम् इव क्रुद्धो हरिर् यौवनम् आस्थितः

tat sainyaṃ harivīrāṇāṃ trāsayām āsa rākṣasaḥ mṛgayūtham iva kruddho harir yauvanam āsthitaḥ

Sanskrit only: no published translation is held for this verse.

स राषसेन्द्रो हरिसैन्यमध्ये; नायुध्यमानं निजघान कं चित् उपेत्य रामं सधनुः कलापी; सगर्वितं वाक्यम् इदं बभाषे

sa rāṣasendro harisainyamadhye; nāyudhyamānaṃ nijaghāna kaṃ cit upetya rāmaṃ sadhanuḥ kalāpī; sagarvitaṃ vākyam idaṃ babhāṣe

Sanskrit only: no published translation is held for this verse.

रथे स्थितो ऽहं शरचापपाणिर्; न प्राकृतं कं चन योधयामि यस्यास्ति शक्तिर् व्यवसाय युक्ता; ददातुं मे क्षिप्रम् इहाद्य युद्धम्

rathe sthito 'haṃ śaracāpapāṇir; na prākṛtaṃ kaṃ cana yodhayāmi yasyāsti śaktir vyavasāya yuktā; dadātuṃ me kṣipram ihādya yuddham

Sanskrit only: no published translation is held for this verse.

तत् तस्य वाक्यं ब्रुवतो निशम्य; चुकोप सौमित्रिर् अमित्रहन्ता अमृष्यमाणश् च समुत्पपात; जग्राह चापं च ततः स्मयित्वा

tat tasya vākyaṃ bruvato niśamya; cukopa saumitrir amitrahantā amṛṣyamāṇaś ca samutpapāta; jagrāha cāpaṃ ca tataḥ smayitvā

Sanskrit only: no published translation is held for this verse.

क्रुद्धः सौमित्रिर् उत्पत्य तूणाद् आक्षिप्य सायकम् पुरस्ताद् अतिकायस्य विचकर्ष महद् धनुः

kruddhaḥ saumitrir utpatya tūṇād ākṣipya sāyakam purastād atikāyasya vicakarṣa mahad dhanuḥ

Sanskrit only: no published translation is held for this verse.

पूरयन् स महीं शैलान् आकाशं सागरं दिशः ज्याशब्दो लक्ष्मणस्योग्रस् त्रासयन् रजनीचरान्

pūrayan sa mahīṃ śailān ākāśaṃ sāgaraṃ diśaḥ jyāśabdo lakṣmaṇasyogras trāsayan rajanīcarān

Sanskrit only: no published translation is held for this verse.

सौमित्रेश् चापनिर्घोषं श्रुत्वा प्रतिभयं तदा विसिष्मिये महातेजा राक्षसेन्द्रात्मजो बली

saumitreś cāpanirghoṣaṃ śrutvā pratibhayaṃ tadā visiṣmiye mahātejā rākṣasendrātmajo balī

Sanskrit only: no published translation is held for this verse.

अथातिकायः कुपितो दृष्ट्वा लक्ष्मणम् उत्थितम् आदाय निशितं बाणम् इदं वचनम् अब्रवीत्

athātikāyaḥ kupito dṛṣṭvā lakṣmaṇam utthitam ādāya niśitaṃ bāṇam idaṃ vacanam abravīt

Sanskrit only: no published translation is held for this verse.

बालस् त्वम् असि सौमित्रे विक्रमेष्व् अविचक्षणः गच्छ किं कालसदृशं मां योधयितुम् इच्छसि

bālas tvam asi saumitre vikrameṣv avicakṣaṇaḥ gaccha kiṃ kālasadṛśaṃ māṃ yodhayitum icchasi

Sanskrit only: no published translation is held for this verse.

न हि मद्बाहुसृष्टानाम् अस्त्राणां हिमवान् अपि सोढुम् उत्सहते वेगम् अन्तरिक्षम् अथो मही

na hi madbāhusṛṣṭānām astrāṇāṃ himavān api soḍhum utsahate vegam antarikṣam atho mahī

Sanskrit only: no published translation is held for this verse.

सुखप्रसुप्तं कालाग्निं प्रबोधयितुम् इच्छसि न्यस्य चापं निवर्तस्व मा प्राणाञ् जहि मद्गतः

sukhaprasuptaṃ kālāgniṃ prabodhayitum icchasi nyasya cāpaṃ nivartasva mā prāṇāñ jahi madgataḥ

Sanskrit only: no published translation is held for this verse.

अथ वा त्वं प्रतिष्टब्धो न निवर्तितुम् इच्छसि तिष्ठ प्राणान् परित्यज्य गमिष्यसि यमक्षयम्

atha vā tvaṃ pratiṣṭabdho na nivartitum icchasi tiṣṭha prāṇān parityajya gamiṣyasi yamakṣayam

Sanskrit only: no published translation is held for this verse.

पश्य मे निशितान् बाणान् अरिदर्पनिषूदनान् ईश्वरायुधसंकाशांस् तप्तकाञ्चनभूषणान्

paśya me niśitān bāṇān aridarpaniṣūdanān īśvarāyudhasaṃkāśāṃs taptakāñcanabhūṣaṇān

Sanskrit only: no published translation is held for this verse.

एष ते सर्पसंकाशो बाणः पास्यति शोणितम् मृगराज इव क्रुद्धो नागराजस्य शोणितम्

eṣa te sarpasaṃkāśo bāṇaḥ pāsyati śoṇitam mṛgarāja iva kruddho nāgarājasya śoṇitam

Sanskrit only: no published translation is held for this verse.

श्रुत्वातिकायस्य वचः सरोषं; सगर्वितं संयति राजपुत्रः स संचुकोपातिबलो बृहच्छ्रीर्; उवाच वाक्यं च ततो महार्थम्

śrutvātikāyasya vacaḥ saroṣaṃ; sagarvitaṃ saṃyati rājaputraḥ sa saṃcukopātibalo bṛhacchrīr; uvāca vākyaṃ ca tato mahārtham

Sanskrit only: no published translation is held for this verse.

न वाक्यमात्रेण भवान् प्रधानो; न कत्थनात् सत्पुरुषा भवन्ति मयि स्थिते धन्विनि बाणपाणौ; विदर्शयस्वात्मबलं दुरात्मन्

na vākyamātreṇa bhavān pradhāno; na katthanāt satpuruṣā bhavanti mayi sthite dhanvini bāṇapāṇau; vidarśayasvātmabalaṃ durātman

Sanskrit only: no published translation is held for this verse.

कर्मणा सूचयात्मानं न विकत्थितुम् अर्हसि पौरुषेण तु यो युक्तः स तु शूर इति स्मृतः

karmaṇā sūcayātmānaṃ na vikatthitum arhasi pauruṣeṇa tu yo yuktaḥ sa tu śūra iti smṛtaḥ

Sanskrit only: no published translation is held for this verse.

सर्वायुधसमायुक्तो धन्वी त्वं रथम् आस्थितः शरैर् वा यदि वाप्य् अस्त्रैर् दर्शयस्व पराक्रमम्

sarvāyudhasamāyukto dhanvī tvaṃ ratham āsthitaḥ śarair vā yadi vāpy astrair darśayasva parākramam

Sanskrit only: no published translation is held for this verse.

ततः शिरस् ते निशितैः पातयिष्याम्य् अहं शरैः मारुतः कालसंपक्वं वृन्तात् तालफलं यथा

tataḥ śiras te niśitaiḥ pātayiṣyāmy ahaṃ śaraiḥ mārutaḥ kālasaṃpakvaṃ vṛntāt tālaphalaṃ yathā

Sanskrit only: no published translation is held for this verse.

अद्य ते मामका बाणास् तप्तकाञ्चनभूषणाः पास्यन्ति रुधिरं गात्राद् बाणशल्यान्तरोत्थितम्

adya te māmakā bāṇās taptakāñcanabhūṣaṇāḥ pāsyanti rudhiraṃ gātrād bāṇaśalyāntarotthitam

Sanskrit only: no published translation is held for this verse.

बालो ऽयम् इति विज्ञाय न मावज्ञातुम् अर्हसि बालो वा यदि वा वृद्धो मृत्युं जानीहि संयुगे

bālo 'yam iti vijñāya na māvajñātum arhasi bālo vā yadi vā vṛddho mṛtyuṃ jānīhi saṃyuge

Sanskrit only: no published translation is held for this verse.

लक्ष्मणस्य वचः श्रुत्वा हेतुमत् परमार्थवत् अतिकायः प्रचुक्रोध बाणं चोत्तमम् आददे

lakṣmaṇasya vacaḥ śrutvā hetumat paramārthavat atikāyaḥ pracukrodha bāṇaṃ cottamam ādade

Sanskrit only: no published translation is held for this verse.

ततो विद्याधरा भूता देवा दैत्या महर्षयः गुह्यकाश् च महात्मानस् तद् युद्धं ददृशुस् तदा

tato vidyādharā bhūtā devā daityā maharṣayaḥ guhyakāś ca mahātmānas tad yuddhaṃ dadṛśus tadā

Sanskrit only: no published translation is held for this verse.

ततो ऽतिकायः कुपितश् चापम् आरोप्य सायकम् लक्ष्मणस्य प्रचिक्षेप संक्षिपन्न् इव चाम्बरम्

tato 'tikāyaḥ kupitaś cāpam āropya sāyakam lakṣmaṇasya pracikṣepa saṃkṣipann iva cāmbaram

Sanskrit only: no published translation is held for this verse.

तम् आपतन्तं निशितं शरम् आशीविषोपमम् अर्धचन्द्रेण चिच्छेद लक्ष्मणः परवीरहा

tam āpatantaṃ niśitaṃ śaram āśīviṣopamam ardhacandreṇa ciccheda lakṣmaṇaḥ paravīrahā

Sanskrit only: no published translation is held for this verse.

तं निकृत्तं शरं दृष्ट्वा कृत्तभोगम् इवोरगम् अतिकायो भृशं क्रुद्धः पञ्चबाणान् समाददे

taṃ nikṛttaṃ śaraṃ dṛṣṭvā kṛttabhogam ivoragam atikāyo bhṛśaṃ kruddhaḥ pañcabāṇān samādade

Sanskrit only: no published translation is held for this verse.

ताञ् शरान् संप्रचिक्षेप लक्ष्मणाय निशाचरः तान् अप्राप्ताञ् शरैस् तीक्ष्णैश् चिच्छेद भरतानुजः

tāñ śarān saṃpracikṣepa lakṣmaṇāya niśācaraḥ tān aprāptāñ śarais tīkṣṇaiś ciccheda bharatānujaḥ

Sanskrit only: no published translation is held for this verse.

स तांश् छित्त्वा शरैस् तीक्ष्णैर् लक्ष्मणः परवीरहा आददे निशितं बाणं ज्वलन्तम् इव तेजसा

sa tāṃś chittvā śarais tīkṣṇair lakṣmaṇaḥ paravīrahā ādade niśitaṃ bāṇaṃ jvalantam iva tejasā

Sanskrit only: no published translation is held for this verse.

तम् आदाय धनुः श्रेष्ठे योजयाम् आस लक्ष्मणः विचकर्ष च वेगेन विससर्ज च सायकम्

tam ādāya dhanuḥ śreṣṭhe yojayām āsa lakṣmaṇaḥ vicakarṣa ca vegena visasarja ca sāyakam

Sanskrit only: no published translation is held for this verse.

पूर्णायतविसृष्टेन शरेणानत पर्वणा ललाटे राक्षसश्रेष्ठम् आजघान स वीर्यवान्

pūrṇāyatavisṛṣṭena śareṇānata parvaṇā lalāṭe rākṣasaśreṣṭham ājaghāna sa vīryavān

Sanskrit only: no published translation is held for this verse.

स ललाटे शरो मग्नस् तस्य भीमस्य रक्षसः ददृशे शोणितेनाक्तः पन्नगेन्द्र इवाहवे

sa lalāṭe śaro magnas tasya bhīmasya rakṣasaḥ dadṛśe śoṇitenāktaḥ pannagendra ivāhave

Sanskrit only: no published translation is held for this verse.

राक्षसः प्रचकम्पे च लक्ष्मणेषु प्रकम्पितः रुद्रबाणहतं भीमं यथा त्रिपुरगोपुरम्

rākṣasaḥ pracakampe ca lakṣmaṇeṣu prakampitaḥ rudrabāṇahataṃ bhīmaṃ yathā tripuragopuram

Sanskrit only: no published translation is held for this verse.

चिन्तयाम् आस चाश्वस्य विमृश्य च महाबलः साधु बाणनिपातेन श्वाघनीयो ऽसि मे रिपुः

cintayām āsa cāśvasya vimṛśya ca mahābalaḥ sādhu bāṇanipātena śvāghanīyo 'si me ripuḥ

Sanskrit only: no published translation is held for this verse.

विचार्यैवं विनम्यास्यं विनम्य च भुजाव् उभौ स रथोपस्थम् आस्थाय रथेन प्रचचार ह

vicāryaivaṃ vinamyāsyaṃ vinamya ca bhujāv ubhau sa rathopastham āsthāya rathena pracacāra ha

Sanskrit only: no published translation is held for this verse.

एकं त्रीन् पञ्च सप्तेति सायकान् राक्षसर्षभः आददे संदधे चापि विचकर्षोत्ससर्ज च

ekaṃ trīn pañca sapteti sāyakān rākṣasarṣabhaḥ ādade saṃdadhe cāpi vicakarṣotsasarja ca

Sanskrit only: no published translation is held for this verse.

ते बाणाः कालसंकाशा राक्षसेन्द्रधनुश् च्युताः हेमपुङ्खा रविप्रख्याश् चक्रुर् दीप्तम् इवाम्बरम्

te bāṇāḥ kālasaṃkāśā rākṣasendradhanuś cyutāḥ hemapuṅkhā raviprakhyāś cakrur dīptam ivāmbaram

Sanskrit only: no published translation is held for this verse.

ततस् तान् राक्षसोत्सृष्टाञ् शरौघान् रावणानुजः असंभ्रान्तः प्रचिच्छेद निशितैर् बहुभिः शरैः

tatas tān rākṣasotsṛṣṭāñ śaraughān rāvaṇānujaḥ asaṃbhrāntaḥ praciccheda niśitair bahubhiḥ śaraiḥ

Sanskrit only: no published translation is held for this verse.

ताञ् शरान् युधि संप्रेक्ष्य निकृत्तान् रावणात्मजः चुकोप त्रिदशेन्द्रारिर् जग्राह निशितं शरम्

tāñ śarān yudhi saṃprekṣya nikṛttān rāvaṇātmajaḥ cukopa tridaśendrārir jagrāha niśitaṃ śaram

Sanskrit only: no published translation is held for this verse.

स संधाय महातेजास् तं बाणं सहसोत्सृजत् ततः सौमित्रिम् आयान्तम् आजघान स्तनान्तरे

sa saṃdhāya mahātejās taṃ bāṇaṃ sahasotsṛjat tataḥ saumitrim āyāntam ājaghāna stanāntare

Sanskrit only: no published translation is held for this verse.

अतिकायेन सौमित्रिस् ताडितो युधि वक्षसि सुस्राव रुधिरं तीव्रं मदं मत्त इव द्विपः

atikāyena saumitris tāḍito yudhi vakṣasi susrāva rudhiraṃ tīvraṃ madaṃ matta iva dvipaḥ

Sanskrit only: no published translation is held for this verse.

स चकार तदात्मानं विशल्यं सहसा विभुः जग्राह च शरं तीष्णम् अस्त्रेणापि समादधे

sa cakāra tadātmānaṃ viśalyaṃ sahasā vibhuḥ jagrāha ca śaraṃ tīṣṇam astreṇāpi samādadhe

Sanskrit only: no published translation is held for this verse.

आग्नेयेन तदास्त्रेण योजयाम् आस सायकम् स जज्वाल तदा बाणो धनुश् चास्य महात्मनः

āgneyena tadāstreṇa yojayām āsa sāyakam sa jajvāla tadā bāṇo dhanuś cāsya mahātmanaḥ

Sanskrit only: no published translation is held for this verse.

अतिकायो ऽतितेजस्वी सौरम् अस्त्रं समाददे तेन बाणं भुजंगाभं हेमपुङ्खम् अयोजयत्

atikāyo 'titejasvī sauram astraṃ samādade tena bāṇaṃ bhujaṃgābhaṃ hemapuṅkham ayojayat

Sanskrit only: no published translation is held for this verse.

ततस् तं ज्वलितं घोरं लक्ष्मणः शरम् आहितम् अतिकायाय चिक्षेप कालदण्डम् इवान्तकः

tatas taṃ jvalitaṃ ghoraṃ lakṣmaṇaḥ śaram āhitam atikāyāya cikṣepa kāladaṇḍam ivāntakaḥ

Sanskrit only: no published translation is held for this verse.

आग्नेयेनाभिसंयुक्तं दृष्ट्वा बाणं निशाचरः उत्ससर्ज तदा बाणं दीप्तं सूर्यास्त्रयोजितम्

āgneyenābhisaṃyuktaṃ dṛṣṭvā bāṇaṃ niśācaraḥ utsasarja tadā bāṇaṃ dīptaṃ sūryāstrayojitam

Sanskrit only: no published translation is held for this verse.

ताव् उभाव् अम्बरे बाणाव् अन्योन्यम् अभिजघ्नतुः तेजसा संप्रदीप्ताग्रौ क्रुद्धाव् इव भुजं गमौ

tāv ubhāv ambare bāṇāv anyonyam abhijaghnatuḥ tejasā saṃpradīptāgrau kruddhāv iva bhujaṃ gamau

Sanskrit only: no published translation is held for this verse.

ताव् अन्योन्यं विनिर्दह्य पेततुर् धरणीतले निरर्चिषौ भस्मकृतौ न भ्राजेते शरोत्तमौ

tāv anyonyaṃ vinirdahya petatur dharaṇītale nirarciṣau bhasmakṛtau na bhrājete śarottamau

Sanskrit only: no published translation is held for this verse.

ततो ऽतिकायः संक्रुद्धस् त्व् अस्त्रम् ऐषीकम् उत्सृजत् तत् प्रचिच्छेद सौमित्रिर् अस्त्रम् ऐन्द्रेण वीर्यवान्

tato 'tikāyaḥ saṃkruddhas tv astram aiṣīkam utsṛjat tat praciccheda saumitrir astram aindreṇa vīryavān

Sanskrit only: no published translation is held for this verse.

ऐषीकं निहतं दृष्ट्वा कुमारो रावणात्मजः याम्येनास्त्रेण संक्रुद्धो योजयाम् आस सायकम्

aiṣīkaṃ nihataṃ dṛṣṭvā kumāro rāvaṇātmajaḥ yāmyenāstreṇa saṃkruddho yojayām āsa sāyakam

Sanskrit only: no published translation is held for this verse.

ततस् तद् अस्त्रं चिक्षेप लक्ष्मणाय निशाचरः वायव्येन तद् अस्त्रं तु निजघान स लक्ष्मणः

tatas tad astraṃ cikṣepa lakṣmaṇāya niśācaraḥ vāyavyena tad astraṃ tu nijaghāna sa lakṣmaṇaḥ

Sanskrit only: no published translation is held for this verse.

अथैनं शरधाराभिर् धाराभिर् इव तोयदः अभ्यवर्षत संक्रुद्धो लक्ष्मणो रावणात्मजम्

athainaṃ śaradhārābhir dhārābhir iva toyadaḥ abhyavarṣata saṃkruddho lakṣmaṇo rāvaṇātmajam

Sanskrit only: no published translation is held for this verse.

ते ऽतिकायं समासाद्य कवचे वज्रभूषिते भग्नाग्रशल्याः सहसा पेतुर् बाणा महीतले

te 'tikāyaṃ samāsādya kavace vajrabhūṣite bhagnāgraśalyāḥ sahasā petur bāṇā mahītale

Sanskrit only: no published translation is held for this verse.

तान् मोघान् अभिसंप्रेक्ष्य लक्ष्मणः परवीरहा अभ्यवर्षत बाणानां सहस्रेण महायशाः

tān moghān abhisaṃprekṣya lakṣmaṇaḥ paravīrahā abhyavarṣata bāṇānāṃ sahasreṇa mahāyaśāḥ

Sanskrit only: no published translation is held for this verse.

स वर्ष्यमाणो बाणौघैर् अतिकायो महाबलः अवध्यकवचः संख्ये राक्षसो नैव विव्यथे

sa varṣyamāṇo bāṇaughair atikāyo mahābalaḥ avadhyakavacaḥ saṃkhye rākṣaso naiva vivyathe

Sanskrit only: no published translation is held for this verse.

न शशाक रुजं कर्तुं युधि तस्य नरोत्तमः अथैनम् अभ्युपागम्य वायुर् वाक्यम् उवाच ह

na śaśāka rujaṃ kartuṃ yudhi tasya narottamaḥ athainam abhyupāgamya vāyur vākyam uvāca ha

Sanskrit only: no published translation is held for this verse.

ब्रह्मदत्तवरो ह्य् एष अवध्य कवचावृतः ब्राह्मेणास्त्रेण भिन्ध्य् एनम् एष वध्यो हि नान्यथा

brahmadattavaro hy eṣa avadhya kavacāvṛtaḥ brāhmeṇāstreṇa bhindhy enam eṣa vadhyo hi nānyathā

Sanskrit only: no published translation is held for this verse.

ततः स वायोर् वचनं निशम्य; सौमित्रिर् इन्द्रप्रतिमानवीर्यः समाददे बाणम् अमोघवेगं; तद् ब्राह्मम् अस्त्रं सहसा नियोज्य

tataḥ sa vāyor vacanaṃ niśamya; saumitrir indrapratimānavīryaḥ samādade bāṇam amoghavegaṃ; tad brāhmam astraṃ sahasā niyojya

Sanskrit only: no published translation is held for this verse.

तस्मिन् वरास्त्रे तु नियुज्यमाने; सौमित्रिणा बाणवरे शिताग्रे दिशः सचन्द्रार्कमहाग्रहाश् च; नभश् च तत्रास ररास चोर्वी

tasmin varāstre tu niyujyamāne; saumitriṇā bāṇavare śitāgre diśaḥ sacandrārkamahāgrahāś ca; nabhaś ca tatrāsa rarāsa corvī

Sanskrit only: no published translation is held for this verse.

तं ब्रह्मणो ऽस्त्रेण नियुज्य चापे; शरं सुपुङ्खं यमदूतकल्पम् सौमित्रिर् इन्द्रारिसुतस्य तस्य; ससर्ज बाणं युधि वज्रकल्पम्

taṃ brahmaṇo 'streṇa niyujya cāpe; śaraṃ supuṅkhaṃ yamadūtakalpam saumitrir indrārisutasya tasya; sasarja bāṇaṃ yudhi vajrakalpam

Sanskrit only: no published translation is held for this verse.

तं लक्ष्मणोत्सृष्टम् अमोघवेगं; समापतन्तं ज्वलनप्रकाशम् सुवर्णवज्रोत्तमचित्रपुङ्खं; तदातिकायः समरे ददर्श

taṃ lakṣmaṇotsṛṣṭam amoghavegaṃ; samāpatantaṃ jvalanaprakāśam suvarṇavajrottamacitrapuṅkhaṃ; tadātikāyaḥ samare dadarśa

Sanskrit only: no published translation is held for this verse.

तं प्रेक्षमाणः सहसातिकायो; जघान बाणैर् निशितैर् अनेकैः स सायकस् तस्य सुपर्णवेगस्; तदातिवेगेन जगाम पार्श्वम्

taṃ prekṣamāṇaḥ sahasātikāyo; jaghāna bāṇair niśitair anekaiḥ sa sāyakas tasya suparṇavegas; tadātivegena jagāma pārśvam

Sanskrit only: no published translation is held for this verse.

तम् आगतं प्रेक्ष्य तदातिकायो; बाणं प्रदीप्तान्तककालकल्पम् जघान शक्त्यृष्टिगदाकुठारैः; शूलैर् हलैश् चाप्य् अविपन्नचेष्टः

tam āgataṃ prekṣya tadātikāyo; bāṇaṃ pradīptāntakakālakalpam jaghāna śaktyṛṣṭigadākuṭhāraiḥ; śūlair halaiś cāpy avipannaceṣṭaḥ

Sanskrit only: no published translation is held for this verse.

तान्य् आयुधान्य् अद्भुतविग्रहाणि; मोघानि कृत्वा स शरो ऽग्निदीप्तः प्रसह्य तस्यैव किरीटजुष्टं; तदातिकायस्य शिरो जहार

tāny āyudhāny adbhutavigrahāṇi; moghāni kṛtvā sa śaro 'gnidīptaḥ prasahya tasyaiva kirīṭajuṣṭaṃ; tadātikāyasya śiro jahāra

Sanskrit only: no published translation is held for this verse.

तच् छिरः सशिरस् त्राणं लक्ष्मणेषुप्रपीडितम् पपात सहसा भूमौ शृङ्गं हिमवतो यथा

tac chiraḥ saśiras trāṇaṃ lakṣmaṇeṣuprapīḍitam papāta sahasā bhūmau śṛṅgaṃ himavato yathā

Sanskrit only: no published translation is held for this verse.

प्रहर्षयुक्ता बहवस् तु वानरा; प्रबुद्धपद्मप्रतिमाननास् तदा अपूजयंल् लक्ष्मणम् इष्टभागिनं; हते रिपौ भीमबले दुरासदे

praharṣayuktā bahavas tu vānarā; prabuddhapadmapratimānanās tadā apūjayaṃl lakṣmaṇam iṣṭabhāginaṃ; hate ripau bhīmabale durāsade

Sanskrit only: no published translation is held for this verse.