Vālmīki Rāmāyaṇa (critical edition) 6.7

इत्य् उक्ता राक्षसेन्द्रेण राक्षसास् ते महाबलाः ऊचुः प्राञ्जलयः सर्वे रावणं राक्षसेश्वरम्

ity uktā rākṣasendreṇa rākṣasās te mahābalāḥ ūcuḥ prāñjalayaḥ sarve rāvaṇaṃ rākṣaseśvaram

Sanskrit only: no published translation is held for this verse.

राजन् परिघशक्त्यृष्टिशूलपट्टससंकुलम् सुमहन् नो बलं कस्माद् विषादं भजते भवान्

rājan parighaśaktyṛṣṭiśūlapaṭṭasasaṃkulam sumahan no balaṃ kasmād viṣādaṃ bhajate bhavān

Sanskrit only: no published translation is held for this verse.

कैलासशिखरावासी यक्षैर् बहुभिर् आवृतः सुमहत् कदनं कृत्वा वश्यस् ते धनदः कृतः

kailāsaśikharāvāsī yakṣair bahubhir āvṛtaḥ sumahat kadanaṃ kṛtvā vaśyas te dhanadaḥ kṛtaḥ

Sanskrit only: no published translation is held for this verse.

स महेश्वरसख्येन श्लाघमानस् त्वया विभो निर्जितः समरे रोषाल् लोकपालो महाबलः

sa maheśvarasakhyena ślāghamānas tvayā vibho nirjitaḥ samare roṣāl lokapālo mahābalaḥ

Sanskrit only: no published translation is held for this verse.

विनिहत्य च यक्षौघान् विक्षोभ्य च विगृह्य च त्वया कैलासशिखराद् विमानम् इदम् आहृतम्

vinihatya ca yakṣaughān vikṣobhya ca vigṛhya ca tvayā kailāsaśikharād vimānam idam āhṛtam

Sanskrit only: no published translation is held for this verse.

मयेन दानवेन्द्रेण त्वद्भयात् सख्यम् इच्छता दुहिता तव भार्यार्थे दत्ता राक्षसपुंगव

mayena dānavendreṇa tvadbhayāt sakhyam icchatā duhitā tava bhāryārthe dattā rākṣasapuṃgava

Sanskrit only: no published translation is held for this verse.

दानवेन्द्रो मधुर् नाम वीर्योत्सिक्तो दुरासदः विगृह्य वशम् आनीतः कुम्भीनस्याः सुखावहः

dānavendro madhur nāma vīryotsikto durāsadaḥ vigṛhya vaśam ānītaḥ kumbhīnasyāḥ sukhāvahaḥ

Sanskrit only: no published translation is held for this verse.

निर्जितास् ते महाबाहो नागा गत्वा रसातलम् वासुकिस् तक्षकः शङ्खो जटी च वशम् आहृताः

nirjitās te mahābāho nāgā gatvā rasātalam vāsukis takṣakaḥ śaṅkho jaṭī ca vaśam āhṛtāḥ

Sanskrit only: no published translation is held for this verse.

अक्षया बलवन्तश् च शूरा लब्धवराः पुनः त्वया संवत्सरं युद्ध्वा समरे दानवा विभो

akṣayā balavantaś ca śūrā labdhavarāḥ punaḥ tvayā saṃvatsaraṃ yuddhvā samare dānavā vibho

Sanskrit only: no published translation is held for this verse.

स्वबलं समुपाश्रित्य नीता वशम् अरिंदम मायाश् चाधिगतास् तत्र बहवो राक्षसाधिप

svabalaṃ samupāśritya nītā vaśam ariṃdama māyāś cādhigatās tatra bahavo rākṣasādhipa

Sanskrit only: no published translation is held for this verse.

शूराश् च बलवन्तश् च वरुणस्य सुता रणे निर्जितास् ते महाबाहो चतुर्विधबलानुगाः

śūrāś ca balavantaś ca varuṇasya sutā raṇe nirjitās te mahābāho caturvidhabalānugāḥ

Sanskrit only: no published translation is held for this verse.

मृत्युदण्डमहाग्राहं शाल्मलिद्वीपमण्डितम् अवगाह्य त्वया राजन् यमस्य बलसागरम्

mṛtyudaṇḍamahāgrāhaṃ śālmalidvīpamaṇḍitam avagāhya tvayā rājan yamasya balasāgaram

Sanskrit only: no published translation is held for this verse.

जयश् च विप्लुलः प्राप्तो मृत्युश् च प्रतिषेधितः सुयुद्धेन च ते सर्वे लोकास् तत्र सुतोषिताः

jayaś ca viplulaḥ prāpto mṛtyuś ca pratiṣedhitaḥ suyuddhena ca te sarve lokās tatra sutoṣitāḥ

Sanskrit only: no published translation is held for this verse.

क्षत्रियैर् बहुभिर् वीरैः शक्रतुल्यपराक्रमैः आसीद् वसुमती पूर्णा महद्भिर् इव पादपैः

kṣatriyair bahubhir vīraiḥ śakratulyaparākramaiḥ āsīd vasumatī pūrṇā mahadbhir iva pādapaiḥ

Sanskrit only: no published translation is held for this verse.

तेषां वीर्यगुणोत्साहैर् न समो राघवो रणे प्रसह्य ते त्वया राजन् हताः परमदुर्जयाः

teṣāṃ vīryaguṇotsāhair na samo rāghavo raṇe prasahya te tvayā rājan hatāḥ paramadurjayāḥ

Sanskrit only: no published translation is held for this verse.

राजन् नापद् अयुक्तेयम् आगता प्राकृताज् जनात् हृदि नैव त्वया कार्या त्वं वधिष्यसि राघवम्

rājan nāpad ayukteyam āgatā prākṛtāj janāt hṛdi naiva tvayā kāryā tvaṃ vadhiṣyasi rāghavam

Sanskrit only: no published translation is held for this verse.