Vālmīki Rāmāyaṇa (critical edition) 7.55

एवम् उक्तस् तु रामेण परां व्रीडाम् उपागतः शत्रुघ्नो वीर्यसंपन्नो मन्दं मन्दम् उवाच ह

evam uktas tu rāmeṇa parāṃ vrīḍām upāgataḥ śatrughno vīryasaṃpanno mandaṃ mandam uvāca ha

Sanskrit only: no published translation is held for this verse.

अवश्यं करणीयं च शासनं पुरुषर्षभ तव चैव महाभाग शासनं दुरतिक्रमम् अयं कामकरो राजंस् तवास्मि पुरुषर्षभ

avaśyaṃ karaṇīyaṃ ca śāsanaṃ puruṣarṣabha tava caiva mahābhāga śāsanaṃ duratikramam ayaṃ kāmakaro rājaṃs tavāsmi puruṣarṣabha

Sanskrit only: no published translation is held for this verse.

एवम् उक्ते तु शूरेण शत्रुघ्नेन महात्मना उवाच रामः संहृष्टो लक्ष्मणं भरतं तथा

evam ukte tu śūreṇa śatrughnena mahātmanā uvāca rāmaḥ saṃhṛṣṭo lakṣmaṇaṃ bharataṃ tathā

Sanskrit only: no published translation is held for this verse.

संभारान् अभिषेकस्य आनयध्वं समाहिताः अद्यैव पुरुषव्याघ्रम् अभिषेक्ष्यामि दुर्जयम्

saṃbhārān abhiṣekasya ānayadhvaṃ samāhitāḥ adyaiva puruṣavyāghram abhiṣekṣyāmi durjayam

Sanskrit only: no published translation is held for this verse.

पुरोधसं च काकुत्स्थौ नैगमान् ऋत्विजस् तथा मन्त्रिणश् चैव मे सर्वान् आनयध्वं ममाज्ञया

purodhasaṃ ca kākutsthau naigamān ṛtvijas tathā mantriṇaś caiva me sarvān ānayadhvaṃ mamājñayā

Sanskrit only: no published translation is held for this verse.

राज्ञः शासनम् आज्ञाय तथाकुर्वन् महारथः अभिषेकसमारम्भं पुरस्कृत्य पुरोधसं प्रविष्टा राजभवनं पुरंदर गृहोपमम्

rājñaḥ śāsanam ājñāya tathākurvan mahārathaḥ abhiṣekasamārambhaṃ puraskṛtya purodhasaṃ praviṣṭā rājabhavanaṃ puraṃdara gṛhopamam

Sanskrit only: no published translation is held for this verse.

ततो ऽभिषेको ववृधे शत्रुघ्नस्य महात्मनः संप्रहर्षकरः श्रीमान् राघवस्य पुरस्य च

tato 'bhiṣeko vavṛdhe śatrughnasya mahātmanaḥ saṃpraharṣakaraḥ śrīmān rāghavasya purasya ca

Sanskrit only: no published translation is held for this verse.

ततो ऽभिषिक्तं शत्रुघ्नम् अङ्कम् आरोप्य राघवः उवाच मधुरां वाणीं तेजस् तस्याभिपूरयन्

tato 'bhiṣiktaṃ śatrughnam aṅkam āropya rāghavaḥ uvāca madhurāṃ vāṇīṃ tejas tasyābhipūrayan

Sanskrit only: no published translation is held for this verse.

अयं शरस् त्व् अमोघस् ते दिव्यः परपुरंजयः अनेन लवणं सौम्य हन्तासि रघुनन्दन

ayaṃ śaras tv amoghas te divyaḥ parapuraṃjayaḥ anena lavaṇaṃ saumya hantāsi raghunandana

Sanskrit only: no published translation is held for this verse.

सृष्टः शरो ऽयं काकुत्स्थ यदा शेते महार्णवे स्वयम्भूर् अजितो देवो यं नापश्यन् सुरासुराः

sṛṣṭaḥ śaro 'yaṃ kākutstha yadā śete mahārṇave svayambhūr ajito devo yaṃ nāpaśyan surāsurāḥ

Sanskrit only: no published translation is held for this verse.

अदृश्यः सर्वभूतानां तेनायं हि शरोत्तमः सृष्टः क्रोधाभिभूतेन विनाशार्थं दुरात्मनोः मधुकौटभयोर् वीर विघाते वर्तमानयोः

adṛśyaḥ sarvabhūtānāṃ tenāyaṃ hi śarottamaḥ sṛṣṭaḥ krodhābhibhūtena vināśārthaṃ durātmanoḥ madhukauṭabhayor vīra vighāte vartamānayoḥ

Sanskrit only: no published translation is held for this verse.

स्रष्टुकामेन लोकांस् त्रींस् तौ चानेन हतौ युधि अनेन शरमुख्येन ततो लोकांश् चकार सः

sraṣṭukāmena lokāṃs trīṃs tau cānena hatau yudhi anena śaramukhyena tato lokāṃś cakāra saḥ

Sanskrit only: no published translation is held for this verse.

नायं मया शरः पूर्वं रावणस्य वधार्थिना मुखः शत्रुघ्न भूतानां महांस् त्रासो भवेद् इति

nāyaṃ mayā śaraḥ pūrvaṃ rāvaṇasya vadhārthinā mukhaḥ śatrughna bhūtānāṃ mahāṃs trāso bhaved iti

Sanskrit only: no published translation is held for this verse.

यच् च तस्य महच् छूलं त्र्यम्बकेण महात्मना दत्तं शत्रुविनाशाय मधोर् आयुधम् उत्तमम्

yac ca tasya mahac chūlaṃ tryambakeṇa mahātmanā dattaṃ śatruvināśāya madhor āyudham uttamam

Sanskrit only: no published translation is held for this verse.

तत् संनिक्षिप्य भवने पूज्यमानं पुनः पुनः दिशः सर्वाः समालोक्य प्राप्नोत्य् आहारम् आत्मनः

tat saṃnikṣipya bhavane pūjyamānaṃ punaḥ punaḥ diśaḥ sarvāḥ samālokya prāpnoty āhāram ātmanaḥ

Sanskrit only: no published translation is held for this verse.

यदा तु युद्धम् आकाङ्क्षन् कश् चिद् एनं समाह्वयेत् तदा शूलं गृहीत्वा तद् भस्म रक्षः करोति तम्

yadā tu yuddham ākāṅkṣan kaś cid enaṃ samāhvayet tadā śūlaṃ gṛhītvā tad bhasma rakṣaḥ karoti tam

Sanskrit only: no published translation is held for this verse.

स त्वं पुरुषशार्दूल तम् आयुधविवर्जितम् अप्रविष्टपुरं पूर्वं द्वारि तिष्ठ धृतायुधः

sa tvaṃ puruṣaśārdūla tam āyudhavivarjitam apraviṣṭapuraṃ pūrvaṃ dvāri tiṣṭha dhṛtāyudhaḥ

Sanskrit only: no published translation is held for this verse.

अप्रविष्टं च भवनं युद्धाय पुरुषर्षभ आह्वयेथा महाबाहो ततो हन्तासि राक्षसं

apraviṣṭaṃ ca bhavanaṃ yuddhāya puruṣarṣabha āhvayethā mahābāho tato hantāsi rākṣasaṃ

Sanskrit only: no published translation is held for this verse.

अन्यथा क्रियमाणे तु अवध्यः स भविष्यति यदि त्व् एवं कृते वीर विनाशम् उपयास्यति

anyathā kriyamāṇe tu avadhyaḥ sa bhaviṣyati yadi tv evaṃ kṛte vīra vināśam upayāsyati

Sanskrit only: no published translation is held for this verse.

एतत् ते सर्वम् आख्यातं शूलस्य च विपर्ययम् श्रीमतः शितिकण्ठस्य कृत्यं हि दुरतिक्रमम्

etat te sarvam ākhyātaṃ śūlasya ca viparyayam śrīmataḥ śitikaṇṭhasya kṛtyaṃ hi duratikramam

Sanskrit only: no published translation is held for this verse.