Vālmīki Rāmāyaṇa (critical edition) 7.99

प्रभातायां तु शर्वर्यां पृथुवक्षा महायशाः रामः कमलपत्राक्षः पुरोधसम् अथाब्रवीत्

prabhātāyāṃ tu śarvaryāṃ pṛthuvakṣā mahāyaśāḥ rāmaḥ kamalapatrākṣaḥ purodhasam athābravīt

Sanskrit only: no published translation is held for this verse.

अग्निहोत्रं व्रजत्व् अग्रे सर्पिर् ज्वलितपावकम् वाजपेयातपत्रं च शोभयानं महापथम्

agnihotraṃ vrajatv agre sarpir jvalitapāvakam vājapeyātapatraṃ ca śobhayānaṃ mahāpatham

Sanskrit only: no published translation is held for this verse.

ततो वसिष्ठस् तेजस्वी सर्वं निरवशेषतः चकार विधिवद् धर्म्यं महाप्रास्थानिकं विधिम्

tato vasiṣṭhas tejasvī sarvaṃ niravaśeṣataḥ cakāra vidhivad dharmyaṃ mahāprāsthānikaṃ vidhim

Sanskrit only: no published translation is held for this verse.

ततः क्षौमाम्बरधरो ब्रह्म चावर्तयन् परम् कुशान् गृहीत्वा पाणिभ्यां प्रसज्य प्रययाव् अथ

tataḥ kṣaumāmbaradharo brahma cāvartayan param kuśān gṛhītvā pāṇibhyāṃ prasajya prayayāv atha

Sanskrit only: no published translation is held for this verse.

अव्याहरन् क्व चित् किं चिन् निश्चेष्टो निःसुखः पथि निर्जगाम गृहात् तस्माद् दीप्यमानो यथांशुमान्

avyāharan kva cit kiṃ cin niśceṣṭo niḥsukhaḥ pathi nirjagāma gṛhāt tasmād dīpyamāno yathāṃśumān

Sanskrit only: no published translation is held for this verse.

रामस्य पार्श्वे सव्ये तु पद्मा श्रीः सुसमाहिता दक्षिणे ह्रीर् विशालाक्षी व्यवसायस् तथाग्रतः

rāmasya pārśve savye tu padmā śrīḥ susamāhitā dakṣiṇe hrīr viśālākṣī vyavasāyas tathāgrataḥ

Sanskrit only: no published translation is held for this verse.

शरा नानाविधाश् चापि धनुर् आयतविग्रहम् अनुव्रजन्ति काकुत्स्थं सर्वे पुरुषविग्रहाः

śarā nānāvidhāś cāpi dhanur āyatavigraham anuvrajanti kākutsthaṃ sarve puruṣavigrahāḥ

Sanskrit only: no published translation is held for this verse.

वेदा ब्राह्मणरूपेण सावित्री सर्वरक्षिणी ॐकारो ऽथ वषट्कारः सर्वे रामम् अनुव्रताः

vedā brāhmaṇarūpeṇa sāvitrī sarvarakṣiṇī oṃkāro 'tha vaṣaṭkāraḥ sarve rāmam anuvratāḥ

Sanskrit only: no published translation is held for this verse.

ऋषयश् च महात्मानः सर्व एव महीसुराः अन्वगच्छन्त काकुत्स्थं स्वर्गद्वारम् उपागतम्

ṛṣayaś ca mahātmānaḥ sarva eva mahīsurāḥ anvagacchanta kākutsthaṃ svargadvāram upāgatam

Sanskrit only: no published translation is held for this verse.

तं यान्तम् अनुयान्ति स्म अन्तःपुरचराः स्त्रियः सवृद्धबालदासीकाः सवर्षवरकिंकराः

taṃ yāntam anuyānti sma antaḥpuracarāḥ striyaḥ savṛddhabāladāsīkāḥ savarṣavarakiṃkarāḥ

Sanskrit only: no published translation is held for this verse.

सान्तःपुरश् च भरतः शत्रुघ्नसहितो ययौ रामव्रतम् उपागम्य राघवं समनुव्रताः

sāntaḥpuraś ca bharataḥ śatrughnasahito yayau rāmavratam upāgamya rāghavaṃ samanuvratāḥ

Sanskrit only: no published translation is held for this verse.

ततो विप्रा महात्मानः साग्निहोत्राः समाहिताः सपुत्रदाराः काकुत्स्थम् अन्वगच्छन् महामतिम्

tato viprā mahātmānaḥ sāgnihotrāḥ samāhitāḥ saputradārāḥ kākutstham anvagacchan mahāmatim

Sanskrit only: no published translation is held for this verse.

मन्त्रिणो भृत्यवर्गाश् च सपुत्राः सहबान्धवाः सानुगा राघवं सर्वे अन्वगच्छन् प्रहृष्टवत्

mantriṇo bhṛtyavargāś ca saputrāḥ sahabāndhavāḥ sānugā rāghavaṃ sarve anvagacchan prahṛṣṭavat

Sanskrit only: no published translation is held for this verse.

ततः सर्वाः प्रकृतयो हृष्टपुष्टजनावृताः अनुजग्मुः प्रगच्छन्तं राघवं गुणरञ्जिताः

tataḥ sarvāḥ prakṛtayo hṛṣṭapuṣṭajanāvṛtāḥ anujagmuḥ pragacchantaṃ rāghavaṃ guṇarañjitāḥ

Sanskrit only: no published translation is held for this verse.

स्नातं प्रमुदितं सर्वं हृष्टपुष्पम् अनुत्तमम् दृप्तं किलिकिलाशब्दैः सर्वं रामम् अनुव्रतम्

snātaṃ pramuditaṃ sarvaṃ hṛṣṭapuṣpam anuttamam dṛptaṃ kilikilāśabdaiḥ sarvaṃ rāmam anuvratam

Sanskrit only: no published translation is held for this verse.

न तत्र कश् चिद् दीनो ऽभूद् व्रीडितो वापि दुःखितः हृष्टं प्रमुदितं सर्वं बभूव परमाद्भुतम्

na tatra kaś cid dīno 'bhūd vrīḍito vāpi duḥkhitaḥ hṛṣṭaṃ pramuditaṃ sarvaṃ babhūva paramādbhutam

Sanskrit only: no published translation is held for this verse.

द्रष्टुकामो ऽथ निर्याणं राज्ञो जानपदो जनः संप्राप्तः सो ऽपि दृष्ट्वैव सह सर्वैर् अनुव्रतः

draṣṭukāmo 'tha niryāṇaṃ rājño jānapado janaḥ saṃprāptaḥ so 'pi dṛṣṭvaiva saha sarvair anuvrataḥ

Sanskrit only: no published translation is held for this verse.

ऋक्षवानररक्षांसि जनाश् च पुरवासिनः अगछन् परया भक्त्या पृष्ठतः सुसमाहिताः

ṛkṣavānararakṣāṃsi janāś ca puravāsinaḥ agachan parayā bhaktyā pṛṣṭhataḥ susamāhitāḥ

Sanskrit only: no published translation is held for this verse.