Vālmīki Rāmāyaṇa — star passages [RamS] 2.49

उषित्वा रजनीं तत्र राजपुत्राव् अरिंदमौ । महर्षिम् अभिवाद्याथ जग्मतुस् तं गिरिं प्रति

uṣitvā rajanīṃ tatra rājaputrāv ariṃdamau / maharṣim abhivādyātha jagmatus taṃ giriṃ prati

Sanskrit only: no published translation is held for this verse.

प्रस्थितांश् चैव तान् प्रेक्ष्य पिता पुत्रान् इवान्वगात् । ततः प्रचक्रमे वक्तुं वचनं स महामुनिः

prasthitāṃś caiva tān prekṣya pitā putrān ivānvagāt / tataḥ pracakrame vaktuṃ vacanaṃ sa mahāmuniḥ

Sanskrit only: no published translation is held for this verse.

अथासाद्य तु कालिन्दीं शीघ्रस्रोतसमापगाम् । तत्र यूयं प्लवं कृत्वा तरतांशुमतीं नदीम्

athāsādya tu kālindīṃ śīghrasrotasamāpagām / tatra yūyaṃ plavaṃ kṛtvā taratāṃśumatīṃ nadīm

Sanskrit only: no published translation is held for this verse.

ततो न्यग्रोधम् आसाद्य महान्तं हरितच्छदम् । विवृद्धं बहुभिर् वृक्षैः श्यामं सिद्धोपसेवितम्

tato nyagrodham āsādya mahāntaṃ haritacchadam / vivṛddhaṃ bahubhir vṛkṣaiḥ śyāmaṃ siddhopasevitam

Sanskrit only: no published translation is held for this verse.

क्रोशमात्रं ततो गत्वा नीलं द्रक्ष्यथ काननम् । पलाशबदरीमिश्रं राम वंशैश् च यामुनैः

krośamātraṃ tato gatvā nīlaṃ drakṣyatha kānanam / palāśabadarīmiśraṃ rāma vaṃśaiś ca yāmunaiḥ

Sanskrit only: no published translation is held for this verse.

स पन्थाश् चित्रकूटस्य गतः सुबहुशो मया । रम्यो मार्दवयुक्तश् च वनदावैर् विवर्जितः । इति पन्थानम् आवेद्य महर्षिः स न्यवर्तत ॥ रम्स् २,४९।६ ॥* उपावृत्ते मुनौ तस्मिन् रामो लक्ष्मणम् अब्रवीत् । कृतपुण्याः स्म सौमित्रे मुनिर् यन् नो ऽनुकम्पते

sa panthāś citrakūṭasya gataḥ subahuśo mayā / ramyo mārdavayuktaś ca vanadāvair vivarjitaḥ / iti panthānam āvedya maharṣiḥ sa nyavartata // RamS 2,49.6 //* upāvṛtte munau tasmin rāmo lakṣmaṇam abravīt / kṛtapuṇyāḥ sma saumitre munir yan no 'nukampate

Sanskrit only: no published translation is held for this verse.

इति तौ पुरुषव्याघ्रौ मन्त्रयित्वा मनस्विनौ । सीताम् एवाग्रतः कृत्वा कालिन्दीं जग्मतुर् नदीम्

iti tau puruṣavyāghrau mantrayitvā manasvinau / sītām evāgrataḥ kṛtvā kālindīṃ jagmatur nadīm

Sanskrit only: no published translation is held for this verse.

तौ काष्ठसंघाटम् अथो चक्रतुः सुमहाप्लवम् । चकार लक्ष्मणश् छित्त्वा सीतायाः सुखम् आसनम्

tau kāṣṭhasaṃghāṭam atho cakratuḥ sumahāplavam / cakāra lakṣmaṇaś chittvā sītāyāḥ sukham āsanam

Sanskrit only: no published translation is held for this verse.

तत्र श्रियम् इवाचिन्त्यां रामो दाशरथिः प्रियाम् । ईषत् संलज्जमानां ताम् अध्यारोपयत प्लवम्

tatra śriyam ivācintyāṃ rāmo dāśarathiḥ priyām / īṣat saṃlajjamānāṃ tām adhyāropayata plavam

Sanskrit only: no published translation is held for this verse.

ततः प्लवेनांशुमतीं शीघ्रगाम् ऊर्मिमालिनीम् । तीरजैर् बहुभिर् वृक्षैः संतेरुर् यमुनां नदीम्

tataḥ plavenāṃśumatīṃ śīghragām ūrmimālinīm / tīrajair bahubhir vṛkṣaiḥ saṃterur yamunāṃ nadīm

Sanskrit only: no published translation is held for this verse.

ते तीर्णाः प्लवम् उत्सृज्य प्रस्थाय यमुनावनात् । श्यामं न्यग्रोधम् आसेदुः शीतलं हरितच्छदम्

te tīrṇāḥ plavam utsṛjya prasthāya yamunāvanāt / śyāmaṃ nyagrodham āseduḥ śītalaṃ haritacchadam

Sanskrit only: no published translation is held for this verse.

कौसल्यां चैव पश्येयं सुमित्रां च यशस्विनीम् । इति सीताञ्जलिं कृत्वा पर्यगच्छद् वनस्पतिम्

kausalyāṃ caiva paśyeyaṃ sumitrāṃ ca yaśasvinīm / iti sītāñjaliṃ kṛtvā paryagacchad vanaspatim

Sanskrit only: no published translation is held for this verse.

क्रोशमात्रं ततो गत्वा भ्रातरौ रामलक्ष्मणौ । बहून् मेध्यान् मृगान् हत्वा चेरतुर् यमुनावने

krośamātraṃ tato gatvā bhrātarau rāmalakṣmaṇau / bahūn medhyān mṛgān hatvā ceratur yamunāvane

Sanskrit only: no published translation is held for this verse.

विहृत्य ते बर्हिणपूगनादिते शुभे वने वारणवानरायुते । समं नदीवप्रम् उपेत्य संमतं निवासम् आजग्मुर् अदीनदर्शनाः

vihṛtya te barhiṇapūganādite śubhe vane vāraṇavānarāyute / samaṃ nadīvapram upetya saṃmataṃ nivāsam ājagmur adīnadarśanāḥ

Sanskrit only: no published translation is held for this verse.