Library·Vālmīki Rāmāyaṇa — star passages [RamS]·2·2.83
व्युष्य रात्रिं तु तत्रैव गङ्गाकूले स राघवः । भरतः काल्यम् उत्थाय शत्रुघ्नम् इदम् अब्रवीत्
vyuṣya rātriṃ tu tatraiva gaṅgākūle sa rāghavaḥ / bharataḥ kālyam utthāya śatrughnam idam abravīt
Sanskrit only: no published translation is held for this verse.
शत्रुघोत्तिष्ठ किं शेषे निषादाधिपतिं गुहम् । शीघ्रम् आनय भद्रं ते तारयिष्यति वाहिनीम्
śatrughottiṣṭha kiṃ śeṣe niṣādādhipatiṃ guham / śīghram ānaya bhadraṃ te tārayiṣyati vāhinīm
Sanskrit only: no published translation is held for this verse.
जागर्मि नाहं स्वपिमि तथैवार्यं विचिन्तयन् । इत्य् एवम् अब्रवीद् भ्रात्रा शत्रुघ्नो ऽपि प्रचोदितः
jāgarmi nāhaṃ svapimi tathaivāryaṃ vicintayan / ity evam abravīd bhrātrā śatrughno 'pi pracoditaḥ
Sanskrit only: no published translation is held for this verse.
इति संवदतोर् एवम् अन्योन्यं नरसिंहयोः । आगम्य प्राञ्जलिः काले गुहो भरतम् अब्रवीत्
iti saṃvadator evam anyonyaṃ narasiṃhayoḥ / āgamya prāñjaliḥ kāle guho bharatam abravīt
Sanskrit only: no published translation is held for this verse.
कच्चित् सुखं नदीतीरे ऽवात्सीः काकुत्स्थ शर्वरीम् । कच्चिच् च सह सैन्यस्य तव सर्वम् अनामयम्
kaccit sukhaṃ nadītīre 'vātsīḥ kākutstha śarvarīm / kaccic ca saha sainyasya tava sarvam anāmayam
Sanskrit only: no published translation is held for this verse.
गुहस्य तत् तु वचनं श्रुत्वा स्नेहाद् उदीरितम् । रामस्यानुवशो वाक्यं भरतो ऽपीदम् अब्रवीत्
guhasya tat tu vacanaṃ śrutvā snehād udīritam / rāmasyānuvaśo vākyaṃ bharato 'pīdam abravīt
Sanskrit only: no published translation is held for this verse.
सुखा नः शर्वरी राजन् पूजिताश् चापि ते वयम् । गङ्गां तु नौभिर् बह्वीभिर् दाशाः संतारयन्तु नः
sukhā naḥ śarvarī rājan pūjitāś cāpi te vayam / gaṅgāṃ tu naubhir bahvībhir dāśāḥ saṃtārayantu naḥ
Sanskrit only: no published translation is held for this verse.
ततो गुहः संत्वरितः श्रुत्वा भरतशासनम् । प्रतिप्रविश्य नगरं तं ज्ञातिजनम् अब्रवीत्
tato guhaḥ saṃtvaritaḥ śrutvā bharataśāsanam / pratipraviśya nagaraṃ taṃ jñātijanam abravīt
Sanskrit only: no published translation is held for this verse.
उत्तिष्ठत प्रबुध्यध्वं भद्रम् अस्तु हि वः सदा । नावः समनुकर्षध्वं तारयिष्याम वाहिनीम्
uttiṣṭhata prabudhyadhvaṃ bhadram astu hi vaḥ sadā / nāvaḥ samanukarṣadhvaṃ tārayiṣyāma vāhinīm
Sanskrit only: no published translation is held for this verse.
ते तथोक्ताः समुत्थाय त्वरिता राजशासनात् । पञ्च नावां शतान्य् एव समानिन्युः समन्ततः
te tathoktāḥ samutthāya tvaritā rājaśāsanāt / pañca nāvāṃ śatāny eva samāninyuḥ samantataḥ
Sanskrit only: no published translation is held for this verse.
अन्याः स्वस्तिकविज्ञेया महाघण्टाधरा वराः । शोभमानाः पताकिन्यो युक्तवाताः सुसंहताः
anyāḥ svastikavijñeyā mahāghaṇṭādharā varāḥ / śobhamānāḥ patākinyo yuktavātāḥ susaṃhatāḥ
Sanskrit only: no published translation is held for this verse.
ततः स्वस्तिकविज्ञेयां पाण्डुकम्बलसंवृताम् । सनन्दिघोषां कल्याणीं गुहो नावम् उपाहरत्
tataḥ svastikavijñeyāṃ pāṇḍukambalasaṃvṛtām / sanandighoṣāṃ kalyāṇīṃ guho nāvam upāharat
Sanskrit only: no published translation is held for this verse.
ताम् आरुरोह भरतः शत्रुघ्नश् च महाबलः । कौसल्या च सुमित्रा च याश् चान्या राजयोषितः
tām āruroha bharataḥ śatrughnaś ca mahābalaḥ / kausalyā ca sumitrā ca yāś cānyā rājayoṣitaḥ
Sanskrit only: no published translation is held for this verse.
पुरोहितश् च तत् पूर्वं गुरवे ब्राह्मणाश् च ये । अनन्तरं राजदारास् तथैव शकटापणाः
purohitaś ca tat pūrvaṃ gurave brāhmaṇāś ca ye / anantaraṃ rājadārās tathaiva śakaṭāpaṇāḥ
Sanskrit only: no published translation is held for this verse.
आवासम् आदीपयतां तीर्थं चाप्य् अवगाहताम् । भाण्डानि चाददानानां घोषस् त्रिदिवम् अस्पृशत्
āvāsam ādīpayatāṃ tīrthaṃ cāpy avagāhatām / bhāṇḍāni cādadānānāṃ ghoṣas tridivam aspṛśat
Sanskrit only: no published translation is held for this verse.
पताकिन्यस् तु ता नावः स्वयं दाशैर् अधिष्ठिताः । वहन्त्यो जनम् आरूढं तदा संपेतुर् आशुगाः
patākinyas tu tā nāvaḥ svayaṃ dāśair adhiṣṭhitāḥ / vahantyo janam ārūḍhaṃ tadā saṃpetur āśugāḥ
Sanskrit only: no published translation is held for this verse.
नारीणाम् अभिपूर्णास् तु काश्चित् काश्चित् तु वाजिनाम् । कश्चित् तत्र वहन्ति स्म यानयुग्यं महाधनम्
nārīṇām abhipūrṇās tu kāścit kāścit tu vājinām / kaścit tatra vahanti sma yānayugyaṃ mahādhanam
Sanskrit only: no published translation is held for this verse.
ताः स्म गत्वा परं तीरम् अवरोप्य च तं जनम् । निवृत्ताः काण्डचित्राणि क्रियन्ते दाशबन्धुभिः
tāḥ sma gatvā paraṃ tīram avaropya ca taṃ janam / nivṛttāḥ kāṇḍacitrāṇi kriyante dāśabandhubhiḥ
Sanskrit only: no published translation is held for this verse.
सवैजयन्तास् तु गजा गजारोहैः प्रचोदिताः । तरन्तः स्म प्रकाशन्ते सध्वजा इव पर्वताः
savaijayantās tu gajā gajārohaiḥ pracoditāḥ / tarantaḥ sma prakāśante sadhvajā iva parvatāḥ
Sanskrit only: no published translation is held for this verse.
नावश् चारुरुहुस् त्व् अन्ये प्लवैस् तेरुस् तथापरे । अन्ये कुम्भघटैस् तेरुर् अन्ये तेरुश् च बाहुभिः
nāvaś cāruruhus tv anye plavais terus tathāpare / anye kumbhaghaṭais terur anye teruś ca bāhubhiḥ
Sanskrit only: no published translation is held for this verse.
सा पुण्या ध्वजिनी गङ्गां दाशैः संतारिता स्वयम् । मैत्रे मुहूर्ते प्रययौ प्रयागवनम् उत्तमम्
sā puṇyā dhvajinī gaṅgāṃ dāśaiḥ saṃtāritā svayam / maitre muhūrte prayayau prayāgavanam uttamam
Sanskrit only: no published translation is held for this verse.
आश्वासयित्वा च चमूं महात्मा निवेशयित्वा च यथोपजोषम् । द्रष्टुं भरद्वाजम् ऋषिप्रवर्यम् ऋत्विग्वृतः सन् भरतः प्रतस्थे
āśvāsayitvā ca camūṃ mahātmā niveśayitvā ca yathopajoṣam / draṣṭuṃ bharadvājam ṛṣipravaryam ṛtvigvṛtaḥ san bharataḥ pratasthe
Sanskrit only: no published translation is held for this verse.