Santideva: Bodhicaryavatara 6

येषां सुखे यान्ति मुदं मुनीन्द्राः येषां व्यथायां प्रविशन्ति मन्युम् । तत्तोषणात्सर्वमुनीन्द्रतुष्टिस् तत्रापकारे ऽपकृतं मुनीनाम्

yeṣāṃ sukhe yānti mudaṃ munīndrāḥ yeṣāṃ vyathāyāṃ praviśanti manyum / tattoṣaṇātsarvamunīndratuṣṭis tatrāpakāre 'pakṛtaṃ munīnām

Sanskrit only: no published translation is held for this verse.

आदीप्तकायस्य यथा समन्तान् न सर्वकामैरपि सौमनस्यम् । सत्त्वव्यथायामपि तद्वदेव न प्रीत्युपायो ऽस्ति दयामयानाम्

ādīptakāyasya yathā samantān na sarvakāmairapi saumanasyam / sattvavyathāyāmapi tadvadeva na prītyupāyo 'sti dayāmayānām

Sanskrit only: no published translation is held for this verse.

तस्मान्मया यज्जनदुःखदेन दुःखं कृतं सर्वमहाकृपाणाम् । तदद्य पापं प्रतिदेशयामि यत्खेदितास्तन्मुनयः क्षमन्ताम्

tasmānmayā yajjanaduḥkhadena duḥkhaṃ kṛtaṃ sarvamahākṛpāṇām / tadadya pāpaṃ pratideśayāmi yatkheditāstanmunayaḥ kṣamantām

Sanskrit only: no published translation is held for this verse.

आराधनायाद्य तथागतानां सर्वात्मना दास्यमुपैमि लोके । कुर्वन्तु मे मूर्घ्नि पदं जनौघा विघ्नन्तु वा तुष्यतु लोकनाथः

ārādhanāyādya tathāgatānāṃ sarvātmanā dāsyamupaimi loke / kurvantu me mūrghni padaṃ janaughā vighnantu vā tuṣyatu lokanāthaḥ

Sanskrit only: no published translation is held for this verse.

आत्मीकृतं सर्वमिदं जगत्तैः । कृपात्मभिर्नैव हि संशयो ऽस्ति । दृश्यन्त एते ननु सत्त्वरूपास् त एव नाथाः किमनादरो ऽत्र

ātmīkṛtaṃ sarvamidaṃ jagattaiḥ / kṛpātmabhirnaiva hi saṃśayo 'sti / dṛśyanta ete nanu sattvarūpās ta eva nāthāḥ kimanādaro 'tra

Sanskrit only: no published translation is held for this verse.

तथागताराधनमेतदेव स्वार्थस्य संसाधनमेतदेव । लोकस्य दुःखापहमेतदेव तस्मान्ममास्तु व्रतमेतदेव

tathāgatārādhanametadeva svārthasya saṃsādhanametadeva / lokasya duḥkhāpahametadeva tasmānmamāstu vratametadeva

Sanskrit only: no published translation is held for this verse.

यथैको राजपुरुषः प्रमन्थाति महाजनम् । विकर्तुं नैव शक्नोति दीर्घदर्शी महाजनः

yathaiko rājapuruṣaḥ pramanthāti mahājanam / vikartuṃ naiva śaknoti dīrghadarśī mahājanaḥ

Sanskrit only: no published translation is held for this verse.

यस्मान्नैव स एकाकी तस्य राजबलं बलम् । तथा न दुर्बलं कंचिदपराद्धं विमानयेत्

yasmānnaiva sa ekākī tasya rājabalaṃ balam / tathā na durbalaṃ kaṃcidaparāddhaṃ vimānayet

Sanskrit only: no published translation is held for this verse.

यस्मान्नरकपालाश्च कृपावन्तश्च तद्बलम् । तस्मादाराधयेत्सत्त्वान् भृत्यश्चण्डनृपं यथा

yasmānnarakapālāśca kṛpāvantaśca tadbalam / tasmādārādhayetsattvān bhṛtyaścaṇḍanṛpaṃ yathā

Sanskrit only: no published translation is held for this verse.

कुपितः किं नृपः कुर्याद्येन स्यान्नरकव्यथा । यत्सत्त्वदौर्मनस्येन कृतेन ह्यनुभूयते

kupitaḥ kiṃ nṛpaḥ kuryādyena syānnarakavyathā / yatsattvadaurmanasyena kṛtena hyanubhūyate

Sanskrit only: no published translation is held for this verse.

तुष्टः किं नृपतिर्दद्याद्यद्बुद्धत्वसमं भवेत् । यत्सत्त्वसौमनस्येन कृतेन ह्यनुभूयते

tuṣṭaḥ kiṃ nṛpatirdadyādyadbuddhatvasamaṃ bhavet / yatsattvasaumanasyena kṛtena hyanubhūyate

Sanskrit only: no published translation is held for this verse.

आस्तां भविष्यद्बुद्धत्वं सत्त्वाराधनसंभवम् । इहैव सौभाग्ययशःसौस्थित्यं किं न पश्यसि

āstāṃ bhaviṣyadbuddhatvaṃ sattvārādhanasaṃbhavam / ihaiva saubhāgyayaśaḥsausthityaṃ kiṃ na paśyasi

Sanskrit only: no published translation is held for this verse.

प्रासादिकत्वमारोग्यं प्रामोद्यं चिरजीवितम् । चक्रवर्तिसुखं स्फीतं क्षमी प्राप्नोति संसरन्

prāsādikatvamārogyaṃ prāmodyaṃ cirajīvitam / cakravartisukhaṃ sphītaṃ kṣamī prāpnoti saṃsaran

Sanskrit only: no published translation is held for this verse.