Bhoja: Samarāṅgaṇa-sūtradhāra 1

देवः स पातु भुवनत्रयसूत्रधारस्त्वां बालचन्द्र कलिकाङ्कितजूटकोटिः । एतत्समग्रमपि कारणमन्तरेण कार्त्स्न्यादसूत्रितमसूत्र्यत येन विश्वम्

devaḥ sa pātu bhuvanatrayasūtradhārastvāṃ bālacandra kalikāṅkitajūṭakoṭiḥ | etatsamagramapi kāraṇamantareṇa kārtsnyādasūtritamasūtryata yena viśvam

Sanskrit only: no published translation is held for this verse.

सुखं धनानि ऋद्धिश्च सन्ततिः सर्वदा नृणाम् । प्रियाण्येषां तु संसिद्धयै सर्वं स्याच्छुभलक्षणम्

sukhaṃ dhanāni ṛddhiśca santatiḥ sarvadā nṛṇām | priyāṇyeṣāṃ tu saṃsiddhayai sarvaṃ syācchubhalakṣaṇam

Sanskrit only: no published translation is held for this verse.

यच्च निन्दितलक्ष्मा च तदेतेषां विघातकृत्। अतः सर्वमुपादेयं यद्भवेच्छुभलक्षणम्

yacca ninditalakṣmā ca tadeteṣāṃ vighātakṛt| ataḥ sarvamupādeyaṃ yadbhavecchubhalakṣaṇam

Sanskrit only: no published translation is held for this verse.

देशः पुरं निवासश्च सभा वेश्मासनानि च। यद्यदीदृशमन्यच्च तत्तच्छ्रेयस्करं मतम्

deśaḥ puraṃ nivāsaśca sabhā veśmāsanāni ca| yadyadīdṛśamanyacca tattacchreyaskaraṃ matam

Sanskrit only: no published translation is held for this verse.

वास्तुशास्त्रादृते तस्य न स्याल्लक्षणनिश्चयः। तस्माल्लोकस्य कृपया शास्त्रमेतदुदीर्यते

vāstuśāstrādṛte tasya na syāllakṣaṇaniścayaḥ| tasmāllokasya kṛpayā śāstrametadudīryate

Sanskrit only: no published translation is held for this verse.

अथैकदा जगज्जन्महेतुमम्बुरुहासनम्। पृथ्वी पृथुभयभ्रान्ता चकिताक्षी समाययौ

athaikadā jagajjanmahetumamburuhāsanam| pṛthvī pṛthubhayabhrāntā cakitākṣī samāyayau

Sanskrit only: no published translation is held for this verse.

प्रणम्य प्रणतिप्रह्वनिखिलत्रिदशेश्वरम्। सगद्गदमुवाचेति भूतधात्री पितामहम्

praṇamya praṇatiprahvanikhilatridaśeśvaram| sagadgadamuvāceti bhūtadhātrī pitāmaham

Sanskrit only: no published translation is held for this verse.

भगवन्नहमेतेन पृथुना पृथुतेजसा। उपद्रुता त्वां शरणं प्राप्ता त्रायस्व मां ततः

bhagavannahametena pṛthunā pṛthutejasā| upadrutā tvāṃ śaraṇaṃ prāptā trāyasva māṃ tataḥ

Sanskrit only: no published translation is held for this verse.

वदन्त्यामिति मेदिन्यामाविरासीदथो पृथुः। संरम्भमुक्तहृदयो ब्रह्माणं प्रणनाम च

vadantyāmiti medinyāmāvirāsīdatho pṛthuḥ| saṃrambhamuktahṛdayo brahmāṇaṃ praṇanāma ca

Sanskrit only: no published translation is held for this verse.

जगादैनमथ स्निग्धध्वनिगम्भीरया गिरा। कुर्वंस्तद्यानहंसानां पयोदध्वनिशङ्कितम्

jagādainamatha snigdhadhvanigambhīrayā girā| kurvaṃstadyānahaṃsānāṃ payodadhvaniśaṅkitam

Sanskrit only: no published translation is held for this verse.

त्वयास्मि जगतां नाथ जगतोऽधिपतिः कृतः। स्थापितानि च भूतानि सर्वाण्यपि वशे मम

tvayāsmi jagatāṃ nātha jagato'dhipatiḥ kṛtaḥ| sthāpitāni ca bhūtāni sarvāṇyapi vaśe mama

Sanskrit only: no published translation is held for this verse.

तेष्वियं मम विश्वेश कदाचिद्वशवर्तिनी। समीकरोमि पाषाणजालान्यस्याः किलाधुना

teṣviyaṃ mama viśveśa kadācidvaśavartinī| samīkaromi pāṣāṇajālānyasyāḥ kilādhunā

Sanskrit only: no published translation is held for this verse.

व्यस्तानि धनुषा तावद्गौर्भूत्वेयं पलायिता। दोग्धुकामोऽहमप्येनां चिरमन्वगमं महीम्

vyastāni dhanuṣā tāvadgaurbhūtveyaṃ palāyitā| dogdhukāmo'hamapyenāṃ ciramanvagamaṃ mahīm

Sanskrit only: no published translation is held for this verse.

यत्रक्वापि प्रयात्येषा तत्र मामेव पश्यति। अपश्यन्त्यन्यतस्त्राणमदुग्धा त्वामुपस्थिता

yatrakvāpi prayātyeṣā tatra māmeva paśyati| apaśyantyanyatastrāṇamadugdhā tvāmupasthitā

Sanskrit only: no published translation is held for this verse.

अस्यां वर्णाश्रमस्थानविभागश्च विधास्यते। इयं च दुर्गमानेकक्षोणीधरकुलाकुला

asyāṃ varṇāśramasthānavibhāgaśca vidhāsyate| iyaṃ ca durgamānekakṣoṇīdharakulākulā

Sanskrit only: no published translation is held for this verse.

विधास्येऽस्यां कथं त्वेतदिति मे शङ्कितं मनः। पृथुनेत्यथ विज्ञप्तो भगवानब्जसम्भवः

vidhāsye'syāṃ kathaṃ tvetaditi me śaṅkitaṃ manaḥ| pṛthunetyatha vijñapto bhagavānabjasambhavaḥ

Sanskrit only: no published translation is held for this verse.

उवाच बोधयन्नेनं कृत्वा भूमिं च निर्भयाम्। इयं मही महीपाल विधिवत् पालिता सती

uvāca bodhayannenaṃ kṛtvā bhūmiṃ ca nirbhayām| iyaṃ mahī mahīpāla vidhivat pālitā satī

Sanskrit only: no published translation is held for this verse.

सस्यैरुत्पाद्य निष्पन्नैस्तव भोग्या भविष्यति। यच्च ते स्यादभिप्रेतं स्थानादिविनिवेशनम्

sasyairutpādya niṣpannaistava bhogyā bhaviṣyati| yacca te syādabhipretaṃ sthānādiviniveśanam

Sanskrit only: no published translation is held for this verse.

तदेष त्रिदशाचार्यः सर्वसिद्धिप्रवर्तकः। सुतः प्रभासस्य विभोः स्वस्रीयश्च बृहस्पतेः

tadeṣa tridaśācāryaḥ sarvasiddhipravartakaḥ| sutaḥ prabhāsasya vibhoḥ svasrīyaśca bṛhaspateḥ

Sanskrit only: no published translation is held for this verse.

विश्वाभिसायिधीः सर्वं विश्वकर्मा करिष्यति। राजन्नसौ महेन्द्र स्य विदधावमरावतीम्

viśvābhisāyidhīḥ sarvaṃ viśvakarmā kariṣyati| rājannasau mahendra sya vidadhāvamarāvatīm

Sanskrit only: no published translation is held for this verse.

अन्या अप्यमुना रम्याः पुर्यो लोकभृतां कृताः। त्वया क्षेत्रीकृतां मूर्त्तिं दृष्ट्वा साद्रि द्रुमामसौ

anyā apyamunā ramyāḥ puryo lokabhṛtāṃ kṛtāḥ| tvayā kṣetrīkṛtāṃ mūrttiṃ dṛṣṭvā sādri drumāmasau

Sanskrit only: no published translation is held for this verse.

सन्निवेशान् पुरग्रामनगराणां विधास्यति। तद्गच्छ वत्स लोकानामितस्त्वं हितकाम्यया

sanniveśān puragrāmanagarāṇāṃ vidhāsyati| tadgaccha vatsa lokānāmitastvaṃ hitakāmyayā

Sanskrit only: no published translation is held for this verse.

भयोज्झिता त्वमप्युर्वि पृथोः प्रियकरी भव। काले स्मृतः स्मृतः पुण्यो राज्ञः प्रियचिकीर्षया

bhayojjhitā tvamapyurvi pṛthoḥ priyakarī bhava| kāle smṛtaḥ smṛtaḥ puṇyo rājñaḥ priyacikīrṣayā

Sanskrit only: no published translation is held for this verse.

त्वमप्यखिलमेवैतद् विश्वकर्मन् करिष्यसि। इत्युक्त्वा गमनमुपेयुषि प्रजेशे स्वं स्थानं क्षितिभुजि चाश्रिते मुदोर्व्याम् ।। प्रालेयावनिभृतमाजगाम खेलत्सिद्धस्त्रीपरिगतमाशु विश्वकर्मा

tvamapyakhilamevaitad viśvakarman kariṣyasi| ityuktvā gamanamupeyuṣi prajeśe svaṃ sthānaṃ kṣitibhuji cāśrite mudorvyām || prāleyāvanibhṛtamājagāma khelatsiddhastrīparigatamāśu viśvakarmā

Sanskrit only: no published translation is held for this verse.