Skanda Purāṇa (part) 13

स चापि तरुभिस्तत्र बहुभिः कुसुमोत्करैः । शोभयामास शृङ्गाणि प्रालेयाद्रेः समन्ततः

sa cāpi tarubhistatra bahubhiḥ kusumotkaraiḥ / śobhayāmāsa śṛṅgāṇi prāleyādreḥ samantataḥ

Sanskrit only: no published translation is held for this verse.

तस्यापि च ऋतोस्तत्र वायवः सुमनोहराः । ववुः पाटलविस्तीर्ण- कदम्बार्जुनगन्धिनः

tasyāpi ca ṛtostatra vāyavaḥ sumanoharāḥ / vavuḥ pāṭalavistīrṇa- kadambārjunagandhinaḥ

Sanskrit only: no published translation is held for this verse.

वाप्यः प्रफुल्लपद्मौघाः केसरारुणमूर्तयः । अभवंस्तटसंघुष्ट- कलहंसकदम्बकाः

vāpyaḥ praphullapadmaughāḥ kesarāruṇamūrtayaḥ / abhavaṃstaṭasaṃghuṣṭa- kalahaṃsakadambakāḥ

Sanskrit only: no published translation is held for this verse.

तथा कुरवकाश्चापि कुसुमापाण्डुमूर्तयः । सर्वेषु जज्ञुः शृङ्गेषु भ्रमरावलिसेविताः

tathā kuravakāścāpi kusumāpāṇḍumūrtayaḥ / sarveṣu jajñuḥ śṛṅgeṣu bhramarāvalisevitāḥ

Sanskrit only: no published translation is held for this verse.

बकुलाश्च नितम्बेषु विशालेषु महीभृतः । उत्ससर्जुर्मनोज्ञानि कुसुमानि समन्ततः

bakulāśca nitambeṣu viśāleṣu mahībhṛtaḥ / utsasarjurmanojñāni kusumāni samantataḥ

Sanskrit only: no published translation is held for this verse.

इति कुसुमविचित्रसर्ववृक्षा विविधविहंगमनादरम्यदेशाः । हिमगिरितनयाविवाहभूत्यै षडुपययुरृतवो मुनिप्रवीर

iti kusumavicitrasarvavṛkṣā vividhavihaṃgamanādaramyadeśāḥ / himagiritanayāvivāhabhūtyai ṣaḍupayayurṛtavo munipravīra

Sanskrit only: no published translation is held for this verse.

तत एवं प्रवृत्ते तु सर्वभूतसमागमे । नानावाद्यशताकीर्णे ब्रह्मा मम पिता स्वयम्

tata evaṃ pravṛtte tu sarvabhūtasamāgame / nānāvādyaśatākīrṇe brahmā mama pitā svayam

Sanskrit only: no published translation is held for this verse.

शैलपुत्रीमलंकृत्य योग्याभरणसम्पदा । पुरं प्रवेशयामास स्वयमादाय लोकधृक्

śailaputrīmalaṃkṛtya yogyābharaṇasampadā / puraṃ praveśayāmāsa svayamādāya lokadhṛk

Sanskrit only: no published translation is held for this verse.

ततस्तु पुनरेवेशं ब्रह्मा व्यज्ञापयद्विभुम् । हविर्जुहोमि वह्नौ तु उपाध्यायपदे स्थितः । ददासि मह्यं यद्याज्ञां कर्तव्यो ऽयं क्रियाविधिः

tatastu punareveśaṃ brahmā vyajñāpayadvibhum / havirjuhomi vahnau tu upādhyāyapade sthitaḥ / dadāsi mahyaṃ yadyājñāṃ kartavyo 'yaṃ kriyāvidhiḥ

Sanskrit only: no published translation is held for this verse.

तमाह शंकरो देवं देवदेवो जगत्पतिः । यद्यदिष्टं सुरेशान तत्कुरुष्व यथेप्सितम् । कर्तास्मि वचनं सर्वं ब्रह्मंस्तव जगद्विभो

tamāha śaṃkaro devaṃ devadevo jagatpatiḥ / yadyadiṣṭaṃ sureśāna tatkuruṣva yathepsitam / kartāsmi vacanaṃ sarvaṃ brahmaṃstava jagadvibho

Sanskrit only: no published translation is held for this verse.

ततः प्रणम्य हृष्टात्मा ब्रह्मा लोकपितामहः । हस्तं देवस्य देव्याश्च योगबन्धे युयोज ह

tataḥ praṇamya hṛṣṭātmā brahmā lokapitāmahaḥ / hastaṃ devasya devyāśca yogabandhe yuyoja ha

Sanskrit only: no published translation is held for this verse.

ज्वलनं च स्वयं कृत्वा कृताञ्जलिमुपस्थितं । श्रुतिगीतैर्महामन्त्रैर् मूर्तिमद्भिरुपस्थितैः

jvalanaṃ ca svayaṃ kṛtvā kṛtāñjalimupasthitaṃ / śrutigītairmahāmantrair mūrtimadbhirupasthitaiḥ

Sanskrit only: no published translation is held for this verse.

यथोक्तविधिना हुत्वा सर्पिस्तदमृतं च हि । त्रिश्च तं ज्वलनं देवं कारयित्वा प्रदक्षिणम्

yathoktavidhinā hutvā sarpistadamṛtaṃ ca hi / triśca taṃ jvalanaṃ devaṃ kārayitvā pradakṣiṇam

Sanskrit only: no published translation is held for this verse.

मुक्त्वा हस्तसमायोगं सहितः सर्वदेवतैः । सुतैश्च मानसैः सर्वैः प्रहृष्टेनान्तरात्मना । वृत्ते उद्वाहकाले तु प्रणनाम वृषध्वजम्

muktvā hastasamāyogaṃ sahitaḥ sarvadevataiḥ / sutaiśca mānasaiḥ sarvaiḥ prahṛṣṭenāntarātmanā / vṛtte udvāhakāle tu praṇanāma vṛṣadhvajam

Sanskrit only: no published translation is held for this verse.

योगेनैव तयोर्व्यास तदोमापरमेशयोः । उद्वाहः स परो वृत्तो यं देवा न विदुः क्वचित्

yogenaiva tayorvyāsa tadomāparameśayoḥ / udvāhaḥ sa paro vṛtto yaṃ devā na viduḥ kvacit

Sanskrit only: no published translation is held for this verse.

इति ते सर्वमाख्यातं स्वयंवरमिदं शुभम् । उद्वाहश्चैव देवस्य शृण्वतः परमाद्भुतम्

iti te sarvamākhyātaṃ svayaṃvaramidaṃ śubham / udvāhaścaiva devasya śṛṇvataḥ paramādbhutam

Sanskrit only: no published translation is held for this verse.