Skanda Purāṇa (part) 20

व्यास उवाच उमाहरौ तु देवेशौ चक्रतुर्यच्च संगतौ । तन्मे सर्वमशेषेण कथयस्व महामुने

vyāsa uvāca umāharau tu deveśau cakraturyacca saṃgatau / tanme sarvamaśeṣeṇa kathayasva mahāmune

Sanskrit only: no published translation is held for this verse.

सनत्कुमार उवाच उमाहरौ तु संगम्य परस्परमनिन्दितौ । शालङ्कस्यान्वये विप्रं युयुजाते वरेण ह

sanatkumāra uvāca umāharau tu saṃgamya parasparamaninditau / śālaṅkasyānvaye vipraṃ yuyujāte vareṇa ha

Sanskrit only: no published translation is held for this verse.

स चाप्ययोनिजः पुत्र आराध्य परमेश्वरम् । रुद्रेण समतां लब्ध्वा महागणपतिर्बभौ

sa cāpyayonijaḥ putra ārādhya parameśvaram / rudreṇa samatāṃ labdhvā mahāgaṇapatirbabhau

Sanskrit only: no published translation is held for this verse.

व्यास उवाच कथं नन्दी समुत्पन्नः कथं चाराध्य शंकरम् । समानत्वमगाच्छम्भोः प्रतीहारत्वमेव च

vyāsa uvāca kathaṃ nandī samutpannaḥ kathaṃ cārādhya śaṃkaram / samānatvamagācchambhoḥ pratīhāratvameva ca

Sanskrit only: no published translation is held for this verse.

सनत्कुमार उवाच अभूदृषिः स धर्मात्मा शिलादो नाम वीर्यवान् । तस्याभूच्छिलकैर्वृत्तिः शिलादस्तेन सो ऽभवत्

sanatkumāra uvāca abhūdṛṣiḥ sa dharmātmā śilādo nāma vīryavān / tasyābhūcchilakairvṛttiḥ śilādastena so 'bhavat

Sanskrit only: no published translation is held for this verse.

अपश्यल्लम्बमानांस्तु गर्तायां स पितॄन्द्विजः । विच्छिन्नसंततीन्घोरं निरयं वै प्रपेतुषः

apaśyallambamānāṃstu gartāyāṃ sa pitṝndvijaḥ / vicchinnasaṃtatīnghoraṃ nirayaṃ vai prapetuṣaḥ

Sanskrit only: no published translation is held for this verse.

तैरुक्तो ऽपत्यकामैस्तु देवं लोकेशमव्ययम् । आराधय महादेवं सुतार्थं द्विजसत्तम

tairukto 'patyakāmaistu devaṃ lokeśamavyayam / ārādhaya mahādevaṃ sutārthaṃ dvijasattama

Sanskrit only: no published translation is held for this verse.

तस्य वर्षसहस्रेण तप्यमानस्य शूलधृक् । शर्वः सोमो गणवृतो वरदो ऽस्मीत्यभाषत

tasya varṣasahasreṇa tapyamānasya śūladhṛk / śarvaḥ somo gaṇavṛto varado 'smītyabhāṣata

Sanskrit only: no published translation is held for this verse.

तं दृष्ट्वा सोममीशेशं प्रणतः पादयोर्विभोः । हर्षगद्गदया वाचा तुष्टाव विबुधेश्वरम्

taṃ dṛṣṭvā somamīśeśaṃ praṇataḥ pādayorvibhoḥ / harṣagadgadayā vācā tuṣṭāva vibudheśvaram

Sanskrit only: no published translation is held for this verse.

नमः परमदेवाय महेशाय महात्मने । स्रष्ट्रे सर्वसुरेशानां ब्रह्मणः पतये नमः

namaḥ paramadevāya maheśāya mahātmane / sraṣṭre sarvasureśānāṃ brahmaṇaḥ pataye namaḥ

Sanskrit only: no published translation is held for this verse.

नमः कामाङ्गनाशाय योगसम्भवहेतवे । नमः पर्वतवासाय ध्यानगम्याय वेधसे

namaḥ kāmāṅganāśāya yogasambhavahetave / namaḥ parvatavāsāya dhyānagamyāya vedhase

Sanskrit only: no published translation is held for this verse.

ऋषीणां पतये नित्यं देवानां पतये नमः । वेदानां पतये चैव योगिनां पतये नमः

ṛṣīṇāṃ pataye nityaṃ devānāṃ pataye namaḥ / vedānāṃ pataye caiva yogināṃ pataye namaḥ

Sanskrit only: no published translation is held for this verse.

प्रधानाय नमो नित्यं तत्त्वायामरसंज्ञिणे । वरदाय च भक्तानां नमः सर्वगताय च

pradhānāya namo nityaṃ tattvāyāmarasaṃjñiṇe / varadāya ca bhaktānāṃ namaḥ sarvagatāya ca

Sanskrit only: no published translation is held for this verse.

तन्मात्रेन्द्रियभूतानां विकाराणां गुणैः सह । स्रष्ट्रे च पतये चैव नमश्च प्रभविष्णवे

tanmātrendriyabhūtānāṃ vikārāṇāṃ guṇaiḥ saha / sraṣṭre ca pataye caiva namaśca prabhaviṣṇave

Sanskrit only: no published translation is held for this verse.

जगतः पतये चैव जगत्स्रष्ट्रे नमः सदा । प्रकृतेः पतये नित्यं पुरुषात्परगामिने

jagataḥ pataye caiva jagatsraṣṭre namaḥ sadā / prakṛteḥ pataye nityaṃ puruṣātparagāmine

Sanskrit only: no published translation is held for this verse.

ईश्वराय नमो नित्यं योगगम्याय रंहसे । संसारोत्पत्तिनाशाय सर्वकामप्रदाय च

īśvarāya namo nityaṃ yogagamyāya raṃhase / saṃsārotpattināśāya sarvakāmapradāya ca

Sanskrit only: no published translation is held for this verse.

शरण्याय नमो नित्यं नमो भस्माङ्गरागिणे । नमस्ते ऽयोग्रहस्ताय तेजसां पतये नमः

śaraṇyāya namo nityaṃ namo bhasmāṅgarāgiṇe / namaste 'yograhastāya tejasāṃ pataye namaḥ

Sanskrit only: no published translation is held for this verse.

सूर्यानिलहुताशाम्बु- चन्द्राकाशधराय च । स्थिताय सर्वदा नित्यं नमस्त्रैलोकवेधसे

sūryānilahutāśāmbu- candrākāśadharāya ca / sthitāya sarvadā nityaṃ namastrailokavedhase

Sanskrit only: no published translation is held for this verse.

स्तोतव्यस्य कुतो देव विश्रामस्तव विद्यते । यदा हेतुस्त्वमेवास्य जगतः स्थितिनाशयोः

stotavyasya kuto deva viśrāmastava vidyate / yadā hetustvamevāsya jagataḥ sthitināśayoḥ

Sanskrit only: no published translation is held for this verse.

अशरण्यस्य देवेश त्वत्तश्च शरणार्थिनः । प्रसादं परमालम्ब्य वरदो भव विश्वकृत्

aśaraṇyasya deveśa tvattaśca śaraṇārthinaḥ / prasādaṃ paramālambya varado bhava viśvakṛt

Sanskrit only: no published translation is held for this verse.

सनत्कुमार उवाच यः स्तोत्रमेतदखिलं पठते द्विजन्मा प्रातः शुचिर्नियमवान्पुरतो द्विजानाम् । तं ब्रह्मराक्षसनिशाचरभूतयक्षा हिंसन्ति नो द्विपदपन्नगपूतनाश्च

sanatkumāra uvāca yaḥ stotrametadakhilaṃ paṭhate dvijanmā prātaḥ śucirniyamavānpurato dvijānām / taṃ brahmarākṣasaniśācarabhūtayakṣā hiṃsanti no dvipadapannagapūtanāśca

Sanskrit only: no published translation is held for this verse.

ततः स भगवान्देवः स्तूयमानः सहोमया । उवाच वरदो ऽस्मीति ब्रूहि यत्ते मनोगतम्

tataḥ sa bhagavāndevaḥ stūyamānaḥ sahomayā / uvāca varado 'smīti brūhi yatte manogatam

Sanskrit only: no published translation is held for this verse.

तमेवंवादिनं देवं शिलादो ऽभ्यर्चयत्तदा । उवाच चेदं देवेशं स वाचा सज्जमानया

tamevaṃvādinaṃ devaṃ śilādo 'bhyarcayattadā / uvāca cedaṃ deveśaṃ sa vācā sajjamānayā

Sanskrit only: no published translation is held for this verse.

भगवन्यदि तुष्टो ऽसि यदि देयो वरश्च मे । इच्छाम्यात्मसमं पुत्रं मृत्युहीनमयोनिजम्

bhagavanyadi tuṣṭo 'si yadi deyo varaśca me / icchāmyātmasamaṃ putraṃ mṛtyuhīnamayonijam

Sanskrit only: no published translation is held for this verse.

एवमुक्तस्ततो देवः प्रीयमाणस्त्रिलोचनः । एवमस्त्विति तं प्रोच्य तत्रैवान्तरधीयत

evamuktastato devaḥ prīyamāṇastrilocanaḥ / evamastviti taṃ procya tatraivāntaradhīyata

Sanskrit only: no published translation is held for this verse.

गते तस्मिन्महेष्वासे ऋषिः परमपूजितः । स्वमाश्रममुपागम्य ऋषिभ्यो ऽकथयत्ततः

gate tasminmaheṣvāse ṛṣiḥ paramapūjitaḥ / svamāśramamupāgamya ṛṣibhyo 'kathayattataḥ

Sanskrit only: no published translation is held for this verse.

तैः प्रशस्तस्ततश्चैव कालेन मुनिसत्तम । यियक्षुर्यज्ञभूमिं स्वां लाङ्गलेन चकर्ष ताम्

taiḥ praśastastataścaiva kālena munisattama / yiyakṣuryajñabhūmiṃ svāṃ lāṅgalena cakarṣa tām

Sanskrit only: no published translation is held for this verse.

तस्यां तु कृष्यमाणायां सीतायां तत्समुत्थितः । संवर्तकानलप्रख्यः कुमारः प्रत्यदृश्यत

tasyāṃ tu kṛṣyamāṇāyāṃ sītāyāṃ tatsamutthitaḥ / saṃvartakānalaprakhyaḥ kumāraḥ pratyadṛśyata

Sanskrit only: no published translation is held for this verse.

स तं दृष्ट्वा तथोद्भूतं कुमारं दीप्ततेजसम् । राक्षसो ऽयमिति ज्ञात्वा भयान्नोपससार तम्

sa taṃ dṛṣṭvā tathodbhūtaṃ kumāraṃ dīptatejasam / rākṣaso 'yamiti jñātvā bhayānnopasasāra tam

Sanskrit only: no published translation is held for this verse.

कुमारो ऽपि तथोद्भूतः पितरं दीप्ततेजसम् । उपासर्पत दीनात्मा तात तातेति चाब्रवीत्

kumāro 'pi tathodbhūtaḥ pitaraṃ dīptatejasam / upāsarpata dīnātmā tāta tāteti cābravīt

Sanskrit only: no published translation is held for this verse.

स तातेत्युच्यमानो ऽपि यदा तं नाभ्यनन्दत । ततो वायुस्तमाकाशे शिलादं प्राह सुस्वरम्

sa tātetyucyamāno 'pi yadā taṃ nābhyanandata / tato vāyustamākāśe śilādaṃ prāha susvaram

Sanskrit only: no published translation is held for this verse.

वायुरुवाच शालङ्कायन पुत्रस्ते यो ऽसौ देवेन शम्भुना । अयोनिजः पुरा दत्तः स एष प्रतिनन्दय

vāyuruvāca śālaṅkāyana putraste yo 'sau devena śambhunā / ayonijaḥ purā dattaḥ sa eṣa pratinandaya

Sanskrit only: no published translation is held for this verse.

यस्मान्नन्दीकरस्ते ऽयं सदैव द्विजसत्तम । तस्मान्नन्दीति नाम्नायं भविष्यति सुतस्तव

yasmānnandīkaraste 'yaṃ sadaiva dvijasattama / tasmānnandīti nāmnāyaṃ bhaviṣyati sutastava

Sanskrit only: no published translation is held for this verse.

सनत्कुमार उवाच ततः स वायुवचनान् नन्दिनं परिषस्वजे । गृहीत्वा चाश्रमं स्वेन सो ऽनयत्तुष्टिवर्धनम् । चूडोपनयनादीनि कर्माण्यस्य चकार सः

sanatkumāra uvāca tataḥ sa vāyuvacanān nandinaṃ pariṣasvaje / gṛhītvā cāśramaṃ svena so 'nayattuṣṭivardhanam / cūḍopanayanādīni karmāṇyasya cakāra saḥ

Sanskrit only: no published translation is held for this verse.

कृत्वा चाध्यापयामास वेदान्साङ्गानशेषतः । आयुर्वेदं धनुर्वेदं गान्धर्वं शब्दलक्षणम्

kṛtvā cādhyāpayāmāsa vedānsāṅgānaśeṣataḥ / āyurvedaṃ dhanurvedaṃ gāndharvaṃ śabdalakṣaṇam

Sanskrit only: no published translation is held for this verse.

हस्तिनां चरितं यच्च नरनार्योश्च लक्षणम् । शिल्पानि चैव सर्वाणि निमित्तज्ञानमेव च

hastināṃ caritaṃ yacca naranāryośca lakṣaṇam / śilpāni caiva sarvāṇi nimittajñānameva ca

Sanskrit only: no published translation is held for this verse.

भूतग्रामचिकित्सां च मातॄणां चरितं च यत् । भुजंगानां च सर्वेषां यच्च किंचिद्विचेष्टितम् । अब्दैरधीतवान्सर्वं व्यास पञ्चभिरेव च

bhūtagrāmacikitsāṃ ca mātṝṇāṃ caritaṃ ca yat / bhujaṃgānāṃ ca sarveṣāṃ yacca kiṃcidviceṣṭitam / abdairadhītavānsarvaṃ vyāsa pañcabhireva ca

Sanskrit only: no published translation is held for this verse.

दक्षः शुचिरदीनात्मा प्रियवागनसूयकः । सर्वलोकप्रियो नित्यं मनोनयननन्दनः

dakṣaḥ śuciradīnātmā priyavāganasūyakaḥ / sarvalokapriyo nityaṃ manonayananandanaḥ

Sanskrit only: no published translation is held for this verse.

तस्याथ सप्तमे वर्षे ऋषी दिव्यौ तपोधनौ । आश्रमं समनुप्राप्तौ शिलादस्य महौजसौ

tasyātha saptame varṣe ṛṣī divyau tapodhanau / āśramaṃ samanuprāptau śilādasya mahaujasau

Sanskrit only: no published translation is held for this verse.

तावभ्यर्च्य यथान्यायं शिलादः सुमहातपाः । सुखासीनौ समालक्ष्य आसने परमार्चितौ

tāvabhyarcya yathānyāyaṃ śilādaḥ sumahātapāḥ / sukhāsīnau samālakṣya āsane paramārcitau

Sanskrit only: no published translation is held for this verse.

मित्रावरुणनामानौ तपोयोगबलान्वितौ । अभिज्ञौ सर्वभूतानां त्रैलोक्ये सचराचरे

mitrāvaruṇanāmānau tapoyogabalānvitau / abhijñau sarvabhūtānāṃ trailokye sacarācare

Sanskrit only: no published translation is held for this verse.

ताभ्यामनुज्ञातश्चैव निषसाद वरासने । उपविष्टस्ततः प्रीत इष्टाभिर्वाग्भिरस्तुवत्

tābhyāmanujñātaścaiva niṣasāda varāsane / upaviṣṭastataḥ prīta iṣṭābhirvāgbhirastuvat

Sanskrit only: no published translation is held for this verse.

ताभ्यां पृष्टश्च कच्चित्ते पुत्रस्तुष्टिप्रदः शुभः । स्वाध्यायनियतः कच्चित् कच्चिद्धर्मस्य संततिः

tābhyāṃ pṛṣṭaśca kaccitte putrastuṣṭipradaḥ śubhaḥ / svādhyāyaniyataḥ kaccit kacciddharmasya saṃtatiḥ

Sanskrit only: no published translation is held for this verse.

कच्चिन्न वृद्धान्बालो न गुरून्वाप्यवमन्यते । कच्चिन्नियमवांश्चैव कच्चित्तुष्टिप्रदः सताम्

kaccinna vṛddhānbālo na gurūnvāpyavamanyate / kaccinniyamavāṃścaiva kaccittuṣṭipradaḥ satām

Sanskrit only: no published translation is held for this verse.

स एवमुक्तस्तेजस्वी शिलादः पुत्रवत्सलः । उवाच गुणवान्सम्यक् कुलवंशविवर्धनः

sa evamuktastejasvī śilādaḥ putravatsalaḥ / uvāca guṇavānsamyak kulavaṃśavivardhanaḥ

Sanskrit only: no published translation is held for this verse.

तमाहूय स तुष्ट्या तु पुत्रं नन्दिनमच्युतम् । तयोः पादेषु शिरसा अपातयत नन्दिनम्

tamāhūya sa tuṣṭyā tu putraṃ nandinamacyutam / tayoḥ pādeṣu śirasā apātayata nandinam

Sanskrit only: no published translation is held for this verse.

तौ तु तस्याशिषं देवौ प्रयुङ्क्तो धर्मनित्यताम् । गुरुशुश्रूषणे भावं लोकांश्चैव तथाक्षयान्

tau tu tasyāśiṣaṃ devau prayuṅkto dharmanityatām / guruśuśrūṣaṇe bhāvaṃ lokāṃścaiva tathākṣayān

Sanskrit only: no published translation is held for this verse.

सनत्कुमार उवाच शिलादस्तामथालक्ष्य आशिषं देवयोस्तदा । विसृज्य नन्दिनं भीतः सो ऽपृच्छदृषिसत्तमौ

sanatkumāra uvāca śilādastāmathālakṣya āśiṣaṃ devayostadā / visṛjya nandinaṃ bhītaḥ so 'pṛcchadṛṣisattamau

Sanskrit only: no published translation is held for this verse.

शिलाद उवाच भगवन्तावृषी सत्यौ गतिज्ञौ सर्वदेहिनाम् । किमर्थं मम पुत्रस्य दीर्घमायुरुभावपि । प्रयुक्तवन्तौ सम्यक्तु नाशिषं मुनिसत्तमौ

śilāda uvāca bhagavantāvṛṣī satyau gatijñau sarvadehinām / kimarthaṃ mama putrasya dīrghamāyurubhāvapi / prayuktavantau samyaktu nāśiṣaṃ munisattamau

Sanskrit only: no published translation is held for this verse.

मित्रावरुणावूचतुः तवैष तनयस्तात अल्पायुः सर्वसंमतः । अतो ऽन्यद्वर्षमेकं वै जीवितं धारयिष्यति

mitrāvaruṇāvūcatuḥ tavaiṣa tanayastāta alpāyuḥ sarvasaṃmataḥ / ato 'nyadvarṣamekaṃ vai jīvitaṃ dhārayiṣyati

Sanskrit only: no published translation is held for this verse.

सनत्कुमार उवाच ततः स शोकसंतप्तो न्यपतद्भुवि दुःखितः । विसृज्य ऋषिशार्दूलाव् एकाकी विललाप च

sanatkumāra uvāca tataḥ sa śokasaṃtapto nyapatadbhuvi duḥkhitaḥ / visṛjya ṛṣiśārdūlāv ekākī vilalāpa ca

Sanskrit only: no published translation is held for this verse.

तस्य शोकाद्विलपतः स्वरं श्रुत्वा सुतः शुभः । नन्द्यागात्तमथापश्यत् पितरं दुःखितं भृशम्

tasya śokādvilapataḥ svaraṃ śrutvā sutaḥ śubhaḥ / nandyāgāttamathāpaśyat pitaraṃ duḥkhitaṃ bhṛśam

Sanskrit only: no published translation is held for this verse.

नन्द्युवाच केन त्वं तात दुःखेन दूयमानः प्ररोदिषि । दुःखं ते कुत उद्भूतं ज्ञातुमिच्छाम्यहं पितः

nandyuvāca kena tvaṃ tāta duḥkhena dūyamānaḥ prarodiṣi / duḥkhaṃ te kuta udbhūtaṃ jñātumicchāmyahaṃ pitaḥ

Sanskrit only: no published translation is held for this verse.

शिलाद उवाच पुत्र त्वं किल वर्षेण जीवितं सम्प्रहास्यसि । ऊचतुस्तावृषीत्येवं ततो मां कृच्छ्रमाविशत्

śilāda uvāca putra tvaṃ kila varṣeṇa jīvitaṃ samprahāsyasi / ūcatustāvṛṣītyevaṃ tato māṃ kṛcchramāviśat

Sanskrit only: no published translation is held for this verse.

नन्द्युवाच सत्यं देवऋषी तात न तावनृतमूचतुः । तथापि तु न मृत्युर्मे प्रभविष्यति मा शुचः

nandyuvāca satyaṃ devaṛṣī tāta na tāvanṛtamūcatuḥ / tathāpi tu na mṛtyurme prabhaviṣyati mā śucaḥ

Sanskrit only: no published translation is held for this verse.

शिलाद उवाच किं तपः किं परिज्ञानं को योगः कः श्रमश्च ते । येन त्वं मृत्युमुद्युक्तं वञ्चयिष्यसि कथ्यताम्

śilāda uvāca kiṃ tapaḥ kiṃ parijñānaṃ ko yogaḥ kaḥ śramaśca te / yena tvaṃ mṛtyumudyuktaṃ vañcayiṣyasi kathyatām

Sanskrit only: no published translation is held for this verse.

नन्द्युवाच न तात तपसा मृत्युं वञ्चयिष्ये न विद्यया । महादेवप्रसादेन मृत्युं जेष्यामि नान्यथा

nandyuvāca na tāta tapasā mṛtyuṃ vañcayiṣye na vidyayā / mahādevaprasādena mṛtyuṃ jeṣyāmi nānyathā

Sanskrit only: no published translation is held for this verse.

द्रक्ष्यामि शंकरं देवं ततो मृत्युर्न मे भवेत् । नष्टे मृत्यौ त्वया सार्धं चिरं वत्स्यामि निर्वृतः

drakṣyāmi śaṃkaraṃ devaṃ tato mṛtyurna me bhavet / naṣṭe mṛtyau tvayā sārdhaṃ ciraṃ vatsyāmi nirvṛtaḥ

Sanskrit only: no published translation is held for this verse.

शिलाद उवाच मया वर्षसहस्रेण तपस्तप्त्वा सुदुश्चरम् । महादेवः पुरा दृष्टो लब्धस्त्वं मे यतः सुतः

śilāda uvāca mayā varṣasahasreṇa tapastaptvā suduścaram / mahādevaḥ purā dṛṣṭo labdhastvaṃ me yataḥ sutaḥ

Sanskrit only: no published translation is held for this verse.

भवांस्तु वर्षेणैकेन तपसा नातिभावितः । कथं द्रष्टा महादेवम् एतदिच्छामि वेदितुम्

bhavāṃstu varṣeṇaikena tapasā nātibhāvitaḥ / kathaṃ draṣṭā mahādevam etadicchāmi veditum

Sanskrit only: no published translation is held for this verse.

नन्द्युवाच न तात तपसा देवो दृश्यते न च विद्यया । शुद्धेन मनसा भक्त्या दृश्यते परमेश्वरः

nandyuvāca na tāta tapasā devo dṛśyate na ca vidyayā / śuddhena manasā bhaktyā dṛśyate parameśvaraḥ

Sanskrit only: no published translation is held for this verse.

त्वया विसृष्टो गत्वाहम् अचिरेण त्रिलोचनम् । द्रष्टा तात न संदेहो विसृजाशु ततस्तु माम्

tvayā visṛṣṭo gatvāham acireṇa trilocanam / draṣṭā tāta na saṃdeho visṛjāśu tatastu mām

Sanskrit only: no published translation is held for this verse.

तिष्ठन्तं मां यमो ऽभ्येत्य पश्यतस्ते ऽभिसंमतम् । न हिंसति तथा तस्माद् इतस्तात व्रजाम्यहम्

tiṣṭhantaṃ māṃ yamo 'bhyetya paśyataste 'bhisaṃmatam / na hiṃsati tathā tasmād itastāta vrajāmyaham

Sanskrit only: no published translation is held for this verse.

तिष्ठन्तं वा शयानं वा धावन्तं पतितं तथा । न प्रतीक्षति वै मृत्युर् इति बुद्ध्वा शमं व्रज

tiṣṭhantaṃ vā śayānaṃ vā dhāvantaṃ patitaṃ tathā / na pratīkṣati vai mṛtyur iti buddhvā śamaṃ vraja

Sanskrit only: no published translation is held for this verse.

अवतीर्य जलं दिव्यं भावं शुद्धं समास्थितः । अभ्यस्य रौद्रमध्यायं ततो द्रक्ष्यामि शंकरम्

avatīrya jalaṃ divyaṃ bhāvaṃ śuddhaṃ samāsthitaḥ / abhyasya raudramadhyāyaṃ tato drakṣyāmi śaṃkaram

Sanskrit only: no published translation is held for this verse.

जपतश्चापि युक्तस्य रुद्रभावार्पितस्य च । न मृत्युकाला बहवः करिष्यन्ति मम व्यथाम्

japataścāpi yuktasya rudrabhāvārpitasya ca / na mṛtyukālā bahavaḥ kariṣyanti mama vyathām

Sanskrit only: no published translation is held for this verse.

सनत्कुमार उवाच तमेवंवादिनं मत्वा ब्रुवाणं शुद्धया गिरा । व्यसर्जयददीनात्मा कृच्छ्रात्पुत्रं महातपाः

sanatkumāra uvāca tamevaṃvādinaṃ matvā bruvāṇaṃ śuddhayā girā / vyasarjayadadīnātmā kṛcchrātputraṃ mahātapāḥ

Sanskrit only: no published translation is held for this verse.

अभिवन्द्य पितुः पादौ शिरसा स महायशाः । प्रदक्षिणं समावृत्य सम्प्रतस्थे ऽतिनिश्चितः

abhivandya pituḥ pādau śirasā sa mahāyaśāḥ / pradakṣiṇaṃ samāvṛtya sampratasthe 'tiniścitaḥ

Sanskrit only: no published translation is held for this verse.

अभिवाद्य ऋषीन्सर्वान् स दिदृक्षुरुदारधीः । मुनिः स देवमगमत् प्रणतार्तिहरं हरम्

abhivādya ṛṣīnsarvān sa didṛkṣurudāradhīḥ / muniḥ sa devamagamat praṇatārtiharaṃ haram

Sanskrit only: no published translation is held for this verse.