Skanda Purāṇa (part) 25

सनत्कुमार उवाच ततस्तत्रागतान्देवान् देवताधिपतिर्भवः । मरुतः प्राह सम्पूज्य कन्यार्थं सदसत्पतिः

sanatkumāra uvāca tatastatrāgatāndevān devatādhipatirbhavaḥ / marutaḥ prāha sampūjya kanyārthaṃ sadasatpatiḥ

Sanskrit only: no published translation is held for this verse.

मरुतो ये महावेगा महासत्त्वा महौजसः । आमन्त्र्य नाम्ना तानीशः सशक्रः सपितामहः

maruto ye mahāvegā mahāsattvā mahaujasaḥ / āmantrya nāmnā tānīśaḥ saśakraḥ sapitāmahaḥ

Sanskrit only: no published translation is held for this verse.

युष्माकं सुयशा कन्या सुभगा दिव्यरूपिणी । दातुमर्हथ तां सुभ्रूं स्नुषां मह्यं महाबलाः

yuṣmākaṃ suyaśā kanyā subhagā divyarūpiṇī / dātumarhatha tāṃ subhrūṃ snuṣāṃ mahyaṃ mahābalāḥ

Sanskrit only: no published translation is held for this verse.

मरुत ऊचुः त्वमस्माकं च तस्याश्च सर्वस्य जगतस्तथा । प्रभविष्णुस्त्रिलोकेश न तु याचितुमर्हसि

maruta ūcuḥ tvamasmākaṃ ca tasyāśca sarvasya jagatastathā / prabhaviṣṇustrilokeśa na tu yācitumarhasi

Sanskrit only: no published translation is held for this verse.

त्वयैव देया ग्राह्या च त्वं नो गतिरनुत्तमा । मा नः परानिवेशान याचनेन विभावय

tvayaiva deyā grāhyā ca tvaṃ no gatiranuttamā / mā naḥ parāniveśāna yācanena vibhāvaya

Sanskrit only: no published translation is held for this verse.

पिता नः कश्यपः श्रीमान् मरीचिश्च पितामहः । पितामहपिता ब्रह्मा तस्यापि त्वं पितामहः । स त्वं पितामहो ऽस्माकं न परान्कर्तुमर्हसि

pitā naḥ kaśyapaḥ śrīmān marīciśca pitāmahaḥ / pitāmahapitā brahmā tasyāpi tvaṃ pitāmahaḥ / sa tvaṃ pitāmaho 'smākaṃ na parānkartumarhasi

Sanskrit only: no published translation is held for this verse.

स एवमुक्तो देवेशो मरुद्भिर्देवसत्तमैः । सुयशां मरुतां कन्याम् आनयामास तत्क्षणात्

sa evamukto deveśo marudbhirdevasattamaiḥ / suyaśāṃ marutāṃ kanyām ānayāmāsa tatkṣaṇāt

Sanskrit only: no published translation is held for this verse.

स्वयं होतास्य तत्रासीद् ब्रह्मा लोकपितामहः । कश्यपश्च तथोद्गाता अत्रिः साम स्वयं जगौ । अथर्वाङ्गिरसौ देवौ ब्रह्मत्वमपि चक्रतुः

svayaṃ hotāsya tatrāsīd brahmā lokapitāmahaḥ / kaśyapaśca tathodgātā atriḥ sāma svayaṃ jagau / atharvāṅgirasau devau brahmatvamapi cakratuḥ

Sanskrit only: no published translation is held for this verse.

नारदः पर्वतश्चैव चित्रसेनश्च गायनः । विश्वावसू रुचिश्चैव हाहा हूहू तथैव च

nāradaḥ parvataścaiva citrasenaśca gāyanaḥ / viśvāvasū ruciścaiva hāhā hūhū tathaiva ca

Sanskrit only: no published translation is held for this verse.

तथा शालिशिरा यश्च विश्रुतो गण्डमण्डकः । ईतिश्चैवेन्द्रवाहश्च यज्ञवाहो ऽथ दक्षिणः । एते चान्ये च गन्धर्वा जगुर्मधुरकण्ठिनः

tathā śāliśirā yaśca viśruto gaṇḍamaṇḍakaḥ / ītiścaivendravāhaśca yajñavāho 'tha dakṣiṇaḥ / ete cānye ca gandharvā jagurmadhurakaṇṭhinaḥ

Sanskrit only: no published translation is held for this verse.

उर्वशी चैव रम्भा च घृताची पूर्वचित्त्यपि । तिलोत्तमा च विश्वाची अन्याश्चाप्सरसः शुभाः । अनृत्यन्त महाभागा नृत्तं सुरमनोहरम्

urvaśī caiva rambhā ca ghṛtācī pūrvacittyapi / tilottamā ca viśvācī anyāścāpsarasaḥ śubhāḥ / anṛtyanta mahābhāgā nṛttaṃ suramanoharam

Sanskrit only: no published translation is held for this verse.

सनत्कुमार उवाच स एवमभवद्व्यास विवाहस्तस्य धीमतः । नन्दिनो गणमुख्यस्य अनौपम्यो ह्यनिन्दितः

sanatkumāra uvāca sa evamabhavadvyāsa vivāhastasya dhīmataḥ / nandino gaṇamukhyasya anaupamyo hyaninditaḥ

Sanskrit only: no published translation is held for this verse.

ततः स तु कृतोद्वाहो नन्दी गत्वा महामनाः । पादान्ववन्दे देवस्य देव्या ब्रह्मण एव च । शिलादस्य च लोकेशः श्रिया परमया युतः

tataḥ sa tu kṛtodvāho nandī gatvā mahāmanāḥ / pādānvavande devasya devyā brahmaṇa eva ca / śilādasya ca lokeśaḥ śriyā paramayā yutaḥ

Sanskrit only: no published translation is held for this verse.

देव उवाच वरं वृणीष्व पुत्र त्वं स्नुषा चेयं तव प्रिया । वरं ददामि ते वत्स अनया सहमीप्सितम्

deva uvāca varaṃ vṛṇīṣva putra tvaṃ snuṣā ceyaṃ tava priyā / varaṃ dadāmi te vatsa anayā sahamīpsitam

Sanskrit only: no published translation is held for this verse.

नन्द्युवाच भगवन्यदि तुष्टो ऽसि त्वयि भक्तिर्दृढास्तु मे । सदा च तुष्टो भव मे साम्बः सह गणेश्वरैः

nandyuvāca bhagavanyadi tuṣṭo 'si tvayi bhaktirdṛḍhāstu me / sadā ca tuṣṭo bhava me sāmbaḥ saha gaṇeśvaraiḥ

Sanskrit only: no published translation is held for this verse.

पितरं चैव मे देव उत्पादकमिमं प्रभो । अनुग्रहेण युक्तेन योक्तुमर्हसि कामद

pitaraṃ caiva me deva utpādakamimaṃ prabho / anugraheṇa yuktena yoktumarhasi kāmada

Sanskrit only: no published translation is held for this verse.

देव उवाच सदाहं तव नन्दीश सुतुष्टः सगणेश्वरः । पार्वत्या सहितो धीमन्न् इदं च शृणु मे वचः

deva uvāca sadāhaṃ tava nandīśa sutuṣṭaḥ sagaṇeśvaraḥ / pārvatyā sahito dhīmann idaṃ ca śṛṇu me vacaḥ

Sanskrit only: no published translation is held for this verse.

सदेष्टश्च वरिष्ठश्च परमैश्वर्यसंयुतः । महायोगी महेष्वासो महाबलपराक्रमः

sadeṣṭaśca variṣṭhaśca paramaiśvaryasaṃyutaḥ / mahāyogī maheṣvāso mahābalaparākramaḥ

Sanskrit only: no published translation is held for this verse.

अजय्यश्चैव जेता च पूज्येज्यश्च सदा भव । अहं यत्र भवांस्तत्र यत्र त्वं तत्र चाप्यहम्

ajayyaścaiva jetā ca pūjyejyaśca sadā bhava / ahaṃ yatra bhavāṃstatra yatra tvaṃ tatra cāpyaham

Sanskrit only: no published translation is held for this verse.

अयं च ते पिता विप्रः परमैश्वर्यसंयुतः । भविष्यति गणाध्यक्षो महागणपतिर्मम

ayaṃ ca te pitā vipraḥ paramaiśvaryasaṃyutaḥ / bhaviṣyati gaṇādhyakṣo mahāgaṇapatirmama

Sanskrit only: no published translation is held for this verse.

पर्वतं चास्य वैभ्राजं कामगं सर्वकाञ्चनम् । उपेतं भवनैर्दिव्यैः प्रयच्छामि जनावृतम् । तेनायं सर्वलोकेषु चरिष्यति यथेप्सितम्

parvataṃ cāsya vaibhrājaṃ kāmagaṃ sarvakāñcanam / upetaṃ bhavanairdivyaiḥ prayacchāmi janāvṛtam / tenāyaṃ sarvalokeṣu cariṣyati yathepsitam

Sanskrit only: no published translation is held for this verse.

स्थानं श्रीपर्वते चास्य भविष्यति सुपूजितम् । भृगौ तस्मिंश्च यः प्राणांस् त्यक्ष्यते वै सुधार्मिकः । स कामचारी वैभ्राजे गणपो ऽस्य भविष्यति

sthānaṃ śrīparvate cāsya bhaviṣyati supūjitam / bhṛgau tasmiṃśca yaḥ prāṇāṃs tyakṣyate vai sudhārmikaḥ / sa kāmacārī vaibhrāje gaṇapo 'sya bhaviṣyati

Sanskrit only: no published translation is held for this verse.

सनत्कुमार उवाच ततो देवी महाभागा शैलादेरददद्वरम् । सो ऽब्रवीत्त्वयि भक्तिर्मे सदैवानपगा भवेत्

sanatkumāra uvāca tato devī mahābhāgā śailāderadadadvaram / so 'bravīttvayi bhaktirme sadaivānapagā bhavet

Sanskrit only: no published translation is held for this verse.

ततो मरुत्सुता चैव उभाभ्यामपि चोदिता । वरं वृणु यथेष्टं वै ताविदं प्रत्युवाच ह

tato marutsutā caiva ubhābhyāmapi coditā / varaṃ vṛṇu yatheṣṭaṃ vai tāvidaṃ pratyuvāca ha

Sanskrit only: no published translation is held for this verse.

युवयोरस्तु भक्तिर्मे तथा भर्तरि चैव हि । नित्यं चानपगा स्यान्मे धर्मे च मतिरुत्तमा । एतदिच्छामि देवेशौ वरं वरसहस्रदौ

yuvayorastu bhaktirme tathā bhartari caiva hi / nityaṃ cānapagā syānme dharme ca matiruttamā / etadicchāmi deveśau varaṃ varasahasradau

Sanskrit only: no published translation is held for this verse.

सनत्कुमार उवाच ततस्तावेवमेतत्ते भवितेति शुचिस्मिते । ऊचतुर्मुदितौ देवौ स्नुषां तां वरवर्णिनीम्

sanatkumāra uvāca tatastāvevametatte bhaviteti śucismite / ūcaturmuditau devau snuṣāṃ tāṃ varavarṇinīm

Sanskrit only: no published translation is held for this verse.

गणाश्चास्य ततो ऽभ्येत्य सर्वे देवप्रियेप्सया । वरं ददुर्महासत्त्वाः स वव्रे काञ्चनप्रभः

gaṇāścāsya tato 'bhyetya sarve devapriyepsayā / varaṃ dadurmahāsattvāḥ sa vavre kāñcanaprabhaḥ

Sanskrit only: no published translation is held for this verse.

युष्मासु मम भक्तिश्च ऐश्वर्यं चापि संमतम् । वश्याश्च यूयं सर्वे मे प्रियो युष्माकमेव च

yuṣmāsu mama bhaktiśca aiśvaryaṃ cāpi saṃmatam / vaśyāśca yūyaṃ sarve me priyo yuṣmākameva ca

Sanskrit only: no published translation is held for this verse.

गणा ऊचुः भवान्मन्तानुमन्ता च गतिरागतिरेव च । अस्माकमीशः सर्वेषां देवानामपि चेश्वरः

gaṇā ūcuḥ bhavānmantānumantā ca gatirāgatireva ca / asmākamīśaḥ sarveṣāṃ devānāmapi ceśvaraḥ

Sanskrit only: no published translation is held for this verse.

कुष्माण्डानां वरिष्ठश्च रुद्राणां त्वं महाबलः । ईतीनां द्वारपालश्च प्रमथानां तथैव च

kuṣmāṇḍānāṃ variṣṭhaśca rudrāṇāṃ tvaṃ mahābalaḥ / ītīnāṃ dvārapālaśca pramathānāṃ tathaiva ca

Sanskrit only: no published translation is held for this verse.

महाबलो महायोगी सेनानीस्त्वं हि नो मतः । त्वं भूतो भूतनेता च नायको ऽथ विनायकः

mahābalo mahāyogī senānīstvaṃ hi no mataḥ / tvaṃ bhūto bhūtanetā ca nāyako 'tha vināyakaḥ

Sanskrit only: no published translation is held for this verse.

ग्रहाणामधिपश्चैव उग्रदण्डधरस्तथा । त्वमग्रयोधी शत्रुघ्नस् त्वं वीरस्त्वं दिवस्पतिः

grahāṇāmadhipaścaiva ugradaṇḍadharastathā / tvamagrayodhī śatrughnas tvaṃ vīrastvaṃ divaspatiḥ

Sanskrit only: no published translation is held for this verse.

महानुभावस्त्वं चैव क्षीरोदनिलयश्च ह । जप्येश्वरनिकेतश्च जप्येश्वरविभावितः

mahānubhāvastvaṃ caiva kṣīrodanilayaśca ha / japyeśvaraniketaśca japyeśvaravibhāvitaḥ

Sanskrit only: no published translation is held for this verse.

भावनः सर्वभूतानां वरदो वरदार्चितः । अस्माकं वरदश्चैव भव भूतेश्वर प्रभो

bhāvanaḥ sarvabhūtānāṃ varado varadārcitaḥ / asmākaṃ varadaścaiva bhava bhūteśvara prabho

Sanskrit only: no published translation is held for this verse.

सनत्कुमार उवाच स एवं गणपैः सर्वैः स्तुतो नन्दीश्वरो विभुः । उवाच प्रणतः सर्वान् ब्रूत किं करवाणि वः

sanatkumāra uvāca sa evaṃ gaṇapaiḥ sarvaiḥ stuto nandīśvaro vibhuḥ / uvāca praṇataḥ sarvān brūta kiṃ karavāṇi vaḥ

Sanskrit only: no published translation is held for this verse.

त एवमुक्ता गणपाः सर्व एव महाबलाः । ऊचुस्तं दिव्यभावज्ञा देवदेवस्य संनिधौ

ta evamuktā gaṇapāḥ sarva eva mahābalāḥ / ūcustaṃ divyabhāvajñā devadevasya saṃnidhau

Sanskrit only: no published translation is held for this verse.

त्वमस्माकं गणाध्यक्षः कृतो देवेन शम्भुना । अस्माभिश्चाभिषिक्तस्त्वं नायको धर्मदायकः

tvamasmākaṃ gaṇādhyakṣaḥ kṛto devena śambhunā / asmābhiścābhiṣiktastvaṃ nāyako dharmadāyakaḥ

Sanskrit only: no published translation is held for this verse.

स त्वं शिवश्च सौम्यश्च गुणवानगुणेष्वपि । क्षमाशौचदमोपेतो भव नः प्रियकृत्सदा

sa tvaṃ śivaśca saumyaśca guṇavānaguṇeṣvapi / kṣamāśaucadamopeto bhava naḥ priyakṛtsadā

Sanskrit only: no published translation is held for this verse.

सनत्कुमार उवाच एवमुक्तस्तदा सर्वान् प्रणम्य बहुमानतः । शिरस्यञ्जलिमाधाय गणपानस्तुवत्तदा

sanatkumāra uvāca evamuktastadā sarvān praṇamya bahumānataḥ / śirasyañjalimādhāya gaṇapānastuvattadā

Sanskrit only: no published translation is held for this verse.

नन्द्युवाच नमो वः सर्वभूतेभ्यो नमो योगिभ्य एव च । नमश्चाप्यनिकेतेभ्यो योगीशेभ्यो नमस्तथा

nandyuvāca namo vaḥ sarvabhūtebhyo namo yogibhya eva ca / namaścāpyaniketebhyo yogīśebhyo namastathā

Sanskrit only: no published translation is held for this verse.

नमः कामचरेभ्यश्च नम उग्रेभ्य एव च । मृत्युभ्यश्च यमेभ्यश्च कालेभ्यश्च नमो नमः

namaḥ kāmacarebhyaśca nama ugrebhya eva ca / mṛtyubhyaśca yamebhyaśca kālebhyaśca namo namaḥ

Sanskrit only: no published translation is held for this verse.

नमः काञ्चनमालेभ्यः सर्वधर्मिभ्य एव च । नमो वो वधकेभ्यश्च अवध्येभ्यस्तथैव च

namaḥ kāñcanamālebhyaḥ sarvadharmibhya eva ca / namo vo vadhakebhyaśca avadhyebhyastathaiva ca

Sanskrit only: no published translation is held for this verse.

नमः परमयोगिभ्यो जटिभ्यश्च नमो नमः । नमो वो ऽदृश्यरूपेभ्यो विकृतेभ्यस्तथैव च

namaḥ paramayogibhyo jaṭibhyaśca namo namaḥ / namo vo 'dṛśyarūpebhyo vikṛtebhyastathaiva ca

Sanskrit only: no published translation is held for this verse.

नमो वल्कलवासेभ्यः कृत्तिवासेभ्य एव च । नमः श्वेताम्बरस्रग्भ्यश् चित्रस्रग्भ्यो नमो नमः

namo valkalavāsebhyaḥ kṛttivāsebhya eva ca / namaḥ śvetāmbarasragbhyaś citrasragbhyo namo namaḥ

Sanskrit only: no published translation is held for this verse.

धावद्भ्यश्च द्रवद्भ्यश्च प्रस्थितेभ्यो नमो नमः । नमो मुनिभ्यो गायद्भ्यो जपद्भ्यश्च नमो नमः

dhāvadbhyaśca dravadbhyaśca prasthitebhyo namo namaḥ / namo munibhyo gāyadbhyo japadbhyaśca namo namaḥ

Sanskrit only: no published translation is held for this verse.

नमः शरभरूपेभ्यः शतरूपेभ्य एव च । नमः पर्वतवासेभ्यो व्याघ्ररूपेभ्य एव च

namaḥ śarabharūpebhyaḥ śatarūpebhya eva ca / namaḥ parvatavāsebhyo vyāghrarūpebhya eva ca

Sanskrit only: no published translation is held for this verse.

नमो मार्जाररूपेभ्यः काककोकेभ्य एव च । नमो दैवतरूपेभ्यः पवनेभ्यस्तथैव च

namo mārjārarūpebhyaḥ kākakokebhya eva ca / namo daivatarūpebhyaḥ pavanebhyastathaiva ca

Sanskrit only: no published translation is held for this verse.

नमो ऽग्निभ्यस्तथाद्भ्यश्च वरुणेभ्यस्तथैव च । नमो धनेशरूपेभ्यः सर्वरूपिभ्य एव च

namo 'gnibhyastathādbhyaśca varuṇebhyastathaiva ca / namo dhaneśarūpebhyaḥ sarvarūpibhya eva ca

Sanskrit only: no published translation is held for this verse.

नमश्चोदरवक्त्रेभ्यः सर्ववक्त्रेभ्य एव च । नमो वामनरूपेभ्यो वामरूपेभ्य एव च

namaścodaravaktrebhyaḥ sarvavaktrebhya eva ca / namo vāmanarūpebhyo vāmarūpebhya eva ca

Sanskrit only: no published translation is held for this verse.

देवासुरमनुष्याणाम् आप्यायिभ्यो नमो नमः । नमो वः सर्वभूतानां नमो वः सर्वतः शुभाः

devāsuramanuṣyāṇām āpyāyibhyo namo namaḥ / namo vaḥ sarvabhūtānāṃ namo vaḥ sarvataḥ śubhāḥ

Sanskrit only: no published translation is held for this verse.

ग्रहेभ्यश्च नमो वो ऽस्तु मोक्षेभ्यश्च नमस्तथा । शुभेभ्यश्च नमो वो ऽस्तु अशुभेभ्यस्तथैव च । मम सौम्याः शिवाश्चैव भवन्तु गणनायकाः

grahebhyaśca namo vo 'stu mokṣebhyaśca namastathā / śubhebhyaśca namo vo 'stu aśubhebhyastathaiva ca / mama saumyāḥ śivāścaiva bhavantu gaṇanāyakāḥ

Sanskrit only: no published translation is held for this verse.

इति स्तुता गणपतयो महाबलाः शुभैर्वचोभिः सुरशत्रुनाशनाः । दिशन्तु मे सुखमतुलं सुखप्रदा बलं च वीर्यं स्थिरतां च संयुगे

iti stutā gaṇapatayo mahābalāḥ śubhairvacobhiḥ suraśatrunāśanāḥ / diśantu me sukhamatulaṃ sukhapradā balaṃ ca vīryaṃ sthiratāṃ ca saṃyuge

Sanskrit only: no published translation is held for this verse.

तपो ऽक्षयं स्थानमथातुलां गतिं यशस्तथाग्र्यं बहु धर्मनित्यताम् । दिशन्तु सर्वं मनसेप्सितं च मे सुरेश्वराः पुष्टिमनुत्तमां तथा

tapo 'kṣayaṃ sthānamathātulāṃ gatiṃ yaśastathāgryaṃ bahu dharmanityatām / diśantu sarvaṃ manasepsitaṃ ca me sureśvarāḥ puṣṭimanuttamāṃ tathā

Sanskrit only: no published translation is held for this verse.

सनत्कुमार उवाच इमौ नन्दिगणेन्द्राणां स्तवौ यो ऽध्येति नित्यशः । सो ऽश्वमेधावभृथवत् सर्वपापैः प्रमुच्यते

sanatkumāra uvāca imau nandigaṇendrāṇāṃ stavau yo 'dhyeti nityaśaḥ / so 'śvamedhāvabhṛthavat sarvapāpaiḥ pramucyate

Sanskrit only: no published translation is held for this verse.

सन्ध्यायामपरस्यां तु जपन्पापं दिवाकृतम् । पूर्वस्यां संत्यजेद्वापि सर्वरात्रिकृतं जपन्

sandhyāyāmaparasyāṃ tu japanpāpaṃ divākṛtam / pūrvasyāṃ saṃtyajedvāpi sarvarātrikṛtaṃ japan

Sanskrit only: no published translation is held for this verse.

सनत्कुमार उवाच ततस्ते गणपाः सर्वे संस्तुतास्तेन धीमता । निसृष्टाश्च तदा जग्मुः प्रणिपत्य वृषध्वजम्

sanatkumāra uvāca tataste gaṇapāḥ sarve saṃstutāstena dhīmatā / nisṛṣṭāśca tadā jagmuḥ praṇipatya vṛṣadhvajam

Sanskrit only: no published translation is held for this verse.

देवाश्च सर्वलोकाश्च ततो देवः स्वयं प्रभुः । सृष्ट्वा नन्दीश्वरगृहं प्रदाय च महामनाः । ईप्सितं सह देव्या वै जगाम स्थानमव्ययम्

devāśca sarvalokāśca tato devaḥ svayaṃ prabhuḥ / sṛṣṭvā nandīśvaragṛhaṃ pradāya ca mahāmanāḥ / īpsitaṃ saha devyā vai jagāma sthānamavyayam

Sanskrit only: no published translation is held for this verse.

य इमं नन्दिनो जन्म वरदानं तथैव च । अभिषेकं विवाहं च पठेद्वा श्रावयीत वा । ब्राह्मणः स मृतो याति नन्दीश्वरसलोकताम्

ya imaṃ nandino janma varadānaṃ tathaiva ca / abhiṣekaṃ vivāhaṃ ca paṭhedvā śrāvayīta vā / brāhmaṇaḥ sa mṛto yāti nandīśvarasalokatām

Sanskrit only: no published translation is held for this verse.

यो नियतस्तु पठेत्प्रयतात्मा सर्वमिमं प्रणतो भवभक्त्या । सो ऽपि गतः परलोकविचारी नन्दिसमो ऽनुचरो हि मम स्यात्

yo niyatastu paṭhetprayatātmā sarvamimaṃ praṇato bhavabhaktyā / so 'pi gataḥ paralokavicārī nandisamo 'nucaro hi mama syāt

Sanskrit only: no published translation is held for this verse.