Skanda Purāṇa (part) 26

इति स्कन्दपुराणे पञ्चविंशतिमो ऽध्यायः सनत्कुमार उवाच एवं नन्दीश्वरो व्यास उत्पन्नो ऽनुचरश्च ह । अभवद्देवदेवस्य सेनापत्ये ऽभिषेचितः

iti skandapurāṇe pañcaviṃśatimo 'dhyāyaḥ sanatkumāra uvāca evaṃ nandīśvaro vyāsa utpanno 'nucaraśca ha / abhavaddevadevasya senāpatye 'bhiṣecitaḥ

Sanskrit only: no published translation is held for this verse.

व्यास उवाच देव्या सहाथ भगवान् आसीनस्तत्र कामदः । अकरोत्किं महादेव एतदिच्छामि वेदितुम्

vyāsa uvāca devyā sahātha bhagavān āsīnastatra kāmadaḥ / akarotkiṃ mahādeva etadicchāmi veditum

Sanskrit only: no published translation is held for this verse.

सनत्कुमार उवाच भगवान्हिमवच्छृङ्गे शर्वो देव्याः प्रियेप्सया । गणेशैर्विविधाकारैर् हासं संजनयन्मुहुः

sanatkumāra uvāca bhagavānhimavacchṛṅge śarvo devyāḥ priyepsayā / gaṇeśairvividhākārair hāsaṃ saṃjanayanmuhuḥ

Sanskrit only: no published translation is held for this verse.

देवीं बालेन्दुतिलको रामयच्च रराम च । महानुभावैः सर्वज्ञैः कामरूपधरैः शुभैः

devīṃ bālendutilako rāmayacca rarāma ca / mahānubhāvaiḥ sarvajñaiḥ kāmarūpadharaiḥ śubhaiḥ

Sanskrit only: no published translation is held for this verse.

अथ देव्याससादैका मातरं परमेश्वरी । आसीनां काञ्चने शुभ्रे आसने परमार्चिते

atha devyāsasādaikā mātaraṃ parameśvarī / āsīnāṃ kāñcane śubhre āsane paramārcite

Sanskrit only: no published translation is held for this verse.

अथ दृष्ट्वा सतीं देवीम् आगतां तु सुरूपिणीम् । आसनेन महार्हेण सम्पादयदनिन्दिताम्

atha dṛṣṭvā satīṃ devīm āgatāṃ tu surūpiṇīm / āsanena mahārheṇa sampādayadaninditām

Sanskrit only: no published translation is held for this verse.

आसीनां तां च सोवाच मेना हिमवतः प्रिया । चिरस्यागमनं ह्यद्य तव पुत्रि शुभेक्षणे । दरिद्रक्रीडनैस्त्वं हि भर्त्रा क्रीडसि संगता

āsīnāṃ tāṃ ca sovāca menā himavataḥ priyā / cirasyāgamanaṃ hyadya tava putri śubhekṣaṇe / daridrakrīḍanaistvaṃ hi bhartrā krīḍasi saṃgatā

Sanskrit only: no published translation is held for this verse.

ये दरिद्रा भवन्ति स्म तथैव च निराश्रयाः । उमे त एवं क्रीडन्ति यथा तव पतिः शुभे

ye daridrā bhavanti sma tathaiva ca nirāśrayāḥ / ume ta evaṃ krīḍanti yathā tava patiḥ śubhe

Sanskrit only: no published translation is held for this verse.

सनत्कुमार उवाच सैवमुक्ता तु मात्राथ नातिहृष्टमनाभवत् । महत्याक्षमया युक्ता न किंचित्तामुवाच ह

sanatkumāra uvāca saivamuktā tu mātrātha nātihṛṣṭamanābhavat / mahatyākṣamayā yuktā na kiṃcittāmuvāca ha

Sanskrit only: no published translation is held for this verse.

विसृष्टा सा तदा मात्रा गत्वा देवमुवाच ह । भगवन्देवदेवेश नेह वत्स्यामि भूधरे । अन्यं वृणु ममावासं भुवनेश महाद्युते

visṛṣṭā sā tadā mātrā gatvā devamuvāca ha / bhagavandevadeveśa neha vatsyāmi bhūdhare / anyaṃ vṛṇu mamāvāsaṃ bhuvaneśa mahādyute

Sanskrit only: no published translation is held for this verse.

देव उवाच सदा त्वमुच्यमाना वै मया वासार्थमीश्वरि । अन्यत्र रोचितवती नावासं देवि कर्हिचित्

deva uvāca sadā tvamucyamānā vai mayā vāsārthamīśvari / anyatra rocitavatī nāvāsaṃ devi karhicit

Sanskrit only: no published translation is held for this verse.

इदानीं स्वयमेव त्वं वासमन्यत्र शोभने । कस्मान्मृगयसे देवि ब्रूहि तन्मे शुचिस्मिते

idānīṃ svayameva tvaṃ vāsamanyatra śobhane / kasmānmṛgayase devi brūhi tanme śucismite

Sanskrit only: no published translation is held for this verse.

देव्युवाच गृहं गताहं देवेश पितुरद्य महात्मनः । दृष्ट्वा च मे तत्र माता विजने लोकभावनी

devyuvāca gṛhaṃ gatāhaṃ deveśa pituradya mahātmanaḥ / dṛṣṭvā ca me tatra mātā vijane lokabhāvanī

Sanskrit only: no published translation is held for this verse.

आसनादिभिरभ्यर्च्य सा मामेवमभाषत । उमे तव सदा भर्ता दरिद्रक्रीडनैः शुभे । क्रीडते न हि देवानां क्रीडा भवति तादृशी

āsanādibhirabhyarcya sā māmevamabhāṣata / ume tava sadā bhartā daridrakrīḍanaiḥ śubhe / krīḍate na hi devānāṃ krīḍā bhavati tādṛśī

Sanskrit only: no published translation is held for this verse.

यत्किल त्वं महादेव गणेशैर्विविधैः शुभैः । रमसे तदनिष्टं हि मम मातुर्वृषध्वज

yatkila tvaṃ mahādeva gaṇeśairvividhaiḥ śubhaiḥ / ramase tadaniṣṭaṃ hi mama māturvṛṣadhvaja

Sanskrit only: no published translation is held for this verse.

सनत्कुमार उवाच ततो देवः प्रहस्याह देवीं हासयितुं प्रभुः । एवमेतन्न संदेहः कस्मान्मन्युरभूत्तव

sanatkumāra uvāca tato devaḥ prahasyāha devīṃ hāsayituṃ prabhuḥ / evametanna saṃdehaḥ kasmānmanyurabhūttava

Sanskrit only: no published translation is held for this verse.

कृत्तिवासा ह्यवासा वा श्मशाननिलयश्च ह । अनिकेतो ह्यरण्येषु पर्वतानां गुहासु च । विचरामि गणैर्नग्नैर् वृतो ऽम्भोजविलोचने

kṛttivāsā hyavāsā vā śmaśānanilayaśca ha / aniketo hyaraṇyeṣu parvatānāṃ guhāsu ca / vicarāmi gaṇairnagnair vṛto 'mbhojavilocane

Sanskrit only: no published translation is held for this verse.

मा क्रुधो देवि मातुस्त्वं तथ्यं मातावदत्तव । न हि मातृसमो बन्धुर् जन्तूनामस्ति शोभने

mā krudho devi mātustvaṃ tathyaṃ mātāvadattava / na hi mātṛsamo bandhur jantūnāmasti śobhane

Sanskrit only: no published translation is held for this verse.

देव्युवाच न मे ऽस्ति बन्धुभिः किंचित् कृत्यं सुरवरेश्वर । तथा कुरु महादेव यथान्यत्र वसामहे

devyuvāca na me 'sti bandhubhiḥ kiṃcit kṛtyaṃ suravareśvara / tathā kuru mahādeva yathānyatra vasāmahe

Sanskrit only: no published translation is held for this verse.

सनत्कुमार उवाच स एवमुक्तो देवेशो देव्या देवेश्वरः प्रभुः । पार्श्वस्थं गणपं प्राह निकुम्भं नाम विश्रुतम्

sanatkumāra uvāca sa evamukto deveśo devyā deveśvaraḥ prabhuḥ / pārśvasthaṃ gaṇapaṃ prāha nikumbhaṃ nāma viśrutam

Sanskrit only: no published translation is held for this verse.

गणेश्वर निकुम्भ त्वं गत्वा वाराणसीं शुभाम् । शून्यां कुरु महाबाहो उपायेनैव मा बलात्

gaṇeśvara nikumbha tvaṃ gatvā vārāṇasīṃ śubhām / śūnyāṃ kuru mahābāho upāyenaiva mā balāt

Sanskrit only: no published translation is held for this verse.

तत्र राजा निवसति दिवोदासः प्रतापवान् । धार्मिको मम भक्तश्च महायोगी महाबलः

tatra rājā nivasati divodāsaḥ pratāpavān / dhārmiko mama bhaktaśca mahāyogī mahābalaḥ

Sanskrit only: no published translation is held for this verse.

स त्वं तथा गतः कुर्या यथास्मै नापराध्यसे । तस्यैव चापराधेन शून्यां वाराणसीं कुरु

sa tvaṃ tathā gataḥ kuryā yathāsmai nāparādhyase / tasyaiva cāparādhena śūnyāṃ vārāṇasīṃ kuru

Sanskrit only: no published translation is held for this verse.

सनत्कुमार उवाच स एवमुक्तस्तेजस्वी निकुम्भो गणसत्तमः । उवाच देवं प्रणतः प्राञ्जलिर्हृषिताननः

sanatkumāra uvāca sa evamuktastejasvī nikumbho gaṇasattamaḥ / uvāca devaṃ praṇataḥ prāñjalirhṛṣitānanaḥ

Sanskrit only: no published translation is held for this verse.

तथा करिष्ये देवेश यथा स हि नराधिपः । भविष्यत्यपराधीश त्वं च तुष्टो भविष्यसि । शून्या वाराणसी चैव भविष्यति न संशयः

tathā kariṣye deveśa yathā sa hi narādhipaḥ / bhaviṣyatyaparādhīśa tvaṃ ca tuṣṭo bhaviṣyasi / śūnyā vārāṇasī caiva bhaviṣyati na saṃśayaḥ

Sanskrit only: no published translation is held for this verse.

सनत्कुमार उवाच एवमुक्त्वा निकुम्भो ऽसौ प्रणम्य शिरसा हरम् । जगाम पुण्यां लोकेषु पुरीं वाराणसीं प्रभुः

sanatkumāra uvāca evamuktvā nikumbho 'sau praṇamya śirasā haram / jagāma puṇyāṃ lokeṣu purīṃ vārāṇasīṃ prabhuḥ

Sanskrit only: no published translation is held for this verse.

तत्रासौ दर्शनं स्वप्ने नापिताय ददौ गणः । मण्डूकाक्षाय रूपं च स्वं तस्यादर्शयत्तदा

tatrāsau darśanaṃ svapne nāpitāya dadau gaṇaḥ / maṇḍūkākṣāya rūpaṃ ca svaṃ tasyādarśayattadā

Sanskrit only: no published translation is held for this verse.

निकुम्भ उवाच मण्डूकाक्ष निकुम्भो ऽहं गणपः शोकनाशनः । तवानुग्रहकृत्प्राप्तो यद्ब्रवीमि कुरुष्व तत्

nikumbha uvāca maṇḍūkākṣa nikumbho 'haṃ gaṇapaḥ śokanāśanaḥ / tavānugrahakṛtprāpto yadbravīmi kuruṣva tat

Sanskrit only: no published translation is held for this verse.

दिवोदासगृहद्वारि कुरुष्व त्वं ममालयम् । स्थापयस्व च तत्रार्चां मद्रूपसदृशीं शुभाम्

divodāsagṛhadvāri kuruṣva tvaṃ mamālayam / sthāpayasva ca tatrārcāṃ madrūpasadṛśīṃ śubhām

Sanskrit only: no published translation is held for this verse.

वित्तं च ते प्रदास्यामि पुत्रान्सौभाग्यमेव च । प्रियत्वं चैव सर्वत्र गतिं चानुत्तमां पुनः

vittaṃ ca te pradāsyāmi putrānsaubhāgyameva ca / priyatvaṃ caiva sarvatra gatiṃ cānuttamāṃ punaḥ

Sanskrit only: no published translation is held for this verse.

सनत्कुमार उवाच एवमुक्तो निकुम्भेन नापितो नृपतिं तदा । गत्वावदद्दिवोदासम् इन्द्रवैवस्वतोपमम्

sanatkumāra uvāca evamukto nikumbhena nāpito nṛpatiṃ tadā / gatvāvadaddivodāsam indravaivasvatopamam

Sanskrit only: no published translation is held for this verse.

नापित उवाच स्वामिंस्तव गृहद्वारि करिष्ये गणपालयम् । स्थापयिष्ये गणेशं च तन्मे ऽनुज्ञातुमर्हसि

nāpita uvāca svāmiṃstava gṛhadvāri kariṣye gaṇapālayam / sthāpayiṣye gaṇeśaṃ ca tanme 'nujñātumarhasi

Sanskrit only: no published translation is held for this verse.

तथेति सो ऽप्यनुज्ञातश् चक्रे तत्र तदालयम् । प्रत्यस्थापयदर्चां च यादृशीं दृष्टवानसौ

tatheti so 'pyanujñātaś cakre tatra tadālayam / pratyasthāpayadarcāṃ ca yādṛśīṃ dṛṣṭavānasau

Sanskrit only: no published translation is held for this verse.

तस्य पूजां च महतीं प्रावर्तयत शोभनाम् । गणेशस्य महासत्त्वः स च तां प्रत्यगृह्णत

tasya pūjāṃ ca mahatīṃ prāvartayata śobhanām / gaṇeśasya mahāsattvaḥ sa ca tāṃ pratyagṛhṇata

Sanskrit only: no published translation is held for this verse.

स तस्मै कर्मणा तेन वित्तं यद्यत्समीहितम् । पशूंश्चैव हि पुत्रांश्च सौभाग्यं चाददत्प्रभुः

sa tasmai karmaṇā tena vittaṃ yadyatsamīhitam / paśūṃścaiva hi putrāṃśca saubhāgyaṃ cādadatprabhuḥ

Sanskrit only: no published translation is held for this verse.

तस्य तां वृद्धिमतुलां नापितस्याभिवीक्ष्य तु । आरिराधयिषुर्लोकस्त् अस्य पूजां चकार ह

tasya tāṃ vṛddhimatulāṃ nāpitasyābhivīkṣya tu / ārirādhayiṣurlokast asya pūjāṃ cakāra ha

Sanskrit only: no published translation is held for this verse.

चक्रुर्यात्रास्तथा केचिद् उपवासांस्तथापरे । होमं जप्यं तथैवान्ये पूजां चान्ये वरार्थिनः । उपहारांस्तथैवान्ये गीतनृत्तं तथापरे

cakruryātrāstathā kecid upavāsāṃstathāpare / homaṃ japyaṃ tathaivānye pūjāṃ cānye varārthinaḥ / upahārāṃstathaivānye gītanṛttaṃ tathāpare

Sanskrit only: no published translation is held for this verse.

तेभ्यस्तथाभ्युपेतेभ्यो निकुम्भः स महायशाः । ददौ सर्वानभिप्रायान् ये ये तेषामभीप्सिताः

tebhyastathābhyupetebhyo nikumbhaḥ sa mahāyaśāḥ / dadau sarvānabhiprāyān ye ye teṣāmabhīpsitāḥ

Sanskrit only: no published translation is held for this verse.

एवं तं कामदं ज्ञात्वा दिवोदासो नृपस्तदा । उवाच महिषीं व्यास कदाचित्पुत्रलिप्सया

evaṃ taṃ kāmadaṃ jñātvā divodāso nṛpastadā / uvāca mahiṣīṃ vyāsa kadācitputralipsayā

Sanskrit only: no published translation is held for this verse.

देवि सर्वानभिप्रायाञ् जनेभ्यो ऽयं प्रयच्छति । गणेश्वरं त्वमप्येनम् अपत्यार्थं प्रसादय

devi sarvānabhiprāyāñ janebhyo 'yaṃ prayacchati / gaṇeśvaraṃ tvamapyenam apatyārthaṃ prasādaya

Sanskrit only: no published translation is held for this verse.

सैवमुक्ता तदा गत्वा गणेशं प्राप्य शोभना । उवाच भगवन्देव अनपत्याहमीश्वर

saivamuktā tadā gatvā gaṇeśaṃ prāpya śobhanā / uvāca bhagavandeva anapatyāhamīśvara

Sanskrit only: no published translation is held for this verse.

उपवासं करिष्यामि तव देवाभिराधने । तावन्न भोक्ष्ये यावन्मे वरो ऽदत्तस्त्वया प्रभो

upavāsaṃ kariṣyāmi tava devābhirādhane / tāvanna bhokṣye yāvanme varo 'dattastvayā prabho

Sanskrit only: no published translation is held for this verse.

जाते च पुत्रे दास्यामि शतानां दशतीर्दश । त्वामुद्दिश्य द्विजातिभ्यो गोधेनूनां गणेश्वर

jāte ca putre dāsyāmi śatānāṃ daśatīrdaśa / tvāmuddiśya dvijātibhyo godhenūnāṃ gaṇeśvara

Sanskrit only: no published translation is held for this verse.

तथा घटसहस्रेण दध्नश्चैव घृतस्य च । क्षीरस्य पञ्चगव्यस्य करिष्ये स्नपनं च ते

tathā ghaṭasahasreṇa dadhnaścaiva ghṛtasya ca / kṣīrasya pañcagavyasya kariṣye snapanaṃ ca te

Sanskrit only: no published translation is held for this verse.

ब्राह्मणानां सहस्राणां शतं चापि सुपूजितम् । पुरस्ताद्भोजयिष्ये ते पुत्रे जाते न संशयः

brāhmaṇānāṃ sahasrāṇāṃ śataṃ cāpi supūjitam / purastādbhojayiṣye te putre jāte na saṃśayaḥ

Sanskrit only: no published translation is held for this verse.

बहून्दास्यति राजा च ग्रामान्दास्यस्तथैव च । सदा सत्त्रं च पूजां च करिष्यति तव प्रभो

bahūndāsyati rājā ca grāmāndāsyastathaiva ca / sadā sattraṃ ca pūjāṃ ca kariṣyati tava prabho

Sanskrit only: no published translation is held for this verse.

सनत्कुमार उवाच सा तमुक्त्वा तथा व्यास तस्थौ नियममास्थिता । सोपवासा तदा पूजां महतीं तस्य कुर्वती

sanatkumāra uvāca sā tamuktvā tathā vyāsa tasthau niyamamāsthitā / sopavāsā tadā pūjāṃ mahatīṃ tasya kurvatī

Sanskrit only: no published translation is held for this verse.

तां तथा तिष्ठतीं देवः प्रोवाच स गणेश्वरः । उत्तिष्ठ नास्ति ते पुत्रो मा खेदं त्वं वृथा कृथाः

tāṃ tathā tiṣṭhatīṃ devaḥ provāca sa gaṇeśvaraḥ / uttiṣṭha nāsti te putro mā khedaṃ tvaṃ vṛthā kṛthāḥ

Sanskrit only: no published translation is held for this verse.

एवं तेन गणेशेन निकुम्भेन महात्मना । असकृत्प्रोच्यमाना सा नियमाद्विरराम ह

evaṃ tena gaṇeśena nikumbhena mahātmanā / asakṛtprocyamānā sā niyamādvirarāma ha

Sanskrit only: no published translation is held for this verse.

ततो नराधिपं देवी प्रोवाच विमना तदा । आर्यपुत्र न मे पुत्रं गणपो ऽसौ प्रयच्छति । ब्रवीति नास्ति ते पुत्रो मा वृथा नियमं कृथाः

tato narādhipaṃ devī provāca vimanā tadā / āryaputra na me putraṃ gaṇapo 'sau prayacchati / bravīti nāsti te putro mā vṛthā niyamaṃ kṛthāḥ

Sanskrit only: no published translation is held for this verse.

सनत्कुमार उवाच एवं महिष्या स प्रोक्तः स्वयमेव नराधिपः । सदा सनियमस्तस्थौ गणेशस्याग्रतो नृपः

sanatkumāra uvāca evaṃ mahiṣyā sa proktaḥ svayameva narādhipaḥ / sadā saniyamastasthau gaṇeśasyāgrato nṛpaḥ

Sanskrit only: no published translation is held for this verse.

तमप्युवाच नृपतिं निकुम्भो नियमस्थितम् । मा स्था वृथेह नृपते न ते पुत्रं ददाम्यहम्

tamapyuvāca nṛpatiṃ nikumbho niyamasthitam / mā sthā vṛtheha nṛpate na te putraṃ dadāmyaham

Sanskrit only: no published translation is held for this verse.

एवमुक्तः स राजेन्द्रो निकुम्भेन महाबलः । क्रोधरक्तेक्षणः प्राह तमुत्थाय गणेश्वरम्

evamuktaḥ sa rājendro nikumbhena mahābalaḥ / krodharaktekṣaṇaḥ prāha tamutthāya gaṇeśvaram

Sanskrit only: no published translation is held for this verse.

राजोवाच गणो वा त्वं पिशाचो वा भूतो वा राक्षसो ऽपि वा । कृतघ्नस्त्वं न संदेहो न त्वं पूजामिहार्हसि

rājovāca gaṇo vā tvaṃ piśāco vā bhūto vā rākṣaso 'pi vā / kṛtaghnastvaṃ na saṃdeho na tvaṃ pūjāmihārhasi

Sanskrit only: no published translation is held for this verse.

मम चैव गृहद्वारि पौरैश्चैव समर्चितः । विषये मम वासी च न च पुत्रं प्रयच्छसि

mama caiva gṛhadvāri pauraiścaiva samarcitaḥ / viṣaye mama vāsī ca na ca putraṃ prayacchasi

Sanskrit only: no published translation is held for this verse.

पूजार्हो न भवांस्तस्मान् मत्तो दण्डं त्वमर्हसि । नृशंसश्चावलिप्तश्च निष्ठुरो मत्सरान्वितः

pūjārho na bhavāṃstasmān matto daṇḍaṃ tvamarhasi / nṛśaṃsaścāvaliptaśca niṣṭhuro matsarānvitaḥ

Sanskrit only: no published translation is held for this verse.

ततो ऽस्य भेदयामास निलयं गजयूथपैः । स्थण्डिलं च बभञ्जाशु ददाहार्चां च सुप्रभाम्

tato 'sya bhedayāmāsa nilayaṃ gajayūthapaiḥ / sthaṇḍilaṃ ca babhañjāśu dadāhārcāṃ ca suprabhām

Sanskrit only: no published translation is held for this verse.

निकुम्भो ऽपि कृतार्थः सन्न् आकाशे संस्थितः प्रभुः । उवाच तं दिवोदासं प्रदहन्निव तेजसा

nikumbho 'pi kṛtārthaḥ sann ākāśe saṃsthitaḥ prabhuḥ / uvāca taṃ divodāsaṃ pradahanniva tejasā

Sanskrit only: no published translation is held for this verse.

यथेष्टं सम्प्रयच्छन्ति देवा वरमभीप्सितम् । न दत्तो यद्यसौ कोपः कस्तत्र भवतो ऽभवत्

yatheṣṭaṃ samprayacchanti devā varamabhīpsitam / na datto yadyasau kopaḥ kastatra bhavato 'bhavat

Sanskrit only: no published translation is held for this verse.

यस्मान्ममालयो भग्नस् त्वया निरपकारिणः । तस्माद्वर्षसहस्रं ते पुरी शून्या भविष्यति

yasmānmamālayo bhagnas tvayā nirapakāriṇaḥ / tasmādvarṣasahasraṃ te purī śūnyā bhaviṣyati

Sanskrit only: no published translation is held for this verse.

सनत्कुमार उवाच स एवमुक्त्वा राजानं निकुम्भः परमात्मवान् । देवेशाय निवेद्यैवं तस्थौ पार्श्वगतः प्रभोः

sanatkumāra uvāca sa evamuktvā rājānaṃ nikumbhaḥ paramātmavān / deveśāya nivedyaivaṃ tasthau pārśvagataḥ prabhoḥ

Sanskrit only: no published translation is held for this verse.

राजापि तस्य वाक्येन तथ्येनार्थेन चैव हि । व्रीडां परां समासाद्य गृहानभ्यागमत्तदा

rājāpi tasya vākyena tathyenārthena caiva hi / vrīḍāṃ parāṃ samāsādya gṛhānabhyāgamattadā

Sanskrit only: no published translation is held for this verse.

अथ सा तेन शापेन पुरी वाराणसी तदा । शून्या समभवत्क्षिप्रं विशुद्धा मृगसेविता

atha sā tena śāpena purī vārāṇasī tadā / śūnyā samabhavatkṣipraṃ viśuddhā mṛgasevitā

Sanskrit only: no published translation is held for this verse.

तां तु शून्यां स विज्ञाय देव्या सह पिनाकधृक् । सगणो नन्दिना सार्धम् आजगाम महाद्युतिः

tāṃ tu śūnyāṃ sa vijñāya devyā saha pinākadhṛk / sagaṇo nandinā sārdham ājagāma mahādyutiḥ

Sanskrit only: no published translation is held for this verse.

स तत्र मानसं दिव्यं विमानं सूर्यवर्चसम् । अनौपम्यगुणं देवो मनसैवाभिनिर्मिमे

sa tatra mānasaṃ divyaṃ vimānaṃ sūryavarcasam / anaupamyaguṇaṃ devo manasaivābhinirmime

Sanskrit only: no published translation is held for this verse.

न मे प्रभवति प्रज्ञा कृत्स्नशस्तन्निरूपणे । एतावच्छक्यते वक्तुम् अनौपम्यगुणं हि तत्

na me prabhavati prajñā kṛtsnaśastannirūpaṇe / etāvacchakyate vaktum anaupamyaguṇaṃ hi tat

Sanskrit only: no published translation is held for this verse.

देवोद्यानानि रम्याणि नन्दनाद्यानि यानि तु । तेभ्यः श्रेष्ठतमं श्रीमद् उद्यानमसृजत्प्रभुः

devodyānāni ramyāṇi nandanādyāni yāni tu / tebhyaḥ śreṣṭhatamaṃ śrīmad udyānamasṛjatprabhuḥ

Sanskrit only: no published translation is held for this verse.

तस्मिन्विमाने गिरिराजपुत्री सर्वर्द्धियुक्ते वचसामगम्ये । रेमे नवेन्दीवरफुल्लनेत्रा देवी न सस्मार वचश्च मातुः

tasminvimāne girirājaputrī sarvarddhiyukte vacasāmagamye / reme navendīvaraphullanetrā devī na sasmāra vacaśca mātuḥ

Sanskrit only: no published translation is held for this verse.