Somadeva: Kathasaritsagara 10.2

स दृष्ट एव रूपेण तस्याश्चित्तमपाहरत् । स्मरेणाकृष्यमाणा च तत्क्षणं सा व्यचिन्तयत्

sa dṛṣṭa eva rūpeṇa tasyāścittamapāharat / smareṇākṛṣyamāṇā ca tatkṣaṇaṃ sā vyacintayat

Sanskrit only: no published translation is held for this verse.

जाने ऽहं नार्यपुत्राद्यत्सुरूपो ऽन्यो न शौर्यवान् । धावत्येव तथाप्यस्मिपुरुषे बत मे मनः

jāne 'haṃ nāryaputrādyatsurūpo 'nyo na śauryavān / dhāvatyeva tathāpyasmipuruṣe bata me manaḥ

Sanskrit only: no published translation is held for this verse.

तदद्यैव भजाम्येनमिति संचिन्त्य सा तदा । सख्यै रहस्यधारिण्यै स्वाभिप्रायं शशंस तम्

tadadyaiva bhajāmyenamiti saṃcintya sā tadā / sakhyai rahasyadhāriṇyai svābhiprāyaṃ śaśaṃsa tam

Sanskrit only: no published translation is held for this verse.

तयैवानाय्य नक्तं च वातायनपथेन सा । अन्तःपुरं तं परुषं रज्जूत्क्षिप्तं न्यवेशयेत्

tayaivānāyya naktaṃ ca vātāyanapathena sā / antaḥpuraṃ taṃ paruṣaṃ rajjūtkṣiptaṃ nyaveśayet

Sanskrit only: no published translation is held for this verse.

स प्रविष्टो ऽत्र पुरुषो नैवाध्यासितुमोजसा । शशाक तस्याः पर्यङ्कं न्यषीदत्पृथगासने

sa praviṣṭo 'tra puruṣo naivādhyāsitumojasā / śaśāka tasyāḥ paryaṅkaṃ nyaṣīdatpṛthagāsane

Sanskrit only: no published translation is held for this verse.

तद्दृष्ट्वा बत नीचो ऽयमिति यावद्विषीदति । राज्ञी सा तावदत्रागादुपरिष्टाद्भ्रमन्नहिः

taddṛṣṭvā bata nīco 'yamiti yāvadviṣīdati / rājñī sā tāvadatrāgādupariṣṭādbhramannahiḥ

Sanskrit only: no published translation is held for this verse.

तं विलोक्य भियोत्थाय सहसा पुरुषो ऽत्र सः । धनुरादाय भुजगं जघान विशिखेन तम्

taṃ vilokya bhiyotthāya sahasā puruṣo 'tra saḥ / dhanurādāya bhujagaṃ jaghāna viśikhena tam

Sanskrit only: no published translation is held for this verse.

विपन्नपतितं तं च गवाक्षेणाक्षिपद्बहिः । हर्षेण तद्भयोत्तीर्णो ननर्त स च कातरः

vipannapatitaṃ taṃ ca gavākṣeṇākṣipadbahiḥ / harṣeṇa tadbhayottīrṇo nanarta sa ca kātaraḥ

Sanskrit only: no published translation is held for this verse.

नृत्यन्तं वीक्ष्य तं विग्ना सा कल्याणवती भृशम् । दध्यौ धिग्धिक्किमेतेन निःसत्त्वेनाधमेन मे

nṛtyantaṃ vīkṣya taṃ vignā sā kalyāṇavatī bhṛśam / dadhyau dhigdhikkimetena niḥsattvenādhamena me

Sanskrit only: no published translation is held for this verse.

दृष्ट्वैव तद्विरक्तां तां चित्तज्ञा सा च तत्सखी । निर्गत्याशु प्रविश्यात्र जगाद कृतसंभ्रमा

dṛṣṭvaiva tadviraktāṃ tāṃ cittajñā sā ca tatsakhī / nirgatyāśu praviśyātra jagāda kṛtasaṃbhramā

Sanskrit only: no published translation is held for this verse.

आगतस् ते पिता देवि तद् अयम् यातु संप्रति । यथागतेनैव पथा स्वगृहं त्वरितं युवा

āgatas te pitā devi tad ayam yātu saṃprati / yathāgatenaiva pathā svagṛhaṃ tvaritaṃ yuvā

Sanskrit only: no published translation is held for this verse.

एवं तयोक्ते निर्यातो रज्ज्वा वातायनाद्बहिः । भयाकुलः स पतितो न दैवात्पञ्चतां गतः

evaṃ tayokte niryāto rajjvā vātāyanādbahiḥ / bhayākulaḥ sa patito na daivātpañcatāṃ gataḥ

Sanskrit only: no published translation is held for this verse.

गते तस्मिन्नवोचत्तां सा कल्याणवती सखीम् । सखि सुष्ठु कृतं नीचो यत्त्वयैष बहिःकृतः

gate tasminnavocattāṃ sā kalyāṇavatī sakhīm / sakhi suṣṭhu kṛtaṃ nīco yattvayaiṣa bahiḥkṛtaḥ

Sanskrit only: no published translation is held for this verse.

ज्ञातं त्वया मे हृदयं चेतो हि मम दूयते । भर्ता मे व्याघ्रसिंहादीन्निपात्यापह्नुते ह्रिया

jñātaṃ tvayā me hṛdayaṃ ceto hi mama dūyate / bhartā me vyāghrasiṃhādīnnipātyāpahnute hriyā

Sanskrit only: no published translation is held for this verse.

अयं तु भुजगं हत्वा हीनसत्त्वः पनृत्यति । तत्तादृशं तं हित्वा किमस्मिन्मे प्राकृते रतिः

ayaṃ tu bhujagaṃ hatvā hīnasattvaḥ panṛtyati / tattādṛśaṃ taṃ hitvā kimasminme prākṛte ratiḥ

Sanskrit only: no published translation is held for this verse.

तदप्रतिष्ठितमतिं धिङ् मां धिगथवा स्त्रियः । या धावन्त्यशुचिं हित्वा कर्पूरं मक्षिका इव

tadapratiṣṭhitamatiṃ dhiṅ māṃ dhigathavā striyaḥ / yā dhāvantyaśuciṃ hitvā karpūraṃ makṣikā iva

Sanskrit only: no published translation is held for this verse.

इति जातानुतापा सा राज्ञी नीत्वा निशां ततः । प्रतीक्षमाणा भर्तारमासीत्तत्र पितुर् गृहे

iti jātānutāpā sā rājñī nītvā niśāṃ tataḥ / pratīkṣamāṇā bhartāramāsīttatra pitur gṛhe

Sanskrit only: no published translation is held for this verse.

तावत् स दत्तान्यबलो गजानीकेन भूभुजा । गत्वा तान् गोत्रजान् पञ्च पापान् सिंहबलो ऽवधीत्

tāvat sa dattānyabalo gajānīkena bhūbhujā / gatvā tān gotrajān pañca pāpān siṃhabalo 'vadhīt

Sanskrit only: no published translation is held for this verse.

ततः स संप्राप्य पुनः स्वराज्यम् आनीय भार्यां च पितुर् गृहात्ताम् । प्रपूर्य तं च श्वशुरं धनौघैर् निष्कण्टकां क्ष्मां सुचिरं शशास

tataḥ sa saṃprāpya punaḥ svarājyam ānīya bhāryāṃ ca pitur gṛhāttām / prapūrya taṃ ca śvaśuraṃ dhanaughair niṣkaṇṭakāṃ kṣmāṃ suciraṃ śaśāsa

Sanskrit only: no published translation is held for this verse.

इति प्रवीरे सुभगे च सत्पतौ विवेकिनीनाम् अपि देव योषिताम् । चलं मनो धावति यत्र कुत्रचिद् विशुद्धसत्त्वा विरलाः पुनः स्त्रियः

iti pravīre subhage ca satpatau vivekinīnām api deva yoṣitām / calaṃ mano dhāvati yatra kutracid viśuddhasattvā viralāḥ punaḥ striyaḥ

Sanskrit only: no published translation is held for this verse.

इति मरुभूतिनिगदितामाकर्ण्य कथां स वत्सराजसुतः । नरवाहनदत्तस् तां सुखसुप्तो नीतवान्रजनीम्

iti marubhūtinigaditāmākarṇya kathāṃ sa vatsarājasutaḥ / naravāhanadattas tāṃ sukhasupto nītavānrajanīm

Sanskrit only: no published translation is held for this verse.