Somadeva: Kathasaritsagara 12.8

इति महाकविश्रीसोमदेवभट्टविरचिते कथासरित्सागरे शशाङ्कवतीलम्बके सप्तमस् तरङ्गः । अष्टमस् तरङ्गः । पञ्चविंशतिका । जितं विघ्नजिता यस्य पुष्पवृष्टिर् इवाम्बरात् । तारावली कराघातच्युता पतति नृत्यतः

iti mahākaviśrīsomadevabhaṭṭaviracite kathāsaritsāgare śaśāṅkavatīlambake saptamas taraṅgaḥ / aṣṭamas taraṅgaḥ / pañcaviṃśatikā / jitaṃ vighnajitā yasya puṣpavṛṣṭir ivāmbarāt / tārāvalī karāghātacyutā patati nṛtyataḥ

Sanskrit only: no published translation is held for this verse.

ततो ऽतिवाह्य रात्रिं तां प्रभाते काननात् ततः । प्रचण्डशक्तिप्रमुखैः प्रस्थितः सचिवैः सह

tato 'tivāhya rātriṃ tāṃ prabhāte kānanāt tataḥ / pracaṇḍaśaktipramukhaiḥ prasthitaḥ sacivaiḥ saha

Sanskrit only: no published translation is held for this verse.

स शशाङ्कवतीहेतोः पुनर् उज्जयिनीं प्रति । मृगाङ्कदत्तः प्रययौ चिन्वञ् शेषान् स्वमन्त्रिनः

sa śaśāṅkavatīhetoḥ punar ujjayinīṃ prati / mṛgāṅkadattaḥ prayayau cinvañ śeṣān svamantrinaḥ

Sanskrit only: no published translation is held for this verse.

गच्छता ददृशे तेन मार्गे विक्रमकेसरी । मन्त्री पुंसातिविकृतेनोह्यमानो नभस्तले

gacchatā dadṛśe tena mārge vikramakesarī / mantrī puṃsātivikṛtenohyamāno nabhastale

Sanskrit only: no published translation is held for this verse.

दर्श्यते चान्यमन्त्रिभ्यो यावत् तेन स संभ्रमात् । तावत् स मन्त्री गगनात् तत्समीपे ऽवतीर्णवान्

darśyate cānyamantribhyo yāvat tena sa saṃbhramāt / tāvat sa mantrī gaganāt tatsamīpe 'vatīrṇavān

Sanskrit only: no published translation is held for this verse.

अवरुह्य च तस्याशु पुंसः स्कन्धाद् उपेत्य सः । मृगाङ्कदत्तं जग्राह पादयोः साश्रुलोचनः

avaruhya ca tasyāśu puṃsaḥ skandhād upetya saḥ / mṛgāṅkadattaṃ jagrāha pādayoḥ sāśrulocanaḥ

Sanskrit only: no published translation is held for this verse.

तेनाश्लिष्टश् च हृष्टेन तथा तन्मन्त्रिभिः क्रमात् । विससर्ज पुमांसं तं स्मृतो ऽभ्येष्यसि माम् इति

tenāśliṣṭaś ca hṛṣṭena tathā tanmantribhiḥ kramāt / visasarja pumāṃsaṃ taṃ smṛto 'bhyeṣyasi mām iti

Sanskrit only: no published translation is held for this verse.

ततो मृगाङ्कदत्तेन कौतुकाद् उपविश्य सः । पृष्टः स्वोदन्तम् आचख्यौ वने विक्रमकेसरी

tato mṛgāṅkadattena kautukād upaviśya saḥ / pṛṣṭaḥ svodantam ācakhyau vane vikramakesarī

Sanskrit only: no published translation is held for this verse.

तदा भवद्भ्यो विभ्रष्टो नागशापात् परिभ्रमन् । बहून्य् अहानि चिन्वानो युष्मान् अहम् अचिन्तयम्

tadā bhavadbhyo vibhraṣṭo nāgaśāpāt paribhraman / bahūny ahāni cinvāno yuṣmān aham acintayam

Sanskrit only: no published translation is held for this verse.

गच्छाम्य् उज्जयिनीं तत्र गन्तव्यं तैर् ध्रुवं यतः । एवं निश्चित्य च प्रायाम् अहं तां नगरीं प्रति

gacchāmy ujjayinīṃ tatra gantavyaṃ tair dhruvaṃ yataḥ / evaṃ niścitya ca prāyām ahaṃ tāṃ nagarīṃ prati

Sanskrit only: no published translation is held for this verse.

क्रमात् तन्निकटं प्राप्य ग्रामं ब्रह्मस्थलाभिधम् । वापीतटे ऽहम् एकस्मिन् वृक्षमूल उपाविशम्

kramāt tannikaṭaṃ prāpya grāmaṃ brahmasthalābhidham / vāpītaṭe 'ham ekasmin vṛkṣamūla upāviśam

Sanskrit only: no published translation is held for this verse.

तत्रैत्य सर्पदंशार्तो वृद्धो मां ब्राह्मणो ऽब्रवीत् । इत उत्तिष्ठ मा पुत्र मदीयां गतिम् आप्स्यसि

tatraitya sarpadaṃśārto vṛddho māṃ brāhmaṇo 'bravīt / ita uttiṣṭha mā putra madīyāṃ gatim āpsyasi

Sanskrit only: no published translation is held for this verse.

इहास्ति हि महासर्पो येन दष्टो रुजार्दितः । उद्यतो ऽस्यां महावाप्याम् एषो ऽहं देहम् उज्झितम्

ihāsti hi mahāsarpo yena daṣṭo rujārditaḥ / udyato 'syāṃ mahāvāpyām eṣo 'haṃ deham ujjhitam

Sanskrit only: no published translation is held for this verse.

इत्य् उक्तवन्तं कृपया देहत्यागान् निवार्य तम् । तत्राकार्षम् अहं विप्रं निर्विषं विषविद्यया

ity uktavantaṃ kṛpayā dehatyāgān nivārya tam / tatrākārṣam ahaṃ vipraṃ nirviṣaṃ viṣavidyayā

Sanskrit only: no published translation is held for this verse.

ततः स विप्रः साकूतम् उदन्तं कृत्स्नम् आदरात् । पृष्ट्वा मां प्रीतिमान् एवं विदितार्थो ऽभ्यभाषत

tataḥ sa vipraḥ sākūtam udantaṃ kṛtsnam ādarāt / pṛṣṭvā māṃ prītimān evaṃ viditārtho 'bhyabhāṣata

Sanskrit only: no published translation is held for this verse.

प्राणास् त्वया मम प्रत्ता तत् प्रवीर गृहाण मे । वेतालसाधनं मन्त्रम् इमं प्राप्तं मया पितुः

prāṇās tvayā mama prattā tat pravīra gṛhāṇa me / vetālasādhanaṃ mantram imaṃ prāptaṃ mayā pituḥ

Sanskrit only: no published translation is held for this verse.

त्वादृशाम् उपयुक्तो ऽयं सिद्धिकृत् सत्त्वशालिनाम् । मादृशाः पुनर् एते न क्लीबाः किं नाम कुर्वते

tvādṛśām upayukto 'yaṃ siddhikṛt sattvaśālinām / mādṛśāḥ punar ete na klībāḥ kiṃ nāma kurvate

Sanskrit only: no published translation is held for this verse.

इत्य् उक्तस् तेन तम् अहं प्रत्यवोचं द्विजोत्तमम् । मृगाङ्कदत्तवियुतो वेतालैः किं करोम्य् अहम्

ity uktas tena tam ahaṃ pratyavocaṃ dvijottamam / mṛgāṅkadattaviyuto vetālaiḥ kiṃ karomy aham

Sanskrit only: no published translation is held for this verse.

तच् छ्रुत्वा स विहस्यैवं विप्रो मां पुनर् अब्रवीत् । किं न जानास्य् अभीष्टं यद् वेतालात् सर्वम् आप्यते

tac chrutvā sa vihasyaivaṃ vipro māṃ punar abravīt / kiṃ na jānāsy abhīṣṭaṃ yad vetālāt sarvam āpyate

Sanskrit only: no published translation is held for this verse.

अपि विद्याधरैश्वर्यं वेतालस्य प्रसादतः । किं त्रिविक्रमसेनेन न प्राप्तं भूभुजा पुरा

api vidyādharaiśvaryaṃ vetālasya prasādataḥ / kiṃ trivikramasenena na prāptaṃ bhūbhujā purā

Sanskrit only: no published translation is held for this verse.