Somadeva: Kathasaritsagara 17.5

स्वाधीना राजकन्याश् च मया ताश् च गवेषिताः । वर्तन्ते प्राप्तकालस्तत्क्रियतां दारसंग्रहः

svādhīnā rājakanyāś ca mayā tāś ca gaveṣitāḥ / vartante prāptakālastatkriyatāṃ dārasaṃgrahaḥ

Sanskrit only: no published translation is held for this verse.

इति पित्रोदिते ऽवादीत्सो ऽथ मुक्ताफलध्वजः । न मे परिणये तात मनस्तावत् प्रवर्तते

iti pitrodite 'vādītso 'tha muktāphaladhvajaḥ / na me pariṇaye tāta manastāvat pravartate

Sanskrit only: no published translation is held for this verse.

अहं तपश्चरिष्यास्मि संप्रत्याराधितुं हरम् । एष वत्सस्तु कुरुतां विवाहं मलयध्वजः

ahaṃ tapaścariṣyāsmi saṃpratyārādhituṃ haram / eṣa vatsastu kurutāṃ vivāhaṃ malayadhvajaḥ

Sanskrit only: no published translation is held for this verse.

एतच् छ्रुत्वैव मलयध्वजस्तं सो ऽनुजो ऽब्रवीत् । विवाहो मम युक्तः किमार्य त्वय्यपरिग्रहे

etac chrutvaiva malayadhvajastaṃ so 'nujo 'bravīt / vivāho mama yuktaḥ kimārya tvayyaparigrahe

Sanskrit only: no published translation is held for this verse.

राज्यं वा त्वय्यराज्यस्थे तव मार्गानुगो ह्य् अहम् । इत्य् उक्ते तेन मलयध्वजेनोवाच भूपतिः

rājyaṃ vā tvayyarājyasthe tava mārgānugo hy aham / ity ukte tena malayadhvajenovāca bhūpatiḥ

Sanskrit only: no published translation is held for this verse.

मेरुध्वजस्तं तनयं ज्येष्ठं मुक्ताफलध्वजम् । युक्तम् एवामुना तावदनुजेन तवोदितम्

merudhvajastaṃ tanayaṃ jyeṣṭhaṃ muktāphaladhvajam / yuktam evāmunā tāvadanujena tavoditam

Sanskrit only: no published translation is held for this verse.

त्वं त्वयुक्तं वदस्येतन् नव एवात्र यौवने । को नाम कालस्तपसो भोगकालो ह्य् अयं तव

tvaṃ tvayuktaṃ vadasyetan nava evātra yauvane / ko nāma kālastapaso bhogakālo hy ayaṃ tava

Sanskrit only: no published translation is held for this verse.

तदकालोचितः पुत्र मुच्यतामेष दुर्ग्रहः । इति तेनोच्यमानो ऽपि राज्ञा ज्येष्ठः सुतो ऽत्र च

tadakālocitaḥ putra mucyatāmeṣa durgrahaḥ / iti tenocyamāno 'pi rājñā jyeṣṭhaḥ suto 'tra ca

Sanskrit only: no published translation is held for this verse.

नाङ्गीचक्रे यदा संप्रत्युद्वाहं निश्चयेन सः । तदा स नृपतिस्तूष्णीं तस्थौ कालं प्रतीक्षितुम्

nāṅgīcakre yadā saṃpratyudvāhaṃ niścayena saḥ / tadā sa nṛpatistūṣṇīṃ tasthau kālaṃ pratīkṣitum

Sanskrit only: no published translation is held for this verse.

अत्रान्तरे च पाताले भार्यां त्रैलोक्यमालिनः । स्वयंप्रभाम् ऊचतुस् तां तपःस्थे ते स्वकन्यके

atrāntare ca pātāle bhāryāṃ trailokyamālinaḥ / svayaṃprabhām ūcatus tāṃ tapaḥsthe te svakanyake

Sanskrit only: no published translation is held for this verse.

आवयोर् अम्ब सप्ताष्टवर्षयोः संयतः पिता । राज्यभ्रंशश् च संवृत्तः कस्माद् अकृतपुण्ययोः

āvayor amba saptāṣṭavarṣayoḥ saṃyataḥ pitā / rājyabhraṃśaś ca saṃvṛttaḥ kasmād akṛtapuṇyayoḥ

Sanskrit only: no published translation is held for this verse.

अष्टमं वर्षमेतच् च तपस्यन्त्योर्न नौ हरः । प्रसीदति न तातो ऽयं मुच्यते ऽद्यापि बन्धनात्

aṣṭamaṃ varṣametac ca tapasyantyorna nau haraḥ / prasīdati na tāto 'yaṃ mucyate 'dyāpi bandhanāt

Sanskrit only: no published translation is held for this verse.

तद्यावदावयोर् न स्याद्रिपोः परिभवो ऽथवा । निर्लक्षणामिमां तावदनले जुहुवुस्तनुम्

tadyāvadāvayor na syādripoḥ paribhavo 'thavā / nirlakṣaṇāmimāṃ tāvadanale juhuvustanum

Sanskrit only: no published translation is held for this verse.

इत्य् उक्ता दुहितृभ्यां सा जगादैवं स्वयंप्रभा । पुत्र्यौ प्रतीक्ष्यतां तावदुदयो ह्य् अस्ति नः पुनः

ity uktā duhitṛbhyāṃ sā jagādaivaṃ svayaṃprabhā / putryau pratīkṣyatāṃ tāvadudayo hy asti naḥ punaḥ

Sanskrit only: no published translation is held for this verse.

तपःस्थितां हि मां स्वप्ने जाने देवो ऽब्रवीच्छिवः । वत्से कुर्या धृतिं राज्यं पुनः प्राप्स्यति ते पतिः

tapaḥsthitāṃ hi māṃ svapne jāne devo 'bravīcchivaḥ / vatse kuryā dhṛtiṃ rājyaṃ punaḥ prāpsyati te patiḥ

Sanskrit only: no published translation is held for this verse.

मुक्ताफलध्वजश्चैष तथैव मलयध्वजः । दुहित्रोस्तव भर्तारौ राजपुत्रौ भविष्यतः

muktāphaladhvajaścaiṣa tathaiva malayadhvajaḥ / duhitrostava bhartārau rājaputrau bhaviṣyataḥ

Sanskrit only: no published translation is held for this verse.

मानुषाविति मा चैतौ विज्ञासीरेतयोर् यतः । एको विद्याधरवरो द्वितीयो मामको गणः

mānuṣāviti mā caitau vijñāsīretayor yataḥ / eko vidyādharavaro dvitīyo māmako gaṇaḥ

Sanskrit only: no published translation is held for this verse.

इत्यादिष्टेश्वरेणाहं प्रबुद्धा रजनीक्षये । इत्याशयैतया चैष सोढः क्लेशो महान्मया

ityādiṣṭeśvareṇāhaṃ prabuddhā rajanīkṣaye / ityāśayaitayā caiṣa soḍhaḥ kleśo mahānmayā

Sanskrit only: no published translation is held for this verse.

तस्मादावेदयाम्येतदर्थं युष्मत्पितुः प्रभोः । तदिच्छया यतिष्ये च युष्मदुद्वाहसिद्धये

tasmādāvedayāmyetadarthaṃ yuṣmatpituḥ prabhoḥ / tadicchayā yatiṣye ca yuṣmadudvāhasiddhaye

Sanskrit only: no published translation is held for this verse.

एवमाश्वास्य सा राज्ञी कन्यके स्वे स्वयंप्रभा । उवाचेन्दुमतीं नाम वृद्धामन्तःपुरस्त्रियम्

evamāśvāsya sā rājñī kanyake sve svayaṃprabhā / uvācendumatīṃ nāma vṛddhāmantaḥpurastriyam

Sanskrit only: no published translation is held for this verse.

आर्यपुत्रस्य निकटं श्वेतशैलगुहां व्रज । निपत्य पादयोस्तं च विज्ञापय गिरा मम

āryaputrasya nikaṭaṃ śvetaśailaguhāṃ vraja / nipatya pādayostaṃ ca vijñāpaya girā mama

Sanskrit only: no published translation is held for this verse.

निर्मितास्मि महाराज धात्रान्येनैव दारुणा । त्वद्वियोगाग्निनाद्यापि न दह्ये ज्वलतापि या

nirmitāsmi mahārāja dhātrānyenaiva dāruṇā / tvadviyogāgninādyāpi na dahye jvalatāpi yā

Sanskrit only: no published translation is held for this verse.

आत्मा तु न मया त्यक्तः पुनस्त्वद्दर्शनाशया । इत्य् उक्त्वा मामकं शार्वं स्वप्नादेशं निवेदयेः

ātmā tu na mayā tyaktaḥ punastvaddarśanāśayā / ity uktvā māmakaṃ śārvaṃ svapnādeśaṃ nivedayeḥ

Sanskrit only: no published translation is held for this verse.

ततः कन्याविवाहार्थं पृच्छेस्तं यच् च वक्ष्यति । तत्त्वयागत्य मे वाच्यं विधास्ये ऽहं तथाविधम्

tataḥ kanyāvivāhārthaṃ pṛcchestaṃ yac ca vakṣyati / tattvayāgatya me vācyaṃ vidhāsye 'haṃ tathāvidham

Sanskrit only: no published translation is held for this verse.

इत्य् उक्त्वेन्दुमतीं तां सा प्रैषयत्सापि निर्गता । पातालात्प्राप तच्छैलगुहाद्वारं सुरक्षितम्

ity uktvendumatīṃ tāṃ sā praiṣayatsāpi nirgatā / pātālātprāpa tacchailaguhādvāraṃ surakṣitam

Sanskrit only: no published translation is held for this verse.

रक्षिणो ऽभ्यर्थ्य तत्रान्तः प्रविश्यालोक्य संयतम् । त्रैलोक्यमालिनं तं सा साश्रुर्जग्राह पादयोः

rakṣiṇo 'bhyarthya tatrāntaḥ praviśyālokya saṃyatam / trailokyamālinaṃ taṃ sā sāśrurjagrāha pādayoḥ

Sanskrit only: no published translation is held for this verse.

तत्पृष्टकुशला तच् च शनैस्तस्मै शशंस सा । कृत्स्नं स्वभार्यासंदेशं ततो राजा जगाद सः

tatpṛṣṭakuśalā tac ca śanaistasmai śaśaṃsa sā / kṛtsnaṃ svabhāryāsaṃdeśaṃ tato rājā jagāda saḥ

Sanskrit only: no published translation is held for this verse.

यः प्रोक्तो राज्यलाभो नः शर्वेणास्तु तथैव सः । मेरुध्वजस्यात्मजयोः कन्यादाने तु का कथा

yaḥ prokto rājyalābho naḥ śarveṇāstu tathaiva saḥ / merudhvajasyātmajayoḥ kanyādāne tu kā kathā

Sanskrit only: no published translation is held for this verse.

इहैवाहं विपद्येय न तु दद्यां निजात्मजे । शत्रुभ्यां मानुषाभ्यां च संयतः सन्नुपायनम्

ihaivāhaṃ vipadyeya na tu dadyāṃ nijātmaje / śatrubhyāṃ mānuṣābhyāṃ ca saṃyataḥ sannupāyanam

Sanskrit only: no published translation is held for this verse.

इत्य् उक्त्वेन्दुमती राज्ञा प्रेषिता तेन सा ततः । एत्य स्वयंप्रभायै तत्तत्पत्न्यै तद्वचो ऽभ्यधात्

ity uktvendumatī rājñā preṣitā tena sā tataḥ / etya svayaṃprabhāyai tattatpatnyai tadvaco 'bhyadhāt

Sanskrit only: no published translation is held for this verse.

श्रुत्वा ततस् ते त्रैलोक्यप्रभात्रिभुवनप्रभे । दैत्येन्द्रकन्ये जननीमूचतुस्तां स्वयंप्रभाम्

śrutvā tatas te trailokyaprabhātribhuvanaprabhe / daityendrakanye jananīmūcatustāṃ svayaṃprabhām

Sanskrit only: no published translation is held for this verse.

आवयोर् यौवनभयदग्निरेवाधुना गतिः । तदम्बास्यां चतुर्दश्यां तत्प्रवेशं विदध्वहे

āvayor yauvanabhayadagnirevādhunā gatiḥ / tadambāsyāṃ caturdaśyāṃ tatpraveśaṃ vidadhvahe

Sanskrit only: no published translation is held for this verse.

कृतनिश्चययोर् एवं तयोः साप्य् अकरोत्तदा । निश्चयं मरणायैव तन्माता सपरिच्छदा

kṛtaniścayayor evaṃ tayoḥ sāpy akarottadā / niścayaṃ maraṇāyaiva tanmātā saparicchadā

Sanskrit only: no published translation is held for this verse.

प्राप्तायां च चतुर्दश्यां ताः पापरिपुनामनि । तीर्थे सर्वाश्चिताश् चक्रुरर्चित्वा हाटकेश्वरम्

prāptāyāṃ ca caturdaśyāṃ tāḥ pāparipunāmani / tīrthe sarvāścitāś cakrurarcitvā hāṭakeśvaram

Sanskrit only: no published translation is held for this verse.

तावन्मेरुध्वजो राजा तिथौ तस्यां सपुत्रकः । सभार्यश्चाययौ तावद्धाटकेश्वरमर्चितुम्

tāvanmerudhvajo rājā tithau tasyāṃ saputrakaḥ / sabhāryaścāyayau tāvaddhāṭakeśvaramarcitum

Sanskrit only: no published translation is held for this verse.

स पापरिपुतीर्थं तत्स्नानार्थं सानुगो व्रजन् । दूरद्ददर्श तत्तीरे वनान्तर्धूममुद्गतम्

sa pāpariputīrthaṃ tatsnānārthaṃ sānugo vrajan / dūraddadarśa tattīre vanāntardhūmamudgatam

Sanskrit only: no published translation is held for this verse.

धूमोद्गमः कुतो ऽत्रेति पृच्छन्तं तं च भूपतिम् । ऊचुः सङ्ग्रामसिंहाद्याः पातालाधिकृता निजाः

dhūmodgamaḥ kuto 'treti pṛcchantaṃ taṃ ca bhūpatim / ūcuḥ saṅgrāmasiṃhādyāḥ pātālādhikṛtā nijāḥ

Sanskrit only: no published translation is held for this verse.

त्रैलोक्यामालिनो भार्या महाराज स्वयंप्रभा । दुहितृभ्यां कुमारीभ्यां सहात्र तपसि स्थिता

trailokyāmālino bhāryā mahārāja svayaṃprabhā / duhitṛbhyāṃ kumārībhyāṃ sahātra tapasi sthitā

Sanskrit only: no published translation is held for this verse.

नूनं ता अग्निकार्यादि किंचिद् अत्राद्य कुर्वते । यदि वातितपःखिन्नाः कुर्वन्त्यग्निप्रवेशनम्

nūnaṃ tā agnikāryādi kiṃcid atrādya kurvate / yadi vātitapaḥkhinnāḥ kurvantyagnipraveśanam

Sanskrit only: no published translation is held for this verse.

तच् छ्रुत्वा सह पुत्राभ्यां पत्न्या तैश्चाधिकारिभिः । द्रष्टुं स राजा तत्रागान्निषिद्धान्यपरिच्छदः

tac chrutvā saha putrābhyāṃ patnyā taiścādhikāribhiḥ / draṣṭuṃ sa rājā tatrāgānniṣiddhānyaparicchadaḥ

Sanskrit only: no published translation is held for this verse.

ददर्श चात्र प्रच्छन्नः स्थितस् ते दैत्यकन्यके । समातृके पूजयन्त्यौ सुसमिद्धं चितानलम्

dadarśa cātra pracchannaḥ sthitas te daityakanyake / samātṛke pūjayantyau susamiddhaṃ citānalam

Sanskrit only: no published translation is held for this verse.

मुखलावण्यसंदोहनिःस्यन्दैर् दिक्षु सर्वतः । चन्द्रबिम्बशतानीव रचयन्त्यौ रसातले

mukhalāvaṇyasaṃdohaniḥsyandair dikṣu sarvataḥ / candrabimbaśatānīva racayantyau rasātale

Sanskrit only: no published translation is held for this verse.

लोलहाराम्बुपूराभ्यां कामस्येवाभिषेचनम् । कुचकाञ्चनकुम्भाभ्यां कुर्वत्यौ त्रिजगज्जये

lolahārāmbupūrābhyāṃ kāmasyevābhiṣecanam / kucakāñcanakumbhābhyāṃ kurvatyau trijagajjaye

Sanskrit only: no published translation is held for this verse.

बिभ्राणे जघनाभोगं विपुलं बद्धमेखलम् । नक्षत्रमालाङ्कम् इव स्मस्रद्विपशिरःस्थलम्

bibhrāṇe jaghanābhogaṃ vipulaṃ baddhamekhalam / nakṣatramālāṅkam iva smasradvipaśiraḥsthalam

Sanskrit only: no published translation is held for this verse.

वहन्त्यौ केशपाशौ च पन्नगाविव निर्मितौ । दात्रा लावण्यसर्वस्वनिधानं रक्षितुं तयोः

vahantyau keśapāśau ca pannagāviva nirmitau / dātrā lāvaṇyasarvasvanidhānaṃ rakṣituṃ tayoḥ

Sanskrit only: no published translation is held for this verse.

दृष्ट्वा ते चिन्तयास्मास स राजा जातविस्मयः । अहो विश्वसृजः सृष्टिर्लसन्नवनवाद्भुता

dṛṣṭvā te cintayāsmāsa sa rājā jātavismayaḥ / aho viśvasṛjaḥ sṛṣṭirlasannavanavādbhutā

Sanskrit only: no published translation is held for this verse.

तदेतयोर् न रम्भापि नोर्वशी न तिलोत्तमा । रूपे भजति तुल्यत्वमसुराधिपकन्ययोः

tadetayor na rambhāpi norvaśī na tilottamā / rūpe bhajati tulyatvamasurādhipakanyayoḥ

Sanskrit only: no published translation is held for this verse.

इति चिन्तयतस् तस्य राज्ञः सा दैत्यकन्यका । ज्येष्ठार्चयित्वा त्रैलोक्यप्रभा वह्निं व्यजिज्ञपत्

iti cintayatas tasya rājñaḥ sā daityakanyakā / jyeṣṭhārcayitvā trailokyaprabhā vahniṃ vyajijñapat

Sanskrit only: no published translation is held for this verse.

उक्तः स्वप्नहरादेशो यतः प्रभृति मे ऽम्बया । ततः प्रभृति बद्ध्वैव भर्तृबुद्धिर्यतो मया

uktaḥ svapnaharādeśo yataḥ prabhṛti me 'mbayā / tataḥ prabhṛti baddhvaiva bhartṛbuddhiryato mayā

Sanskrit only: no published translation is held for this verse.

तस्मिन् गुणनिधौ राजपुत्रे मुक्तास्फलध्वजे । तत् स एव पतिर् भूयाद् भगवन् मे ऽन्यजन्मनि

tasmin guṇanidhau rājaputre muktāsphaladhvaje / tat sa eva patir bhūyād bhagavan me 'nyajanmani

Sanskrit only: no published translation is held for this verse.

इह जन्मनि तातेन संयतस्थेन मानिना । दित्सिताप्यम्बया तस्मै दातुं नाङ्गीकृतास्मि यत्

iha janmani tātena saṃyatasthena māninā / ditsitāpyambayā tasmai dātuṃ nāṅgīkṛtāsmi yat

Sanskrit only: no published translation is held for this verse.

तच् छ्रुत्वा तद्वदेवात्र सापि त्रिभुवनप्रभा । वव्रे हुताशान्मलयध्वजं जन्मान्तरे पतिम्

tac chrutvā tadvadevātra sāpi tribhuvanaprabhā / vavre hutāśānmalayadhvajaṃ janmāntare patim

Sanskrit only: no published translation is held for this verse.

ततो मेरुध्वजो राजा स तच्छ्रवणहर्षुलः । तद्भार्या च महादेवी परस्परमवोचताम्

tato merudhvajo rājā sa tacchravaṇaharṣulaḥ / tadbhāryā ca mahādevī parasparamavocatām

Sanskrit only: no published translation is held for this verse.

प्राप्नुयातामिमे भार्ये यद्यस्मत्तनयाविमौ । तदेताभ्यामवाप्तं स्याल्लोकद्वयजयात्फलम्

prāpnuyātāmime bhārye yadyasmattanayāvimau / tadetābhyāmavāptaṃ syāllokadvayajayātphalam

Sanskrit only: no published translation is held for this verse.

तद्यावदस्मिन्ननले नात्मानं क्षिपतः क्षणम् । तावत्किं नोपसृत्यैते वारयामः समातृके

tadyāvadasminnanale nātmānaṃ kṣipataḥ kṣaṇam / tāvatkiṃ nopasṛtyaite vārayāmaḥ samātṛke

Sanskrit only: no published translation is held for this verse.

एवं देव्या सहालोच्य राजावोचदुपेत्य ताः । मा कार्ष्ट साहसं दुःखं शमयिष्याम्यहं हि वः

evaṃ devyā sahālocya rājāvocadupetya tāḥ / mā kārṣṭa sāhasaṃ duḥkhaṃ śamayiṣyāmyahaṃ hi vaḥ

Sanskrit only: no published translation is held for this verse.

श्रुत्वैतच्छ्रोत्रपीयूषवर्षाभं भूपतेर्वचः । दृष्ट्वा च तं ताः सकलाः प्रणेमुरसुराङ्गनाः

śrutvaitacchrotrapīyūṣavarṣābhaṃ bhūpatervacaḥ / dṛṣṭvā ca taṃ tāḥ sakalāḥ praṇemurasurāṅganāḥ

Sanskrit only: no published translation is held for this verse.

पश्यन्तो ऽपि वयं पूर्वं मायाच्छन्ना न लक्षिताः । लोकद्वयेश्वरेणेह दृष्टाः स्मो ऽद्य पुनस् त्वया

paśyanto 'pi vayaṃ pūrvaṃ māyācchannā na lakṣitāḥ / lokadvayeśvareṇeha dṛṣṭāḥ smo 'dya punas tvayā

Sanskrit only: no published translation is held for this verse.

त्वद्दृष्टानां च दुःखान्तो भवत्येवाचिरेण नः । किं पुनः स्वगिरा दत्ते देवेनाभ्यर्थिते वरे

tvaddṛṣṭānāṃ ca duḥkhānto bhavatyevācireṇa naḥ / kiṃ punaḥ svagirā datte devenābhyarthite vare

Sanskrit only: no published translation is held for this verse.

तद्गृह्णीतार्घ्यपाद्यादि कृतासनपरिग्रहाः । भवन्तो हि जगत्पूज्या अयं चस्माकमाश्रमः

tadgṛhṇītārghyapādyādi kṛtāsanaparigrahāḥ / bhavanto hi jagatpūjyā ayaṃ casmākamāśramaḥ

Sanskrit only: no published translation is held for this verse.

इति स्वयंप्रभामुक्तवतीमाह हसन्नृपः । जामातृभ्यां त्वयैताभ्यां पाद्यार्घ्यं दीयतामिति

iti svayaṃprabhāmuktavatīmāha hasannṛpaḥ / jāmātṛbhyāṃ tvayaitābhyāṃ pādyārghyaṃ dīyatāmiti

Sanskrit only: no published translation is held for this verse.

ततः स्वयंप्रभावादीत्तदेताभ्यां वृषध्वजः । देवो दापयितार्घादि युष्माभिस्त्वद्य गृह्यताम्

tataḥ svayaṃprabhāvādīttadetābhyāṃ vṛṣadhvajaḥ / devo dāpayitārghādi yuṣmābhistvadya gṛhyatām

Sanskrit only: no published translation is held for this verse.

मेरुध्वजो जगादाथ सर्वमात्तमिदं मया । यूयं च मरणोद्योगान्निवर्तध्वमितो ऽधुना

merudhvajo jagādātha sarvamāttamidaṃ mayā / yūyaṃ ca maraṇodyogānnivartadhvamito 'dhunā

Sanskrit only: no published translation is held for this verse.

प्रविश्य तिष्ठतैकस्मिन्स्वपुरे सर्वकामदे । ततो ऽहम् एव ज्ञास्यामि यथा वः कुशलं भवेत्

praviśya tiṣṭhataikasminsvapure sarvakāmade / tato 'ham eva jñāsyāmi yathā vaḥ kuśalaṃ bhavet

Sanskrit only: no published translation is held for this verse.

इत्य् उक्तवन्तं राजानं सा जगाद स्वयंप्रभा । देवादेशान्निवृत्ताः स्मः शरीरत्यागनिश्चयात्

ity uktavantaṃ rājānaṃ sā jagāda svayaṃprabhā / devādeśānnivṛttāḥ smaḥ śarīratyāganiścayāt

Sanskrit only: no published translation is held for this verse.

कारास्थे तु प्रभौ युक्ता कथं नः स्वगृहस्थितिः । तदिहैव वयं तावत्तिष्ठास्मो देव संप्रति

kārāsthe tu prabhau yuktā kathaṃ naḥ svagṛhasthitiḥ / tadihaiva vayaṃ tāvattiṣṭhāsmo deva saṃprati

Sanskrit only: no published translation is held for this verse.

यावद्देवः स्वयं दत्तं वरं नः पालयिष्यति । ससुतामात्यमस्माकं मोचयिष्यति च प्रभुम्

yāvaddevaḥ svayaṃ dattaṃ varaṃ naḥ pālayiṣyati / sasutāmātyamasmākaṃ mocayiṣyati ca prabhum

Sanskrit only: no published translation is held for this verse.

मुक्तस्त्वदधिकारी सन्स च राज्यं करिष्यति । अर्पयिष्यति राज्यं च तुभ्यम् एव त्वदिच्छया

muktastvadadhikārī sansa ca rājyaṃ kariṣyati / arpayiṣyati rājyaṃ ca tubhyam eva tvadicchayā

Sanskrit only: no published translation is held for this verse.

समयप्रतिबन्धं च स करिष्यति तादृशम् । अन्तरस्था वयं चात्र सह पातालवासिभिः

samayapratibandhaṃ ca sa kariṣyati tādṛśam / antarasthā vayaṃ cātra saha pātālavāsibhiḥ

Sanskrit only: no published translation is held for this verse.

पातालेभ्यो ऽस्मदीयानि रत्नानि स्वीकुरुष्व च । एवम् उक्तवतीं तां स राजा मेरुध्वजो ऽब्रवीत्

pātālebhyo 'smadīyāni ratnāni svīkuruṣva ca / evam uktavatīṃ tāṃ sa rājā merudhvajo 'bravīt

Sanskrit only: no published translation is held for this verse.

विज्ञास्याम्य् अहमेवैतत्स्मर्तव्यं स्ववचस्तु वः । इत्य् उक्त्वा स नृपः स्नात्वा हाटकेशमपूजयत्

vijñāsyāmy ahamevaitatsmartavyaṃ svavacastu vaḥ / ity uktvā sa nṛpaḥ snātvā hāṭakeśamapūjayat

Sanskrit only: no published translation is held for this verse.

दैत्यराजसुते ते च तयोर् एवं स्वदृष्टयोः । तत्पुत्रयोस्तदेकाग्रगतचित्ते बभूवतुः

daityarājasute te ca tayor evaṃ svadṛṣṭayoḥ / tatputrayostadekāgragatacitte babhūvatuḥ

Sanskrit only: no published translation is held for this verse.

अथ स रसातलनिलयैर् निखिलैस्त्रैलोक्यमालिनो मुक्तिम् । प्रणिपत्य याच्यमानो राजा मेरुध्वजः सुकृती

atha sa rasātalanilayair nikhilaistrailokyamālino muktim / praṇipatya yācyamāno rājā merudhvajaḥ sukṛtī

Sanskrit only: no published translation is held for this verse.

छत्त्रैः स्वयशःशुभ्रैः स्थगयन्नाशाः सदारसुतभृत्यः । निर्गत्यासुरलोकात्तस्मादागान्निजं नगरम्

chattraiḥ svayaśaḥśubhraiḥ sthagayannāśāḥ sadārasutabhṛtyaḥ / nirgatyāsuralokāttasmādāgānnijaṃ nagaram

Sanskrit only: no published translation is held for this verse.

तत्रास्य पुत्रो मलयध्वजस्तां कनीयसीं दानवराजपुत्रीम् । ध्यायन्ननिद्रो ऽपि निमीलिताक्षः स्मस्रज्वरार्तो रजनीं निनाय

tatrāsya putro malayadhvajastāṃ kanīyasīṃ dānavarājaputrīm / dhyāyannanidro 'pi nimīlitākṣaḥ smasrajvarārto rajanīṃ nināya

Sanskrit only: no published translation is held for this verse.

सधैर् यजलधिस्तु ताम् अपिविचिन्त्य मुक्ताफलध्वजो ऽसुरपतेः सुतां दृढनिबद्धभावां युवा । मुनीन्द्रमनसाम् अपिस्मरविकारदां ज्यायसीं पुरार्थितवरो मुनेर्न खलु चुक्षुभे चेतसा

sadhair yajaladhistu tām apivicintya muktāphaladhvajo 'surapateḥ sutāṃ dṛḍhanibaddhabhāvāṃ yuvā / munīndramanasām apismaravikāradāṃ jyāyasīṃ purārthitavaro munerna khalu cukṣubhe cetasā

Sanskrit only: no published translation is held for this verse.

मेरुध्वजस् तु तम् अवेत्य सुतं निषिद्धदारक्रियं स्मरवशं मलयध्वजं च । कन्याप्रदानविमुखं च महासुरं तम् आसीद् उपायघटनाकुलचित्तवृत्तिः

merudhvajas tu tam avetya sutaṃ niṣiddhadārakriyaṃ smaravaśaṃ malayadhvajaṃ ca / kanyāpradānavimukhaṃ ca mahāsuraṃ tam āsīd upāyaghaṭanākulacittavṛttiḥ

Sanskrit only: no published translation is held for this verse.