Somadeva: Kathasaritsagara 17.6

विद्याधरत्वे यत्प्राप्तः शापो मेघवने मया । त्वदर्थमिह चाद्याहं मृत्युं प्राप्स्याम्यसंशयम्

vidyādharatve yatprāptaḥ śāpo meghavane mayā / tvadarthamiha cādyāhaṃ mṛtyuṃ prāpsyāmyasaṃśayam

Sanskrit only: no published translation is held for this verse.

इत्यादि क्रन्दितं तस्य श्रुत्वा पद्मावती सखीः । प्राह सर्वाणि संवादीन्यभिज्ञानानि यद्यपि

ityādi kranditaṃ tasya śrutvā padmāvatī sakhīḥ / prāha sarvāṇi saṃvādīnyabhijñānāni yadyapi

Sanskrit only: no published translation is held for this verse.

तथापि पारम्पर्येण श्रुतान्य् एतानि जातुचित् । आभ्यां भवेयुरिति मे न चेतो ऽभ्येति निश्चयम्

tathāpi pāramparyeṇa śrutāny etāni jātucit / ābhyāṃ bhaveyuriti me na ceto 'bhyeti niścayam

Sanskrit only: no published translation is held for this verse.

तन्नार्तमस्य शक्नोमि वचः श्रोतुं व्रजाम्य् अहम् । तद्गौर्यायतनं तावत् पूजाकालश् च तत्र मे

tannārtamasya śaknomi vacaḥ śrotuṃ vrajāmy aham / tadgauryāyatanaṃ tāvat pūjākālaś ca tatra me

Sanskrit only: no published translation is held for this verse.

इत्य् उक्त्वा ससखीका सा पद्मावत्यम्बिकाश्रमम् । तज्जगामार्चयित्वा च देवीमेवं व्यजिज्ञपत्

ity uktvā sasakhīkā sā padmāvatyambikāśramam / tajjagāmārcayitvā ca devīmevaṃ vyajijñapat

Sanskrit only: no published translation is held for this verse.

स सिद्धिश्वरदृष्टश्चेत्सत्यं पूर्वप्रियो मम । तत् तथा कुरु येन स्याच्छ्रीघ्रमेतेन संगमः

sa siddhiśvaradṛṣṭaścetsatyaṃ pūrvapriyo mama / tat tathā kuru yena syācchrīghrametena saṃgamaḥ

Sanskrit only: no published translation is held for this verse.

इति पद्मावती यावत् साकाङ्क्षा तत्र तिष्ठति । मुक्ताफलधजस्तावत् सो ऽपि सिद्धिश्वरे स्थितः

iti padmāvatī yāvat sākāṅkṣā tatra tiṣṭhati / muktāphaladhajastāvat so 'pi siddhiśvare sthitaḥ

Sanskrit only: no published translation is held for this verse.

पूर्वं संयतकं मित्त्रं महाबुद्धिम् उवाच तम् । जाने सा स्वास्पदं याता तद्गौर्यायतनं सखे

pūrvaṃ saṃyatakaṃ mittraṃ mahābuddhim uvāca tam / jāne sā svāspadaṃ yātā tadgauryāyatanaṃ sakhe

Sanskrit only: no published translation is held for this verse.

तद् एहि यावस् तत्रैवेत्य् उक्त्वारुह्य मनोगतौ । तस्मिन्विमाने सो ऽप्यागादम्बिकाश्रमम् एव तत्

tad ehi yāvas tatraivety uktvāruhya manogatau / tasminvimāne so 'pyāgādambikāśramam eva tat

Sanskrit only: no published translation is held for this verse.

दूराद्दृष्ट्वावतीर्णं तं विमानेन नभस्तलात् । सख्यः पद्मावतीमूचुर्देवि पश्येदमद्भुतम्

dūrāddṛṣṭvāvatīrṇaṃ taṃ vimānena nabhastalāt / sakhyaḥ padmāvatīmūcurdevi paśyedamadbhutam

Sanskrit only: no published translation is held for this verse.

स इहाप्येष दिव्येन विमानेनागतः किल । मानुषस्यापि दिव्यो ऽस्य प्रभावः कथमीदृशः

sa ihāpyeṣa divyena vimānenāgataḥ kila / mānuṣasyāpi divyo 'sya prabhāvaḥ kathamīdṛśaḥ

Sanskrit only: no published translation is held for this verse.

ततः पद्मावती स्माह सख्यः स्मरथ किं न तत् । यत्स शापप्रदातास्य मया शप्तो दृढव्रतः

tataḥ padmāvatī smāha sakhyaḥ smaratha kiṃ na tat / yatsa śāpapradātāsya mayā śapto dṛḍhavrataḥ

Sanskrit only: no published translation is held for this verse.

मानुषत्वे ऽवतीर्णस्य वाहनं कामरूपभृत् । इच्छानुगतमस्यैव भविष्यति भवानिति

mānuṣatve 'vatīrṇasya vāhanaṃ kāmarūpabhṛt / icchānugatamasyaiva bhaviṣyati bhavāniti

Sanskrit only: no published translation is held for this verse.

तत्तेन मुनिशिष्येण वाहनेनैष निश्चितम् । विमानरूपं दधता स्वेच्छं भ्रमति सर्वतः

tattena muniśiṣyeṇa vāhanenaiṣa niścitam / vimānarūpaṃ dadhatā svecchaṃ bhramati sarvataḥ

Sanskrit only: no published translation is held for this verse.

एवं तयोक्ते सख्यस्तामूचुरेवमवैषि चेत् । तन् न संभावयस्येतं कस्माद्देवि किमीक्षसे

evaṃ tayokte sakhyastāmūcurevamavaiṣi cet / tan na saṃbhāvayasyetaṃ kasmāddevi kimīkṣase

Sanskrit only: no published translation is held for this verse.

एतत्सखीवचः श्रुत्वा पद्मावत्यवदत्पुनः । एवं संभाव्यते सख्यो निश्चयो ऽद्यापि नास्ति मे

etatsakhīvacaḥ śrutvā padmāvatyavadatpunaḥ / evaṃ saṃbhāvyate sakhyo niścayo 'dyāpi nāsti me

Sanskrit only: no published translation is held for this verse.

सत्यं स एव यदि वा भवत्येष तथापि मे । अभिगम्यो ऽन्यदेहस्थः स्वदेहानाश्रितः कथम्

satyaṃ sa eva yadi vā bhavatyeṣa tathāpi me / abhigamyo 'nyadehasthaḥ svadehānāśritaḥ katham

Sanskrit only: no published translation is held for this verse.

तच्छन्ना एव पश्यामस्तावदस्येह चेष्टितम् । इत्य् उक्त्वा राजपुत्रीं सा छन्नैवासीत्सखीवृता

tacchannā eva paśyāmastāvadasyeha ceṣṭitam / ity uktvā rājaputrīṃ sā channaivāsītsakhīvṛtā

Sanskrit only: no published translation is held for this verse.

तावत्तत्रावतीर्यैव विमानादम्बिकाश्रमे । मुक्ताफलध्वजः सोत्को वयस्यं तम् उवाच सः

tāvattatrāvatīryaiva vimānādambikāśrame / muktāphaladhvajaḥ sotko vayasyaṃ tam uvāca saḥ

Sanskrit only: no published translation is held for this verse.

अमुत्र राक्षसीत्रस्ता पूर्वं संभाविता मया । स्वयंवरागता चेह दृष्टोद्यानान्तरे पुनः

amutra rākṣasītrastā pūrvaṃ saṃbhāvitā mayā / svayaṃvarāgatā ceha dṛṣṭodyānāntare punaḥ

Sanskrit only: no published translation is held for this verse.

इह चावाप्तशापं मामनुसर्तुमनास्तदा । प्रिया पद्मावती कृच्छ्रान्मुनीन्द्रेण निवर्तिता

iha cāvāptaśāpaṃ māmanusartumanāstadā / priyā padmāvatī kṛcchrānmunīndreṇa nivartitā

Sanskrit only: no published translation is held for this verse.

सैवाद्य पश्य मे मित्र दृष्टिमार्गात्पलायते । एतत्तस्य वचः श्रुत्वा पद्मवत्यब्रवीत्सखीः

saivādya paśya me mitra dṛṣṭimārgātpalāyate / etattasya vacaḥ śrutvā padmavatyabravītsakhīḥ

Sanskrit only: no published translation is held for this verse.

सत्यं सख्यः स एवायं पूर्वदेहमनाश्रितम् । कथं तूपैम्यमुं तन्मे सो ऽत्र सिद्धीश्वरो गतिः

satyaṃ sakhyaḥ sa evāyaṃ pūrvadehamanāśritam / kathaṃ tūpaimyamuṃ tanme so 'tra siddhīśvaro gatiḥ

Sanskrit only: no published translation is held for this verse.

तेनैव दत्तः स्वप्नो मे स एव च करिष्यति । उपायमिति निश्चित्य सागात्सिद्धिश्वरं पुनः

tenaiva dattaḥ svapno me sa eva ca kariṣyati / upāyamiti niścitya sāgātsiddhiśvaraṃ punaḥ

Sanskrit only: no published translation is held for this verse.

पूर्वदेहस्थितेनैव प्रियेण मम संगमम् । कुरु वा देहि वा मृत्युं तृतीया न गतिर्मम

pūrvadehasthitenaiva priyeṇa mama saṃgamam / kuru vā dehi vā mṛtyuṃ tṛtīyā na gatirmama

Sanskrit only: no published translation is held for this verse.

इति विज्ञापयाम् आस सा तमभ्यर्च्य धूर्जटिम् । ससखीका च तत्रैव तस्थौ देवकुलाङ्गने

iti vijñāpayām āsa sā tamabhyarcya dhūrjaṭim / sasakhīkā ca tatraiva tasthau devakulāṅgane

Sanskrit only: no published translation is held for this verse.

तावद्गौर्याश्रमे तत्र तां स मुक्ताफलध्वजः । अन्विष्याप्राप्य चोद्विग्नस्तमवादीद्वयस्यकम्

tāvadgauryāśrame tatra tāṃ sa muktāphaladhvajaḥ / anviṣyāprāpya codvignastamavādīdvayasyakam

Sanskrit only: no published translation is held for this verse.

इतः प्राप्ता न सा यावो धाम तच्छांभवं पुनः । ततो ऽपि चेन्न लप्स्ये तां प्रवेक्ष्याम्यग्निम् एव तत्

itaḥ prāptā na sā yāvo dhāma tacchāṃbhavaṃ punaḥ / tato 'pi cenna lapsye tāṃ pravekṣyāmyagnim eva tat

Sanskrit only: no published translation is held for this verse.

तच् छ्रुत्वा स सखावोचद्भावि कल्याणम् एव ते । न मृषा स्यान्मुनिवचः स्वप्नादेशश् च शांभवः

tac chrutvā sa sakhāvocadbhāvi kalyāṇam eva te / na mṛṣā syānmunivacaḥ svapnādeśaś ca śāṃbhavaḥ

Sanskrit only: no published translation is held for this verse.

इत्याश्वासयता तेन सख्या मुक्ताफलध्वजः । सह सिद्धिश्वरं प्रायाद्विमानमधिरुह्य सः

ityāśvāsayatā tena sakhyā muktāphaladhvajaḥ / saha siddhiśvaraṃ prāyādvimānamadhiruhya saḥ

Sanskrit only: no published translation is held for this verse.

प्राप्तं दृष्ट्वात्र तं पद्मावती तस्थावलक्षिता । पश्यतेहैव संप्राप्त इति चोवाच सा सखीः

prāptaṃ dṛṣṭvātra taṃ padmāvatī tasthāvalakṣitā / paśyatehaiva saṃprāpta iti covāca sā sakhīḥ

Sanskrit only: no published translation is held for this verse.

सो ऽपि प्रविश्य देवाग्रं दृष्ट्वा प्रत्यग्रपूजितम् । मुक्ताफलध्वजो देवं वयस्यं तम् अभाषत

so 'pi praviśya devāgraṃ dṛṣṭvā pratyagrapūjitam / muktāphaladhvajo devaṃ vayasyaṃ tam abhāṣata

Sanskrit only: no published translation is held for this verse.

सखे केनापि पश्यायमधुनैवार्चितो विभुः । नूनं सैव प्रिया मे ऽत्र स्थिता क्वाप्य् अर्चितस्तया

sakhe kenāpi paśyāyamadhunaivārcito vibhuḥ / nūnaṃ saiva priyā me 'tra sthitā kvāpy arcitastayā

Sanskrit only: no published translation is held for this verse.

इत्य् उक्त्वा सो ऽत्र चिन्वानो यदा न प्राप तां तदा । चक्रन्द हा प्रिये पद्मावतीति विरही मुहुः

ity uktvā so 'tra cinvāno yadā na prāpa tāṃ tadā / cakranda hā priye padmāvatīti virahī muhuḥ

Sanskrit only: no published translation is held for this verse.

पिकीरुते तदालापबुद्ध्या तत्कबरीधिया । बर्हिबर्हे सरसिजे तन्मुखभ्रान्तितस् तथा

pikīrute tadālāpabuddhyā tatkabarīdhiyā / barhibarhe sarasije tanmukhabhrāntitas tathā

Sanskrit only: no published translation is held for this verse.

धावन्स्मरज्वरावेशविवशस्तेन कृच्छ्रतः । आश्वास्य जगदे सख्या राजपुत्रो ऽनुनीय सः

dhāvansmarajvarāveśavivaśastena kṛcchrataḥ / āśvāsya jagade sakhyā rājaputro 'nunīya saḥ

Sanskrit only: no published translation is held for this verse.

बहूपवासक्लान्तेन किम् आरब्धम् इदं त्वया । जितभूलोकपातालं किम् आत्मानम् उपेक्षसे

bahūpavāsaklāntena kim ārabdham idaṃ tvayā / jitabhūlokapātālaṃ kim ātmānam upekṣase

Sanskrit only: no published translation is held for this verse.

त्वय्यन्तिकमनायाते पिता मेरुध्वजस्तव । राजा त्रैलोक्यमाली च श्वशुरो दानवेश्वरः

tvayyantikamanāyāte pitā merudhvajastava / rājā trailokyamālī ca śvaśuro dānaveśvaraḥ

Sanskrit only: no published translation is held for this verse.

त्वदर्थिनी च त्रैलोक्यप्रभा सापि तदात्मजा । माता च ते विनयवत्यनुजो मलयध्वजः

tvadarthinī ca trailokyaprabhā sāpi tadātmajā / mātā ca te vinayavatyanujo malayadhvajaḥ

Sanskrit only: no published translation is held for this verse.

अनिष्टाशङ्किनः सर्वे सोपवासा जहत्यसून् । तदेहि तावद् गत्वा तान् रक्षावो ऽवसितं ह्य् अहः

aniṣṭāśaṅkinaḥ sarve sopavāsā jahatyasūn / tadehi tāvad gatvā tān rakṣāvo 'vasitaṃ hy ahaḥ

Sanskrit only: no published translation is held for this verse.

इति तं वादिनं प्राह मित्त्रं मुक्ताफलध्वजः । त्वम् एव मद्विमानेन गत्वाश्वासय तानिति

iti taṃ vādinaṃ prāha mittraṃ muktāphaladhvajaḥ / tvam eva madvimānena gatvāśvāsaya tāniti

Sanskrit only: no published translation is held for this verse.

ततस् तं स सखावोचत्स ममोपनमेत्कथम् । शापेन मुनिशिष्यो यस्तव वाहनतां गतः

tatas taṃ sa sakhāvocatsa mamopanametkatham / śāpena muniśiṣyo yastava vāhanatāṃ gataḥ

Sanskrit only: no published translation is held for this verse.

इत्य् उक्तवन्तं सुहृदं राजपुत्रो ऽब्रवीत्स तम् । तर्हि तिष्ठ सखे तावत् पश्यावः किं भवेदिह

ity uktavantaṃ suhṛdaṃ rājaputro 'bravītsa tam / tarhi tiṣṭha sakhe tāvat paśyāvaḥ kiṃ bhavediha

Sanskrit only: no published translation is held for this verse.

एवं श्रुत्वा तदालापं पद्मावत्यवदत्सखीः । जाने ऽभिज्ञानसंवादैः स पूर्वप्रिय एष मे

evaṃ śrutvā tadālāpaṃ padmāvatyavadatsakhīḥ / jāne 'bhijñānasaṃvādaiḥ sa pūrvapriya eṣa me

Sanskrit only: no published translation is held for this verse.

कामं मानुषदेहस्थः शापेनैवं कदर्थ्यते । सिद्धकन्योपहासाच् च शापदोषो ममाप्य् अयम्

kāmaṃ mānuṣadehasthaḥ śāpenaivaṃ kadarthyate / siddhakanyopahāsāc ca śāpadoṣo mamāpy ayam

Sanskrit only: no published translation is held for this verse.

इति यावच् च सा वक्ति तावदालोहितच्छविः । वियोगिवनदावाग्निरुदगान्मृगलाञ्छनः

iti yāvac ca sā vakti tāvadālohitacchaviḥ / viyogivanadāvāgnirudagānmṛgalāñchanaḥ

Sanskrit only: no published translation is held for this verse.

पूरयाम् आस च शनैर् जगज्ज्योत्स्ना समन्ततः । कंदर्पदहनज्वाला तं च मुक्ताफलध्वजम्

pūrayām āsa ca śanair jagajjyotsnā samantataḥ / kaṃdarpadahanajvālā taṃ ca muktāphaladhvajam

Sanskrit only: no published translation is held for this verse.

ततस् तत्कालचक्राह्व इव क्रन्दन्नृपात्मजः । छन्नस्थयैव जगदे पद्मावत्य स विग्नया

tatas tatkālacakrāhva iva krandannṛpātmajaḥ / channasthayaiva jagade padmāvatya sa vignayā

Sanskrit only: no published translation is held for this verse.

राजपुत्र स एव त्वं यदि मे पूर्ववल्लभः । तथाप्यन्यशरीरस्थो ममासि परपूरुषः

rājaputra sa eva tvaṃ yadi me pūrvavallabhaḥ / tathāpyanyaśarīrastho mamāsi parapūruṣaḥ

Sanskrit only: no published translation is held for this verse.

अहं ते परदाराश् च तदाक्रन्दसि किं मुहुः । उपायो भवितावश्यं सत्यं चेत्तन्मुनेर्वचः

ahaṃ te paradārāś ca tadākrandasi kiṃ muhuḥ / upāyo bhavitāvaśyaṃ satyaṃ cettanmunervacaḥ

Sanskrit only: no published translation is held for this verse.

एतच् छ्रुत्वा वचस्तस्यास्तामपश्यंश् च सो ऽभ्यगात् । मुक्ताफलध्वजो हर्षविषादविषमां दशाम्

etac chrutvā vacastasyāstāmapaśyaṃś ca so 'bhyagāt / muktāphaladhvajo harṣaviṣādaviṣamāṃ daśām

Sanskrit only: no published translation is held for this verse.

जगाद च मया देवि स्मृतप्राक्तनजन्मना । दृष्ट्वा त्वं प्रत्यभिज्ञाता स्वाम् एव दधती तनुम्

jagāda ca mayā devi smṛtaprāktanajanmanā / dṛṣṭvā tvaṃ pratyabhijñātā svām eva dadhatī tanum

Sanskrit only: no published translation is held for this verse.

त्वं तु वैद्याधरे देहे वर्तमानं विलोक्य माम् । अधुना परिजानीषे मर्त्यदेहगतं कथम्

tvaṃ tu vaidyādhare dehe vartamānaṃ vilokya mām / adhunā parijānīṣe martyadehagataṃ katham

Sanskrit only: no published translation is held for this verse.

तदवश्यं मया त्याज्यमिदं हतशरीरकम् । इत्य् उक्त्वा सो ऽभवत्तूष्णीं छन्नासीत्सापि तत्प्रिया

tadavaśyaṃ mayā tyājyamidaṃ hataśarīrakam / ity uktvā so 'bhavattūṣṇīṃ channāsītsāpi tatpriyā

Sanskrit only: no published translation is held for this verse.

ततो भूयिष्ठयातायां रात्रौ निद्रागते श्रमात् । पूर्वसंयतके तस्मिन्महाबुद्धौ वयस्यके

tato bhūyiṣṭhayātāyāṃ rātrau nidrāgate śramāt / pūrvasaṃyatake tasminmahābuddhau vayasyake

Sanskrit only: no published translation is held for this verse.

अप्राप्यां तेन देहेन जानन् पद्मावतीं स ताम् । मुक्ताफलध्वजो दारूण्याहृत्याग्निम् अदीपयत्

aprāpyāṃ tena dehena jānan padmāvatīṃ sa tām / muktāphaladhvajo dārūṇyāhṛtyāgnim adīpayat

Sanskrit only: no published translation is held for this verse.

भगवंस्त्वत्प्रसादेन प्राक्तनीं तां तनुं श्रितः । प्राप्यासमचिरेणैव प्रियां पद्मावतीमहम्

bhagavaṃstvatprasādena prāktanīṃ tāṃ tanuṃ śritaḥ / prāpyāsamacireṇaiva priyāṃ padmāvatīmaham

Sanskrit only: no published translation is held for this verse.

इति ब्रुवन् प्रणम्यैव लिङ्गमूर्तिं स शंकरम् । जुहाव ज्वलिते तस्मिन्न् अग्नौ राजसुतस् तनुम्

iti bruvan praṇamyaiva liṅgamūrtiṃ sa śaṃkaram / juhāva jvalite tasminn agnau rājasutas tanum

Sanskrit only: no published translation is held for this verse.

तावत् प्रबुद्धः स महाबुद्धिर्मुक्ताफलध्वजम् । तमपश्यन्विचित्यापि पश्यन्नग्निमुदर्चिषम्

tāvat prabuddhaḥ sa mahābuddhirmuktāphaladhvajam / tamapaśyanvicityāpi paśyannagnimudarciṣam

Sanskrit only: no published translation is held for this verse.

विचिन्त्य तं हुतात्मानं वयस्यं विरहाकुलम् । अग्नौ तत्रैव तच्छोकात्सो ऽप्यात्मानमपातयत्

vicintya taṃ hutātmānaṃ vayasyaṃ virahākulam / agnau tatraiva tacchokātso 'pyātmānamapātayat

Sanskrit only: no published translation is held for this verse.

तद्दृष्ट्वा सापि दुःखार्ता पद्मावत्यब्रवीत्सखीः । धिगहो हृदयं स्त्रीणां कठिनं कुलिशादपि

taddṛṣṭvā sāpi duḥkhārtā padmāvatyabravītsakhīḥ / dhigaho hṛdayaṃ strīṇāṃ kaṭhinaṃ kuliśādapi

Sanskrit only: no published translation is held for this verse.

पश्यन्त्य वैशसमिदं नोत्क्रान्तं यन्ममासुभिः । तत्कियच्चिरमात्मानमधन्यो धार्यते मया

paśyantya vaiśasamidaṃ notkrāntaṃ yanmamāsubhiḥ / tatkiyacciramātmānamadhanyo dhāryate mayā

Sanskrit only: no published translation is held for this verse.

नास्ति मे ऽद्यापि दुःखान्तो मदपुण्यैर् मुनेरपि । वचस् तस्यान्यथा जातं तच्छ्रेयो मरणं मम

nāsti me 'dyāpi duḥkhānto madapuṇyair munerapi / vacas tasyānyathā jātaṃ tacchreyo maraṇaṃ mama

Sanskrit only: no published translation is held for this verse.

परपूरुषमध्ये तु प्रवेष्टुमनले ऽत्र मे । न युक्तं तदनायासः पाश एव हि मे गतिः

parapūruṣamadhye tu praveṣṭumanale 'tra me / na yuktaṃ tadanāyāsaḥ pāśa eva hi me gatiḥ

Sanskrit only: no published translation is held for this verse.

इत्य् उक्त्वा साग्रतः शंभोरुपेत्याशोकपादपे । पाशं विधातुं लतया राजपुत्री प्रचक्रमे

ity uktvā sāgrataḥ śaṃbhorupetyāśokapādape / pāśaṃ vidhātuṃ latayā rājaputrī pracakrame

Sanskrit only: no published translation is held for this verse.

आशाप्रदर्शिभिर् वाक्यैर् यावत्तां स सखीजनः । वारयत्याययौ तावन्मुनिः सो ऽत्र तपोधनः

āśāpradarśibhir vākyair yāvattāṃ sa sakhījanaḥ / vārayatyāyayau tāvanmuniḥ so 'tra tapodhanaḥ

Sanskrit only: no published translation is held for this verse.

मा पुत्रि साहसं न स्यादसत्यं तद्वचो मम । धीरा बवाधुनैवेह प्राप्तं पश्यसि तं प्रियम्

mā putri sāhasaṃ na syādasatyaṃ tadvaco mama / dhīrā bavādhunaiveha prāptaṃ paśyasi taṃ priyam

Sanskrit only: no published translation is held for this verse.

त्वदीयेनैव तपसा तस्य शापक्षयो ऽचिरात् । संवृत्तस्तदनास्थेयं स्वतपस्येव ते कथम्

tvadīyenaiva tapasā tasya śāpakṣayo 'cirāt / saṃvṛttastadanāstheyaṃ svatapasyeva te katham

Sanskrit only: no published translation is held for this verse.

प्रत्यासन्ने विवाहे च का तवेयं विषादिता । प्रणिधानादवेत्याहमिदं सर्वमिहागतः

pratyāsanne vivāhe ca kā taveyaṃ viṣāditā / praṇidhānādavetyāhamidaṃ sarvamihāgataḥ

Sanskrit only: no published translation is held for this verse.

इति तं व्याहरन्तं च दृष्ट्वा मुनिम् उपागतम् । प्रणम्य दोलारूढेव साभूत् पद्मावती क्षणम्

iti taṃ vyāharantaṃ ca dṛṣṭvā munim upāgatam / praṇamya dolārūḍheva sābhūt padmāvatī kṣaṇam

Sanskrit only: no published translation is held for this verse.

अथ मर्त्यदेहदाहाद्वैद्याधरमात्मदेहमाश्रित्य । सवयस्यो मुक्ताफलकेतुः सो ऽत्राययौ प्रियस्तस्याः

atha martyadehadāhādvaidyādharamātmadehamāśritya / savayasyo muktāphalaketuḥ so 'trāyayau priyastasyāḥ

Sanskrit only: no published translation is held for this verse.

तं वीक्ष्य चातकवधूरिव नूतनाभ्रं राकाशशाङ्कमुदितं च कुमुद्वतीव । विद्याधरेन्द्रतनयं गगनागतं सा पद्मावती हृदि दधौ कम् अपिप्रमोदम्

taṃ vīkṣya cātakavadhūriva nūtanābhraṃ rākāśaśāṅkamuditaṃ ca kumudvatīva / vidyādharendratanayaṃ gaganāgataṃ sā padmāvatī hṛdi dadhau kam apipramodam

Sanskrit only: no published translation is held for this verse.

स च मुक्ताफलकेतुर्मुमुदे दृष्ट्यैव तामवेक्ष्य पिबन् । चिरमरुभूमिभ्रमणश्रान्तः पान्थो यथा सरितम्

sa ca muktāphalaketurmumude dṛṣṭyaiva tāmavekṣya piban / ciramarubhūmibhramaṇaśrāntaḥ pāntho yathā saritam

Sanskrit only: no published translation is held for this verse.

तौ च शापरजनीक्षयादुभौ चक्रवाकवदवाप्तसंगमौ । जग्मतुस्तपनतेजसो मुनेस् तस्य पादपतनेन तृप्तताम्

tau ca śāparajanīkṣayādubhau cakravākavadavāptasaṃgamau / jagmatustapanatejaso munes tasya pādapatanena tṛptatām

Sanskrit only: no published translation is held for this verse.

यद्युवाम् इह पुनः समागतौ तीर्णशापमुदितौ स एव मे । चेतसो ऽद्य परितोष इत्य् असाव् अभ्यनन्दद् अथ तौ महामुनिः

yadyuvām iha punaḥ samāgatau tīrṇaśāpamuditau sa eva me / cetaso 'dya paritoṣa ity asāv abhyanandad atha tau mahāmuniḥ

Sanskrit only: no published translation is held for this verse.

यातायां निशि चेन्द्रवारणगतस्तत्रैव सो ऽप्याययौ चिन्वन्दारकनिष्ठपुत्रसहितो मेरुध्वजो भूपतिः । त्रैलोक्यप्रभया समं तनयया त्रैलोक्यमाली तथा दैत्यानाम् अधिपो विमानवहनः सान्तःपुरः सानुगः

yātāyāṃ niśi cendravāraṇagatastatraiva so 'pyāyayau cinvandārakaniṣṭhaputrasahito merudhvajo bhūpatiḥ / trailokyaprabhayā samaṃ tanayayā trailokyamālī tathā daityānām adhipo vimānavahanaḥ sāntaḥpuraḥ sānugaḥ

Sanskrit only: no published translation is held for this verse.

ततः स मुक्ताफलकेतुमेतयोः प्रदर्श्य वृत्तान्तमवर्णयन्मुनिः । यथा स कार्यार्थमवाप शापतो मनुष्यतां मुक्तिम् उपागतस् ततः

tataḥ sa muktāphalaketumetayoḥ pradarśya vṛttāntamavarṇayanmuniḥ / yathā sa kāryārthamavāpa śāpato manuṣyatāṃ muktim upāgatas tataḥ

Sanskrit only: no published translation is held for this verse.

बुद्ध्वा तदग्नौ पतनोन्मुखास् ते मेरुध्वजाद्या मुनिनोपदिष्टम् । सिद्धोदकस्नानहरार्चनादि कृत्वा विशोकाः सहसा बभूवुः

buddhvā tadagnau patanonmukhās te merudhvajādyā muninopadiṣṭam / siddhodakasnānaharārcanādi kṛtvā viśokāḥ sahasā babhūvuḥ

Sanskrit only: no published translation is held for this verse.

त्रैलोक्यप्रभया पुनरत्र तया जातिमाशु संस्मृत्य । समचिन्त्यत सिद्धाधिपकन्या देवप्रभास्मि सा हन्त

trailokyaprabhayā punaratra tayā jātimāśu saṃsmṛtya / samacintyata siddhādhipakanyā devaprabhāsmi sā hanta

Sanskrit only: no published translation is held for this verse.

विद्याधराधिनाथः पतिरस्तु ममेति या तपस्यन्ती । पद्मावत्युपहसिता प्राविशमनलं स्वकामनासिद्ध्यै

vidyādharādhināthaḥ patirastu mameti yā tapasyantī / padmāvatyupahasitā prāviśamanalaṃ svakāmanāsiddhyai

Sanskrit only: no published translation is held for this verse.

जातास्म्यस्मिंश् च ततो दितिजकुले यत्र चानुरक्तास्मि । सो ऽप्येष राजपुत्रः प्राप्तो वैद्याधरीं पुनः स्वतनुम्

jātāsmyasmiṃś ca tato ditijakule yatra cānuraktāsmi / so 'pyeṣa rājaputraḥ prāpto vaidyādharīṃ punaḥ svatanum

Sanskrit only: no published translation is held for this verse.

न च युज्यते ऽन्यरूपो देहेनानेन समभिगन्तुमयम् । तदिमामेतत्प्राप्त्यै तनुं जुहोम्यासुरीं पुनर्ज्वलने

na ca yujyate 'nyarūpo dehenānena samabhigantumayam / tadimāmetatprāptyai tanuṃ juhomyāsurīṃ punarjvalane

Sanskrit only: no published translation is held for this verse.

एवं विमृश्य हृदि तच् च निवेद्य पित्रोर् मुक्ताफलध्वजहुताशम् अनुप्रविष्टाम् । आदाय तां करुणयार्पितपूर्वदेहाम् आविर्बभूव हुतभुक्स्वयम् अब्रवीच् च

evaṃ vimṛśya hṛdi tac ca nivedya pitror muktāphaladhvajahutāśam anupraviṣṭām / ādāya tāṃ karuṇayārpitapūrvadehām āvirbabhūva hutabhuksvayam abravīc ca

Sanskrit only: no published translation is held for this verse.

भो मिक्ताफलकेतो त्वामियमुद्दिश्य मयि विमुक्ततनुः । तदिमां सिद्धेशसुतां गृहाण देवप्रभां भार्याम्

bho miktāphalaketo tvāmiyamuddiśya mayi vimuktatanuḥ / tadimāṃ siddheśasutāṃ gṛhāṇa devaprabhāṃ bhāryām

Sanskrit only: no published translation is held for this verse.

इत्य् एतद् उक्त्वैव तिरोहिते ऽनले ब्रह्मात्र सेन्द्रैर् अमरैः सहाययौ । गन्धर्वराजः सह चन्द्रकेतुना विद्याधरेन्द्रेण च पद्मशेखरः

ity etad uktvaiva tirohite 'nale brahmātra sendrair amaraiḥ sahāyayau / gandharvarājaḥ saha candraketunā vidyādharendreṇa ca padmaśekharaḥ

Sanskrit only: no published translation is held for this verse.

प्रह्वाय सर्वैर् अभिनन्दिताय तैर् गन्धर्वराड्व्यग्रपरिग्रहस् ततः । प्रादात्स मुक्ताफलकेतवे सुतां पद्मावतीं तां विधिवद्विभूतिमान्

prahvāya sarvair abhinanditāya tair gandharvarāḍvyagraparigrahas tataḥ / prādātsa muktāphalaketave sutāṃ padmāvatīṃ tāṃ vidhivadvibhūtimān

Sanskrit only: no published translation is held for this verse.

स चात्र विद्याधरराजपुत्रश् चिरोत्सुकस्तां दयितामवाप्य । मेने फलं जन्मतरोरवाप्तम् उवाह ताम् अप्य् अथ सिद्धकन्याम्

sa cātra vidyādhararājaputraś cirotsukastāṃ dayitāmavāpya / mene phalaṃ janmataroravāptam uvāha tām apy atha siddhakanyām

Sanskrit only: no published translation is held for this verse.

स च तया दितिजेश्वरकन्यया विधिवद् अत्र पितृप्रवितीर्णया । नृपसुतः समयुज्यत कान्तया त्रिभुवनप्रभया मलयध्वजः

sa ca tayā ditijeśvarakanyayā vidhivad atra pitṛpravitīrṇayā / nṛpasutaḥ samayujyata kāntayā tribhuvanaprabhayā malayadhvajaḥ

Sanskrit only: no published translation is held for this verse.

ततः कृतित्वादभिषिच्य पुत्रं सद्वीपपृथ्वीवलयैकराज्ये । मेरुध्वजः स्वे मलयध्वजं तं वनं सदारस्तपसे जगाम

tataḥ kṛtitvādabhiṣicya putraṃ sadvīpapṛthvīvalayaikarājye / merudhvajaḥ sve malayadhvajaṃ taṃ vanaṃ sadārastapase jagāma

Sanskrit only: no published translation is held for this verse.

त्रैलोक्यमाली सपरिग्रहश् च प्रायात् पदं स्वं दितिजाधिराजः । शक्रो ऽथ मुक्ताफलकेतवे तां ददौ स विद्युद्ध्वजराज्यलक्ष्मीम्

trailokyamālī saparigrahaś ca prāyāt padaṃ svaṃ ditijādhirājaḥ / śakro 'tha muktāphalaketave tāṃ dadau sa vidyuddhvajarājyalakṣmīm

Sanskrit only: no published translation is held for this verse.

मुक्ताफलकेतुर् अयं भुङ्क्तां विद्याधरासुरैश्वर्यम् । स्वपदानि यान्तु च सुरा इत्थं वागुच्चचार दिवः

muktāphalaketur ayaṃ bhuṅktāṃ vidyādharāsuraiśvaryam / svapadāni yāntu ca surā itthaṃ vāguccacāra divaḥ

Sanskrit only: no published translation is held for this verse.

तामाकण्य ययुस् ततः प्रमुदितास्ते ब्रह्मशक्रादयः शापान्मुक्तवता तपोधनमुनिः शिष्येण साकं ययौ । श्रीमुक्ताफलकेतुना च सहितो भार्याद्वयभ्राजिना पुत्रेणाथ स चन्द्रकेतुरगमद्वैद्याधरं स्वं पदम्

tāmākaṇya yayus tataḥ pramuditāste brahmaśakrādayaḥ śāpānmuktavatā tapodhanamuniḥ śiṣyeṇa sākaṃ yayau / śrīmuktāphalaketunā ca sahito bhāryādvayabhrājinā putreṇātha sa candraketuragamadvaidyādharaṃ svaṃ padam

Sanskrit only: no published translation is held for this verse.

भुक्त्वा च तत्र गगनेचरचक्रवर्तिलक्ष्मीं सुतेन सह तेन चिरं स राजा । तस्मिन्निवेश्य निजराज्यधुरं विरक्तो देव्या समं मुनितपोवनमाश्रितो ऽभूत्

bhuktvā ca tatra gaganecaracakravartilakṣmīṃ sutena saha tena ciraṃ sa rājā / tasminniveśya nijarājyadhuraṃ virakto devyā samaṃ munitapovanamāśrito 'bhūt

Sanskrit only: no published translation is held for this verse.

स च मुक्ताफलकेतुः प्रागिन्द्रादसुरराज्यमासाद्य । प्राप्य पुनश् च पितुस्तद्विद्याधरचक्रवर्तित्वम्

sa ca muktāphalaketuḥ prāgindrādasurarājyamāsādya / prāpya punaś ca pitustadvidyādharacakravartitvam

Sanskrit only: no published translation is held for this verse.

पद्मावत्या सहितो दशकल्पान्मूर्तयेव निर्वृत्या । भेजे सुसमृद्धोभयसम्राज्यसुखश्रियं सुकृती

padmāvatyā sahito daśakalpānmūrtayeva nirvṛtyā / bheje susamṛddhobhayasamrājyasukhaśriyaṃ sukṛtī

Sanskrit only: no published translation is held for this verse.

आलोच्य भावान् अवसाननीरसान् संश्रित्य चान्ते स मुनीन्द्रकाननम् । ज्योतिः परं प्राप्य तपःप्रकर्षतः सायुज्यमीशस्य जगाम धूर्जटेः

ālocya bhāvān avasānanīrasān saṃśritya cānte sa munīndrakānanam / jyotiḥ paraṃ prāpya tapaḥprakarṣataḥ sāyujyamīśasya jagāma dhūrjaṭeḥ

Sanskrit only: no published translation is held for this verse.

एवं हंसयुगान्निशम्य सरसामेतां कथां तन्मुखाज् ज्ञानं प्राप्य च लब्धदिव्यगतिकः स ब्रह्मदत्तो नृपः । तद्भार्यासचिवौ च तौ च विहगौ गत्वैव सिद्धिश्वरं त्यक्त्वा शापतनूः शिवानुचरतां प्रापुर्निजां ते ऽखिलाः

evaṃ haṃsayugānniśamya sarasāmetāṃ kathāṃ tanmukhāj jñānaṃ prāpya ca labdhadivyagatikaḥ sa brahmadatto nṛpaḥ / tadbhāryāsacivau ca tau ca vihagau gatvaiva siddhiśvaraṃ tyaktvā śāpatanūḥ śivānucaratāṃ prāpurnijāṃ te 'khilāḥ

Sanskrit only: no published translation is held for this verse.

इत्य् अहमाकर्ण्य कथां गोमुखतो मदनमञ्चुकाविरहे । हे मुनयः क्षणमात्रं धृत्या चेतो विनोदितवान्

ity ahamākarṇya kathāṃ gomukhato madanamañcukāvirahe / he munayaḥ kṣaṇamātraṃ dhṛtyā ceto vinoditavān

Sanskrit only: no published translation is held for this verse.

एवं कथितकथे किल नरवाहनदत्तचक्रवर्तिनि ते । गोपालकेन सहिताः परितुतुषुः कश्यपाश्रमे मुनयः

evaṃ kathitakathe kila naravāhanadattacakravartini te / gopālakena sahitāḥ paritutuṣuḥ kaśyapāśrame munayaḥ

Sanskrit only: no published translation is held for this verse.