Somadeva: Kathasaritsagara 4.1

तदादेशेन च प्राप्तं मया त्वच्चरणान्तिकम् । विपदश् च निवृत्ता मे द्वारात् प्रतिहता इव

tadādeśena ca prāptaṃ mayā tvaccaraṇāntikam / vipadaś ca nivṛttā me dvārāt pratihatā iva

Sanskrit only: no published translation is held for this verse.

इत्य् एष मम वृत्तान्तो नाम्ना पिङ्गलिकाप्य् अहम् । आबाल्याग्निक्रियाधूमैर् यन् मे पिङ्गलिते दृशौ

ity eṣa mama vṛttānto nāmnā piṅgalikāpy aham / ābālyāgnikriyādhūmair yan me piṅgalite dṛśau

Sanskrit only: no published translation is held for this verse.

स तु शान्तिकरो देवि देवरो मे विदेशगः । कुत्र तिष्ठति देशे ऽसाव् इति नाद्यापि बुध्यते

sa tu śāntikaro devi devaro me videśagaḥ / kutra tiṣṭhati deśe 'sāv iti nādyāpi budhyate

Sanskrit only: no published translation is held for this verse.

एवम् उक्तस्ववृत्तान्तां कुलीनेत्य् अवधार्य ताम् । प्रीत्येनां ब्राह्मणीं देवी सा वितर्क्यैवम् अब्रवीत्

evam uktasvavṛttāntāṃ kulīnety avadhārya tām / prītyenāṃ brāhmaṇīṃ devī sā vitarkyaivam abravīt

Sanskrit only: no published translation is held for this verse.

इह शान्तिकरो नाम स्थितो ऽस्माकं पुरोहितः । वैदेशिकः स जाने ऽहं देवरस् ते भविष्यति

iha śāntikaro nāma sthito 'smākaṃ purohitaḥ / vaideśikaḥ sa jāne 'haṃ devaras te bhaviṣyati

Sanskrit only: no published translation is held for this verse.

इत्य् उक्त्वा ब्राह्मणीम् उत्कां नीत्वा रात्रिं तदैव ताम् । देवी शान्तिकरं प्रातर् आनाय्यापृच्छद् अन्वयम्

ity uktvā brāhmaṇīm utkāṃ nītvā rātriṃ tadaiva tām / devī śāntikaraṃ prātar ānāyyāpṛcchad anvayam

Sanskrit only: no published translation is held for this verse.

उक्तान्वयाय तस्मै च सा संजातसुनिश्चया । इयं ते भ्रातृजायेति ब्राह्मणीं ताम् अदर्शयत्

uktānvayāya tasmai ca sā saṃjātasuniścayā / iyaṃ te bhrātṛjāyeti brāhmaṇīṃ tām adarśayat

Sanskrit only: no published translation is held for this verse.

जातायां च परिज्ञप्तौ ज्ञातबन्धुक्षयो ऽथ सः । ब्राह्मणीं भ्रातृजायां तां निन्ये शान्तिकरो गृहम्

jātāyāṃ ca parijñaptau jñātabandhukṣayo 'tha saḥ / brāhmaṇīṃ bhrātṛjāyāṃ tāṃ ninye śāntikaro gṛham

Sanskrit only: no published translation is held for this verse.

तत्रानुशोच्य पितरौ भ्रातरं च यथोचितम् । आश्वासयाम् आस स तां बालकद्वितयान्विताम्

tatrānuśocya pitarau bhrātaraṃ ca yathocitam / āśvāsayām āsa sa tāṃ bālakadvitayānvitām

Sanskrit only: no published translation is held for this verse.

देवी वासवदत्तापि तस्यास् तौ बालकौ सुतौ । पुरोहितौ स्वपुत्रस्य भाविनः पर्यकल्पयत्

devī vāsavadattāpi tasyās tau bālakau sutau / purohitau svaputrasya bhāvinaḥ paryakalpayat

Sanskrit only: no published translation is held for this verse.

ज्येष्ठस् तयोः शान्तिसोमो नाम्ना वैश्वागरो ऽपरः । कृतस् तयैव देव्या च वितीर्णबहुसंपदा

jyeṣṭhas tayoḥ śāntisomo nāmnā vaiśvāgaro 'paraḥ / kṛtas tayaiva devyā ca vitīrṇabahusaṃpadā

Sanskrit only: no published translation is held for this verse.

अन्धस्येवास्य लोकस्य फलभूमिं स्वकर्मभिः । पुरोगैर् नीयमानस्य हेतुमात्रं स्वपौरुषम्

andhasyevāsya lokasya phalabhūmiṃ svakarmabhiḥ / purogair nīyamānasya hetumātraṃ svapauruṣam

Sanskrit only: no published translation is held for this verse.

यद् एत्य लब्धविभवास् तत्र सर्वे ऽपि संगताः । बालकौ तौ तयोः सा च माता शान्तिकरश् च सः

yad etya labdhavibhavās tatra sarve 'pi saṃgatāḥ / bālakau tau tayoḥ sā ca mātā śāntikaraś ca saḥ

Sanskrit only: no published translation is held for this verse.

ततो गच्छत्सु दिवसेष्व् एकदा पञ्चभिः सुतैः । सहागताम् उपादाय शरावान् कुम्भकारिकाम्

tato gacchatsu divaseṣv ekadā pañcabhiḥ sutaiḥ / sahāgatām upādāya śarāvān kumbhakārikām

Sanskrit only: no published translation is held for this verse.

दृष्ट्वा स्वमन्दिरे कांचिद् देव्या वासवदत्तया । सा ब्राह्मणी पिङ्गलिका जगदे पार्श्ववर्तिनी

dṛṣṭvā svamandire kāṃcid devyā vāsavadattayā / sā brāhmaṇī piṅgalikā jagade pārśvavartinī

Sanskrit only: no published translation is held for this verse.

पञ्चैतस्याः सुतो ऽद्यापि नैको मे सखि दृश्यताम् । पुण्यानाम् ईदृशं पात्रम् ईदृश्य् अपि न मादृशी

pañcaitasyāḥ suto 'dyāpi naiko me sakhi dṛśyatām / puṇyānām īdṛśaṃ pātram īdṛśy api na mādṛśī

Sanskrit only: no published translation is held for this verse.

ततः पिङ्गलिकावादीद् देवि दुःखाय जायते । प्रजेयं पापभूयिष्ठा दरिद्रेष्व् एव भूयसी

tataḥ piṅgalikāvādīd devi duḥkhāya jāyate / prajeyaṃ pāpabhūyiṣṭhā daridreṣv eva bhūyasī

Sanskrit only: no published translation is held for this verse.

युष्मादृशेषु जायेत यः स को ऽप्य् उत्तमो भवेत् । तद् अलं त्वरया प्राप्स्यस्य् अचिरात् स्वोचितं सुतम्

yuṣmādṛśeṣu jāyeta yaḥ sa ko 'py uttamo bhavet / tad alaṃ tvarayā prāpsyasy acirāt svocitaṃ sutam

Sanskrit only: no published translation is held for this verse.

इति पिङ्गलिकोक्तापि सोत्सुका सुतजन्मनि । अभूद् वासवदत्ता सा तच्चिन्ताक्रान्तमानसा

iti piṅgalikoktāpi sotsukā sutajanmani / abhūd vāsavadattā sā taccintākrāntamānasā

Sanskrit only: no published translation is held for this verse.

गिरीशाराधनप्राप्यं पुत्रं ते नारदो ऽभ्यधात् । तद् देवि वरदो ऽवश्यम् आराध्यः स शिवो ऽत्र नः

girīśārādhanaprāpyaṃ putraṃ te nārado 'bhyadhāt / tad devi varado 'vaśyam ārādhyaḥ sa śivo 'tra naḥ

Sanskrit only: no published translation is held for this verse.

इत्य् उक्ता वत्सराजेन तत्कालं चागतेन सा । देवी लब्धाशयेनाशु चकार व्रतनिश्चयम्

ity uktā vatsarājena tatkālaṃ cāgatena sā / devī labdhāśayenāśu cakāra vrataniścayam

Sanskrit only: no published translation is held for this verse.

तस्याम् आत्तव्रतायां तु स राजापि समन्त्रिकः । सराष्ट्रश् चापि विदधे शंकराराधनव्रतम्

tasyām āttavratāyāṃ tu sa rājāpi samantrikaḥ / sarāṣṭraś cāpi vidadhe śaṃkarārādhanavratam

Sanskrit only: no published translation is held for this verse.

त्रिरात्रोपोषितौ तौ च दंपती स विभुस् ततः । प्रसादप्रकटीभूतः स्वयं स्वप्ने समादिशत्

trirātropoṣitau tau ca daṃpatī sa vibhus tataḥ / prasādaprakaṭībhūtaḥ svayaṃ svapne samādiśat

Sanskrit only: no published translation is held for this verse.

उत्तिष्ठतं स युवयोः कामांशो जनिता सुतः । नाथो विद्याधराणां यो भविता मत्प्रसादतः

uttiṣṭhataṃ sa yuvayoḥ kāmāṃśo janitā sutaḥ / nātho vidyādharāṇāṃ yo bhavitā matprasādataḥ

Sanskrit only: no published translation is held for this verse.

इति वचनम् उदीर्य चन्द्रमौलौ सपदि तिरोहिततां गते प्रबुध्य । अधिगतवरम् आशु दंपती तौ प्रमदम् अकृत्रिमम् आपतुः कृतार्थौ

iti vacanam udīrya candramaulau sapadi tirohitatāṃ gate prabudhya / adhigatavaram āśu daṃpatī tau pramadam akṛtrimam āpatuḥ kṛtārthau

Sanskrit only: no published translation is held for this verse.

उत्थाय चोषसि ततः प्रकृतीर् विधाय तत्स्वप्नकीर्तनसुधारसतर्पितास् ताः । देवी च सा नरपतिश् च सबन्धुभृत्यौ बद्धोत्सवौ विदधतुर् व्रतपारणानि

utthāya coṣasi tataḥ prakṛtīr vidhāya tatsvapnakīrtanasudhārasatarpitās tāḥ / devī ca sā narapatiś ca sabandhubhṛtyau baddhotsavau vidadhatur vratapāraṇāni

Sanskrit only: no published translation is held for this verse.

कतिपयदिवसापगमे तस्याः स्वप्ने जटाधरः पुरुषः । को ऽप्य् अथ देव्या वासवदत्तायाः फलम् उपेत्य ददौ

katipayadivasāpagame tasyāḥ svapne jaṭādharaḥ puruṣaḥ / ko 'py atha devyā vāsavadattāyāḥ phalam upetya dadau

Sanskrit only: no published translation is held for this verse.

ततः स विनिवेदितस्फुटतथाविधस्वप्नया सह प्रमुदितस् तया समभिनन्दितो मन्त्रिभिः । विचिन्त्य शशिमौलिना फलनिभेन दत्तं सुतं मनोरथम् अदूरगं गणयति स्म वत्सेश्वरः

tataḥ sa viniveditasphuṭatathāvidhasvapnayā saha pramuditas tayā samabhinandito mantribhiḥ / vicintya śaśimaulinā phalanibhena dattaṃ sutaṃ manoratham adūragaṃ gaṇayati sma vatseśvaraḥ

Sanskrit only: no published translation is held for this verse.