Somadeva: Kathasaritsagara 6.6

तत्रान्यपत्नीविमुखः कदलीगर्भया तया । समं स तस्थावाख्याततद्वृत्तान्तः स्वमन्त्रिषु

tatrānyapatnīvimukhaḥ kadalīgarbhayā tayā / samaṃ sa tasthāvākhyātatadvṛttāntaḥ svamantriṣu

Sanskrit only: no published translation is held for this verse.

ततस् तस्य महादेवी तदीयं मन्त्रिणं रहः । स्मारयित्वोपकारान्स्वाञ्जगादात्यन्तदुःखिता

tatas tasya mahādevī tadīyaṃ mantriṇaṃ rahaḥ / smārayitvopakārānsvāñjagādātyantaduḥkhitā

Sanskrit only: no published translation is held for this verse.

राज्ञा नूतनभार्यैकसक्तेनादाहमुज्झिता । तत्तथा कुरु येनैषा सपत्नी मे निवर्तते

rājñā nūtanabhāryaikasaktenādāhamujjhitā / tattathā kuru yenaiṣā sapatnī me nivartate

Sanskrit only: no published translation is held for this verse.

तच् छ्रुत्वा सो ऽब्रवीन्मन्त्री देवि कर्तुं न युज्यते । मादृशानां प्रबोः पत्न्या विनाशो ऽथ वियोजनम्

tac chrutvā so 'bravīnmantrī devi kartuṃ na yujyate / mādṛśānāṃ praboḥ patnyā vināśo 'tha viyojanam

Sanskrit only: no published translation is held for this verse.

एष प्रव्राजकस्त्रीणां विषयः कुहकादिषु । प्रयोगेष्व् अभियुक्तानां संगतानां तथाविधैः

eṣa pravrājakastrīṇāṃ viṣayaḥ kuhakādiṣu / prayogeṣv abhiyuktānāṃ saṃgatānāṃ tathāvidhaiḥ

Sanskrit only: no published translation is held for this verse.

ता हि कैतवतापस्यः प्रविश्यैवानिवारिताः । गृहेषु मायाकुशलाः कर्म किं किं न कुर्वते

tā hi kaitavatāpasyaḥ praviśyaivānivāritāḥ / gṛheṣu māyākuśalāḥ karma kiṃ kiṃ na kurvate

Sanskrit only: no published translation is held for this verse.

इत्य् उक्ता तेन सा देवी विनतेवाह तं ह्रिया । अलं तर्हि ममानेन गर्हितेन सतामिति

ity uktā tena sā devī vinatevāha taṃ hriyā / alaṃ tarhi mamānena garhitena satāmiti

Sanskrit only: no published translation is held for this verse.

तद्वचो हृदि कृत्वा तु तं विसृज्य च मन्त्रिणम् । कांचित्प्रव्राजिकां चेटीमुखेनानयति स्म सा

tadvaco hṛdi kṛtvā tu taṃ visṛjya ca mantriṇam / kāṃcitpravrājikāṃ ceṭīmukhenānayati sma sā

Sanskrit only: no published translation is held for this verse.

तस्याः शशंस चामूलात्तत्सर्वं स्वमनीषितम् । अङ्गीचकार दातुं च सिद्धे कार्ये धनं महत्

tasyāḥ śaśaṃsa cāmūlāttatsarvaṃ svamanīṣitam / aṅgīcakāra dātuṃ ca siddhe kārye dhanaṃ mahat

Sanskrit only: no published translation is held for this verse.

साप्यर्थलोभाद् आर्तां ताम् इत्य् उवाच कुतापसी । देवी किं नाम वस्त्व् एतद् अहं ते ऽसधयाम्य् अदः

sāpyarthalobhād ārtāṃ tām ity uvāca kutāpasī / devī kiṃ nāma vastv etad ahaṃ te 'sadhayāmy adaḥ

Sanskrit only: no published translation is held for this verse.

नानाविधान् हि जानामि प्रयोगान् सुबहून् अहम् । एवम् आश्वास्य तां देवीं साथ प्रव्राजिका ययौ

nānāvidhān hi jānāmi prayogān subahūn aham / evam āśvāsya tāṃ devīṃ sātha pravrājikā yayau

Sanskrit only: no published translation is held for this verse.

मठिकां प्राप्य च निजां भीतेवेत्थमचिन्तयत् । अहो अतीव भोगाशा कं नाम न विडम्बयेत्

maṭhikāṃ prāpya ca nijāṃ bhītevetthamacintayat / aho atīva bhogāśā kaṃ nāma na viḍambayet

Sanskrit only: no published translation is held for this verse.

यन् मया सहसा देव्याः प्रतिज्ञा पुरतः कृता । विज्ञानं चात्र तादृङ् मे सम्यक् किंचिन् न विद्यते

yan mayā sahasā devyāḥ pratijñā purataḥ kṛtā / vijñānaṃ cātra tādṛṅ me samyak kiṃcin na vidyate

Sanskrit only: no published translation is held for this verse.

अन्यत्र् एव च न व्याजं कर्तुं राजगृहे क्षमम् । ज्ञात्वा जातु हि कुर्वीरन्निग्रहं प्रभविष्णवः

anyatr eva ca na vyājaṃ kartuṃ rājagṛhe kṣamam / jñātvā jātu hi kurvīrannigrahaṃ prabhaviṣṇavaḥ

Sanskrit only: no published translation is held for this verse.

एकस् तत्राभ्युपायः स्याद् यत् सुहृन् मे ऽस्ति नापितः । इदृग्विज्ञानकुशलः स चेत्कुर्यादिहोद्यमम्

ekas tatrābhyupāyaḥ syād yat suhṛn me 'sti nāpitaḥ / idṛgvijñānakuśalaḥ sa cetkuryādihodyamam

Sanskrit only: no published translation is held for this verse.

इत्य् आलोच्य् ऐव सा तस्य नापितस्यान्तिकं ययौ । तस्मै मनीषितं सर्वं तच्छशंसार्थसिद्धिदम्

ity ālocy aiva sā tasya nāpitasyāntikaṃ yayau / tasmai manīṣitaṃ sarvaṃ tacchaśaṃsārthasiddhidam

Sanskrit only: no published translation is held for this verse.

ततः स नापितो वृद्धो धूर्तश्चैवमचिन्तयत् । उपस्थितमिदं दिष्ट्या लाभस्थानं ममाधुना

tataḥ sa nāpito vṛddho dhūrtaścaivamacintayat / upasthitamidaṃ diṣṭyā lābhasthānaṃ mamādhunā

Sanskrit only: no published translation is held for this verse.

तन्न बाध्या नवा राजवधू रक्ष्या तु सा यतः । दिव्यदृष्टिः पिता तस्य सर्वं प्रख्यापयेदिदम्

tanna bādhyā navā rājavadhū rakṣyā tu sā yataḥ / divyadṛṣṭiḥ pitā tasya sarvaṃ prakhyāpayedidam

Sanskrit only: no published translation is held for this verse.

विश्लिष्यैतां तु नृपतेर्देवीं संप्रति भुञ्ज्महे । कुरहस्यसहाये हि भृते भृत्यायते प्रभुः

viśliṣyaitāṃ tu nṛpaterdevīṃ saṃprati bhuñjmahe / kurahasyasahāye hi bhṛte bhṛtyāyate prabhuḥ

Sanskrit only: no published translation is held for this verse.

संश्लेष्य काले राज्ञे च वाच्यमेतत्तथा मया । यथा स्यादुपजीव्यो मे राजा सा चार्षिकन्यका

saṃśleṣya kāle rājñe ca vācyametattathā mayā / yathā syādupajīvyo me rājā sā cārṣikanyakā

Sanskrit only: no published translation is held for this verse.

एवं च नातिपापं स्याद्भवेद्दिर्घा च जीविका । इत्य् आलोच्य स तां प्राह नापितः कूटतापसीम्

evaṃ ca nātipāpaṃ syādbhaveddirghā ca jīvikā / ity ālocya sa tāṃ prāha nāpitaḥ kūṭatāpasīm

Sanskrit only: no published translation is held for this verse.

अम्ब सर्वं करोम्येतत्किं तु योगबलेन चेत् । एषा राज्ञो नवा भार्या हन्यते तन्न युज्यते

amba sarvaṃ karomyetatkiṃ tu yogabalena cet / eṣā rājño navā bhāryā hanyate tanna yujyate

Sanskrit only: no published translation is held for this verse.

बुद्ध्वा कदाचिद् राजा हि सर्वान् अस्मान् विनाशयेत् । स्त्रीहत्यापातकं च स्यात्तत्पिता च मुनिः शपेत्

buddhvā kadācid rājā hi sarvān asmān vināśayet / strīhatyāpātakaṃ ca syāttatpitā ca muniḥ śapet

Sanskrit only: no published translation is held for this verse.

तस्माद्बुद्धिबलेनैषा राज्ञो विश्लेष्यते परम् । येन देवी सुखं तिष्ठेद् अर्थप्राप्तिर् भवेच् च नः

tasmādbuddhibalenaiṣā rājño viśleṣyate param / yena devī sukhaṃ tiṣṭhed arthaprāptir bhavec ca naḥ

Sanskrit only: no published translation is held for this verse.

एतच् च मे कियत् किं हि न बुद्ध्या साधयाम्य् अहम् । प्रज्ञानं मामकीनं च श्रूयतां वर्णयामि ते

etac ca me kiyat kiṃ hi na buddhyā sādhayāmy aham / prajñānaṃ māmakīnaṃ ca śrūyatāṃ varṇayāmi te

Sanskrit only: no published translation is held for this verse.

अभूद् अस्य पिता राज्ञो दुःशीलो दृढवर्मणः । अहं च दासस् तस्येह राज्ञः स्वोचितकर्मकृत्

abhūd asya pitā rājño duḥśīlo dṛḍhavarmaṇaḥ / ahaṃ ca dāsas tasyeha rājñaḥ svocitakarmakṛt

Sanskrit only: no published translation is held for this verse.

स कदाचिद् इह भ्राम्यन् भार्याम् ऐक्षत मामकीम् । तस्यां तस्य सुरूपायां तरुण्यां च मनो ययौ

sa kadācid iha bhrāmyan bhāryām aikṣata māmakīm / tasyāṃ tasya surūpāyāṃ taruṇyāṃ ca mano yayau

Sanskrit only: no published translation is held for this verse.

नापितस्त्रीति चाबोधि पृष्ट्वा परिजनं स ताम् । किं नापितः करोतीति प्रविश्य् ऐव स मे गृहम्

nāpitastrīti cābodhi pṛṣṭvā parijanaṃ sa tām / kiṃ nāpitaḥ karotīti praviśy aiva sa me gṛham

Sanskrit only: no published translation is held for this verse.

उपभुज्य् ऐव तां स्वेच्छं मद्भार्यां कुनृपो ययौ । अहं च तदहर्दैवाद्गृहादासं बहिः क्वचित्

upabhujy aiva tāṃ svecchaṃ madbhāryāṃ kunṛpo yayau / ahaṃ ca tadahardaivādgṛhādāsaṃ bahiḥ kvacit

Sanskrit only: no published translation is held for this verse.

अन्येद्युश् च प्रविष्टेन दृष्टा सान्यादृशी मया । पृष्टा भार्या यथावृत्तं साभिमानेव मे ऽभ्यधात्

anyedyuś ca praviṣṭena dṛṣṭā sānyādṛśī mayā / pṛṣṭā bhāryā yathāvṛttaṃ sābhimāneva me 'bhyadhāt

Sanskrit only: no published translation is held for this verse.

तत्क्रमेणैव तां भार्याम् अशक्तस्य निषेधने । नित्यम् एवोपभुञ्जानः स ममोत्तब्धवान् नृपः

tatkrameṇaiva tāṃ bhāryām aśaktasya niṣedhane / nityam evopabhuñjānaḥ sa mamottabdhavān nṛpaḥ

Sanskrit only: no published translation is held for this verse.

कुतो गम्यमगम्यं वा कुशीलोन्मादिनः प्रभोः । वातोद्भूतस्य दावाग्नेः किं तृणं किं च काननम्

kuto gamyamagamyaṃ vā kuśīlonmādinaḥ prabhoḥ / vātodbhūtasya dāvāgneḥ kiṃ tṛṇaṃ kiṃ ca kānanam

Sanskrit only: no published translation is held for this verse.

ततो यावद् गतिर् मे ऽस्ति न काचित् तन्निवारणे । तावत्स्वल्पाशनक्षामो मान्द्यव्याजमशिश्रियम्

tato yāvad gatir me 'sti na kācit tannivāraṇe / tāvatsvalpāśanakṣāmo māndyavyājamaśiśriyam

Sanskrit only: no published translation is held for this verse.

तादृशश् च गतो ऽभूवं राज्ञस् तस्याहम् अन्तिकम् । स्वव्यापारोपसेवार्थं निःश्वसन्कृशपाण्डुरः

tādṛśaś ca gato 'bhūvaṃ rājñas tasyāham antikam / svavyāpāropasevārthaṃ niḥśvasankṛśapāṇḍuraḥ

Sanskrit only: no published translation is held for this verse.

तत्र मन्दमिवालोक्य साभिप्रायः स मां नृपः । पप्रच्छ रे किमीदृक्त्वं संजातः कथ्यतामिति

tatra mandamivālokya sābhiprāyaḥ sa māṃ nṛpaḥ / papraccha re kimīdṛktvaṃ saṃjātaḥ kathyatāmiti

Sanskrit only: no published translation is held for this verse.

निर्बन्धपृष्टस् तं चाहं विजने याचिताभयः । प्रत्यवोचं नृपं देव भार्यास्ति मम डाकिनी

nirbandhapṛṣṭas taṃ cāhaṃ vijane yācitābhayaḥ / pratyavocaṃ nṛpaṃ deva bhāryāsti mama ḍākinī

Sanskrit only: no published translation is held for this verse.

सा च सुप्तस्य मे ऽन्त्राणि गुदेनाकृष्य चूषति । तथैव चान्तः क्षिपति तेनाहं क्षामतां गतः

sā ca suptasya me 'ntrāṇi gudenākṛṣya cūṣati / tathaiva cāntaḥ kṣipati tenāhaṃ kṣāmatāṃ gataḥ

Sanskrit only: no published translation is held for this verse.

पोषणाय च मे नित्यं बृंहणं भोजनं कुतः । इत्य् उक्तः स मया राजा जाताशङ्को व्यचिन्तयत्

poṣaṇāya ca me nityaṃ bṛṃhaṇaṃ bhojanaṃ kutaḥ / ity uktaḥ sa mayā rājā jātāśaṅko vyacintayat

Sanskrit only: no published translation is held for this verse.

किं सत्यं डाकिनी सा स्यात्तेनाहं किं हृतस्तथा । किंस्विदाहरपुष्टस्य चूषेदन्त्रं ममापि सा

kiṃ satyaṃ ḍākinī sā syāttenāhaṃ kiṃ hṛtastathā / kiṃsvidāharapuṣṭasya cūṣedantraṃ mamāpi sā

Sanskrit only: no published translation is held for this verse.

तदद्य ताम् अहं युक्त्या जिज्ञासिष्ये स्वयं निशि । इति संचिन्त्य राजा मे सो ऽत्राहारमदापयत्

tadadya tām ahaṃ yuktyā jijñāsiṣye svayaṃ niśi / iti saṃcintya rājā me so 'trāhāramadāpayat

Sanskrit only: no published translation is held for this verse.

ततो गत्वा गृहं तस्या भार्यायाः संनिधावहम् । अश्रूण्यमुञ्च पृष्टश् च तया ताम् एवम् अब्रवम्

tato gatvā gṛhaṃ tasyā bhāryāyāḥ saṃnidhāvaham / aśrūṇyamuñca pṛṣṭaś ca tayā tām evam abravam

Sanskrit only: no published translation is held for this verse.

प्रिये न वाच्यं कस्यापि त्वया शृणु वदामि ते । अस्य राज्ञो गुदे जाता दन्ता वज्राश्रिसंनिभाः

priye na vācyaṃ kasyāpi tvayā śṛṇu vadāmi te / asya rājño gude jātā dantā vajrāśrisaṃnibhāḥ

Sanskrit only: no published translation is held for this verse.

तच् च भग्नो ऽद्य जात्यो ऽपि क्षुरो मे कर्म कुर्वतः । एवं चात्र ममेदानीं क्षुरस्त्रुट्येत्पदे पदे

tac ca bhagno 'dya jātyo 'pi kṣuro me karma kurvataḥ / evaṃ cātra mamedānīṃ kṣurastruṭyetpade pade

Sanskrit only: no published translation is held for this verse.

तन्नवं नवमानेष्ये कुतो नित्यम् अहं क्षुरम् । अतो रोदिमि नष्टा हि जीविकेयं गृहे मम

tannavaṃ navamāneṣye kuto nityam ahaṃ kṣuram / ato rodimi naṣṭā hi jīvikeyaṃ gṛhe mama

Sanskrit only: no published translation is held for this verse.

इत्य् उक्ता सा मया भार्या मतिमाधादुपैष्यतः । रात्रौ राज्ञो ऽस्य सुप्तस्य गुददन्ताद्भुतेक्षणे

ity uktā sā mayā bhāryā matimādhādupaiṣyataḥ / rātrau rājño 'sya suptasya gudadantādbhutekṣaṇe

Sanskrit only: no published translation is held for this verse.

आ संसाराददृष्टं तदसत्यं न त्वबोधि सा । विदधा अपि वञ्च्यन्ते विटवर्णनया स्त्रियः

ā saṃsārādadṛṣṭaṃ tadasatyaṃ na tvabodhi sā / vidadhā api vañcyante viṭavarṇanayā striyaḥ

Sanskrit only: no published translation is held for this verse.

अथैत्य तां नि शि स्वैरं मद्भार्यामुपभुज्य सः । राजा श्रमादिवालीकं सुप्तवान्मद्वचः स्मरन्

athaitya tāṃ ni śi svairaṃ madbhāryāmupabhujya saḥ / rājā śramādivālīkaṃ suptavānmadvacaḥ smaran

Sanskrit only: no published translation is held for this verse.

मद्भार्याप्यथ तं सुप्तं मत्वा तस्य शनैः शनैः । हस्तं प्रसारयाम् आस गुदे दन्तोपलब्धये

madbhāryāpyatha taṃ suptaṃ matvā tasya śanaiḥ śanaiḥ / hastaṃ prasārayām āsa gude dantopalabdhaye

Sanskrit only: no published translation is held for this verse.

गुदप्राप्ते च तत्पाणावुत्थाय सहसैव सः । डाकिनी डाकिनीत्य् उक्त्वा त्रस्तो राजा ततो ययौ

gudaprāpte ca tatpāṇāvutthāya sahasaiva saḥ / ḍākinī ḍākinīty uktvā trasto rājā tato yayau

Sanskrit only: no published translation is held for this verse.

ततः प्रभृति सा तेन भीत्या त्यक्ता नृपेण मे । भार्या गृहीतसंतोषा मदेकायत्ततां गता

tataḥ prabhṛti sā tena bhītyā tyaktā nṛpeṇa me / bhāryā gṛhītasaṃtoṣā madekāyattatāṃ gatā

Sanskrit only: no published translation is held for this verse.

एकं पूर्वं नृपाद्बुद्ध्या गृहिणी मोचिता मया । इति तां तापसीमुक्त्वा नापितः सो ऽब्रवीत्पुनः

ekaṃ pūrvaṃ nṛpādbuddhyā gṛhiṇī mocitā mayā / iti tāṃ tāpasīmuktvā nāpitaḥ so 'bravītpunaḥ

Sanskrit only: no published translation is held for this verse.

तदेतत्प्रज्ञया कारमार्ये युष्मन्मनीषितम् । यथा च क्रियते मातस्तदिदं वच्मि ते शृणु

tadetatprajñayā kāramārye yuṣmanmanīṣitam / yathā ca kriyate mātastadidaṃ vacmi te śṛṇu

Sanskrit only: no published translation is held for this verse.

को ऽप्य् अन्तःपुरवृद्धो ऽत्र स्वीकार्यो यो ब्रवीत्यमुम् । जाया ते कदलीगर्भा डाकिनीति नृपं रहः

ko 'py antaḥpuravṛddho 'tra svīkāryo yo bravītyamum / jāyā te kadalīgarbhā ḍākinīti nṛpaṃ rahaḥ

Sanskrit only: no published translation is held for this verse.

आरण्यकाया नह्यस्याः कश्चित्परिजनः स्वकः । सर्वः परो भेदसहो लोभात्कुर्वीत किं न यत्

āraṇyakāyā nahyasyāḥ kaścitparijanaḥ svakaḥ / sarvaḥ paro bhedasaho lobhātkurvīta kiṃ na yat

Sanskrit only: no published translation is held for this verse.

ततो ऽस्मिन् राज्ञि साशङ्के श्रवणान् निशि यत्नतः । हस्तपादादि कदलीगर्भाधाम्नि निधीयते

tato 'smin rājñi sāśaṅke śravaṇān niśi yatnataḥ / hastapādādi kadalīgarbhādhāmni nidhīyate

Sanskrit only: no published translation is held for this verse.

तत्प्रभाते विलोक्य् ऐव राजा सत्यमवेत्य तत् । वृद्धोक्तं कदलीगर्भां भीतस्तां त्यक्ष्यति स्वयम्

tatprabhāte viloky aiva rājā satyamavetya tat / vṛddhoktaṃ kadalīgarbhāṃ bhītastāṃ tyakṣyati svayam

Sanskrit only: no published translation is held for this verse.

एवं सपत्नीविरहाद्देवी सुखमवाप्नुयात् । त्वां च सा बहु मन्येत लाभः कश्चिद्भवेच् च नः

evaṃ sapatnīvirahāddevī sukhamavāpnuyāt / tvāṃ ca sā bahu manyeta lābhaḥ kaścidbhavec ca naḥ

Sanskrit only: no published translation is held for this verse.

इत्य् उक्ता तापसी तेन नापितेन तथेति सा । गत्वा राज्ञो महादेव्यै यथावस्तु न्यवेदयत्

ity uktā tāpasī tena nāpitena tatheti sā / gatvā rājño mahādevyai yathāvastu nyavedayat

Sanskrit only: no published translation is held for this verse.

देवी च तत्तथा चक्रे सा तद्युक्त्या नृपो ऽपि ताम् । प्रत्यक्षं वीक्ष्य कदलीगर्भां दुष्टेति तां जहौ

devī ca tattathā cakre sā tadyuktyā nṛpo 'pi tām / pratyakṣaṃ vīkṣya kadalīgarbhāṃ duṣṭeti tāṃ jahau

Sanskrit only: no published translation is held for this verse.

तुष्टया च ततो देव्या तया गुप्तमदायि यत् । प्रव्राजिका तद्बुभुजे सा यथेष्टं सनापित

tuṣṭayā ca tato devyā tayā guptamadāyi yat / pravrājikā tadbubhuje sā yatheṣṭaṃ sanāpita

Sanskrit only: no published translation is held for this verse.

त्यक्ता च कदलीगर्भा सा तेन दृढवर्मणा । राज्ञाभिशापसंतप्ता निर्ययौ राजमन्दिरात्

tyaktā ca kadalīgarbhā sā tena dṛḍhavarmaṇā / rājñābhiśāpasaṃtaptā niryayau rājamandirāt

Sanskrit only: no published translation is held for this verse.

येनाजगाम तेनैव प्रययौ पितुराश्रमम् । पूर्वोप्तजातसिद्धार्थसाभिज्ञानेन सा पथा

yenājagāma tenaiva prayayau piturāśramam / pūrvoptajātasiddhārthasābhijñānena sā pathā

Sanskrit only: no published translation is held for this verse.

तत्र ताम् आगतां दृष्ट्वा सो ऽकस्मात्तत्पिता मुनिः । तस्या दुश्चरिताशङ्की तस्थौ मङ्कणकः क्षणम्

tatra tām āgatāṃ dṛṣṭvā so 'kasmāttatpitā muniḥ / tasyā duścaritāśaṅkī tasthau maṅkaṇakaḥ kṣaṇam

Sanskrit only: no published translation is held for this verse.

प्रणिदानाच् च तं कृत्स्नं तद्वृत्तान्तमवेत्य सः । आश्वास्य च स्वयं स्नेहात्तामादाय ययौ ततः

praṇidānāc ca taṃ kṛtsnaṃ tadvṛttāntamavetya saḥ / āśvāsya ca svayaṃ snehāttāmādāya yayau tataḥ

Sanskrit only: no published translation is held for this verse.

एत्य तस्मै यदाचक्यौ स्वयं प्रह्वाय भूभृते । देव्या सपत्नीदोषेण कृतं कपटनाटकम्

etya tasmai yadācakyau svayaṃ prahvāya bhūbhṛte / devyā sapatnīdoṣeṇa kṛtaṃ kapaṭanāṭakam

Sanskrit only: no published translation is held for this verse.

तत्कालं स्वयमभ्येत्य राज्ञे तस्मै स नापितः । यथावृत्तं तदाचष्ट पुनर् एवमुवाच च

tatkālaṃ svayamabhyetya rājñe tasmai sa nāpitaḥ / yathāvṛttaṃ tadācaṣṭa punar evamuvāca ca

Sanskrit only: no published translation is held for this verse.

इत्थं विश्लेष्य कदलीगर्भा राज्ञी मया प्रभो । अभिचारवशाद्युक्त्या देवीं संतोष्य रक्षिता

itthaṃ viśleṣya kadalīgarbhā rājñī mayā prabho / abhicāravaśādyuktyā devīṃ saṃtoṣya rakṣitā

Sanskrit only: no published translation is held for this verse.

तच् छ्रुत्वा निश्चयं दृष्ट्वा मुनीन्द्रवचनस्य सः । जग्राह कदलीगर्भां संजातप्रत्ययो नृपः

tac chrutvā niścayaṃ dṛṣṭvā munīndravacanasya saḥ / jagrāha kadalīgarbhāṃ saṃjātapratyayo nṛpaḥ

Sanskrit only: no published translation is held for this verse.

अनुव्रज्य मुनिं तं च संविभेजे स नापितम् । भक्तो ममायमित्यर्थैर्धूर्तैर्भोज्या बतेश्वराः

anuvrajya muniṃ taṃ ca saṃvibheje sa nāpitam / bhakto mamāyamityarthairdhūrtairbhojyā bateśvarāḥ

Sanskrit only: no published translation is held for this verse.

ततस् तया समं तस्थौ कदलीगर्भय् ऐव सः । राजा स्वदेवीविमुखो दृढवर्म सुनिर्वृतः

tatas tayā samaṃ tasthau kadalīgarbhay aiva saḥ / rājā svadevīvimukho dṛḍhavarma sunirvṛtaḥ

Sanskrit only: no published translation is held for this verse.

एवंविधान्विदधते सुबहून्सपत्न्यो दोषान्मृषाप्यनवमाङ्गि कलिङ्गसेने । त्वं कन्यका च चिरभाविविवाहलग्ना वाञ्छन्त्यचिन्त्यगतयश् च सुरा अपि त्वाम्

evaṃvidhānvidadhate subahūnsapatnyo doṣānmṛṣāpyanavamāṅgi kaliṅgasene / tvaṃ kanyakā ca cirabhāvivivāhalagnā vāñchantyacintyagatayaś ca surā api tvām

Sanskrit only: no published translation is held for this verse.

तत्सर्वतः सांप्रतम् आत्मना त्वम् आत्मानम् एकं जगदेकरत्नम् । वत्सेश्वरैकार्पितम् अत्र रक्षेर् वैरं तवायं हि निजः प्रकर्षः

tatsarvataḥ sāṃpratam ātmanā tvam ātmānam ekaṃ jagadekaratnam / vatseśvaraikārpitam atra rakṣer vairaṃ tavāyaṃ hi nijaḥ prakarṣaḥ

Sanskrit only: no published translation is held for this verse.

अहं हि नेष्यामि सखि त्वदन्तिकं स्थिताधुना त्वं पतिमन्दिरे यतः । सखीपतेः सद्म न यान्ति सत्स्त्रियः सुगात्रि भर्ताद्य निवारितास्मि च

ahaṃ hi neṣyāmi sakhi tvadantikaṃ sthitādhunā tvaṃ patimandire yataḥ / sakhīpateḥ sadma na yānti satstriyaḥ sugātri bhartādya nivāritāsmi ca

Sanskrit only: no published translation is held for this verse.

न च गुप्तम् इहागमः क्षमो मे त्वदतिस्नेहवशात् स दिव्यदृष्टिः । तदवैति हि मत्पतिः कथंचित् तमनुज्ञाप्य किलागताहमद्य

na ca guptam ihāgamaḥ kṣamo me tvadatisnehavaśāt sa divyadṛṣṭiḥ / tadavaiti hi matpatiḥ kathaṃcit tamanujñāpya kilāgatāhamadya

Sanskrit only: no published translation is held for this verse.

इह नास्त्यधुना हि मामकीनं सखि कार्यं तव यामि तद्गृहाय । यदि मामनुमंस्यते च भर्ता तदिहैष्यामि पुनर्विलङ्घ्य लज्जाम्

iha nāstyadhunā hi māmakīnaṃ sakhi kāryaṃ tava yāmi tadgṛhāya / yadi māmanumaṃsyate ca bhartā tadihaiṣyāmi punarvilaṅghya lajjām

Sanskrit only: no published translation is held for this verse.

इत्थं सबाष्पमभिधाय कलिङ्गसेनां ताम् अश्रुधौतवदनां मनुजेन्द्रपुत्रीम् । आश्वास्य चाह्नि विगलत्यसुरेन्द्रपुत्री सोमप्रभा स्वभवनं नभसा जगाम

itthaṃ sabāṣpamabhidhāya kaliṅgasenāṃ tām aśrudhautavadanāṃ manujendraputrīm / āśvāsya cāhni vigalatyasurendraputrī somaprabhā svabhavanaṃ nabhasā jagāma

Sanskrit only: no published translation is held for this verse.