Rudradeva: Śyainika-śāstra (on hawking) 3

अथेदानीं मृगव्या तु समासव्यासयोगतः एकापि चाष्टधा सैषा बहुधात्र निरूप्यते

athedānīṃ mṛgavyā tu samāsavyāsayogataḥ ekāpi cāṣṭadhā saiṣā bahudhātra nirūpyate

Sanskrit only: no published translation is held for this verse.

आमिषाद्यर्थसंसिद्ध्यै नैकोपायैः सुखाय च हिंसनं प्राणिमात्रस्य मृगयेति प्रचक्षते

āmiṣādyarthasaṃsiddhyai naikopāyaiḥ sukhāya ca hiṃsanaṃ prāṇimātrasya mṛgayeti pracakṣate

Sanskrit only: no published translation is held for this verse.

हिंसनं प्राणिनां यत्र तत्र दोषपरम्परा यागीयाः पशवः प्रोक्ता ग्राम्यारण्याश्चतुर्दश

hiṃsanaṃ prāṇināṃ yatra tatra doṣaparamparā yāgīyāḥ paśavaḥ proktā grāmyāraṇyāścaturdaśa

Sanskrit only: no published translation is held for this verse.

एषाम् अप्रोक्षितानां च हिंसा दोषाय जायते अस्मिन् अर्थे पुरा श्लोका यथा द्वैपायनोदिताः

eṣām aprokṣitānāṃ ca hiṃsā doṣāya jāyate asmin arthe purā ślokā yathā dvaipāyanoditāḥ

Sanskrit only: no published translation is held for this verse.

पाण्डुकिन्दमसंवादे मृगहिंसाप्रसंगतः शत्रूणां या वधे वृत्तिः सा मृगाणां वधे स्मृता

pāṇḍukindamasaṃvāde mṛgahiṃsāprasaṃgataḥ śatrūṇāṃ yā vadhe vṛttiḥ sā mṛgāṇāṃ vadhe smṛtā

Sanskrit only: no published translation is held for this verse.

राज्ञां मृग न मां मोहात् त्वं गर्हयितुमर्हसि अछद्मना मायया वा मृगाणां वध इष्यते

rājñāṃ mṛga na māṃ mohāt tvaṃ garhayitumarhasi achadmanā māyayā vā mṛgāṇāṃ vadha iṣyate

Sanskrit only: no published translation is held for this verse.

अगस्त्यः सत्रमासीनश्चचार मृगयां ऋषिः आरण्यान् सर्वदैवत्यान् पशून् प्रोक्षन् महावने

agastyaḥ satramāsīnaścacāra mṛgayāṃ ṛṣiḥ āraṇyān sarvadaivatyān paśūn prokṣan mahāvane

Sanskrit only: no published translation is held for this verse.

अगस्त्यप्रोक्षणाद्धिंसा मृगव्यायां न वर्तते ग्राम्याणां प्रोक्षणं शस्तं यागादिषु यथाविधि

agastyaprokṣaṇāddhiṃsā mṛgavyāyāṃ na vartate grāmyāṇāṃ prokṣaṇaṃ śastaṃ yāgādiṣu yathāvidhi

Sanskrit only: no published translation is held for this verse.

आरण्यानां ह्यगस्त्यस्य प्रोक्षाच्छस्यते वधः श्रूयन्ते चेतिहासाश्च राज्ञां तस्या निषेवने

āraṇyānāṃ hyagastyasya prokṣācchasyate vadhaḥ śrūyante cetihāsāśca rājñāṃ tasyā niṣevane

Sanskrit only: no published translation is held for this verse.

व्यायामाच्चोपघाताच्च प्रत्युतायासवेदनम् यत्र तत्र सुखायेति व्यर्थं चेत् तत्र कथ्यते

vyāyāmāccopaghātācca pratyutāyāsavedanam yatra tatra sukhāyeti vyarthaṃ cet tatra kathyate

Sanskrit only: no published translation is held for this verse.

यथा प्रसह्य मानिन्याश्चुम्बनालिङ्गनादिकम् आयाससाध्यमप्यन्तर्न नाम मुदमञ्चति

yathā prasahya māninyāścumbanāliṅganādikam āyāsasādhyamapyantarna nāma mudamañcati

Sanskrit only: no published translation is held for this verse.

प्रहारो नखदन्तादेर् यथैव स्मरसंगरे उपघातस्तथैवात्र रसावेशान् न वा रुजे

prahāro nakhadantāder yathaiva smarasaṃgare upaghātastathaivātra rasāveśān na vā ruje

Sanskrit only: no published translation is held for this verse.

इति सिद्धं लक्षणं हि मृगयायाः पुरोदितम् तस्याः किलाष्टभेदानां विवेचनमथोच्यते

iti siddhaṃ lakṣaṇaṃ hi mṛgayāyāḥ puroditam tasyāḥ kilāṣṭabhedānāṃ vivecanamathocyate

Sanskrit only: no published translation is held for this verse.

हरमूर्तिर् इवावस्थाभेदादेकैव कामिनी यथाष्टधा रसायालं तथैव मृगया मता

haramūrtir ivāvasthābhedādekaiva kāminī yathāṣṭadhā rasāyālaṃ tathaiva mṛgayā matā

Sanskrit only: no published translation is held for this verse.

आश्वीनान्या सजालान्या काल्यान्या यावशी परा सापेक्षान्या पदप्रेक्षा तथा श्वगणिका परा

āśvīnānyā sajālānyā kālyānyā yāvaśī parā sāpekṣānyā padaprekṣā tathā śvagaṇikā parā

Sanskrit only: no published translation is held for this verse.

श्येनपाताष्टमी चैताः क्रमेण परिकीर्तिताः स्वलक्षणम् अथैषां हि तथाकर्तव्यतोच्यते

śyenapātāṣṭamī caitāḥ krameṇa parikīrtitāḥ svalakṣaṇam athaiṣāṃ hi tathākartavyatocyate

Sanskrit only: no published translation is held for this verse.

तुरगैः साधनीभूतैर् विद्रवन्तः शरादिभिः वध्यन्ते हि मृगा यस्यां साश्वीना रसशेवधिः

turagaiḥ sādhanībhūtair vidravantaḥ śarādibhiḥ vadhyante hi mṛgā yasyāṃ sāśvīnā rasaśevadhiḥ

Sanskrit only: no published translation is held for this verse.

अवृक्षकर्दमग्रावा नीरन्ध्रा भूः प्रशस्यते कालश्च शिशिरार्धान्ताद् आ ज्यैष्ठार्धम् अपीष्यते

avṛkṣakardamagrāvā nīrandhrā bhūḥ praśasyate kālaśca śiśirārdhāntād ā jyaiṣṭhārdham apīṣyate

Sanskrit only: no published translation is held for this verse.

तस्याः सुसेवनान्मेदश्छेदो वपुषि लाघवम् बलाशोपचयो दार्ढ्यम् अन्तराग्नेश्च पाटवम्

tasyāḥ susevanānmedaśchedo vapuṣi lāghavam balāśopacayo dārḍhyam antarāgneśca pāṭavam

Sanskrit only: no published translation is held for this verse.

क्षुत्तृट्शीतातपालस्यजागरादेः सहिष्णुता चललक्ष्यादिनैपुण्यम् उत्साहपरिवर्धनम्

kṣuttṛṭśītātapālasyajāgarādeḥ sahiṣṇutā calalakṣyādinaipuṇyam utsāhaparivardhanam

Sanskrit only: no published translation is held for this verse.

स्वसत्त्वोद्भावनं ज्ञानं सत्त्वानां चित्तचेष्टिते इत्यादिकगुणोत्कर्षो जायते चात्मसम्पदे

svasattvodbhāvanaṃ jñānaṃ sattvānāṃ cittaceṣṭite ityādikaguṇotkarṣo jāyate cātmasampade

Sanskrit only: no published translation is held for this verse.

तथा धर्म्मार्जनमपि वृकव्याघ्रादिहिंसनात् वधेन हरिणादीनां शस्यादीनां च रक्षणात्

tathā dharmmārjanamapi vṛkavyāghrādihiṃsanāt vadhena hariṇādīnāṃ śasyādīnāṃ ca rakṣaṇāt

Sanskrit only: no published translation is held for this verse.

नैककर्म्मोपयोग्यानामटवीनां निरीक्षणात् वित्रासनाच्च चौराणां तथाटविकरञ्जनात्

naikakarmmopayogyānāmaṭavīnāṃ nirīkṣaṇāt vitrāsanācca caurāṇāṃ tathāṭavikarañjanāt

Sanskrit only: no published translation is held for this verse.

तथार्थोपार्ज्जनं मत्तहस्तिगण्डानुबन्धनात् विषाणाजिनकस्तूरिमणिपक्षाद्युपार्ज्जनात्

tathārthopārjjanaṃ mattahastigaṇḍānubandhanāt viṣāṇājinakastūrimaṇipakṣādyupārjjanāt

Sanskrit only: no published translation is held for this verse.

वराहलाविकादीनां सन्मांसाभ्यवहारतः उद्रिक्तसत्त्वसम्पत्त्या कामोद्रेकोऽपि पुष्कलः

varāhalāvikādīnāṃ sanmāṃsābhyavahārataḥ udriktasattvasampattyā kāmodreko'pi puṣkalaḥ

Sanskrit only: no published translation is held for this verse.

रसोऽभिमानो ऽहंकारः कामसर्वस्वम् उच्यते अतो मृगव्याश्रान्तस्य चन्दनाद्यनुलेपनम्

raso'bhimāno 'haṃkāraḥ kāmasarvasvam ucyate ato mṛgavyāśrāntasya candanādyanulepanam

Sanskrit only: no published translation is held for this verse.

गात्रसंवाहनं हस्तपल्लवैश्च मृगीदृशाम् पानकं पञ्चसारादि तालवृन्तानिला मुहुः

gātrasaṃvāhanaṃ hastapallavaiśca mṛgīdṛśām pānakaṃ pañcasārādi tālavṛntānilā muhuḥ

Sanskrit only: no published translation is held for this verse.

मनसो ह्यभिमानेन यथा सम्बन्धमृच्छति अन्यदा न तथा येन तेन कामैकवेदनम्

manaso hyabhimānena yathā sambandhamṛcchati anyadā na tathā yena tena kāmaikavedanam

Sanskrit only: no published translation is held for this verse.

स्त्रीमृगव्याभिदा कापि रसपुष्टौ च दृश्यते शास्त्रकारैः किलैतावान् सूक्ष्मभेदस्तु दर्शितः

strīmṛgavyābhidā kāpi rasapuṣṭau ca dṛśyate śāstrakāraiḥ kilaitāvān sūkṣmabhedastu darśitaḥ

Sanskrit only: no published translation is held for this verse.

आभ्यासिकी सम्प्रयोगे प्रीतिश्चानुत्तमा रतौ विभावाश्चानुभावाश्च रसाधिक्यात्तयोः समाः

ābhyāsikī samprayoge prītiścānuttamā ratau vibhāvāścānubhāvāśca rasādhikyāttayoḥ samāḥ

Sanskrit only: no published translation is held for this verse.

संयोगविप्रयोगाभ्यां विलोक्यन्ते यथायथम् तेषां स्त्रीविषये व्यासो नाट्यालंकारनिर्मितौ

saṃyogaviprayogābhyāṃ vilokyante yathāyatham teṣāṃ strīviṣaye vyāso nāṭyālaṃkāranirmitau

Sanskrit only: no published translation is held for this verse.

कामशास्त्रादिषु महान् दृश्यते तेन नोच्यते मृगयायास्तु संक्षेपात् परिज्ञानाय कथ्यते

kāmaśāstrādiṣu mahān dṛśyate tena nocyate mṛgayāyāstu saṃkṣepāt parijñānāya kathyate

Sanskrit only: no published translation is held for this verse.

मोक्तुर्दूराच्छकुन्तादेर्ग्रहः श्येनादिभिः कृतः धन्विनश्च हठाल्लक्ष्ये शरसिद्धिश्चलाचले

mokturdūrācchakuntādergrahaḥ śyenādibhiḥ kṛtaḥ dhanvinaśca haṭhāllakṣye śarasiddhiścalācale

Sanskrit only: no published translation is held for this verse.

व्यञ्जयत्युत्तमां प्रीतिं अश्रुरोमाञ्चगद्गदैः विच्युतिश्चापि तस्यैव वियोगेनापदिश्यते

vyañjayatyuttamāṃ prītiṃ aśruromāñcagadgadaiḥ vicyutiścāpi tasyaiva viyogenāpadiśyate

Sanskrit only: no published translation is held for this verse.

वितर्कस्मृतिवैवर्ण्यविलापादिकरी यतः इत्याद्यूह्यमतः साम्यं मृगयायास्तथा स्त्रियः तेनैषापि त्रिवर्गस्य साधनाय प्रशस्यते

vitarkasmṛtivaivarṇyavilāpādikarī yataḥ ityādyūhyamataḥ sāmyaṃ mṛgayāyāstathā striyaḥ tenaiṣāpi trivargasya sādhanāya praśasyate

Sanskrit only: no published translation is held for this verse.

सम्भूय सावकाशेन प्रसार्यानिलसम्मुखम् बलं मृगाभिसारेण सानायासेन सिध्यति

sambhūya sāvakāśena prasāryānilasammukham balaṃ mṛgābhisāreṇa sānāyāsena sidhyati

Sanskrit only: no published translation is held for this verse.

खड्गाभिसरणे शस्तः पञ्चषा एव सादिनः

khaḍgābhisaraṇe śastaḥ pañcaṣā eva sādinaḥ

Sanskrit only: no published translation is held for this verse.

वश्यास्तुरंगाः शस्यन्ते शिक्षिता ये गतागते त्वरया पृष्ठतो वेध्यः क्षुद्रशक्त्या तु सादिना

vaśyāsturaṃgāḥ śasyante śikṣitā ye gatāgate tvarayā pṛṣṭhato vedhyaḥ kṣudraśaktyā tu sādinā

Sanskrit only: no published translation is held for this verse.

परावृत्तो यदि भवेत्तदास्य पुरयायिना विश्रम्भात्तु निजाश्वस्य सादिना भाव्यमञ्जसा

parāvṛtto yadi bhavettadāsya purayāyinā viśrambhāttu nijāśvasya sādinā bhāvyamañjasā

Sanskrit only: no published translation is held for this verse.

तस्याभिसारे चान्येन वेध्यो भवति पृष्ठतः अथवा पार्श्वतो वाणैर्वेध्यः श्रेष्ठधनुर्द्धरैः

tasyābhisāre cānyena vedhyo bhavati pṛṣṭhataḥ athavā pārśvato vāṇairvedhyaḥ śreṣṭhadhanurddharaiḥ

Sanskrit only: no published translation is held for this verse.

दृप्तं मृगेन्द्रमपि च तरलाश्वैस्तु धन्विनः लक्ष्यालक्ष्येण लक्ष्येण मार्ज्जारमिव निघ्नते

dṛptaṃ mṛgendramapi ca taralāśvaistu dhanvinaḥ lakṣyālakṣyeṇa lakṣyeṇa mārjjāramiva nighnate

Sanskrit only: no published translation is held for this verse.

सा सजाला कूटवृत्त्या यस्यां निघ्नन्ति वै मृगान् मत्स्यशङ्खोद्रसूक्तीनां बन्धनं चापि कुर्वते

sā sajālā kūṭavṛttyā yasyāṃ nighnanti vai mṛgān matsyaśaṅkhodrasūktīnāṃ bandhanaṃ cāpi kurvate

Sanskrit only: no published translation is held for this verse.

नरास्तस्यां साधनानामानन्त्यमुपलक्ष्यते निषादप्रायनीचेषु स्थितिस्तस्या विलोक्यते

narāstasyāṃ sādhanānāmānantyamupalakṣyate niṣādaprāyanīceṣu sthitistasyā vilokyate

Sanskrit only: no published translation is held for this verse.

गजबन्धादिसौकर्य्यसिद्धये सातिरिच्यते कारणीया नृपैः सा तु महोदयकरी यतः

gajabandhādisaukaryyasiddhaye sātiricyate kāraṇīyā nṛpaiḥ sā tu mahodayakarī yataḥ

Sanskrit only: no published translation is held for this verse.

छद्माचरणमप्यत्र न दोषायानुबध्यते अस्मिन् अर्थे वालिवधे यथा वाल्मीकिनोदना

chadmācaraṇamapyatra na doṣāyānubadhyate asmin arthe vālivadhe yathā vālmīkinodanā

Sanskrit only: no published translation is held for this verse.

वागुराभिश्च कूटैश्च पाशैश्च विविधैर् नराः प्रतिच्छन्ना अदृश्याश्च गृह्णन्ति बहवोऽद्भुतम् विध्यन्त्य् अभिमुखाश्चापि मृगयाधर्म्मकोविदाः

vāgurābhiśca kūṭaiśca pāśaiśca vividhair narāḥ praticchannā adṛśyāśca gṛhṇanti bahavo'dbhutam vidhyanty abhimukhāścāpi mṛgayādharmmakovidāḥ

Sanskrit only: no published translation is held for this verse.

कुरङ्गांश्च कुरङ्गाश्च पक्षिणश्चापि पक्षिणः बध्नन्ति शिक्षायोगेन सजालान्तर्गतैव सा

kuraṅgāṃśca kuraṅgāśca pakṣiṇaścāpi pakṣiṇaḥ badhnanti śikṣāyogena sajālāntargataiva sā

Sanskrit only: no published translation is held for this verse.

काल्या संकाल्य बहुभिः पृष्ठतोऽन्यैः पुरस्थितैः साध्यते या पृथक्लीनैश्चतुर्धा सा तु भिद्यते

kālyā saṃkālya bahubhiḥ pṛṣṭhato'nyaiḥ purasthitaiḥ sādhyate yā pṛthaklīnaiścaturdhā sā tu bhidyate

Sanskrit only: no published translation is held for this verse.

तारोच्चारैः काल्यमाना पुरोवातं द्विभिस् त्रिभिः त्रिकीर्णमोक्षैर्हन्यन्ते एणा सा बहुकर्णिका

tāroccāraiḥ kālyamānā purovātaṃ dvibhis tribhiḥ trikīrṇamokṣairhanyante eṇā sā bahukarṇikā

Sanskrit only: no published translation is held for this verse.

पृष्ठतो निबिडीभूतैः काल्यन्ते यत्र वै मृगाः बध्यन्ते पादपच्छन्नैर्यत्र सा मूललग्निका

pṛṣṭhato nibiḍībhūtaiḥ kālyante yatra vai mṛgāḥ badhyante pādapacchannairyatra sā mūlalagnikā

Sanskrit only: no published translation is held for this verse.

सुदूराद् वर्तुलीभूय क्रमात् संकोचमागतैः एकत्र प्रतिसंरुद्धा नैकजात्युद्भवा मृगाः

sudūrād vartulībhūya kramāt saṃkocamāgataiḥ ekatra pratisaṃruddhā naikajātyudbhavā mṛgāḥ

Sanskrit only: no published translation is held for this verse.

वध्यन्ते करवालाद्यैर् बहुभिर् यत्र नैकधा महाकाल्येति सा प्रोक्ता सिध्यते सा नृपादिभिः

vadhyante karavālādyair bahubhir yatra naikadhā mahākālyeti sā proktā sidhyate sā nṛpādibhiḥ

Sanskrit only: no published translation is held for this verse.

अपरा गजकाल्येति साध्यते साश्वसादिभिः ग्रीष्मर्तावेव विरलीभूतवार्युपरोधनात्

aparā gajakālyeti sādhyate sāśvasādibhiḥ grīṣmartāveva viralībhūtavāryuparodhanāt

Sanskrit only: no published translation is held for this verse.

चतुर्व्विधायाः काल्यायाः साधने कुशला जनाः युज्यन्ते कालने मोक्षे शराणां चान्यथा नृणाम् वृथायासो भवेद्ध्वंसः स्वीयेष्वेवानुदृश्यते

caturvvidhāyāḥ kālyāyāḥ sādhane kuśalā janāḥ yujyante kālane mokṣe śarāṇāṃ cānyathā nṛṇām vṛthāyāso bhaveddhvaṃsaḥ svīyeṣvevānudṛśyate

Sanskrit only: no published translation is held for this verse.

निर्यातयवशस्यादिस्पन्दनामात्रसूचिताः वध्यन्ते यत्र वै वध्या यावशी सा प्रकीर्तिता

niryātayavaśasyādispandanāmātrasūcitāḥ vadhyante yatra vai vadhyā yāvaśī sā prakīrtitā

Sanskrit only: no published translation is held for this verse.

द्वित्रैरेवाश्ववारैश्च शरमोक्षविशारदैः सा सिध्यति शैनश्चारात् शस्यस्पन्दोपलक्षणात्

dvitrairevāśvavāraiśca śaramokṣaviśāradaiḥ sā sidhyati śainaścārāt śasyaspandopalakṣaṇāt

Sanskrit only: no published translation is held for this verse.

चात्यायासकरी सा तु प्रमोदायोपजायते

cātyāyāsakarī sā tu pramodāyopajāyate

Sanskrit only: no published translation is held for this verse.

मृगाद्यपेक्षामालम्ब्य लीनो यत्रैक एव वा धन्वी विध्यति दिग्धेन सा सापेक्षा स्मृता बुधैः

mṛgādyapekṣāmālambya līno yatraika eva vā dhanvī vidhyati digdhena sā sāpekṣā smṛtā budhaiḥ

Sanskrit only: no published translation is held for this verse.

विभीतकादौ क्षेत्रे वा निपाने सा तु सिध्यति गोशवादिषु सिंहादेर्वधाय सुखसिद्धिदा

vibhītakādau kṣetre vā nipāne sā tu sidhyati gośavādiṣu siṃhādervadhāya sukhasiddhidā

Sanskrit only: no published translation is held for this verse.

पदमार्गानुसारेण वध्यन्ते यत्र वै मृगाः पदप्रेक्षा च सा प्रोक्ता द्विधा सापि प्रयुज्यते

padamārgānusāreṇa vadhyante yatra vai mṛgāḥ padaprekṣā ca sā proktā dvidhā sāpi prayujyate

Sanskrit only: no published translation is held for this verse.

कुक्कुरैः परितोऽन्विष्य चिरमायास्य कर्कशम् वध्यते हि मृगो यस्यां श्वपदप्रेक्षिका हि सा

kukkuraiḥ parito'nviṣya ciramāyāsya karkaśam vadhyate hi mṛgo yasyāṃ śvapadaprekṣikā hi sā

Sanskrit only: no published translation is held for this verse.

यत्र धन्वी प्रयत्नेन स्वयमन्विष्य कौशलात् सुप्तं सुप्तोत्थितं वापि हन्ति सा पूर्वशब्दिता

yatra dhanvī prayatnena svayamanviṣya kauśalāt suptaṃ suptotthitaṃ vāpi hanti sā pūrvaśabditā

Sanskrit only: no published translation is held for this verse.

ते च द्वे सैकतप्राये सानूपे वाथ यत्नतः वर्षर्त्तावतिसिध्येते चान्यदातिश्रमात् पुनः

te ca dve saikataprāye sānūpe vātha yatnataḥ varṣarttāvatisidhyete cānyadātiśramāt punaḥ

Sanskrit only: no published translation is held for this verse.

ऊषरादिस्थले यस्यां लक्ष्यीकृत्योपवाहिताः गृह्णन्ति शशकादींश् च श्वानः श्वगणिका स्मृता

ūṣarādisthale yasyāṃ lakṣyīkṛtyopavāhitāḥ gṛhṇanti śaśakādīṃś ca śvānaḥ śvagaṇikā smṛtā

Sanskrit only: no published translation is held for this verse.

शुनां सुखपरिक्षेपः सिद्ध्यसिद्धी शशप्लुतौ पतनोत्पतनाभ्यां द्वे हास्यपुष्टिविधायिके

śunāṃ sukhaparikṣepaḥ siddhyasiddhī śaśaplutau patanotpatanābhyāṃ dve hāsyapuṣṭividhāyike

Sanskrit only: no published translation is held for this verse.

तेषां च घुर्घुरोद्दामराविणि प्रतिधावताम् काले तद्रौद्रपर्याप्तैर् दन्तादन्ति नखानखि

teṣāṃ ca ghurghuroddāmarāviṇi pratidhāvatām kāle tadraudraparyāptair dantādanti nakhānakhi

Sanskrit only: no published translation is held for this verse.

द्विशस्त्रिशः सावकाशाद्रज्जुमोक्षविशारदैः लक्ष्यमुद्दिश्य च शुनां मोकस् तत्सिद्धिकारकः

dviśastriśaḥ sāvakāśādrajjumokṣaviśāradaiḥ lakṣyamuddiśya ca śunāṃ mokas tatsiddhikārakaḥ

Sanskrit only: no published translation is held for this verse.

तस्यां शराणां सहसा मोक्षो नान्यत्र शस्यते बाधमानम् अपास्यैकं कोलं कौलेयसिद्धये

tasyāṃ śarāṇāṃ sahasā mokṣo nānyatra śasyate bādhamānam apāsyaikaṃ kolaṃ kauleyasiddhaye

Sanskrit only: no published translation is held for this verse.

दण्डापि सा त्वर्थयुक्ता प्रयोक्तव्या शशादिषु एवं सापि प्रमोदानामास्पदं परिकीर्त्यते

daṇḍāpi sā tvarthayuktā prayoktavyā śaśādiṣu evaṃ sāpi pramodānāmāspadaṃ parikīrtyate

Sanskrit only: no published translation is held for this verse.

अस्या एव भिदा कापि कृष्णसारे रुरौ हि यः मोकोऽतिरसकृद् येन रज्ज्वा मोकोऽपि स स्मृतः

asyā eva bhidā kāpi kṛṣṇasāre rurau hi yaḥ moko'tirasakṛd yena rajjvā moko'pi sa smṛtaḥ

Sanskrit only: no published translation is held for this verse.

यस्यां तन्त्रैर्द्विधा मुक्ताः पतत्रिषु पतन्ति च श्येनाः सातीव रसभूः श्येनपातेति कथ्यते

yasyāṃ tantrairdvidhā muktāḥ patatriṣu patanti ca śyenāḥ sātīva rasabhūḥ śyenapāteti kathyate

Sanskrit only: no published translation is held for this verse.

श्येनपाता मृगव्येति स्वैरं वान्यस्य वा भवेत् स्वैरमारण्यकानां चेत् मृगव्येति निरर्थकम्

śyenapātā mṛgavyeti svairaṃ vānyasya vā bhavet svairamāraṇyakānāṃ cet mṛgavyeti nirarthakam

Sanskrit only: no published translation is held for this verse.

मृगान् शशादा गृह्णन्तीत्येवं यदि सदर्थकम् तदा सिंहादिषु पुनः कथं नैतत्प्रयुज्यते

mṛgān śaśādā gṛhṇantītyevaṃ yadi sadarthakam tadā siṃhādiṣu punaḥ kathaṃ naitatprayujyate

Sanskrit only: no published translation is held for this verse.

यत्रानेकार्थमसकृत् मृग्यन्ते प्राणिनः पराः सा मृगव्येति निर्दिष्टा सा तिरश्चां न विद्यते

yatrānekārthamasakṛt mṛgyante prāṇinaḥ parāḥ sā mṛgavyeti nirdiṣṭā sā tiraścāṃ na vidyate

Sanskrit only: no published translation is held for this verse.

ते तु स्वोदरपर्य्याप्तिमात्रमांसाय केवलम् हिंसन्ति न तु चैतेषां अर्थोऽन्यत्रानुबध्यते

te tu svodaraparyyāptimātramāṃsāya kevalam hiṃsanti na tu caiteṣāṃ artho'nyatrānubadhyate

Sanskrit only: no published translation is held for this verse.

न केवलं मृगव्याया ह्यर्थो मांसार्थमात्रकः यतो मुक्ताजिनादीनां कस्तूर्यादेः समुद्भवः

na kevalaṃ mṛgavyāyā hyartho māṃsārthamātrakaḥ yato muktājinādīnāṃ kastūryādeḥ samudbhavaḥ

Sanskrit only: no published translation is held for this verse.

दृश्यन्ते हस्तिबन्धाश्च तेन नानार्थसिद्धये अन्विष्यते प्राणिजातं मृगयेत्युच्यते ततः

dṛśyante hastibandhāśca tena nānārthasiddhaye anviṣyate prāṇijātaṃ mṛgayetyucyate tataḥ

Sanskrit only: no published translation is held for this verse.

अतो नृभिः प्रयुक्तानां तेषां पातोऽत्र कथ्यते तेनाष्टमी मृगव्यैषा श्येनपाता निरूपिता

ato nṛbhiḥ prayuktānāṃ teṣāṃ pāto'tra kathyate tenāṣṭamī mṛgavyaiṣā śyenapātā nirūpitā

Sanskrit only: no published translation is held for this verse.

एतस्या विशदतया किलाष्ट भेदा निर्दिष्टाः पुनरपरे ह्यवान्तरा ये ते सर्वे रसजननाय नैकरूपाः कल्प्यन्ते विहितविधानसम्प्रयोगात्

etasyā viśadatayā kilāṣṭa bhedā nirdiṣṭāḥ punarapare hyavāntarā ye te sarve rasajananāya naikarūpāḥ kalpyante vihitavidhānasamprayogāt

Sanskrit only: no published translation is held for this verse.

इति श्रीरुद्रदेवविरचिते श्यैनिके शास्त्रे मृगयाविवेचनस्तृतीयः परिच्छेदः

iti śrīrudradevaviracite śyainike śāstre mṛgayāvivecanastṛtīyaḥ paricchedaḥ

Sanskrit only: no published translation is held for this verse.