Samkara: Upadesasahasri 1.10

दृशिस्वरूपं गगनोपमं परं सकृद्विभातं त्व् अजम् एकम् अक्षरम् । अलेपकं सर्वगतं यद् अद्वयं तद् एव चाहं सततं विमुक्त ओम्

dṛśisvarūpaṃ gaganopamaṃ paraṃ sakṛdvibhātaṃ tv ajam ekam akṣaram / alepakaṃ sarvagataṃ yad advayaṃ tad eva cāhaṃ satataṃ vimukta om

Sanskrit only: no published translation is held for this verse.

दृशिस् तु शुद्धो ऽहम् अविक्रियात्मको न मे ऽस्ति कश्चिद् विषयः स्वभावतः । पुरस् तिरश् चोर्ध्वम् अधश् च सर्वतः सुपूर्णभूमा त्व् अज आत्मनि स्थितः

dṛśis tu śuddho 'ham avikriyātmako na me 'sti kaścid viṣayaḥ svabhāvataḥ / puras tiraś cordhvam adhaś ca sarvataḥ supūrṇabhūmā tv aja ātmani sthitaḥ

Sanskrit only: no published translation is held for this verse.

अजो ऽमरश् चैव तथाजरो ऽमृतः स्वयंप्रभः सर्वगतो ऽहम् अद्वयः । न कारणं कार्यम् अतीव निर्मलः सदैव तृप्तश् च ततो विमुक्त ओम्

ajo 'maraś caiva tathājaro 'mṛtaḥ svayaṃprabhaḥ sarvagato 'ham advayaḥ / na kāraṇaṃ kāryam atīva nirmalaḥ sadaiva tṛptaś ca tato vimukta om

Sanskrit only: no published translation is held for this verse.

सुषुप्तजाग्रत्स्वपतश् च दर्शनं न मे ऽस्ति किंचित् स्वम् इवेह मोहनम् । स्वतश् च तेषां परतो ऽप्य् असत्त्वतस् तुरीय एवास्मि सदा दृग् अद्वयः

suṣuptajāgratsvapataś ca darśanaṃ na me 'sti kiṃcit svam iveha mohanam / svataś ca teṣāṃ parato 'py asattvatas turīya evāsmi sadā dṛg advayaḥ

Sanskrit only: no published translation is held for this verse.

शरीरबुद्धीन्द्रियदुःखसंततिर् न मे न चाहं मम निर्विकारतः । असत्त्वहेतोश् च तथैव संततेर् असत्त्वम् अस्याः स्वपतो हि दृश्यवत्

śarīrabuddhīndriyaduḥkhasaṃtatir na me na cāhaṃ mama nirvikārataḥ / asattvahetoś ca tathaiva saṃtater asattvam asyāḥ svapato hi dṛśyavat

Sanskrit only: no published translation is held for this verse.

इदं तु सत्यं मम नास्ति विक्रिया विकारहेतुर् न हि मे ऽद्वयत्वतः । न पुण्यपापे न च मोक्षबन्धने न चास्ति वर्णाश्रमताशरीरतः

idaṃ tu satyaṃ mama nāsti vikriyā vikārahetur na hi me 'dvayatvataḥ / na puṇyapāpe na ca mokṣabandhane na cāsti varṇāśramatāśarīrataḥ

Sanskrit only: no published translation is held for this verse.

अनादितो निर्गुणतो न कर्म मे फलं च तस्मात् परमो ऽहम् अद्वयः । यथा नभः सर्वगतं न लिप्यते तथा ह्य् अहं देहगतो ऽपि सूक्ष्मतः

anādito nirguṇato na karma me phalaṃ ca tasmāt paramo 'ham advayaḥ / yathā nabhaḥ sarvagataṃ na lipyate tathā hy ahaṃ dehagato 'pi sūkṣmataḥ

Sanskrit only: no published translation is held for this verse.

सदा च भूतेषु समो ऽहम् ईश्वरः क्षराक्षराभ्यां परमो ह्य् अथोत्तमः । परात्मतत्त्वश् च तथाद्वयो ऽपि सन् विपर्ययेणाभिवृतस् त्व् अविद्यया

sadā ca bhūteṣu samo 'ham īśvaraḥ kṣarākṣarābhyāṃ paramo hy athottamaḥ / parātmatattvaś ca tathādvayo 'pi san viparyayeṇābhivṛtas tv avidyayā

Sanskrit only: no published translation is held for this verse.

अविद्यया भावनया च कर्मभिर् विविक्त आत्माव्यवधिः सुनिर्मलः । दृगादिशक्तिप्रचितो ऽहम् अद्वयः स्थितः स्वरूपे गगनं यथाचलम्

avidyayā bhāvanayā ca karmabhir vivikta ātmāvyavadhiḥ sunirmalaḥ / dṛgādiśaktipracito 'ham advayaḥ sthitaḥ svarūpe gaganaṃ yathācalam

Sanskrit only: no published translation is held for this verse.

अहं परं ब्रह्म विनिश्चयात्मदृङ् न जायते भूय इति श्रुतेर् वचः । न चैव बीजे त्व् असति प्रजायते फलं न जन्मास्ति ततो ह्य् अमोहता

ahaṃ paraṃ brahma viniścayātmadṛṅ na jāyate bhūya iti śruter vacaḥ / na caiva bīje tv asati prajāyate phalaṃ na janmāsti tato hy amohatā

Sanskrit only: no published translation is held for this verse.

ममेदम् इत्थं च तवाद ईदृशं तथाहम् एवं न परो ऽपि चान्यथा । विमूढतैवास्य जनस्य कल्पना सदा समे ब्रह्मणि वाद्वये शिवे

mamedam itthaṃ ca tavāda īdṛśaṃ tathāham evaṃ na paro 'pi cānyathā / vimūḍhataivāsya janasya kalpanā sadā same brahmaṇi vādvaye śive

Sanskrit only: no published translation is held for this verse.

यद् अद्वयं ज्ञानम् अतीव निर्मलं महात्मनां तत्र न शोकमोहता । तयोर् अभावे न हि कर्म जन्म वा भवेद् अयं वेदविदां विनिश्चयः

yad advayaṃ jñānam atīva nirmalaṃ mahātmanāṃ tatra na śokamohatā / tayor abhāve na hi karma janma vā bhaved ayaṃ vedavidāṃ viniścayaḥ

Sanskrit only: no published translation is held for this verse.

सुषुप्तवज् जाग्रति यो न पश्यति द्वयं तु पश्यन्न् अपि चाद्वयत्वतः । तथा च कुर्वन्न् अपि निष्क्रियश् च यः स आत्मविन् नान्य इतीह निश्चयः

suṣuptavaj jāgrati yo na paśyati dvayaṃ tu paśyann api cādvayatvataḥ / tathā ca kurvann api niṣkriyaś ca yaḥ sa ātmavin nānya itīha niścayaḥ

Sanskrit only: no published translation is held for this verse.

इतीदम् उक्तं परमार्थदर्शनं मया हि वेदान्तविनिश्चितं परम् । विमुच्यते ऽस्मिन् यदि निश्चितो भवेन् न लिप्यते व्योमवद् एव कर्मभिः

itīdam uktaṃ paramārthadarśanaṃ mayā hi vedāntaviniścitaṃ param / vimucyate 'smin yadi niścito bhaven na lipyate vyomavad eva karmabhiḥ

Sanskrit only: no published translation is held for this verse.