Utpaladeva: Sivastotravali 10

अविच्छेदभङ्गाख्यं दशमं स्तोत्रम् न सोढव्यम् अवश्यम् ते जगदेकप्रभोर् इदम् & माहेश्वराश् च लोकानाम् इतरेषां समाश् च यत्

avicchedabhaṅgākhyaṃ daśamaṃ stotram na soḍhavyam avaśyam te jagadekaprabhor idam & māheśvarāś ca lokānām itareṣāṃ samāś ca yat

Sanskrit only: no published translation is held for this verse.

ये सदैवानुरागेण भवत्पादानुगामिनः & यत्र तत्र गता भोगांस् ते कांश् चिद् उपभुञ्जते

ye sadaivānurāgeṇa bhavatpādānugāminaḥ & yatra tatra gatā bhogāṃs te kāṃś cid upabhuñjate

Sanskrit only: no published translation is held for this verse.

भर्ता कालान्तको यत्र भवांस् तत्र कुतो रुजः & तत्र चेतरभोगाशा का लक्ष्मीर् यत्र तावकी

bhartā kālāntako yatra bhavāṃs tatra kuto rujaḥ & tatra cetarabhogāśā kā lakṣmīr yatra tāvakī

Sanskrit only: no published translation is held for this verse.

क्षनमात्रसुखेनापि विभुर् येनासि लभ्यसे & तदैव सर्वः कालो ऽस्य त्वदानन्देन पूर्यते

kṣanamātrasukhenāpi vibhur yenāsi labhyase & tadaiva sarvaḥ kālo 'sya tvadānandena pūryate

Sanskrit only: no published translation is held for this verse.

आनन्दरसबिन्दुस् ते चन्द्रमा गलितो भुवि & सूर्यस् तथा ते प्रसृतः संहारी तेजसः कणः

ānandarasabindus te candramā galito bhuvi & sūryas tathā te prasṛtaḥ saṃhārī tejasaḥ kaṇaḥ

Sanskrit only: no published translation is held for this verse.

बलिं यामस् तृतीयाय नेत्रायास्मै तव प्रभो & अलौकिकस्य कस्यापि माहात्म्यस्यैकलक्ष्मणे

baliṃ yāmas tṛtīyāya netrāyāsmai tava prabho & alaukikasya kasyāpi māhātmyasyaikalakṣmaṇe

Sanskrit only: no published translation is held for this verse.

तेनैव दृष्टो ऽसि भवद्दर्शनाद्यो ऽतिहृष्यति & कथञ्चिद् यस्य वा हर्षः को ऽपि तेन त्वम् ईक्षितः

tenaiva dṛṣṭo 'si bhavaddarśanādyo 'tihṛṣyati & kathañcid yasya vā harṣaḥ ko 'pi tena tvam īkṣitaḥ

Sanskrit only: no published translation is held for this verse.

येषाम् प्रसन्नो ऽसि विभो यैर् लब्धं हृदयं तव & आकृष्य त्वत्पुरात्तैस् तु बाह्यम् आभ्यन्तरीकृतम्

yeṣām prasanno 'si vibho yair labdhaṃ hṛdayaṃ tava & ākṛṣya tvatpurāttais tu bāhyam ābhyantarīkṛtam

Sanskrit only: no published translation is held for this verse.

त्वद् ऋते निखिलं विश्वं समदृग्यातम् ईक्ष्यताम् & ईश्वरः पुनर् एतस्य त्वम् एको विषमेक्षणः

tvad ṛte nikhilaṃ viśvaṃ samadṛgyātam īkṣyatām & īśvaraḥ punar etasya tvam eko viṣamekṣaṇaḥ

Sanskrit only: no published translation is held for this verse.

आस्तां भवत्प्रभावेण विना सत्तैव नास्ति यत् & त्वद्दूषणकथा येषाम् त्वद् ऋते नोपपद्यते

āstāṃ bhavatprabhāveṇa vinā sattaiva nāsti yat & tvaddūṣaṇakathā yeṣām tvad ṛte nopapadyate

Sanskrit only: no published translation is held for this verse.

बाह्यान्तरान्तरायालीकेवले चेतसि स्थितिः & त्वयि चेत् स्यान् मम विभो किम् अन्यद् उपयुज्यते

bāhyāntarāntarāyālīkevale cetasi sthitiḥ & tvayi cet syān mama vibho kim anyad upayujyate

Sanskrit only: no published translation is held for this verse.

अन्ये भ्रमन्ति भगवन्न् आत्मन्य् एवातिदुःस्थिताः & अन्ये भ्रमन्ति भगवन्न् आत्मन्य् एवातिसुस्थिताः

anye bhramanti bhagavann ātmany evātiduḥsthitāḥ & anye bhramanti bhagavann ātmany evātisusthitāḥ

Sanskrit only: no published translation is held for this verse.

अपीत्वापि भवद्भक्तिसुधाम् अनवलोक्य च & त्वाम् ईश त्वत्समाचारमात्रात् सिद्ध्यन्ति जन्तवः

apītvāpi bhavadbhaktisudhām anavalokya ca & tvām īśa tvatsamācāramātrāt siddhyanti jantavaḥ

Sanskrit only: no published translation is held for this verse.

भृत्या वयं तव विभो तेन त्रिजगतां यथा & बिभर्ष्य् आत्मानम् एवं ते भर्त्तव्या वयम् अप्य् अलम्

bhṛtyā vayaṃ tava vibho tena trijagatāṃ yathā & bibharṣy ātmānam evaṃ te bharttavyā vayam apy alam

Sanskrit only: no published translation is held for this verse.

परानन्दामृतमये दृष्टो ऽपि जगदात्मनि & त्वयि स्पर्शरसे ऽत्यन्ततरसुत्कण्ठितो(?) ऽस्मि ते

parānandāmṛtamaye dṛṣṭo 'pi jagadātmani & tvayi sparśarase 'tyantatarasutkaṇṭhito(?) 'smi te

Sanskrit only: no published translation is held for this verse.

देव दुःखान्य् अशेषाणि यानि संसारिणाम् अपि & घृत्याख्यभवदीयात्मयुतान्य् आयान्ति सह्यताम्

deva duḥkhāny aśeṣāṇi yāni saṃsāriṇām api & ghṛtyākhyabhavadīyātmayutāny āyānti sahyatām

Sanskrit only: no published translation is held for this verse.

सर्वज्ञे सर्वशक्तौ च त्वय्य् एव सति चिन्मये & सर्वथाप्य् असतो नाथ युक्तास्य जगतः प्रथा

sarvajñe sarvaśaktau ca tvayy eva sati cinmaye & sarvathāpy asato nātha yuktāsya jagataḥ prathā

Sanskrit only: no published translation is held for this verse.

त्वत्प्राणिताः स्फुरन्तीमे गुणा लोष्टोपमा अपि & नृत्यन्ति पवनोद्धूताः कार्पासाः पिचवो यथा

tvatprāṇitāḥ sphurantīme guṇā loṣṭopamā api & nṛtyanti pavanoddhūtāḥ kārpāsāḥ picavo yathā

Sanskrit only: no published translation is held for this verse.

यदि नाथ गुणेष्व् आत्माभिमानो न भवेत् ततः & केन हीयेत जगतस् त्वदेकात्मतया प्रथा

yadi nātha guṇeṣv ātmābhimāno na bhavet tataḥ & kena hīyeta jagatas tvadekātmatayā prathā

Sanskrit only: no published translation is held for this verse.

वन्द्यास् ते ऽपि महीयांसः प्रलयोपगता अपि & त्वत्कोपपावकस्पर्शपूता ये परमेश्वर

vandyās te 'pi mahīyāṃsaḥ pralayopagatā api & tvatkopapāvakasparśapūtā ye parameśvara

Sanskrit only: no published translation is held for this verse.

महाप्रकाशवपुषि विस्पष्टे भवति स्थिते & सर्वतो ऽपीश तत् कस्मात् तमसि प्रसराम्य् अहम्

mahāprakāśavapuṣi vispaṣṭe bhavati sthite & sarvato 'pīśa tat kasmāt tamasi prasarāmy aham

Sanskrit only: no published translation is held for this verse.

अविभागो भवान् एव स्वरूपम् अमृतं मम & तथापि मर्त्यधर्माणाम् अहम् एवैकम् आस्पदम्

avibhāgo bhavān eva svarūpam amṛtaṃ mama & tathāpi martyadharmāṇām aham evaikam āspadam

Sanskrit only: no published translation is held for this verse.

महेश्वरेति यस्यास्ति नामकं वाग्विभूषणम् & प्रणामाङ्कश् च शिरसि स एवैकः प्रभावितः

maheśvareti yasyāsti nāmakaṃ vāgvibhūṣaṇam & praṇāmāṅkaś ca śirasi sa evaikaḥ prabhāvitaḥ

Sanskrit only: no published translation is held for this verse.

सदसच् च भवान् एव येन तेनाप्रयासतः & स्वरसेनैव भगवंस् तथा सिद्धिः कथं न मे

sadasac ca bhavān eva yena tenāprayāsataḥ & svarasenaiva bhagavaṃs tathā siddhiḥ kathaṃ na me

Sanskrit only: no published translation is held for this verse.

शिवदासः शिवैकात्मा किं यन् नासादयेत् सुखम् & तर्प्यो ऽस्मि देवमुख्यानाम् अपि येनामृतासवैः

śivadāsaḥ śivaikātmā kiṃ yan nāsādayet sukham & tarpyo 'smi devamukhyānām api yenāmṛtāsavaiḥ

Sanskrit only: no published translation is held for this verse.

हृन्नाभ्योर् अन्तरालस्थः प्राणिनां पित्तविग्रहः & ग्रससे त्वं महावह्निः सर्वं स्थावरजङ्गमम्

hṛnnābhyor antarālasthaḥ prāṇināṃ pittavigrahaḥ & grasase tvaṃ mahāvahniḥ sarvaṃ sthāvarajaṅgamam

Sanskrit only: no published translation is held for this verse.