Utpaladeva: Sivastotravali 11

औत्सुक्यविश्वसितनामैकादशं स्तोत्रम् जगद् इदम् अथवा सुहृदो बन्धुजनो वा न भवति मम किम् अपि & त्वं पुनर् एतत् सर्वं यदा तदा को ऽपरो मे ऽस्तु

autsukyaviśvasitanāmaikādaśaṃ stotram jagad idam athavā suhṛdo bandhujano vā na bhavati mama kim api & tvaṃ punar etat sarvaṃ yadā tadā ko 'paro me 'stu

Sanskrit only: no published translation is held for this verse.

स्वामिन् महेश्वरस् त्वं साक्षात् सर्वं जगत् त्वम् एवेति & वस्त्व् एव सिद्धिम् एत्व् इति याच्ञा तत्रापि याच्ञैव

svāmin maheśvaras tvaṃ sākṣāt sarvaṃ jagat tvam eveti & vastv eva siddhim etv iti yācñā tatrāpi yācñaiva

Sanskrit only: no published translation is held for this verse.

त्रिभुवनाधिपतित्वम् अपीह यत् तृणम् इव प्रतिभाति भवज्जुषः & किम् इव तस्य फलं शुभकर्मणो भवति नाथ भवत्स्मरणाद् ऋते

tribhuvanādhipatitvam apīha yat tṛṇam iva pratibhāti bhavajjuṣaḥ & kim iva tasya phalaṃ śubhakarmaṇo bhavati nātha bhavatsmaraṇād ṛte

Sanskrit only: no published translation is held for this verse.

येन नैव भवतो ऽस्ति विभिन्नं किञ्चनापि जगतां प्रभवश् च & त्वद्विजृम्भितम् अतो ऽद्भुतकर्मस्व् अप्य् उदेति न तव स्तुतिबन्धः

yena naiva bhavato 'sti vibhinnaṃ kiñcanāpi jagatāṃ prabhavaś ca & tvadvijṛmbhitam ato 'dbhutakarmasv apy udeti na tava stutibandhaḥ

Sanskrit only: no published translation is held for this verse.

त्वन्मयो ऽस्मि भवदर्चननिष्ठः सर्वदाहम् इति चाप्य् अविरामम् & भावयन्न् अपि विभो स्वरसेन स्वप्नगो ऽपि न तथा किम् इव स्याम्

tvanmayo 'smi bhavadarcananiṣṭhaḥ sarvadāham iti cāpy avirāmam & bhāvayann api vibho svarasena svapnago 'pi na tathā kim iva syām

Sanskrit only: no published translation is held for this verse.

ये मनाग् अपि भवच्चरणाब्जोद्भूतसौरभलवेन विमृष्टः & तेषु विस्रम् इव भवति समस्तं भोगजातम् अमरैर् अपि मृग्यम्

ye manāg api bhavaccaraṇābjodbhūtasaurabhalavena vimṛṣṭaḥ & teṣu visram iva bhavati samastaṃ bhogajātam amarair api mṛgyam

Sanskrit only: no published translation is held for this verse.

हृदि ते न तु विद्यते ऽन्यद् अन्यद् वचने कर्मणि चान्यद् एव शंभो & परमार्थसतो ऽप्य् अनुग्रहो वा यदि वा निग्रह एक एव कार्यः

hṛdi te na tu vidyate 'nyad anyad vacane karmaṇi cānyad eva śaṃbho & paramārthasato 'py anugraho vā yadi vā nigraha eka eva kāryaḥ

Sanskrit only: no published translation is held for this verse.

मूढो ऽस्मि दुःखकलितो ऽस्मि जरादिदोषभीतो ऽस्मि शक्तिरहितो ऽस्मि तवाश्रितो ऽस्मि & शम्भो तथा कलय शीघ्रम् उपैमि येन सर्वोत्तमां धुरम् अपोज्झितदुःखमार्गः

mūḍho 'smi duḥkhakalito 'smi jarādidoṣabhīto 'smi śaktirahito 'smi tavāśrito 'smi & śambho tathā kalaya śīghram upaimi yena sarvottamāṃ dhuram apojjhitaduḥkhamārgaḥ

Sanskrit only: no published translation is held for this verse.

त्वत्कर्णदेशम धिशय्य महार्घभावम् आक्रन्दितानि मम तुच्छतराणि यान्ति & वंशान्तरालपतितानि जलैकदेशखण्डानि मौक्तिकमणित्वम् इवोद्वहन्ति

tvatkarṇadeśama dhiśayya mahārghabhāvam ākranditāni mama tucchatarāṇi yānti & vaṃśāntarālapatitāni jalaikadeśakhaṇḍāni mauktikamaṇitvam ivodvahanti

Sanskrit only: no published translation is held for this verse.

किम् इव च लभ्यते बत न तैर् अपि नाथ जनैः क्षणम् अपि कैतवाद् अपि च ये तव नाम्नि रताः & शिशिरमयूखशेखर तथा कुरु येन मम क्षतमरणो ऽणिमादिकम् उपैमि यथा विभवम्

kim iva ca labhyate bata na tair api nātha janaiḥ kṣaṇam api kaitavād api ca ye tava nāmni ratāḥ & śiśiramayūkhaśekhara tathā kuru yena mama kṣatamaraṇo 'ṇimādikam upaimi yathā vibhavam

Sanskrit only: no published translation is held for this verse.

शम्भो शर्व शशङ्कशेखर शिव त्र्यक्षाक्षमालाधर श्रीमन्न् उग्रकपाललाञ्छन लसद्भीमत्रिशूलायुध & कारुण्याम्बुनिधे त्रिलोकरचनाशीलोग्रशक्त्यात्मक श्रीकण्ठाशु विनाशयाशुभभरान् आधत् स्वसिद्धिं पराम्

śambho śarva śaśaṅkaśekhara śiva tryakṣākṣamālādhara śrīmann ugrakapālalāñchana lasadbhīmatriśūlāyudha & kāruṇyāmbunidhe trilokaracanāśīlograśaktyātmaka śrīkaṇṭhāśu vināśayāśubhabharān ādhat svasiddhiṃ parām

Sanskrit only: no published translation is held for this verse.

तत् किं नाथ भवेन् न यत्र भगवान् निर्मातृताम् अश्नुते भावः स्यात् किम् उ तस्य चेतनवतो नाशास्ति यं शङ्करः & इत्थं ते परमेश्वराक्षतमहाशक्तेः सदा संश्रितः संसारे ऽत्र निरन्तराधिविधुरः क्लिश्याम्य् अहं केवलम्

tat kiṃ nātha bhaven na yatra bhagavān nirmātṛtām aśnute bhāvaḥ syāt kim u tasya cetanavato nāśāsti yaṃ śaṅkaraḥ & itthaṃ te parameśvarākṣatamahāśakteḥ sadā saṃśritaḥ saṃsāre 'tra nirantarādhividhuraḥ kliśyāmy ahaṃ kevalam

Sanskrit only: no published translation is held for this verse.

यद्य् अप्य् अत्र वरप्रदोद्धततमाः पीडाजरामृत्यव एते वा क्षणम् आसतां बहुमतः शब्दादिर् एवास्थिरः & तत्रापि स्पृहयामि सन्ततसुखाकाङ्क्षी चिरं स्थास्नवे भोगास्वादयुतत्वदङ्घ्रिकमलध्यानाग्र्य जीवातवे

yady apy atra varapradoddhatatamāḥ pīḍājarāmṛtyava ete vā kṣaṇam āsatāṃ bahumataḥ śabdādir evāsthiraḥ & tatrāpi spṛhayāmi santatasukhākāṅkṣī ciraṃ sthāsnave bhogāsvādayutatvadaṅghrikamaladhyānāgrya jīvātave

Sanskrit only: no published translation is held for this verse.

हे नाथ प्रणतार्तिनाशनपटो श्रेयोनिधे धूर्जटे दुःखैकायतनस्य जन्ममरणत्रस्तस्य मे साम्प्रतम् & तच् चेष्टस्व यथा मनोज्ञविषयास्वादप्रदा उत्तमा जीवन्न् एव समश्नुवे ऽहम् अचलाः सिद्धीस् त्वदर्चापरः

he nātha praṇatārtināśanapaṭo śreyonidhe dhūrjaṭe duḥkhaikāyatanasya janmamaraṇatrastasya me sāmpratam & tac ceṣṭasva yathā manojñaviṣayāsvādapradā uttamā jīvann eva samaśnuve 'ham acalāḥ siddhīs tvadarcāparaḥ

Sanskrit only: no published translation is held for this verse.

नमो मोहमहाध्वान्तध्वंसनानन्यकर्मणे & सर्वप्रकाशातिशयप्रकाशायेन्दुलक्ष्मणे

namo mohamahādhvāntadhvaṃsanānanyakarmaṇe & sarvaprakāśātiśayaprakāśāyendulakṣmaṇe

Sanskrit only: no published translation is held for this verse.