Utpaladeva: Sivastotravali 18

आविष्कारनाम अष्टादशं स्तोत्रम् जगतो ऽन्तरतो भवन्तम् आप्त्वा पुनर् एतद् भवतो ऽन्तराल् लभन्ते & जगदीश तवैव भक्तिभाजो न हि तेषाम् इह दूरतो ऽस्ति किञ्चित्

āviṣkāranāma aṣṭādaśaṃ stotram jagato 'ntarato bhavantam āptvā punar etad bhavato 'ntarāl labhante & jagadīśa tavaiva bhaktibhājo na hi teṣām iha dūrato 'sti kiñcit

Sanskrit only: no published translation is held for this verse.

क्वचिद् एव भवान् क्वचिद् भवानी सकलार्थक्रमगर्भिणी प्रधाना & परमार्थपदे तु नैव देव्या भवतो नापि जतत्त्रयस्य भेदः

kvacid eva bhavān kvacid bhavānī sakalārthakramagarbhiṇī pradhānā & paramārthapade tu naiva devyā bhavato nāpi jatattrayasya bhedaḥ

Sanskrit only: no published translation is held for this verse.

नो जानते सुभगम् अप्य् अवलेपवन्तो लोकाः प्रयत्नसुभगा निखिल हि भावाः & चेतः पुनर् यद् इदम् उद्यतम् अप्य् अवैति नैवात्मरूपम् इह हा तद् अहो हतो ऽस्मि

no jānate subhagam apy avalepavanto lokāḥ prayatnasubhagā nikhila hi bhāvāḥ & cetaḥ punar yad idam udyatam apy avaiti naivātmarūpam iha hā tad aho hato 'smi

Sanskrit only: no published translation is held for this verse.

भवन्मयस्वात्मनिवासलब्धसम्पद्भराभ्यर्चितयुष्मदङ्घ्रिः & न भोजनाच्छादनम् अप्य् अजस्रम् अपेक्षते यस् तम् अहं नतो ऽस्मि

bhavanmayasvātmanivāsalabdhasampadbharābhyarcitayuṣmadaṅghriḥ & na bhojanācchādanam apy ajasram apekṣate yas tam ahaṃ nato 'smi

Sanskrit only: no published translation is held for this verse.

सदा भवद्देहनिवासस्वस्थो ऽप्य् अन्तः परं दह्यत एष लोकः & तवेच्छया तत् कुरु मे यथात्र त्वदर्चनानन्दमयो भवेयम्

sadā bhavaddehanivāsasvastho 'py antaḥ paraṃ dahyata eṣa lokaḥ & tavecchayā tat kuru me yathātra tvadarcanānandamayo bhaveyam

Sanskrit only: no published translation is held for this verse.

स्वरसोदितयुष्मदङ्घ्रिपद्मद्वयपूजामृतपानसक्तचित्तः & सकार्थचयेष्व् अहं भवेयम् सुखसंस्पर्शनमात्रलोकयात्रः

svarasoditayuṣmadaṅghripadmadvayapūjāmṛtapānasaktacittaḥ & sakārthacayeṣv ahaṃ bhaveyam sukhasaṃsparśanamātralokayātraḥ

Sanskrit only: no published translation is held for this verse.

सकलव्यवहारगोचरे स्फुटम् अन्तः स्पुरति त्वयि प्रभो & उपयान्त्य् अपयान्ति चानिशम् मम वस्तूनि विभान्तु सर्वदा

sakalavyavahāragocare sphuṭam antaḥ spurati tvayi prabho & upayānty apayānti cāniśam mama vastūni vibhāntu sarvadā

Sanskrit only: no published translation is held for this verse.

सततम् एव तवैव पुरे ऽथवाप्य् अरहितो विचरेयम् अहं त्वया & क्षणलवो ऽप्य् अथ मा स्म भवेत् स मे न विजये ननु यत्र भवन्मयः

satatam eva tavaiva pure 'thavāpy arahito vicareyam ahaṃ tvayā & kṣaṇalavo 'py atha mā sma bhavet sa me na vijaye nanu yatra bhavanmayaḥ

Sanskrit only: no published translation is held for this verse.

भवदङ्गपरिस्रवत्सुशीतामृतपूरैर् भरिते समन्ततो ऽपि & भवदर्चनसम्पदेह भक्तास् तव संसारसरो ऽन्तरे चरन्ति

bhavadaṅgaparisravatsuśītāmṛtapūrair bharite samantato 'pi & bhavadarcanasampadeha bhaktās tava saṃsārasaro 'ntare caranti

Sanskrit only: no published translation is held for this verse.

महामन्त्रतरुच्छायाशीतले त्वन्महावने & निजात्मनि सदा नाथ वसेयं तव पूजकः

mahāmantratarucchāyāśītale tvanmahāvane & nijātmani sadā nātha vaseyaṃ tava pūjakaḥ

Sanskrit only: no published translation is held for this verse.

प्रतिवस्तु समस्तजीवतः प्रतिभासि प्रतिभामयो यथा & मम नाथ तथा पुरः प्रथां व्रज नेत्रत्रयशूलशोभितः

prativastu samastajīvataḥ pratibhāsi pratibhāmayo yathā & mama nātha tathā puraḥ prathāṃ vraja netratrayaśūlaśobhitaḥ

Sanskrit only: no published translation is held for this verse.

अभिमानचरूपहारतो ममताभक्तिभरेण कल्पितात् & परितोषगतः कदा भवान् मम सर्वत्र भवेद् दृशः पदम्

abhimānacarūpahārato mamatābhaktibhareṇa kalpitāt & paritoṣagataḥ kadā bhavān mama sarvatra bhaved dṛśaḥ padam

Sanskrit only: no published translation is held for this verse.

निवसन्परमामृताब्धिमध्ये भवदर्चाविधिमात्रमग्नचित्तः & सकलं जनवृत्तम् आचरेयं रसयन् सर्वत एव किञ्चनापि

nivasanparamāmṛtābdhimadhye bhavadarcāvidhimātramagnacittaḥ & sakalaṃ janavṛttam ācareyaṃ rasayan sarvata eva kiñcanāpi

Sanskrit only: no published translation is held for this verse.

भवदीयम् इहास्तु वस्तु तत्त्वं विवरीतुं क इवात्र पात्रम् अर्थे & इदम् एव हि नामरूपचेष्टाद्यसमं ते हरते हरो ऽसि यस्मात्

bhavadīyam ihāstu vastu tattvaṃ vivarītuṃ ka ivātra pātram arthe & idam eva hi nāmarūpaceṣṭādyasamaṃ te harate haro 'si yasmāt

Sanskrit only: no published translation is held for this verse.

शान्तये न सुखलिप्सुता मनाग् भक्तिसम्भृतमदेषु तैः प्रभोः & मोक्षमार्गणफलापि नार्थना स्मर्यते हृदयहारिणः पुरः

śāntaye na sukhalipsutā manāg bhaktisambhṛtamadeṣu taiḥ prabhoḥ & mokṣamārgaṇaphalāpi nārthanā smaryate hṛdayahāriṇaḥ puraḥ

Sanskrit only: no published translation is held for this verse.

जागरेतरदशाथवा परा यापि काचन मनाग् अवस्थितेः & भक्तिभाजनजनस्य साखिला त्वत्सनाथमनसो महोत्सवः

jāgaretaradaśāthavā parā yāpi kācana manāg avasthiteḥ & bhaktibhājanajanasya sākhilā tvatsanāthamanaso mahotsavaḥ

Sanskrit only: no published translation is held for this verse.

आमनो ऽक्षवलयस्य वृत्तयः सर्वतः शिथिलवृत्तयो ऽपि ताः & त्वाम् अवाप्य दृढदीर्घसंविदो नाथ भक्तिधनसोष्मणां कथम्

āmano 'kṣavalayasya vṛttayaḥ sarvataḥ śithilavṛttayo 'pi tāḥ & tvām avāpya dṛḍhadīrghasaṃvido nātha bhaktidhanasoṣmaṇāṃ katham

Sanskrit only: no published translation is held for this verse.

न च विभिन्नम् असृज्यत किञ्चिद् अस्त्य् अथ सुखेतरद् अत्र न निर्मितम् & अथ च दुःखि च भेदि च सर्वथाप्य् असमविस्मयधाम नमो ऽस्तु ते

na ca vibhinnam asṛjyata kiñcid asty atha sukhetarad atra na nirmitam & atha ca duḥkhi ca bhedi ca sarvathāpy asamavismayadhāma namo 'stu te

Sanskrit only: no published translation is held for this verse.

खरनिषेधखदामृतपूरणोच्छलितधौतविकल्पमलस्य मे & दलितदुर्जयसंशयवैरिणस् त्वदवलोकनम् अस्तु निरन्तरम्

kharaniṣedhakhadāmṛtapūraṇocchalitadhautavikalpamalasya me & dalitadurjayasaṃśayavairiṇas tvadavalokanam astu nirantaram

Sanskrit only: no published translation is held for this verse.

स्फुटम् अविश माम् अथाविशेयं सततं नाथ भवन्तमस्मि यस्मात् & रभसेन वपुस् तवैव साक्षात् परमासत्तिगतः समर्चयेयम्

sphuṭam aviśa mām athāviśeyaṃ satataṃ nātha bhavantamasmi yasmāt & rabhasena vapus tavaiva sākṣāt paramāsattigataḥ samarcayeyam

Sanskrit only: no published translation is held for this verse.

त्वयि न स्तुतिशक्तिर् अस्ति कस्याप्य् अथवास्त्य् एव यतो ऽतिसुन्दरो ऽसि & सततं पुनर् अर्थितं ममैतद् यद् अविश्रान्ति विलोकयेयम् ईशम्

tvayi na stutiśaktir asti kasyāpy athavāsty eva yato 'tisundaro 'si & satataṃ punar arthitaṃ mamaitad yad aviśrānti vilokayeyam īśam

Sanskrit only: no published translation is held for this verse.