Utpaladeva: Sivastotravali 4

सुरसोद्बलाख्यां चतुर्थं स्तोत्रम् चपलम् असि यद् अपि मानस तत्रापि श्लाघ्यसे यतो भजसे & शरणानाम् अपि शरणं त्रिभुवनगुरुम् अम्बिकाकान्तम्

surasodbalākhyāṃ caturthaṃ stotram capalam asi yad api mānasa tatrāpi ślāghyase yato bhajase & śaraṇānām api śaraṇaṃ tribhuvanagurum ambikākāntam

Sanskrit only: no published translation is held for this verse.

उल्लङ्घ्य विविधदैवतसोपानक्रमम् उपेय शिवचरणान् & आश्रित्याप्य् अधरतरां भूमिं नाद्यापि चित्रम् उज्झामि

ullaṅghya vividhadaivatasopānakramam upeya śivacaraṇān & āśrityāpy adharatarāṃ bhūmiṃ nādyāpi citram ujjhāmi

Sanskrit only: no published translation is held for this verse.

प्रकटय निजम् अध्वानं स्थगयतराम् अखिललोकचरितानि & यावद् भवामि भगवंस् तव सपदि सदोदितो दासः

prakaṭaya nijam adhvānaṃ sthagayatarām akhilalokacaritāni & yāvad bhavāmi bhagavaṃs tava sapadi sadodito dāsaḥ

Sanskrit only: no published translation is held for this verse.

शिव शिव शम्भो शङ्कर शरणागतवत्सलाशु कुरु करुणाम् & तव चरणकमलयुगलस्मरणपरस्य हि सम्पदो ऽदूरे

śiva śiva śambho śaṅkara śaraṇāgatavatsalāśu kuru karuṇām & tava caraṇakamalayugalasmaraṇaparasya hi sampado 'dūre

Sanskrit only: no published translation is held for this verse.

तावकाङ्घ्रिकमलासनलीना ये यथारुचि जगद् रचयन्ति & ते विरिञ्चिम् अधिकारमलेनालिप्तम् अस्ववशम् ईश हसन्ति

tāvakāṅghrikamalāsanalīnā ye yathāruci jagad racayanti & te viriñcim adhikāramalenāliptam asvavaśam īśa hasanti

Sanskrit only: no published translation is held for this verse.

त्वत्प्रकाशवपुषो न विभिन्नं किं चन प्रभवति प्रतिभातुम् & तत् सदैव भगवन् परिलब्धो ऽसीश्वर प्रकृतितो ऽपि विदूरः

tvatprakāśavapuṣo na vibhinnaṃ kiṃ cana prabhavati pratibhātum & tat sadaiva bhagavan parilabdho 'sīśvara prakṛtito 'pi vidūraḥ

Sanskrit only: no published translation is held for this verse.

पादपङ्कजरसं तव के चिद् भेदपर्युषितवृत्तिम् उपेताः & के चनापि रसयन्ति तु सध्यो भातम् अक्षतवपुर् द्वयशून्यम्

pādapaṅkajarasaṃ tava ke cid bhedaparyuṣitavṛttim upetāḥ & ke canāpi rasayanti tu sadhyo bhātam akṣatavapur dvayaśūnyam

Sanskrit only: no published translation is held for this verse.

नाथ विद्युद् इव भाति विभाते या कदा चन ममामृतदिग्धा & सा यदि स्थिरतरैव भवेत् तत् पूजितो ऽसि विधिवत् किम् उतान्यत्

nātha vidyud iva bhāti vibhāte yā kadā cana mamāmṛtadigdhā & sā yadi sthirataraiva bhavet tat pūjito 'si vidhivat kim utānyat

Sanskrit only: no published translation is held for this verse.

सर्वम् अस्यपरम् अस्ति न किं चिद् वस्त्व् अवस्तु यदि वेति महत्या & प्रज्ञाय व्यवसितो ऽत्र यथैव त्वं तथैव भव सुप्रकटो मे

sarvam asyaparam asti na kiṃ cid vastv avastu yadi veti mahatyā & prajñāya vyavasito 'tra yathaiva tvaṃ tathaiva bhava suprakaṭo me

Sanskrit only: no published translation is held for this verse.

स्वेच्छयैव भगवन् निजमार्गे कारितः पदम् अहं प्रभुनैव & तत् कथं जनवद् एव चरामि त्वत्पदोचितम् अवैमि न किं चित्

svecchayaiva bhagavan nijamārge kāritaḥ padam ahaṃ prabhunaiva & tat kathaṃ janavad eva carāmi tvatpadocitam avaimi na kiṃ cit

Sanskrit only: no published translation is held for this verse.

को ऽपि देव हृदि तेषु तावको जृम्भते सुभगभाव उत्तमः & त्वत्कथाम्बुदनिनादचातका येन ते ऽपि सुभगीकृताश् चिरम्

ko 'pi deva hṛdi teṣu tāvako jṛmbhate subhagabhāva uttamaḥ & tvatkathāmbudaninādacātakā yena te 'pi subhagīkṛtāś ciram

Sanskrit only: no published translation is held for this verse.

त्वज्जुषां त्वयि कयापि लीलया राग एष परिपोषम् आगतः & यद् वियोगभुवि सङ्कथा तथा संस्मृतिः फलति संगमोत्सवम्

tvajjuṣāṃ tvayi kayāpi līlayā rāga eṣa paripoṣam āgataḥ & yad viyogabhuvi saṅkathā tathā saṃsmṛtiḥ phalati saṃgamotsavam

Sanskrit only: no published translation is held for this verse.

यो विचित्ररससेकवर्धितः शङ्करेति शतशो ऽप्य् उदीरितः & शब्द आविशति तिर्यगाशयेष्व् अप्य् अयं नवनवप्रयोजनः

yo vicitrarasasekavardhitaḥ śaṅkareti śataśo 'py udīritaḥ & śabda āviśati tiryagāśayeṣv apy ayaṃ navanavaprayojanaḥ

Sanskrit only: no published translation is held for this verse.

ते जयन्ति मुखमण्डले भ्रमन् अस्ति येषु नियतं शिवध्वनिः & यः शाशीव प्रसृतो ऽमृताशयात् स्वादु संस्रवति चामृतं परम्

te jayanti mukhamaṇḍale bhraman asti yeṣu niyataṃ śivadhvaniḥ & yaḥ śāśīva prasṛto 'mṛtāśayāt svādu saṃsravati cāmṛtaṃ param

Sanskrit only: no published translation is held for this verse.

परिसमाप्तम् इवोग्रम् इदं जगद् विगलितो ऽविरलो मनसो मलः & तद् अपि नास्ति भवत्पुरार्गलकवाटविघट्टनम् अण्व पि

parisamāptam ivogram idaṃ jagad vigalito 'viralo manaso malaḥ & tad api nāsti bhavatpurārgalakavāṭavighaṭṭanam aṇva pi

Sanskrit only: no published translation is held for this verse.

सततफुल्लभवन्मुखपङ्कजोदरविलोकनलालसचेतसः & किम् अपि तत् कुरु नाथ मनाग् इव स्फुरसि येन ममाभिमुखस्थितिः

satataphullabhavanmukhapaṅkajodaravilokanalālasacetasaḥ & kim api tat kuru nātha manāg iva sphurasi yena mamābhimukhasthitiḥ

Sanskrit only: no published translation is held for this verse.

त्वदविभेदमतेर् अपरं नु किं सुखम् इहास्ति विभूतिर् अथापरा & तद् इह तावकदासजनस्य किं कुपथम् एति मनः परिहृत्य ताम्

tvadavibhedamater aparaṃ nu kiṃ sukham ihāsti vibhūtir athāparā & tad iha tāvakadāsajanasya kiṃ kupatham eti manaḥ parihṛtya tām

Sanskrit only: no published translation is held for this verse.

क्षणम् अपीह न तावकदासतां प्रति भवेयम् अहं किल भाजनम् & भवदभेदरसासवम् आदराद् अविरतं रसयेयम् अहं न चेत्

kṣaṇam apīha na tāvakadāsatāṃ prati bhaveyam ahaṃ kila bhājanam & bhavadabhedarasāsavam ādarād avirataṃ rasayeyam ahaṃ na cet

Sanskrit only: no published translation is held for this verse.

न किल पश्यति सत्यम् अयं जनस् तव वपुर् द्वयदृष्टिमलीमसः & तद् अपि सर्वविदाश्रितवत्सलः किम् इदम् आरटितं न शृणोषि मे

na kila paśyati satyam ayaṃ janas tava vapur dvayadṛṣṭimalīmasaḥ & tad api sarvavidāśritavatsalaḥ kim idam āraṭitaṃ na śṛṇoṣi me

Sanskrit only: no published translation is held for this verse.

स्मरसि नाथ कदाचिद् अपीहितं विषयसौख्यम् अथापि मयार्थितम् & सततम् एव भवद्वपुरीक्षणामृतमभीष्टमलं मम देहि तत्

smarasi nātha kadācid apīhitaṃ viṣayasaukhyam athāpi mayārthitam & satatam eva bhavadvapurīkṣaṇāmṛtamabhīṣṭamalaṃ mama dehi tat

Sanskrit only: no published translation is held for this verse.

किल यदैव शिवाध्वनि तावके कृतपदो ऽस्मि महेश तवेच्छया & शुभशतान्युदितानि तदैव मे किम् अपरं मृगये भवतः प्रभो

kila yadaiva śivādhvani tāvake kṛtapado 'smi maheśa tavecchayā & śubhaśatānyuditāni tadaiva me kim aparaṃ mṛgaye bhavataḥ prabho

Sanskrit only: no published translation is held for this verse.

यत्र सो ऽस्तम् अयम् एति विवस्वांश् चन्द्रमः प्रभृतिभिः सह सर्वैः & कापि सा विजयते शिवरात्रिः स्वप्रभाप्रसरभास्वररूपा

yatra so 'stam ayam eti vivasvāṃś candramaḥ prabhṛtibhiḥ saha sarvaiḥ & kāpi sā vijayate śivarātriḥ svaprabhāprasarabhāsvararūpā

Sanskrit only: no published translation is held for this verse.

अप्य् उपार्जितम् अहं त्रिषु लोकेष्व् अधिपत्यम् अमरेश्वर मन्ये & नीरसं तद् अखिलं भवदङ्घ्रिस्पर्शनामृतरसेन विहीनम्

apy upārjitam ahaṃ triṣu lokeṣv adhipatyam amareśvara manye & nīrasaṃ tad akhilaṃ bhavadaṅghrisparśanāmṛtarasena vihīnam

Sanskrit only: no published translation is held for this verse.

बत नाथ दृढो ऽयम् आत्मबन्धो भवदख्यातिमयस् त्वयैव कॢप्तः & यद् अयं प्रथमानम् एव मे त्वाम् अवधीर्य श्लथते न लेशतो ऽपि

bata nātha dṛḍho 'yam ātmabandho bhavadakhyātimayas tvayaiva kḷptaḥ & yad ayaṃ prathamānam eva me tvām avadhīrya ślathate na leśato 'pi

Sanskrit only: no published translation is held for this verse.

महताम् अमरेश पूज्यमानो ऽप्य् अनिशं तिष्ठसि पूजकैकरूपः & बहिरन्तरपीह दृश्यमानः स्फुरसि द्रष्टृशरीर एव शश्वत्

mahatām amareśa pūjyamāno 'py aniśaṃ tiṣṭhasi pūjakaikarūpaḥ & bahirantarapīha dṛśyamānaḥ sphurasi draṣṭṛśarīra eva śaśvat

Sanskrit only: no published translation is held for this verse.