Library·Vājasaneyi Saṃhitā (Śukla Yajurveda, as given on Wikisource)·15
अग्ने जातान् प्र णुद नः सपत्नान् प्रत्य् अजातान् नुद जातवेदः । अधि नो ब्रूहि सुमना ऽ अहेडꣳस् तव स्याम शर्मꣳस् त्रिवरूथ ऽ उद्भौ ॥
agne jātān pra ṇuda naḥ sapatnān praty ajātān nuda jātavedaḥ | adhi no brūhi sumanā ' aheḍam̐s tava syāma śarmam̐s trivarūtha ' udbhau ||
Sanskrit only: no published translation is held for this verse.
सहसा जातान् प्र णुदा नः सपत्नान् प्रत्य् अजातान् जातवेदो नुदस्व । अधि नो ब्रूहि सुमनस्यमानो वयꣳ स्याम प्र णुदा नः सपत्नान् ॥
sahasā jātān pra ṇudā naḥ sapatnān praty ajātān jātavedo nudasva | adhi no brūhi sumanasyamāno vayam̐ syāma pra ṇudā naḥ sapatnān ||
Sanskrit only: no published translation is held for this verse.
षोडशी स्तोम ऽ ओजो द्रविणम् । चतुश्चत्वारिꣳश स्तोमो वर्चो द्रविणम् । अग्नेः पुरीषम् अस्य अप्सो नाम तां त्वा विश्वे ऽ अभि गृणन्तु देवाः । स्तोमपृष्ठा घृतवतीह सीद प्रजावद् अस्मे द्रविणा यजस्व ॥
ṣoḍaśī stoma ' ojo draviṇam | catuścatvārim̐śa stomo varco draviṇam | agneḥ purīṣam asya apso nāma tāṃ tvā viśve ' abhi gṛṇantu devāḥ | stomapṛṣṭhā ghṛtavatīha sīda prajāvad asme draviṇā yajasva ||
Sanskrit only: no published translation is held for this verse.
एवश् छन्दः । वरिवश् छन्दः । शंभूश् छन्दः । परिभूश् छन्दः । ऽ आच्छच् छन्दः । मनश् छन्दः । व्यचश् छन्दः । सिन्धुश् छन्दः । समुद्रश् छन्दः । सरिरं छन्दः । ककुप् छन्दः । त्रिककुप् छन्दः । काव्यं छन्दः । ऽ अङ्कुपं छन्दः । अक्षरपङ्क्तिश् छन्दः । पदपङ्क्तिश् छन्दः । विष्टारपङ्क्तिश् छन्दः । क्षुरो भ्राजश् छन्दः ॥
evaś chandaḥ | varivaś chandaḥ | śaṃbhūś chandaḥ | paribhūś chandaḥ | ' ācchac chandaḥ | manaś chandaḥ | vyacaś chandaḥ | sindhuś chandaḥ | samudraś chandaḥ | sariraṃ chandaḥ | kakup chandaḥ | trikakup chandaḥ | kāvyaṃ chandaḥ | ' aṅkupaṃ chandaḥ | akṣarapaṅktiś chandaḥ | padapaṅktiś chandaḥ | viṣṭārapaṅktiś chandaḥ | kṣuro bhrājaś chandaḥ ||
Sanskrit only: no published translation is held for this verse.
आच्छच् छन्दः । प्रच्छच् छन्दः । संयच् छन्दः । वियच् छन्दः । बृहच् छन्दः । रथन्तरं छन्दः । निकायश् छन्दः । विवधश् छन्दः । गिरश् छन्दः । भ्रजश् छन्दः । सꣳस्तुप् छन्दः । ऽ अनुष्टुप् छन्दः । ऽ एवश् छन्दः । वरिवश् छन्दः । वयश् छन्दः । वयस्कृच् छन्दः । विष्पर्धाश् छन्दः । विशालं छन्दः । छदिश् छन्दः । दूरोहणं छन्दः । तन्द्रं छन्दः । ऽ अङ्काङ्कं छन्दः ॥
ācchac chandaḥ | pracchac chandaḥ | saṃyac chandaḥ | viyac chandaḥ | bṛhac chandaḥ | rathantaraṃ chandaḥ | nikāyaś chandaḥ | vivadhaś chandaḥ | giraś chandaḥ | bhrajaś chandaḥ | sam̐stup chandaḥ | ' anuṣṭup chandaḥ | ' evaś chandaḥ | varivaś chandaḥ | vayaś chandaḥ | vayaskṛc chandaḥ | viṣpardhāś chandaḥ | viśālaṃ chandaḥ | chadiś chandaḥ | dūrohaṇaṃ chandaḥ | tandraṃ chandaḥ | ' aṅkāṅkaṃ chandaḥ ||
Sanskrit only: no published translation is held for this verse.
रश्मिना सत्याय सत्यं जिन्व । प्रेतिना धर्मणा धर्मं जिन्व । अन्वित्या दिवा दिवं जिन्व । संधिनान्तरिक्षेणान्तरिक्षं जिन्व । प्रतिधिना पृथिव्या पृथिवीं जिन्व । विष्टम्भेन वृष्ट्या वृष्टिं जिन्व । प्रवया ऽह्नाहर् जिन्व । अनुया रात्र्या रात्रीं जिन्व । उशिजा वसुभ्यो वसून् जिन्व । प्रकेतेनादित्येभ्य ऽ आदित्यान् जिन्व ॥
raśminā satyāya satyaṃ jinva | pretinā dharmaṇā dharmaṃ jinva | anvityā divā divaṃ jinva | saṃdhināntarikṣeṇāntarikṣaṃ jinva | pratidhinā pṛthivyā pṛthivīṃ jinva | viṣṭambhena vṛṣṭyā vṛṣṭiṃ jinva | pravayā 'hnāhar jinva | anuyā rātryā rātrīṃ jinva | uśijā vasubhyo vasūn jinva | praketenādityebhya ' ādityān jinva ||
Sanskrit only: no published translation is held for this verse.
तन्तुना रायस्पोषेण रायस्पोषं जिन्व । सꣳसर्पेण श्रुताय श्रुतं जिन्व । ऐडेनौषधीभिर् ओषधीर् जिन्व । उत्तमेन तनूभिस् तनूर् जिन्व । वयोधसाधीतेनाधीतं जिन्व । अभिजिता तेजसा तेजो जिन्व ॥
tantunā rāyaspoṣeṇa rāyaspoṣaṃ jinva | sam̐sarpeṇa śrutāya śrutaṃ jinva | aiḍenauṣadhībhir oṣadhīr jinva | uttamena tanūbhis tanūr jinva | vayodhasādhītenādhītaṃ jinva | abhijitā tejasā tejo jinva ||
Sanskrit only: no published translation is held for this verse.
प्रतिपद् असि प्रतिपदे त्वा । अनुपद् अस्य् अनुपदे त्वा । सम्पद् असि सम्पदे त्वा । तेजो ऽसि तेजसे त्वा ॥
pratipad asi pratipade tvā | anupad asy anupade tvā | sampad asi sampade tvā | tejo 'si tejase tvā ||
Sanskrit only: no published translation is held for this verse.
त्रिवृद् असि त्रिवृते त्वा । प्रवृद् असि प्रवृते त्वा । विवृद् असि विवृते त्वा । सवृद् असि सवृते त्वा । ऽऽआक्रमो ऽस्य् आक्रमाय त्वा । संक्रमो ऽसि संक्रमाय त्वा । उत्क्रमो ऽस्य् उत्क्रमाय त्वा । उत्क्रान्तिर् अस्य् उत्क्रान्त्यै त्वा । अधिपतिनोर्जोर्जं जिन्व ॥
trivṛd asi trivṛte tvā | pravṛd asi pravṛte tvā | vivṛd asi vivṛte tvā | savṛd asi savṛte tvā | ''ākramo 'sy ākramāya tvā | saṃkramo 'si saṃkramāya tvā | utkramo 'sy utkramāya tvā | utkrāntir asy utkrāntyai tvā | adhipatinorjorjaṃ jinva ||
Sanskrit only: no published translation is held for this verse.
राज्ञ्य् असि प्राची दिग् वसवस् ते देवा ऽ अधिपतयो ऽग्निर् हेतीनां प्रतिधर्ता त्रिवृत् त्वा स्तोमः पृथिव्याꣳ श्रयत्व् आज्यम् उक्थम् अव्यथायै स्तभ्नातु रथन्तरꣳ साम प्रतिष्ठित्याऽ अन्तरिक्ष ऽ ऋषयस् त्वा प्रथमजा देवेषु दिवो मात्रया वरिम्णा प्रथन्तु विधर्ता चायम् अधिपतिश् च ते त्वा सर्वे संविदाना नाकस्य पृष्ठे स्वर्गे लोके यजमानं च सादयन्तु ॥
rājñy asi prācī dig vasavas te devā ' adhipatayo 'gnir hetīnāṃ pratidhartā trivṛt tvā stomaḥ pṛthivyām̐ śrayatv ājyam uktham avyathāyai stabhnātu rathantaram̐ sāma pratiṣṭhityā' antarikṣa ' ṛṣayas tvā prathamajā deveṣu divo mātrayā varimṇā prathantu vidhartā cāyam adhipatiś ca te tvā sarve saṃvidānā nākasya pṛṣṭhe svarge loke yajamānaṃ ca sādayantu ||
Sanskrit only: no published translation is held for this verse.
विराड् असि दक्षिणा दिग् रुद्रास् ते देवा ऽ अधिपतय ऽ इन्द्रो हेतीनां प्रतिधर्ता पञ्चदशस् त्वा स्तोमः पृथिव्याꣳ श्रयतु प्रौगम् उक्थम् अव्यथायै स्तभ्नातु बृहत् साम प्रतिष्ठित्या ऽ अन्तरिक्ष ऽ ऋषयस् त्वा प्रथमजा देवेषु दिवो मात्रया वरिम्णा प्रथन्तु विधर्ता चायम् अधिपतिश् च ते त्वा सर्वे संविदाना नाकस्य पृष्ठे स्वर्गे लोके यजमानं च सादयन्तु ॥
virāḍ asi dakṣiṇā dig rudrās te devā ' adhipataya ' indro hetīnāṃ pratidhartā pañcadaśas tvā stomaḥ pṛthivyām̐ śrayatu praugam uktham avyathāyai stabhnātu bṛhat sāma pratiṣṭhityā ' antarikṣa ' ṛṣayas tvā prathamajā deveṣu divo mātrayā varimṇā prathantu vidhartā cāyam adhipatiś ca te tvā sarve saṃvidānā nākasya pṛṣṭhe svarge loke yajamānaṃ ca sādayantu ||
Sanskrit only: no published translation is held for this verse.
सम्राड् असि प्रतीची दिग् आदित्यास् ते देवा ऽ अधिपतयो वरुणो हेतीनां प्रतिधर्ता सप्तदशस् त्वा स्तोमः पृथिव्याꣳ श्रयतु मरुत्वतीयम् उक्थम् अव्यथायै स्तभ्नातु वैरूपꣳ साम प्रतिष्ठित्या ऽ अन्तरिक्ष ऽ ऋषयस् त्वा प्रथमजा देवेषु दिवो मात्रया वरिम्णा प्रथन्तु विधर्ता चायम् अधिपतिश् च ते त्वा सर्वे संविदाना नाकस्य पृष्ठे स्वर्गे लोके यजमानं च सादयन्तु ॥
samrāḍ asi pratīcī dig ādityās te devā ' adhipatayo varuṇo hetīnāṃ pratidhartā saptadaśas tvā stomaḥ pṛthivyām̐ śrayatu marutvatīyam uktham avyathāyai stabhnātu vairūpam̐ sāma pratiṣṭhityā ' antarikṣa ' ṛṣayas tvā prathamajā deveṣu divo mātrayā varimṇā prathantu vidhartā cāyam adhipatiś ca te tvā sarve saṃvidānā nākasya pṛṣṭhe svarge loke yajamānaṃ ca sādayantu ||
Sanskrit only: no published translation is held for this verse.
स्वराड् अस्य् उदीच्य् दिङ् मरुतस् ते देवा ऽ अधिपतयः सोमो हेतीनां प्रतिधर्तैकविꣳशस् त्वा स्तोमः पृथिव्याꣳ श्रयतु निष्केवल्यम् उक्थम् अव्यथायै स्तभ्नातु वैराजꣳ साम प्रतिष्ठित्या ऽ अन्तरिक्ष ऽ ऋषयस् त्वा प्रथमजा देवेषु दिवो मात्रया वरिम्णा प्रथन्तु विधर्ता चायम् अधिपतिश् च ते त्वा सर्वे संविदाना नाकस्य पृष्ठे स्वर्गे लोके यजमानं च सादयन्तु ॥
svarāḍ asy udīcy diṅ marutas te devā ' adhipatayaḥ somo hetīnāṃ pratidhartaikavim̐śas tvā stomaḥ pṛthivyām̐ śrayatu niṣkevalyam uktham avyathāyai stabhnātu vairājam̐ sāma pratiṣṭhityā ' antarikṣa ' ṛṣayas tvā prathamajā deveṣu divo mātrayā varimṇā prathantu vidhartā cāyam adhipatiś ca te tvā sarve saṃvidānā nākasya pṛṣṭhe svarge loke yajamānaṃ ca sādayantu ||
Sanskrit only: no published translation is held for this verse.
अधिपत्न्य् असि बृहती दिग् विश्वे ते देवा ऽ अधिपतयो बृहस्पतिर् हेतीनां प्रतिधर्ता त्रिणवत्रयस्त्रिꣳशौ त्वा स्तोमौ पृथिव्याꣳ श्रयतां वैश्वदेवाग्निमारुते ऽ उक्थे ऽ अव्यथायै स्तभ्नीताꣳ शाक्वररैवते सामनी प्रतिष्ठित्या ऽ अन्तरिक्ष ऽ ऋषयस् त्वा प्रथमजा देवेषु दिवो मात्रया वरिम्णा प्रथन्तु विधर्ता चायम् अधिपतिश् च ते त्वा सर्वे संविदाना नाकस्य पृष्ठे स्वर्गे लोके यजमानं च सादयन्तु ॥
adhipatny asi bṛhatī dig viśve te devā ' adhipatayo bṛhaspatir hetīnāṃ pratidhartā triṇavatrayastrim̐śau tvā stomau pṛthivyām̐ śrayatāṃ vaiśvadevāgnimārute ' ukthe ' avyathāyai stabhnītām̐ śākvararaivate sāmanī pratiṣṭhityā ' antarikṣa ' ṛṣayas tvā prathamajā deveṣu divo mātrayā varimṇā prathantu vidhartā cāyam adhipatiś ca te tvā sarve saṃvidānā nākasya pṛṣṭhe svarge loke yajamānaṃ ca sādayantu ||
Sanskrit only: no published translation is held for this verse.
अयं पुरो हरिकेशः सूर्यरश्मिस् तस्य रथगृत्सश् च रथौजाश् च सेनानीग्रामण्यौ । पुञ्जिकस्थला च क्रतुस्थला चाप्सरसौ दङ्क्ष्णवः पशवो हेतिः पौरुषेयो वधः प्रहेतिस् तेभ्यो नमो ऽ अस्तु ते नो ऽवन्तु ते नो मृडयन्तु ते यं द्विष्मो यश् च नो द्वेष्टि तम् एषां जम्भे दध्मः ॥
ayaṃ puro harikeśaḥ sūryaraśmis tasya rathagṛtsaś ca rathaujāś ca senānīgrāmaṇyau | puñjikasthalā ca kratusthalā cāpsarasau daṅkṣṇavaḥ paśavo hetiḥ pauruṣeyo vadhaḥ prahetis tebhyo namo ' astu te no 'vantu te no mṛḍayantu te yaṃ dviṣmo yaś ca no dveṣṭi tam eṣāṃ jambhe dadhmaḥ ||
Sanskrit only: no published translation is held for this verse.
अयं दक्षिणा विश्वकर्मा तस्य रथस्वनश् च रथेचित्रश् च सेनानीग्रामण्यौ । मेनका च सहजन्या चाप्सरसौ यातुधाना हेती रक्षाꣳसि प्रहेतिस् तेभ्यो नमो ऽअस्तु ते नो ऽवन्तु ते नो मृडयन्तु ते यं द्विष्मो यश् च नो द्वेष्टि तम् एषां जम्भे दध्मः ॥
ayaṃ dakṣiṇā viśvakarmā tasya rathasvanaś ca rathecitraś ca senānīgrāmaṇyau | menakā ca sahajanyā cāpsarasau yātudhānā hetī rakṣām̐si prahetis tebhyo namo 'astu te no 'vantu te no mṛḍayantu te yaṃ dviṣmo yaś ca no dveṣṭi tam eṣāṃ jambhe dadhmaḥ ||
Sanskrit only: no published translation is held for this verse.
अयं पश्चाद् विश्वव्यचास् तस्य रथप्रोतश् चासमरथश् च सेनानीग्रामण्यौ । प्रम्लोचन्ती चानुम्लोचन्ती चाप्सरसौ व्याघ्रा हेतिः सर्पा प्रहेतिस् तेभ्यो नमो ऽ अस्तु ते नो ऽवन्तु ते नो मृडयन्तु ते यं द्विष्मो यश् च नो द्वेष्टि तम् एषां जम्भे दध्मः ॥
ayaṃ paścād viśvavyacās tasya rathaprotaś cāsamarathaś ca senānīgrāmaṇyau | pramlocantī cānumlocantī cāpsarasau vyāghrā hetiḥ sarpā prahetis tebhyo namo ' astu te no 'vantu te no mṛḍayantu te yaṃ dviṣmo yaś ca no dveṣṭi tam eṣāṃ jambhe dadhmaḥ ||
Sanskrit only: no published translation is held for this verse.
अयम् उत्तरात् संयद्वसुस् तस्य तार्क्ष्यश् चारिष्टनेमिश् च सेनानीग्रामण्यौ । विश्वाची च घृताची चाप्सरसाव् आपो हेतिर् वातः प्रहेतिस् तेभ्यो नमो ऽ अस्तु ते नो ऽवन्तु ते नो मृडयन्तु ते यं द्विष्मो यश् च नो द्वेष्टि तम् एषां जम्भे दध्मः ॥
ayam uttarāt saṃyadvasus tasya tārkṣyaś cāriṣṭanemiś ca senānīgrāmaṇyau | viśvācī ca ghṛtācī cāpsarasāv āpo hetir vātaḥ prahetis tebhyo namo ' astu te no 'vantu te no mṛḍayantu te yaṃ dviṣmo yaś ca no dveṣṭi tam eṣāṃ jambhe dadhmaḥ ||
Sanskrit only: no published translation is held for this verse.
अयम् उपर्य् अर्वाग्वसुस् तस्य सेनजिच् च सुषेणश् च सेनानीग्रामण्यौ । उर्वशी च पूर्वचित्तिश् चाप्सरसाव् अवस्फूर्जन् हेतिर् विद्युत् प्रहेतिस् तेभ्यो नमो ऽ अस्तु ते नो ऽवन्तु ते नो मृडयन्तु ते यं द्विष्मो यश् च नो द्वेष्टि तम् एषां जम्भे दध्मः ॥
ayam upary arvāgvasus tasya senajic ca suṣeṇaś ca senānīgrāmaṇyau | urvaśī ca pūrvacittiś cāpsarasāv avasphūrjan hetir vidyut prahetis tebhyo namo ' astu te no 'vantu te no mṛḍayantu te yaṃ dviṣmo yaś ca no dveṣṭi tam eṣāṃ jambhe dadhmaḥ ||
Sanskrit only: no published translation is held for this verse.
अग्निर् मूर्धा दिवः ककुत् पतिः पृथिव्या ऽ अयम् । अपाꣳ रेताꣳसि जिन्वति ॥
agnir mūrdhā divaḥ kakut patiḥ pṛthivyā ' ayam | apām̐ retām̐si jinvati ||
Agni is head and height of heaven, the Master of the earth is he: He quickeneth the watere seed.
Translated by Ralph T. H. Griffith (1896)This is the translator's rendering of the same verse where it occurs at RV 8.44.16; the wording of this text may differ in places.
अयम् अग्निः सहस्रिणो वाजस्य शतिनस् पतिः । मूर्धा कवी रयीणाम् ॥
ayam agniḥ sahasriṇo vājasya śatinas patiḥ | mūrdhā kavī rayīṇām ||
Sanskrit only: no published translation is held for this verse.
त्वाम् अग्ने पुष्कराद् अध्य् अथर्वा निर् अमन्थत । मूर्ध्नो विश्वस्य वाघतः ॥
tvām agne puṣkarād adhy atharvā nir amanthata | mūrdhno viśvasya vāghataḥ ||
Agni, Atharvan brought thee forth, by rubbing, from the lotus-flower, The head of Visva, of the Priest.
Translated by Ralph T. H. Griffith (1896)This is the translator's rendering of the same verse where it occurs at RV 6.16.13; the wording of this text may differ in places.
भुवो यज्ञस्य रजसश् च नेता यत्रा नियुद्भिः सचसे शिवाभिः । दिवि मूर्धानं दधिषे स्वर्षां जिह्वाम् अग्ने चकृषे हव्यवाहम् ॥
bhuvo yajñasya rajasaś ca netā yatrā niyudbhiḥ sacase śivābhiḥ | divi mūrdhānaṃ dadhiṣe svarṣāṃ jihvām agne cakṛṣe havyavāham ||
Thou art the Leader of the rite and region, to which with thine auspicious teams thou leadest, Thy light-bestowing head to heaven thou liftest, making thy tongue the oblationbearer, Agni.
Translated by Ralph T. H. Griffith (1896)This is the translator's rendering of the same verse where it occurs at RV 10.8.6; the wording of this text may differ in places.
अबोध्य् अग्निः समिधा जनानां प्रति धेनुम् इवायतीम् उषासम् । यह्वा ऽ इव प्र वयाम् उज्जिहानाः प्र भानवः सिस्रते नाकम् अच्छ ॥
abodhy agniḥ samidhā janānāṃ prati dhenum ivāyatīm uṣāsam | yahvā ' iva pra vayām ujjihānāḥ pra bhānavaḥ sisrate nākam accha ||
Sanskrit only: no published translation is held for this verse.
अवोचाम कवये मेध्याय वचो वन्दारु वृषभाय वृष्णे । गविष्ठिरो नमसा स्तोमम् अग्नौ दिवीव रुक्मम् उरुव्यञ्चम् अश्रेत् ॥
avocāma kavaye medhyāya vaco vandāru vṛṣabhāya vṛṣṇe | gaviṣṭhiro namasā stomam agnau divīva rukmam uruvyañcam aśret ||
Sanskrit only: no published translation is held for this verse.
अयम् इह प्रथमो धायि धातृभिर् होता यजिष्ठो ऽ अध्वरेष्व् ईड्यः । यम् अप्नवानो भृगवो विरुरुचुर् वनेषु चित्रं विभ्वं विशे-विशे ॥
ayam iha prathamo dhāyi dhātṛbhir hotā yajiṣṭho ' adhvareṣv īḍyaḥ | yam apnavāno bhṛgavo virurucur vaneṣu citraṃ vibhvaṃ viśe-viśe ||
Here by ordainers was this God appointed first Invoker, best at worship, to be praised at rites: Whom Apnavana, and the Bhrgus caused to shine bright-coloured in the wood, spreading from home to home.
Translated by Ralph T. H. Griffith (1896)This is the translator's rendering of the same verse where it occurs at RV 4.7.1; the wording of this text may differ in places.
जनस्य गोपा ऽ अजनिष्ट जागृविर् अग्निः सुदक्षः सुविताय नव्यसे । घृतप्रतीको बृहता दिविस्पृशा द्युमद् वि भाति भरतेभ्यः शुचिः ॥
janasya gopā ' ajaniṣṭa jāgṛvir agniḥ sudakṣaḥ suvitāya navyase | ghṛtapratīko bṛhatā divispṛśā dyumad vi bhāti bharatebhyaḥ śuciḥ ||
The watchful Guardian of the people hath been born, Agni, the very strong, for fresh prosperity. With oil upon his face, with high heaven touching flame, he shineth splendidly, pure, for the Bharatas.
Translated by Ralph T. H. Griffith (1896)This is the translator's rendering of the same verse where it occurs at RV 5.11.1; the wording of this text may differ in places.
त्वाम् अग्ने ऽ अङ्गिरसो गुहा हितम् अन्व् अविन्दञ् छिश्रियाणं वने-वने । स जायसे मथ्यमानः सहो महत् त्वाम् आहुः सहसस् पुत्रम् अङ्गिरः ॥
tvām agne ' aṅgiraso guhā hitam anv avindañ chiśriyāṇaṃ vane-vane | sa jāyase mathyamānaḥ saho mahat tvām āhuḥ sahasas putram aṅgiraḥ ||
O Agni, the Angirases discovered thee what time thou layest hidden, fleeing back from wood to wood. Thou by attrition art produced as conquering might, and men, O Angiras, call thee the Son of Strength.
Translated by Ralph T. H. Griffith (1896)This is the translator's rendering of the same verse where it occurs at RV 5.11.6; the wording of this text may differ in places.
सखायः सं वः सम्यञ्चम् इषꣳ स्तोमं चाग्नये । वर्षिष्ठाय क्षितीनामूर्जो नप्त्रे सहस्वते ॥
sakhāyaḥ saṃ vaḥ samyañcam iṣam̐ stomaṃ cāgnaye | varṣiṣṭhāya kṣitīnāmūrjo naptre sahasvate ||
Offer to Agni, O my friends, your seemly food, your seemly praise; To him supremest o'er the folk, the Son of Strength, the mighty Lord:
Translated by Ralph T. H. Griffith (1896)This is the translator's rendering of the same verse where it occurs at RV 5.7.1; the wording of this text may differ in places.
सꣳ-सम् इद् युवसे वृषन्न् अग्ने विश्वान्य् अर्य ऽ आ । इडस् पदे सम् इध्यसे स नो वसून्य् आ भर ॥
sam̐-sam id yuvase vṛṣann agne viśvāny arya ' ā | iḍas pade sam idhyase sa no vasūny ā bhara ||
Sanskrit only: no published translation is held for this verse.
त्वां चित्रश्रवस्तम हवन्ते विक्षु जन्तवः । शोचिष्केशं पुरुप्रियाग्ने हव्याय वोढवे ॥
tvāṃ citraśravastama havante vikṣu jantavaḥ | śociṣkeśaṃ purupriyāgne havyāya voḍhave ||
O Agni, loved by many, thou of fame most wondrous, in their homes Men call on thee whose hair is flame, to be the bearer of their gifts.
Translated by Ralph T. H. Griffith (1896)This is the translator's rendering of the same verse where it occurs at RV 1.45.6; the wording of this text may differ in places.
एना वो ऽ अग्निं नमसोर्जो नपातम् आ हुवे । प्रियं चेतिष्ठम् अरतिꣳ स्वध्वरं विश्वस्य दूतम् अमृतम् ॥
enā vo ' agniṃ namasorjo napātam ā huve | priyaṃ cetiṣṭham aratim̐ svadhvaraṃ viśvasya dūtam amṛtam ||
With this my reverent hymn I call Agni for you, the Son of Strength, Dear, wisest envoy, served with noble sacrifice, immortal messenger of all.
Translated by Ralph T. H. Griffith (1896)This is the translator's rendering of the same verse where it occurs at RV 7.16.1; the wording of this text may differ in places.
विश्वस्य दूतम् अमृतं विश्वस्य दूतम् अमृतम् । स योजते ऽ अरुषा विश्वभोजसा स दुद्रवत् स्वाहुतः ॥
viśvasya dūtam amṛtaṃ viśvasya dūtam amṛtam | sa yojate ' aruṣā viśvabhojasā sa dudravat svāhutaḥ ||
Sanskrit only: no published translation is held for this verse.
स दुद्रवत् स्वाहुतः स दुद्रवत् स्वाहुतः । सुब्रह्मा यज्ञः सुशमी वसूनां देवꣳ राधो जनानाम् ॥
sa dudravat svāhutaḥ sa dudravat svāhutaḥ | subrahmā yajñaḥ suśamī vasūnāṃ devam̐ rādho janānām ||
Sanskrit only: no published translation is held for this verse.
अग्ने वाजस्य गोमत ऽ ईशानः सहसो यहो । अस्मे धेहि जातवेदो महि श्रवः ॥
agne vājasya gomata ' īśānaḥ sahaso yaho | asme dhehi jātavedo mahi śravaḥ ||
O Agni, thou who art the lord of wealth in kine, thou Son of Strength, Vouchsafe to us, O Jatavedas, high renown.
Translated by Ralph T. H. Griffith (1896)This is the translator's rendering of the same verse where it occurs at RV 1.79.4; the wording of this text may differ in places.
स ऽ इधानो वसुष् कविर् अग्निर् ईडेन्यो गिरा । रेवद् अस्मभ्यं पुर्वणीक दीदिहि ॥
sa ' idhāno vasuṣ kavir agnir īḍenyo girā | revad asmabhyaṃ purvaṇīka dīdihi ||
He, Agni, kindled, good and wise, must be exalted in our song: Shine, thou of many forms, shine radiantly on us.
Translated by Ralph T. H. Griffith (1896)This is the translator's rendering of the same verse where it occurs at RV 1.79.5; the wording of this text may differ in places.
क्षपो राजन्न् उत त्मनाग्ने वस्तोर् उतोषसः । स तिग्मजम्भ रक्षसो दह प्रति ॥
kṣapo rājann uta tmanāgne vastor utoṣasaḥ | sa tigmajambha rakṣaso daha prati ||
O Agni, shining of thyself by night and when the morning breaks, Burn, thou whose teeth are sharp, against the Raksasas.
Translated by Ralph T. H. Griffith (1896)This is the translator's rendering of the same verse where it occurs at RV 1.79.6; the wording of this text may differ in places.
भद्रो नोऽअग्निर् आहुतो भद्रा रातिः सुभग भद्रो ऽअध्वरः । भद्राऽ उत प्रशस्तयः ॥
bhadro no'agnir āhuto bhadrā rātiḥ subhaga bhadro 'adhvaraḥ | bhadrā' uta praśastayaḥ ||
May Agni worshipped bring us bliss, may the gift, Blessed One, and sacrifice bring bliss; Yea, may our praises bring us bliss.
Translated by Ralph T. H. Griffith (1896)This is the translator's rendering of the same verse where it occurs at RV 8.19.19; the wording of this text may differ in places.
भद्रा ऽ उत प्रशस्तयो भद्रं मनः कृणुष्व वृत्रतूर्ये । येना समत्सु सासहः ॥
bhadrā ' uta praśastayo bhadraṃ manaḥ kṛṇuṣva vṛtratūrye | yenā samatsu sāsahaḥ ||
Sanskrit only: no published translation is held for this verse.
येना समत्सु सासहो ऽव स्थिरा तनुहि भूरि शर्धताम् । वनेमा ते ऽ अभिष्टिभिः ॥
yenā samatsu sāsaho 'va sthirā tanuhi bhūri śardhatām | vanemā te ' abhiṣṭibhiḥ ||
Sanskrit only: no published translation is held for this verse.
अग्निं तं मन्ये यो वसुर् अस्तं यं यन्ति धेनवः । अस्तम् अर्वन्त ऽ आशवो ऽस्तं नित्यासो वाजिन ऽ इषꣳ स्तोतृभ्य ऽ आ भर ॥
agniṃ taṃ manye yo vasur astaṃ yaṃ yanti dhenavaḥ | astam arvanta ' āśavo 'staṃ nityāso vājina ' iṣam̐ stotṛbhya ' ā bhara ||
I VALUE Agni that good Lord, the home to which the kine return: Whom fleet-foot coursers seek as home, and strong enduring steeds as home. Bring food to those who sing thy praise.
Translated by Ralph T. H. Griffith (1896)This is the translator's rendering of the same verse where it occurs at RV 5.6.1; the wording of this text may differ in places.
सो अग्निर् यो वसुर् गृणे सं यम् आयन्ति धेनवः । सम् अर्वन्तो रघुद्रुवः सꣳ सुजातासः सूरय ऽ इषꣳ स्तोतृभ्य ऽ आ भर ॥
so agnir yo vasur gṛṇe saṃ yam āyanti dhenavaḥ | sam arvanto raghudruvaḥ sam̐ sujātāsaḥ sūraya ' iṣam̐ stotṛbhya ' ā bhara ||
'Tis Agni whom we laud as good, to whom the milch-kine come in herds, To whom the chargers swift of foot, to whom our well-born princes come. Bring food to those who sing thy praise.
Translated by Ralph T. H. Griffith (1896)This is the translator's rendering of the same verse where it occurs at RV 5.6.2; the wording of this text may differ in places.
उभे सुश्चन्द्र सर्पिषो दर्वी श्रीणीष ऽ आसनि । उतो न ऽ उत् पुपूर्या ऽ उक्थेषु शवसस् पत ऽ इषꣳ स्तोतृभ्य ऽ आ भर ॥
ubhe suścandra sarpiṣo darvī śrīṇīṣa ' āsani | uto na ' ut pupūryā ' uktheṣu śavasas pata ' iṣam̐ stotṛbhya ' ā bhara ||
Thou, brilliant God, within thy mouth warmest both ladies of the oil. So fill us also, in our hymns, abundantly, O Lord of Strength, Bring food to those who sing thy praise.
Translated by Ralph T. H. Griffith (1896)This is the translator's rendering of the same verse where it occurs at RV 5.6.9; the wording of this text may differ in places.
अग्ने तम् अद्याश्वं न स्तोमैः क्रतुं न भद्रꣳ हृदिस्पृशम् । ऋध्यामा त ऽ ओहैः ॥
agne tam adyāśvaṃ na stomaiḥ kratuṃ na bhadram̐ hṛdispṛśam | ṛdhyāmā ta ' ohaiḥ ||
This day with praises, Agni, we bring thee that which thou lovest. Right judgment, like a horse, with our devotions.
Translated by Ralph T. H. Griffith (1896)This is the translator's rendering of the same verse where it occurs at RV 4.10.1; the wording of this text may differ in places.
अधा ह्य् अग्ने क्रतोर् भद्रस्य दक्षस्य साधोः । रथीर् ऋतस्य बृहतो बभूथ ॥
adhā hy agne krator bhadrasya dakṣasya sādhoḥ | rathīr ṛtasya bṛhato babhūtha ||
For thou hast ever been the Car-driver, Agni, of noble Strength, lofty sacrifice, and rightful judgment.
Translated by Ralph T. H. Griffith (1896)This is the translator's rendering of the same verse where it occurs at RV 4.10.2; the wording of this text may differ in places.
एभिर् नो ऽ अर्कैर् भवा नो अर्वाङ् स्वर्ण ज्योतिः । अग्ने विश्वेभिः सुमना ऽ अनीकैः ॥
ebhir no ' arkair bhavā no arvāṅ svarṇa jyotiḥ | agne viśvebhiḥ sumanā ' anīkaiḥ ||
Through these our praises come thou to meet us, bright as the sunlight, O Agni, well disposed, with all thine aspects.
Translated by Ralph T. H. Griffith (1896)This is the translator's rendering of the same verse where it occurs at RV 4.10.3; the wording of this text may differ in places.
अग्निꣳ होतारं मन्ये दास्वन्तं वसुꣳ सूनुꣳ सहसो जातवेदसं विप्रं न जातवेदसम् । य ऽ ऊर्ध्वया स्वध्वरो देवो देवाच्या कृपा । घृतस्य विभ्राष्टिम् अनु वष्टि शोचिषाऽऽजुह्वानस्य सर्पिषः ॥
agnim̐ hotāraṃ manye dāsvantaṃ vasum̐ sūnum̐ sahaso jātavedasaṃ vipraṃ na jātavedasam | ya ' ūrdhvayā svadhvaro devo devācyā kṛpā | ghṛtasya vibhrāṣṭim anu vaṣṭi śociṣā''juhvānasya sarpiṣaḥ ||
Agni I hold as herald, the munificent, the gracious, Son of Strength, who knoweth all that live, as holy Singer, knowing all, Lord of fair rites, a God with form erected turning to the Gods, He, when the flame hath sprung forth from the holy oil, the offered fatness, longeth for it with his glow.
Translated by Ralph T. H. Griffith (1896)This is the translator's rendering of the same verse where it occurs at RV 1.127.1; the wording of this text may differ in places.
अग्ने त्वं नो ऽ अन्तम उत त्राता शिवो भवा वरूथ्यः । वसुर् अग्निर् वसुश्रवा ऽ अच्छा नक्षि द्युमत्तमꣳ रयिं दाः । तं त्वा शोचिष्ठ दीदिवः सुम्नाय नूनम् ईमहे सखिभ्यः ॥
agne tvaṃ no ' antama uta trātā śivo bhavā varūthyaḥ | vasur agnir vasuśravā ' acchā nakṣi dyumattamam̐ rayiṃ dāḥ | taṃ tvā śociṣṭha dīdivaḥ sumnāya nūnam īmahe sakhibhyaḥ ||
Sanskrit only: no published translation is held for this verse.
येन ऽ ऋषयस् तपसा सत्रम् आयन्न् इन्धाना ऽ अग्निꣳ स्वर् आभरन्तः । तस्मिन्न् अहं नि दधे नाके ऽ अग्निं यम् आहुर् मनव स्तीर्णबर्हिषम् ॥
yena ' ṛṣayas tapasā satram āyann indhānā ' agnim̐ svar ābharantaḥ | tasminn ahaṃ ni dadhe nāke ' agniṃ yam āhur manava stīrṇabarhiṣam ||
Sanskrit only: no published translation is held for this verse.
तं पत्नीभिर् अनु गच्छेम देवाः पुत्रैर् भ्रातृभिर् उत वा हिरण्यैः । नाकं गृभ्णानाः सुकृतस्य लोके तृतीये पृष्ठे ऽ अधि रोचने दिवः ॥
taṃ patnībhir anu gacchema devāḥ putrair bhrātṛbhir uta vā hiraṇyaiḥ | nākaṃ gṛbhṇānāḥ sukṛtasya loke tṛtīye pṛṣṭhe ' adhi rocane divaḥ ||
Sanskrit only: no published translation is held for this verse.
आ वाचो मध्यम् अरुहद् भुरण्युर् अयम् अग्निः सत्पतिश् चेकितानः । पृष्ठे पृथिव्या निहितो दविद्युतद् अधस् पदं कृणुतां ये पृतन्यवः ॥
ā vāco madhyam aruhad bhuraṇyur ayam agniḥ satpatiś cekitānaḥ | pṛṣṭhe pṛthivyā nihito davidyutad adhas padaṃ kṛṇutāṃ ye pṛtanyavaḥ ||
Sanskrit only: no published translation is held for this verse.
अयम् अग्निर् वीरतमो वयोधाः सहस्रियो द्योतताम् अप्रयुच्छन् । विभ्राजमानः सरिरस्य मध्य ऽ उप प्र याहि दिव्यानि धाम ॥
ayam agnir vīratamo vayodhāḥ sahasriyo dyotatām aprayucchan | vibhrājamānaḥ sarirasya madhya ' upa pra yāhi divyāni dhāma ||
Sanskrit only: no published translation is held for this verse.
सम्प्रच्यवध्वम् उप सम्प्रयाताग्ने पथो देवयानान् कृणुध्वम् । पुनः कृण्वाना पितरा युवानान्वा ताꣳसीत् त्वयि तन्तुम् एतम् ॥
sampracyavadhvam upa samprayātāgne patho devayānān kṛṇudhvam | punaḥ kṛṇvānā pitarā yuvānānvā tām̐sīt tvayi tantum etam ||
Sanskrit only: no published translation is held for this verse.
उद् बुध्यस्वाग्ने प्रति जागृहि त्वम् इष्टापूर्ते सꣳ सृजेथाम् अयं च । अस्मिन्त् सधस्थे अध्य् उत्तरस्मिन् विशवे देवा यजमानश् च सीदत ॥
ud budhyasvāgne prati jāgṛhi tvam iṣṭāpūrte sam̐ sṛjethām ayaṃ ca | asmint sadhasthe adhy uttarasmin viśave devā yajamānaś ca sīdata ||
Sanskrit only: no published translation is held for this verse.
येन वहसि सहस्रं येनाग्ने सर्ववेदसम् । तेनेमं यज्ञं नो नय स्वर् देवेषु गन्तवे ॥
yena vahasi sahasraṃ yenāgne sarvavedasam | tenemaṃ yajñaṃ no naya svar deveṣu gantave ||
Sanskrit only: no published translation is held for this verse.
अयं ते योनिर् ऋत्वियो यतो जातो ऽ अरोचथाः । तं जानन्न् अग्न ऽ आरोहाथा नो वर्धया रयिम् ॥
ayaṃ te yonir ṛtviyo yato jāto ' arocathāḥ | taṃ jānann agna ' ārohāthā no vardhayā rayim ||
Sanskrit only: no published translation is held for this verse.
तपश् च तपस्यश् च शैशिराव् ऋतू ऽ अग्नेर् अन्तःश्लेषो सि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसो न्तरा द्यावापृथिवी ऽ इमे शैशिराव् ऋतू ऽ अभिकल्पमाना ऽ इन्द्रम् इव देवा ऽ अभिसं विशन्तु तया देवतयाङ्गिरस्वद् ध्रुवे सीदतम् ॥
tapaś ca tapasyaś ca śaiśirāv ṛtū ' agner antaḥśleṣo si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso ntarā dyāvāpṛthivī ' ime śaiśirāv ṛtū ' abhikalpamānā ' indram iva devā ' abhisaṃ viśantu tayā devatayāṅgirasvad dhruve sīdatam ||
Sanskrit only: no published translation is held for this verse.
परमेष्ठी त्वा सादयतु दिवस् पृष्ठे ज्योतिष्मतीम् । विश्वस्मै प्राणायापानाय व्यानायोदानाय प्रतिष्ठायै चरित्राय । सूर्यस् ते ऽधिपतिस् तया देवतयाऽङ्गिरस्वद् ध्रुवा सीद ॥
parameṣṭhī tvā sādayatu divas pṛṣṭhe jyotiṣmatīm | viśvasmai prāṇāyāpānāya vyānāyodānāya pratiṣṭhāyai caritrāya | sūryas te 'dhipatis tayā devatayā'ṅgirasvad dhruvā sīda ||
Sanskrit only: no published translation is held for this verse.
लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् ॥
lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan ||
Sanskrit only: no published translation is held for this verse.
ता ऽ अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः ॥
tā ' asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ ||
Sanskrit only: no published translation is held for this verse.
इन्द्रं विश्वा अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥
indraṃ viśvā avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim ||
All sacred songs have magnified Indra expansive as the sea, The best of warriors borne on cars, the Lord, the very Lord of strength.
Translated by Ralph T. H. Griffith (1896)This is the translator's rendering of the same verse where it occurs at RV 1.11.1; the wording of this text may differ in places.
प्रोथद् अश्वो न यवसे विष्यन् यदा महः संवरणाद् व्य् अस्थात् । आद् अस्य वातो ऽ अनु वाति शोचिर् अध स्म ते व्रजनं कृष्णम् अस्ति ॥
prothad aśvo na yavase viṣyan yadā mahaḥ saṃvaraṇād vy asthāt | ād asya vāto ' anu vāti śocir adha sma te vrajanaṃ kṛṣṇam asti ||
Like a steed neighing eager for the pasture, when he hath stepped forth from the great enclosure: Then the wind following blows upon his splendour, and, straight, the path is black which thou hast travelled.
Translated by Ralph T. H. Griffith (1896)This is the translator's rendering of the same verse where it occurs at RV 7.3.2; the wording of this text may differ in places.
आयोष् ट्वा सदने सादयाम्य् अवतश् छायायाꣳ समुद्रस्य हृदये । रश्मीवतीं भास्वतीम् आ या द्यां भास्य् आ पृथिवीम् ओर्व् अन्तरिक्षम् ॥
āyoṣ ṭvā sadane sādayāmy avataś chāyāyām̐ samudrasya hṛdaye | raśmīvatīṃ bhāsvatīm ā yā dyāṃ bhāsy ā pṛthivīm orv antarikṣam ||
Sanskrit only: no published translation is held for this verse.
परमेष्ठी त्वा सादयतु दिवस् पृष्ठे व्यचस्वतीं प्रथस्वतीम् दिवं यच्छ दिवं दृꣳह दिवं मा हिꣳसीः । विश्वस्मै प्राणायापानाय व्यानायोदानाय प्रतिष्ठायै चरित्राय । सूर्यस् त्वाभि पातु मह्या स्वस्त्या छर्दिषा शंतमेन तया देवतयाङ्गिरस्वद् ध्रुवे सीदतम् ॥
parameṣṭhī tvā sādayatu divas pṛṣṭhe vyacasvatīṃ prathasvatīm divaṃ yaccha divaṃ dṛm̐ha divaṃ mā him̐sīḥ | viśvasmai prāṇāyāpānāya vyānāyodānāya pratiṣṭhāyai caritrāya | sūryas tvābhi pātu mahyā svastyā chardiṣā śaṃtamena tayā devatayāṅgirasvad dhruve sīdatam ||
Sanskrit only: no published translation is held for this verse.
सहस्रस्य प्रमासि । सहस्रस्य प्रतिमासि । सहस्रस्योन्मासि । साहस्रो ऽसि । सहस्राय त्वा ॥
sahasrasya pramāsi | sahasrasya pratimāsi | sahasrasyonmāsi | sāhasro 'si | sahasrāya tvā ||
Sanskrit only: no published translation is held for this verse.