Library·Vājasaneyi Saṃhitā (Śukla Yajurveda, as given on Wikisource)·30
देव सवितः प्र सुव यज्ञं प्र सुव यज्ञपतिं भगाय । दिव्यो गन्धर्वः केतुपूः केतं नः पुनातु वाचस्पतिर् वाजं नः स्वदतु ॥
deva savitaḥ pra suva yajñaṃ pra suva yajñapatiṃ bhagāya | divyo gandharvaḥ ketupūḥ ketaṃ naḥ punātu vācaspatir vājaṃ naḥ svadatu ||
Sanskrit only: no published translation is held for this verse.
तत् सवितुर् वरेण्यं भर्गो देवस्य धीमहि । धियो यो नः प्रचोदयत् ॥
tat savitur vareṇyaṃ bhargo devasya dhīmahi | dhiyo yo naḥ pracodayat ||
May we attain that excellent glory of Savitar the God: So May he stimulate our prayers.
Translated by Ralph T. H. Griffith (1896)This is the translator's rendering of the same verse where it occurs at RV 3.62.10; the wording of this text may differ in places.
विश्वानि देव सवितर् दुरितानि परा सुव । यद् भद्रं तन् न ऽ आ सुव ॥
viśvāni deva savitar duritāni parā suva | yad bhadraṃ tan na ' ā suva ||
Savitar, God, send far away all sorrows and calamities, And send us only what is good.
Translated by Ralph T. H. Griffith (1896)This is the translator's rendering of the same verse where it occurs at RV 5.82.5; the wording of this text may differ in places.
विभक्तारꣳ हवामहे वसोश् चित्रस्य राधसः । सवितारं नृचक्षसम् ॥
vibhaktāram̐ havāmahe vasoś citrasya rādhasaḥ | savitāraṃ nṛcakṣasam ||
We call on him, distributer of wondrous bounty and of wealth, On Savitar who looks on men.
Translated by Ralph T. H. Griffith (1896)This is the translator's rendering of the same verse where it occurs at RV 1.22.7; the wording of this text may differ in places.
ब्रह्मणे ब्राह्मणं क्षत्राय राजन्यं मरुद्भ्यो वैश्यं तपसे शूद्रं तमसे तस्करं नारकाय वीरहणं पाप्मने क्लीबम् आक्रयाया ऽ अयोगुं कामाय पुꣳश्चलूम् अतिक्रुष्टाय मागधम् ॥
brahmaṇe brāhmaṇaṃ kṣatrāya rājanyaṃ marudbhyo vaiśyaṃ tapase śūdraṃ tamase taskaraṃ nārakāya vīrahaṇaṃ pāpmane klībam ākrayāyā ' ayoguṃ kāmāya pum̐ścalūm atikruṣṭāya māgadham ||
Sanskrit only: no published translation is held for this verse.
नृत्ताय सूतं गीताय शैलूषं धर्माय सभाचरं नरिष्ठायै भीमलं नर्माय रेभꣳ हसाय कारिम् आनन्दाय स्त्रीषखं प्रमदे कुमारीपुत्रं मेधायै रथकारं धैर्याय तक्षाणम् ॥
nṛttāya sūtaṃ gītāya śailūṣaṃ dharmāya sabhācaraṃ nariṣṭhāyai bhīmalaṃ narmāya rebham̐ hasāya kārim ānandāya strīṣakhaṃ pramade kumārīputraṃ medhāyai rathakāraṃ dhairyāya takṣāṇam ||
Sanskrit only: no published translation is held for this verse.
तपसे कौलालं मायायै कर्मारꣳ रूपाय मणिकारꣳ शुभे वपꣳ शरव्याया ऽ इषुकारꣳ हेत्यै धनुष्कारं कर्मणे ज्याकारं दिष्टाय रज्जुसर्जं मृत्यवे मृगयुम् अन्तकाय श्वनिनम् ॥
tapase kaulālaṃ māyāyai karmāram̐ rūpāya maṇikāram̐ śubhe vapam̐ śaravyāyā ' iṣukāram̐ hetyai dhanuṣkāraṃ karmaṇe jyākāraṃ diṣṭāya rajjusarjaṃ mṛtyave mṛgayum antakāya śvaninam ||
Sanskrit only: no published translation is held for this verse.
नदीभ्यः पौञ्जिष्ठम् ऋक्षीकाभ्यो नैषादं पुरुषव्याघ्राय दुर्मदं गन्धर्वाप्सरोभ्यो व्रात्यं प्रयुग्भ्य ऽ उन्मत्तꣳ सर्पदेवजनेभ्यो ऽप्रतिपदमयेभ्यः कितवम् ईर्यताया ऽ अकितवं पिशाचेभ्यो बिदलकारीं यातुधानेभ्यः कण्टकीकारीम् ॥
nadībhyaḥ pauñjiṣṭham ṛkṣīkābhyo naiṣādaṃ puruṣavyāghrāya durmadaṃ gandharvāpsarobhyo vrātyaṃ prayugbhya ' unmattam̐ sarpadevajanebhyo 'pratipadamayebhyaḥ kitavam īryatāyā ' akitavaṃ piśācebhyo bidalakārīṃ yātudhānebhyaḥ kaṇṭakīkārīm ||
Sanskrit only: no published translation is held for this verse.
संधये जारं गेहायोपपतिम् आर्त्यै परिवित्तं निर्ऋत्यै परिविविदानम् अराद्ध्या ऽ एदिधिषुःपतिं निष्कृत्यै पेशस्कारीꣳ संज्ञानाय स्मरकारीं प्रकामोद्यायोपसदं वर्णायानुरुधं बलायोपदाम् ॥
saṃdhaye jāraṃ gehāyopapatim ārtyai parivittaṃ nirṛtyai parivividānam arāddhyā ' edidhiṣuḥpatiṃ niṣkṛtyai peśaskārīm̐ saṃjñānāya smarakārīṃ prakāmodyāyopasadaṃ varṇāyānurudhaṃ balāyopadām ||
Sanskrit only: no published translation is held for this verse.
उत्सादेभ्यः कुब्जं प्रमुदे वामनं द्वार्भ्यः स्रामꣳ स्वप्नायान्धम् अधर्माय बधिरं पवित्राय भिषजं प्रज्ञानाय नक्षत्रदर्शम् आशिक्षायै प्रश्निनम् उपशिक्षाया ऽ अभिप्रश्निनं मर्यादायै प्रश्नविवाकम् ॥
utsādebhyaḥ kubjaṃ pramude vāmanaṃ dvārbhyaḥ srāmam̐ svapnāyāndham adharmāya badhiraṃ pavitrāya bhiṣajaṃ prajñānāya nakṣatradarśam āśikṣāyai praśninam upaśikṣāyā ' abhipraśninaṃ maryādāyai praśnavivākam ||
Sanskrit only: no published translation is held for this verse.
अर्मेभ्यो हस्तिपं जवायाश्वपं पुष्ट्यै गोपालं वीर्यायाविपालं तेजसे ऽजपालम् इरायै कीनाशं कीलालाय सुराकारं भद्राय गृहपꣳ श्रेयसे वित्तधम् आध्यक्ष्यायानुक्षत्तारम् ॥
armebhyo hastipaṃ javāyāśvapaṃ puṣṭyai gopālaṃ vīryāyāvipālaṃ tejase 'japālam irāyai kīnāśaṃ kīlālāya surākāraṃ bhadrāya gṛhapam̐ śreyase vittadham ādhyakṣyāyānukṣattāram ||
Sanskrit only: no published translation is held for this verse.
भायै दार्वाहारं प्रभाया ऽ अग्न्येधं ब्रध्नस्य विष्टपायाभिषेक्तारं वर्षिष्ठाय नाकाय परिवेष्टारं देवलोकाय पेशितारं मनुष्यलोकाय प्रकरितारꣳ सर्वेभ्यो लोकेभ्यो ऽ उपसेक्तारम् अव ऽ ऋत्यै वधायोपमन्थितारं मेधाय वासःपल्पूलीं प्रकामाय रजयित्रीम् ॥
bhāyai dārvāhāraṃ prabhāyā ' agnyedhaṃ bradhnasya viṣṭapāyābhiṣektāraṃ varṣiṣṭhāya nākāya pariveṣṭāraṃ devalokāya peśitāraṃ manuṣyalokāya prakaritāram̐ sarvebhyo lokebhyo ' upasektāram ava ' ṛtyai vadhāyopamanthitāraṃ medhāya vāsaḥpalpūlīṃ prakāmāya rajayitrīm ||
Sanskrit only: no published translation is held for this verse.
ऋतये स्तेनहृदयं वैरहत्याय पिशुनं विविक्त्यै क्षत्तारम् औपद्रष्ट्र्यायानुक्षत्तारं बालायानुचरं भूम्ने परिष्कन्दं प्रियाय प्रियवादिनम् अरिष्ट्या ऽ अश्वसादꣳ स्वर्गाय लोकाय भागदुघं वर्षिष्ठाय नाकाय परिवेष्टारम् ॥
ṛtaye stenahṛdayaṃ vairahatyāya piśunaṃ viviktyai kṣattāram aupadraṣṭryāyānukṣattāraṃ bālāyānucaraṃ bhūmne pariṣkandaṃ priyāya priyavādinam ariṣṭyā ' aśvasādam̐ svargāya lokāya bhāgadughaṃ varṣiṣṭhāya nākāya pariveṣṭāram ||
Sanskrit only: no published translation is held for this verse.
मन्यवे ऽयस्तापं क्रोधाय निसरं योगाय योक्तारꣳ शोकायाभिसर्तारं क्षेमाय विमोक्तारम् उत्कीलेभ्यस् त्रिष्ठिनं वपुषे मानस्कृतꣳ शीलायाञ्जनीकारीं निर्ऋत्यै कोशकारीं यमायासूम् ॥
manyave 'yastāpaṃ krodhāya nisaraṃ yogāya yoktāram̐ śokāyābhisartāraṃ kṣemāya vimoktāram utkīlebhyas triṣṭhinaṃ vapuṣe mānaskṛtam̐ śīlāyāñjanīkārīṃ nirṛtyai kośakārīṃ yamāyāsūm ||
Sanskrit only: no published translation is held for this verse.
यमाय यमसूम् अथर्वभ्यो ऽवतोकाꣳ संवत्सराय पर्यायिणीं परिवत्सरायाविजाताम् इदावत्सरायातीत्वरीम् इद्वत्सरायातिष्कद्वरीं वत्सराय विजर्जराꣳ संवत्सराय पलिक्नीम् ऋभुभ्यो ऽजिनसंधꣳ साध्येभ्यश् चर्मम्नम् ॥
yamāya yamasūm atharvabhyo 'vatokām̐ saṃvatsarāya paryāyiṇīṃ parivatsarāyāvijātām idāvatsarāyātītvarīm idvatsarāyātiṣkadvarīṃ vatsarāya vijarjarām̐ saṃvatsarāya paliknīm ṛbhubhyo 'jinasaṃdham̐ sādhyebhyaś carmamnam ||
Sanskrit only: no published translation is held for this verse.
सरोभ्यो धैवरम् उपस्थावराभ्यो दाशं वैशन्ताभ्यो बैन्दं नड्वलाभ्यः शौष्कलं पाराय मार्गारम् अवराय केवर्तं तीर्थेभ्य ऽ आन्दं विषमेभ्यो मैनालꣳ स्वनेभ्यः पर्णकं गुहाभ्यः किरातꣳ सानुभ्यो जम्भकं पर्वतेभ्यः किम्पूरुषम् ॥
sarobhyo dhaivaram upasthāvarābhyo dāśaṃ vaiśantābhyo baindaṃ naḍvalābhyaḥ śauṣkalaṃ pārāya mārgāram avarāya kevartaṃ tīrthebhya ' āndaṃ viṣamebhyo mainālam̐ svanebhyaḥ parṇakaṃ guhābhyaḥ kirātam̐ sānubhyo jambhakaṃ parvatebhyaḥ kimpūruṣam ||
Sanskrit only: no published translation is held for this verse.
बीभत्सायै पौल्कसं वर्णाय हिरण्यकारं तुलायै वाणिजं पश्चादोषाय ग्लाविनं विश्वेभ्यो भूतेभ्यः सिध्मलं भूत्यै जागरणम् अभूत्यै स्वपनम् आर्त्यै जनवादिनं व्यृद्ध्या ऽ अपगल्भꣳ सꣳशराय प्रच्छिदम् ॥
bībhatsāyai paulkasaṃ varṇāya hiraṇyakāraṃ tulāyai vāṇijaṃ paścādoṣāya glāvinaṃ viśvebhyo bhūtebhyaḥ sidhmalaṃ bhūtyai jāgaraṇam abhūtyai svapanam ārtyai janavādinaṃ vyṛddhyā ' apagalbham̐ sam̐śarāya pracchidam ||
Sanskrit only: no published translation is held for this verse.
अक्षराजाय कितवं कृतायादिनवदर्शं त्रेतायै कल्पिनं द्वापरायाधिकल्पिनम् आस्कन्दाय सभास्थाणुं मृत्यवे गोव्यच्छम् अन्तकाय गोघातं क्षुधे यो गां विकृन्तन्तं भिक्षमाण ऽ उपतिष्ठति दुष्कृताय चरकाचार्यं पाप्मने सैलगम् ॥
akṣarājāya kitavaṃ kṛtāyādinavadarśaṃ tretāyai kalpinaṃ dvāparāyādhikalpinam āskandāya sabhāsthāṇuṃ mṛtyave govyaccham antakāya goghātaṃ kṣudhe yo gāṃ vikṛntantaṃ bhikṣamāṇa ' upatiṣṭhati duṣkṛtāya carakācāryaṃ pāpmane sailagam ||
Sanskrit only: no published translation is held for this verse.
प्रतिश्रुत्काया ऽ अर्तनं घोषाय भषम् अन्ताय बहुवादिनम् अनन्ताय मूकꣳ शब्दायाडम्बराघातं महसे वीणावादं क्रोशाय तूणवध्मम् अवरस्पराय शङ्खध्मं वनाय वनपम् अन्यतोरण्याय दावपम् ॥
pratiśrutkāyā ' artanaṃ ghoṣāya bhaṣam antāya bahuvādinam anantāya mūkam̐ śabdāyāḍambarāghātaṃ mahase vīṇāvādaṃ krośāya tūṇavadhmam avarasparāya śaṅkhadhmaṃ vanāya vanapam anyatoraṇyāya dāvapam ||
Sanskrit only: no published translation is held for this verse.
नर्माय पुꣳश्चलूꣳ हसाय कारिं यादसे शाबल्यां ग्रामण्यं गणकम् अभिक्रोशकं तान् महसे वीणावादं पाणिघ्नं तूणवध्मं तान् नृतायानन्दाय तलवम् ॥
narmāya pum̐ścalūm̐ hasāya kāriṃ yādase śābalyāṃ grāmaṇyaṃ gaṇakam abhikrośakaṃ tān mahase vīṇāvādaṃ pāṇighnaṃ tūṇavadhmaṃ tān nṛtāyānandāya talavam ||
Sanskrit only: no published translation is held for this verse.
अग्नये पीवानं पृथिव्यै पीठसर्पिणं वायवे चाण्डालम् अन्तरिक्षाय वꣳशनर्तिनं दिवे खलतिꣳ सूर्याय हर्यक्षं नक्षत्रेभ्यः किर्मिरं चन्द्रमसे किलासम् अह्ने शुक्लं पिङ्गाक्षꣳ रात्र्यै कृष्णं पिङ्गाक्षम् ॥
agnaye pīvānaṃ pṛthivyai pīṭhasarpiṇaṃ vāyave cāṇḍālam antarikṣāya vam̐śanartinaṃ dive khalatim̐ sūryāya haryakṣaṃ nakṣatrebhyaḥ kirmiraṃ candramase kilāsam ahne śuklaṃ piṅgākṣam̐ rātryai kṛṣṇaṃ piṅgākṣam ||
Sanskrit only: no published translation is held for this verse.
अथैतान् अष्टौ विरूपान् आ लभते ऽतिदीर्घं चातिह्रस्वं चातिस्थूलं चातिकृशं चातिशुक्लं चातिकृष्णं चातिकुल्वं चातिलोमशं च । अशूद्रा ऽ अब्राह्मणास् ते प्राजापत्याः । मागधः पुꣳश्चली कितवः क्लीबो ऽशूद्रा ऽ अब्राह्मणास् ते प्राजापत्याः ॥
athaitān aṣṭau virūpān ā labhate 'tidīrghaṃ cātihrasvaṃ cātisthūlaṃ cātikṛśaṃ cātiśuklaṃ cātikṛṣṇaṃ cātikulvaṃ cātilomaśaṃ ca | aśūdrā ' abrāhmaṇās te prājāpatyāḥ | māgadhaḥ pum̐ścalī kitavaḥ klībo 'śūdrā ' abrāhmaṇās te prājāpatyāḥ ||
Sanskrit only: no published translation is held for this verse.