Vājasaneyi Saṃhitā (Śukla Yajurveda, as given on Wikisource) 38

देवस्य त्वा सवितुः प्रसवे ऽश्विनोर् बाहुभ्यां पूष्णो हस्ताभ्याम् । आ ददे ऽदित्यै रास्नासि ॥

devasya tvā savituḥ prasave 'śvinor bāhubhyāṃ pūṣṇo hastābhyām | ā dade 'dityai rāsnāsi ||

Sanskrit only: no published translation is held for this verse.

इड ऽ एहि । अदित ऽ एहि । सरस्वत्त्य् एहि । असाव् एहि । असाव् एहि । असाव् एहि ॥

iḍa ' ehi | adita ' ehi | sarasvatty ehi | asāv ehi | asāv ehi | asāv ehi ||

Sanskrit only: no published translation is held for this verse.

अदित्यै रास्नासीन्द्राण्या ऽ उष्णीषः । पूषासि । घर्माय दीष्व ॥

adityai rāsnāsīndrāṇyā ' uṣṇīṣaḥ | pūṣāsi | gharmāya dīṣva ||

Sanskrit only: no published translation is held for this verse.

अश्विभ्यां पिन्वस्व । सरस्वत्यै पिन्वस्व । इन्द्राय पिन्वस्व । स्वाहेन्द्रवत् । स्वाहेन्द्रवत् । स्वाहेन्द्रवत् ॥

aśvibhyāṃ pinvasva | sarasvatyai pinvasva | indrāya pinvasva | svāhendravat | svāhendravat | svāhendravat ||

Sanskrit only: no published translation is held for this verse.

यस् ते स्तनः शशयो यो मयोभूर् यो रत्नधा वसुविद् यः सुदत्रः । येन विश्वा पुष्यसि वार्याणि सरस्वति तम् इह धातवे ऽकः । उर्व् अन्तरिक्षम् अन्व् एमि ॥

yas te stanaḥ śaśayo yo mayobhūr yo ratnadhā vasuvid yaḥ sudatraḥ | yena viśvā puṣyasi vāryāṇi sarasvati tam iha dhātave 'kaḥ | urv antarikṣam anv emi ||

Sanskrit only: no published translation is held for this verse.

गायत्रं छन्दो ऽसि । त्रैष्टुभं छन्दो ऽसि । द्यावापृथिवीभ्यां त्वा परि गृह्णामि । अन्तरिक्षेणोप यच्छामि । इन्द्राश्विना । मधुनः सारघस्य घर्मं पात वसवो यजत वाट् । स्वाहा सूर्यस्य रश्मये वृष्टिवनये ॥

gāyatraṃ chando 'si | traiṣṭubhaṃ chando 'si | dyāvāpṛthivībhyāṃ tvā pari gṛhṇāmi | antarikṣeṇopa yacchāmi | indrāśvinā | madhunaḥ sāraghasya gharmaṃ pāta vasavo yajata vāṭ | svāhā sūryasya raśmaye vṛṣṭivanaye ||

Sanskrit only: no published translation is held for this verse.

समुद्राय त्वा वाताय स्वाहा । सरिराय त्वा वाताय स्वाहा । अनाधृष्याय त्वा वाताय स्वाहा । अप्रतिधृष्याय त्वा वाताय स्वाहा । अवस्यवे त्वा वाताय स्वाहा । अशिमिदाय त्वा वाताय स्वाहा ॥

samudrāya tvā vātāya svāhā | sarirāya tvā vātāya svāhā | anādhṛṣyāya tvā vātāya svāhā | apratidhṛṣyāya tvā vātāya svāhā | avasyave tvā vātāya svāhā | aśimidāya tvā vātāya svāhā ||

Sanskrit only: no published translation is held for this verse.

इन्द्राय त्वा वसुमते रुद्रवते स्वाहा । इन्द्राय त्वादित्यवते स्वाहा । इन्द्राय त्वाभिमातिघ्ने स्वाहा । सवित्रे त्व ऽ ऋभुमते विभुमते वाजवते स्वाहा । बृहस्पतये त्वा विश्वदेव्यावते स्वाहा ॥

indrāya tvā vasumate rudravate svāhā | indrāya tvādityavate svāhā | indrāya tvābhimātighne svāhā | savitre tva ' ṛbhumate vibhumate vājavate svāhā | bṛhaspataye tvā viśvadevyāvate svāhā ||

Sanskrit only: no published translation is held for this verse.

यमाय त्वाङ्गिरस्वते पितृमते स्वाहा । स्वाहा घर्माय । स्वाहा घर्मः पित्रे ॥

yamāya tvāṅgirasvate pitṛmate svāhā | svāhā gharmāya | svāhā gharmaḥ pitre ||

Sanskrit only: no published translation is held for this verse.

विश्वा ऽ आशा दक्षिणसद् विश्वान् देवान् अयाड् इह । स्वाहाकृतस्य घर्मस्य मधोः पिबतम् अश्विना ॥

viśvā ' āśā dakṣiṇasad viśvān devān ayāḍ iha | svāhākṛtasya gharmasya madhoḥ pibatam aśvinā ||

Sanskrit only: no published translation is held for this verse.

दिवि धा ऽ इमं यज्ञम् इमम् यज्ञं दिवि धाः । स्वाहाग्नये यज्ञियाय शं यजुर्भ्यः ॥

divi dhā ' imaṃ yajñam imam yajñaṃ divi dhāḥ | svāhāgnaye yajñiyāya śaṃ yajurbhyaḥ ||

Sanskrit only: no published translation is held for this verse.

अश्विना घर्मं पातꣳ हार्द्वानम् अहर् दिवाभिर् ऊतिभिः । तन्त्रायिणो नमो द्यावापृथिवीभ्याम् ॥

aśvinā gharmaṃ pātam̐ hārdvānam ahar divābhir ūtibhiḥ | tantrāyiṇo namo dyāvāpṛthivībhyām ||

Sanskrit only: no published translation is held for this verse.

अपाताम् अश्विना घर्मम् अनु द्यावापृथिवी ऽ अमꣳसाताम् । इहैव रातयः सन्तु ॥

apātām aśvinā gharmam anu dyāvāpṛthivī ' amam̐sātām | ihaiva rātayaḥ santu ||

Sanskrit only: no published translation is held for this verse.

इषे पिन्वस्व । ऊर्जे पिन्वस्व । ब्रह्मणे पिन्वस्व । क्षत्राय पिन्वस्व । द्यावापृथिवीभ्यां पिन्वस्व । धर्मासि सुधर्म । अमेन्य् अस्मे नृम्णानि धारय ब्रह्म धारय क्षत्रम् धारय विषं धारय ॥

iṣe pinvasva | ūrje pinvasva | brahmaṇe pinvasva | kṣatrāya pinvasva | dyāvāpṛthivībhyāṃ pinvasva | dharmāsi sudharma | ameny asme nṛmṇāni dhāraya brahma dhāraya kṣatram dhāraya viṣaṃ dhāraya ||

Sanskrit only: no published translation is held for this verse.

स्वाहा पूष्णे शरसे । स्वाहा ग्रावभ्यः । स्वाहा प्रतिरवेभ्यः । स्वाहा पितृभ्य ऽ ऊर्ध्वबर्हिर्भ्यो घर्मपावभ्यः । स्वाहा द्यावापृथिवीभ्याम् । स्वाहा विश्वेभ्यः देवेभ्यः ॥

svāhā pūṣṇe śarase | svāhā grāvabhyaḥ | svāhā pratiravebhyaḥ | svāhā pitṛbhya ' ūrdhvabarhirbhyo gharmapāvabhyaḥ | svāhā dyāvāpṛthivībhyām | svāhā viśvebhyaḥ devebhyaḥ ||

Sanskrit only: no published translation is held for this verse.

स्वाहा रुद्राय रुद्रहूतये । स्वाहा सं ज्योतिषा ज्योतिः । अहः केतुना जुषताꣳ सुज्योतिर् ज्योतिषा स्वाहा । रात्रिः केतुना जुषताꣳ सुज्योतिर् ज्योतिषा स्वाहा । मधु हुतम् इन्द्रतमे ऽ अग्नाव् अश्याम ते देव घर्म नमस् ते ऽ अस्तु मा मा हिꣳसीः ॥

svāhā rudrāya rudrahūtaye | svāhā saṃ jyotiṣā jyotiḥ | ahaḥ ketunā juṣatām̐ sujyotir jyotiṣā svāhā | rātriḥ ketunā juṣatām̐ sujyotir jyotiṣā svāhā | madhu hutam indratame ' agnāv aśyāma te deva gharma namas te ' astu mā mā him̐sīḥ ||

Sanskrit only: no published translation is held for this verse.

अभीमं महिमा दिवं विप्रो बभूव सप्रथाः । उत श्रवसा पृथिवीꣳ सꣳ सीदस्व महाꣳ२ऽ असि रोचस्व देववीतमः ॥ [वि धूमम् अग्ने ऽ अरुषं मियेध्य सृज प्रशस्त दर्शतम्] ॥

abhīmaṃ mahimā divaṃ vipro babhūva saprathāḥ | uta śravasā pṛthivīm̐ sam̐ sīdasva mahām̐2' asi rocasva devavītamaḥ || [vi dhūmam agne ' aruṣaṃ miyedhya sṛja praśasta darśatam] ||

Sanskrit only: no published translation is held for this verse.

या ते घर्म दिव्या शुग् या गायत्र्याꣳ हविर्धाने । सा त आ प्यायतां निष्ट्यायतां तस्यै ते स्वाहा । या ते घर्मान्तरिक्षे शुग् या त्रिष्टुभ्य् आग्नीध्रे । सा त ऽ आ प्यायतां निष्ट्यायतां तस्यै ते स्वाहा । या ते घर्म पृथिव्याꣳ शुग् या जगत्याꣳ सदस्या । सा त ऽ आ प्यायतां निष्ट्यायतां तस्यै ते स्वाहा ॥

yā te gharma divyā śug yā gāyatryām̐ havirdhāne | sā ta ā pyāyatāṃ niṣṭyāyatāṃ tasyai te svāhā | yā te gharmāntarikṣe śug yā triṣṭubhy āgnīdhre | sā ta ' ā pyāyatāṃ niṣṭyāyatāṃ tasyai te svāhā | yā te gharma pṛthivyām̐ śug yā jagatyām̐ sadasyā | sā ta ' ā pyāyatāṃ niṣṭyāyatāṃ tasyai te svāhā ||

Sanskrit only: no published translation is held for this verse.

क्षत्रस्य त्वा परस्पाय ब्रह्मणस् तन्वं पाहि । विशस् त्वा धर्मणा वयम् अनु क्रामाम सुविताय नव्यसे ॥

kṣatrasya tvā paraspāya brahmaṇas tanvaṃ pāhi | viśas tvā dharmaṇā vayam anu krāmāma suvitāya navyase ||

Sanskrit only: no published translation is held for this verse.

चतुःस्रक्तिर् नाभिर् ऋतस्य सप्रथाः स नो विश्वायुः सप्रथाः स नः सर्वायुः सप्रथाः । अप द्वेषो ऽ अप ह्वरो ऽन्यव्रतस्य सश्चिम ॥

catuḥsraktir nābhir ṛtasya saprathāḥ sa no viśvāyuḥ saprathāḥ sa naḥ sarvāyuḥ saprathāḥ | apa dveṣo ' apa hvaro 'nyavratasya saścima ||

Sanskrit only: no published translation is held for this verse.

घर्मैतत् ते पुरीषं तेन वर्धस्व चा च प्यायस्व । वर्धिषीमहि च वयम् आ च प्यासिषीमहि ॥

gharmaitat te purīṣaṃ tena vardhasva cā ca pyāyasva | vardhiṣīmahi ca vayam ā ca pyāsiṣīmahi ||

Sanskrit only: no published translation is held for this verse.

अचिक्रदद् वृषा हरिर् महान् मित्रो न दर्शतः । सꣳ सूर्येण दिद्युतद् उदधिर् निधिः ॥

acikradad vṛṣā harir mahān mitro na darśataḥ | sam̐ sūryeṇa didyutad udadhir nidhiḥ ||

Sanskrit only: no published translation is held for this verse.

सुमित्रिया न ऽ आप ऽ ओषधयः सन्तु दुर्मित्रियास् तस्मै सन्तु यो ऽस्मान् द्वेष्टि यं च वयं द्विष्मः ॥

sumitriyā na ' āpa ' oṣadhayaḥ santu durmitriyās tasmai santu yo 'smān dveṣṭi yaṃ ca vayaṃ dviṣmaḥ ||

Sanskrit only: no published translation is held for this verse.

उद् वयं तमसस् परि स्वः पश्यन्त ऽ उत्तरम् । देवं देवत्रा सूर्यम् अगन्म ज्योतिर् उत्तमम् ॥

ud vayaṃ tamasas pari svaḥ paśyanta ' uttaram | devaṃ devatrā sūryam aganma jyotir uttamam ||

एधो ऽस्य् एधिषीमहि । समिद् असि तेजो ऽसि तेजो मयि धेहि ॥

edho 'sy edhiṣīmahi | samid asi tejo 'si tejo mayi dhehi ||

Sanskrit only: no published translation is held for this verse.

यावती द्यावापृथिवी यावच् च सप्त सिन्धवो वितस्थिरे । तावन्तम् इन्द्र ते ग्रहमूर्जा गृह्णाम्य् अक्षितं मयि गृह्णाम्य् अक्षितम् ॥

yāvatī dyāvāpṛthivī yāvac ca sapta sindhavo vitasthire | tāvantam indra te grahamūrjā gṛhṇāmy akṣitaṃ mayi gṛhṇāmy akṣitam ||

Sanskrit only: no published translation is held for this verse.

मयि त्यद् इन्द्रियं बृहन् मयि दक्षो मयि क्रतुः । घर्मस् त्रिशुग् वि राजति विराजा ज्योतिषा सह ब्रह्मणा तेजसा सह ॥

mayi tyad indriyaṃ bṛhan mayi dakṣo mayi kratuḥ | gharmas triśug vi rājati virājā jyotiṣā saha brahmaṇā tejasā saha ||

Sanskrit only: no published translation is held for this verse.

पयसो रेत ऽ आभृतं तस्य दोहम् अशीमह्य् उत्तराम्-उत्तराꣳ समाम् । त्विषः संवृक् क्रत्वे दक्षस्य ते सुषुम्णस्य ते सुषुम्णाग्निहुतः । इन्द्रपीतस्य प्रजापतिभक्षितस्य मधुमत ऽ उपहूत ऽ उपहूतस्य भक्षयामि ॥

payaso reta ' ābhṛtaṃ tasya doham aśīmahy uttarām-uttarām̐ samām | tviṣaḥ saṃvṛk kratve dakṣasya te suṣumṇasya te suṣumṇāgnihutaḥ | indrapītasya prajāpatibhakṣitasya madhumata ' upahūta ' upahūtasya bhakṣayāmi ||

Sanskrit only: no published translation is held for this verse.